‘A Leza, Tuma Mwinya Obe’
‘A Leza, Tuma Mwinya Obe’
“Yō, talula mwinya obe ne bubinebine bobe; abyo binkunkuje.”—MITŌTO 43:3.
1. Yehova usokolanga mpango yandi namani?
YEHOVA uyukile kulangila bengidi bandi mu myanda itala kwibayukija mpango yandi. Pa kyaba kya kwibasokwela bubinebine bonso kipukwi, pamo bwa kike kisabana meso, aye wibapanga kitōkeji bityebitye. Lwendo lwetu mu kashinda ka būmi ludi pamo bwa lwa ñenda wenda kulampe. Ulanguka lubanga na bwē, ukimona bintu na kabumbudima. Ebiya dyuba pa kutamba kutunduka pyā, uno ñenda washilula kushalañanya bintu bidi nandi kubwipi. Ino bya kulampe ukibimona na kabumbudima. Dyuba pa kwenda kukanda, ñenda kamone ne bya kulampe bininge. Ne mwinya wa kumushipiditu upāna Leza nao mo monka. Witwivwanijanga bintu bityebitye pa kyaba pa kyaba. Yesu Kidishitu Mwanā Leza nandi wāpene kitōkeji kya kumushipiditu mu uno muswelo. Tubandaulei muswelo wāpēne Yehova kitōkeji ku bantu bandi, mu myaka ya kala, ne wapāna’kyo dyalelo.
2. Yehova wāsokwedile bantu ba mu myaka ya kumeso kwa bwine Kidishitu mwinya muswelo’ka?
2 Mobimwekela, bana ba Kola bo bālembele Mutōto wa 43. Byobādi bene Levi, bādi na madyese a kufundija bantu Bijila bya Leza. (Malaki 2:7) Inoko Yehova ye wādi wabo Mufundiji Mwine Mukatampe, Nsulo ya tunangu tonso kobādi banyemena. (Isaya 30:20) Mulembi wa mitōto wālombele amba: “Abe Leza, . . . talula mwinya obe ne bubinebine bobe; abyo binkunkuje.” (Mitōto 43:1, 3) Mafuku onso ādi akōkele bene Isalela kudi Yehova, nandi wādi wibafundija mashinda andi. Myaka tutwa pa kupita’po, Yehova wēbatōkelwa pa mutyima, wēbapa mwinya ne bubinebine mu muswelo mutabuke kunengela. Leza wēkilongele paātumine Mwanandi pano panshi.
3. Bayuda bātūdilwe namani pa ditompo na bufundiji bwa Yesu?
3 Yesu Kidishitu, Mwanā Leza, pa kwikala muntu, wādi ‘mwinya wa ntanda.’ (Yoano 8:12) Wāfundije bantu “bintu bivule bīne mu nkindi,”—bintu bipya. (Mako 4:2) Wālombola Pontyusa Pilato amba: ‘Bulopwe bwami ke bwa ino ntandapo.’ (Yoano 18:36) Uno wādi mulangwe mupya ku mwine Loma, ne ku Bayuda bene bādi bafwila muzo wabo, mwanda bādi balanga’mba Meshiasa ukāya kushinda Umbikalo wa bene Loma ne kwalwija Isalela ntumbo yandi ya kala. Yesu wādi ulombola mwinya utamba kudi Yehova, ino bendeji ba Bayuda kebādipo basangela kwivwana binenwa byandi, mwanda “badi basenswe kutumbikwa ntumbo ku bantu kudi Lezako patyetye.” (Yoano 12:42, 43) Bavule bātongele kulamata ku byabo bisela bya bantu, bāleka’ko kwitabija mwinya wa kumushipiditu ne bubinebine bwa kwa Leza.—Mitōto 43:3; Mateo 13:15.
4. Tuyukile muswelo’ka amba bana-babwanga ba Yesu bādi ba kutama mu kwivwanija?
4 Inoko kudi bana-balume ne bana-bakaji batyutyu ba mityima myoloke bāitabije na nsangaji bubinebine bwāfundije Yesu. Bāendelela na kutama mu kwabo kwivwanija mpango ya Leza. Nansha būmi bwa Mufundiji wabo pano panshi byobwādi kebulumba ku mfulo, bāendelele na kufunda bivule. Yesu wēbasapwidile amba: “Ngidi bidi na bikwabo byakwisamba nenu bivule bīne. Ino kemwibiyūkapo kwibīvwana panopano.” (Yoano 16:12) I amo, bana-babwanga bādi ba kwendelela na kutama mu kwivwanija bubinebine bwa Leza.
Mwinya ukiletanga kitōkeji
5. I mwanda’ka wālupukile mu myaka katwa imbajinji, ne i bāni bādi na kiselwa kya kupwija’o?
5 Yesu pa kufwa, kupwa wasangulwa, mwinya utamba kudi Leza wāletele kitōkeji kupita ne pabajinji. Mu kimonwa kyāpelwe Petelo, Yehova wāmusokwedile amba Bajentaila bampikwa kutwejibwa kwisao bakekala balondi ba Kidishitu. (Bilongwa 10:9-17) Bine, kuno kwādi kusokwelwa! Inoko, kipangujo kyobādi beipangula i kino: Lelo Yehova wādi usaka bano Bajentaila batwejibwe kwisao pa kupwa kwikala bene Kidishitu? Kino kipangujo kekyālondolwelwepo mu kimonwa, ino uno mwanda wālupwile lupotopoto lukatampe mu bene Kidishitu. Bādi bafwaninwe kwiupwija, shi bitupu, bumo bwabo bulēme bwādi bwa kusūpaila. Penepo ‘batumibwa ne bakulumpe babungakena pamo kushintulula uno mwanda’ mu Yelusalema.—Bilongwa 15:1, 2, 6.
6. I mwingidilo’ka wālondele batumibwa ne bakulumpe mu mwanda utala disao?
6 Lelo bano bātenwe ku kubungakana bādi ba kuyuka muswelo’ka kiswa-mutyima kya Leza pa Bajentaila bāitabije? Yehova kātuminepo mwikeulu wa kwiya kwimanina ino mīsambo, nansha kupāna kimonwa ku boba bādi’ko. Ino ke kunenapo amba batumibwa ne bakulumpe bābudilwe buludiki bo-bonso, mhm. Bābandawile bukamoni bwādi buleta bene Kidishitu bamobamo Bayuda bāmwene muswelo wāshilwile Leza kukwatakanya bantu ba mizo, upungulwila mushipiditu sandu wandi pa Bajentaila bampikwa kutwejibwa kwisao. Koku bakimba mu Bisonekwa bya kwibaludika. Ku mfulo, mwanā-bwanga Yakoba wāleta lubila lwimanine pa kisonekwa kya kuleta’po kitōkeji. Abo bapwa kulanguluka pa buno bukamoni, kiswa-mutyima kya Leza kyāmweka patōka. Kekyadipo kilomba’nka poso bantu ba mizo batwejibwe kwisao penepa kebetabijibwa na Yehova. Batumibwa ne bakulumpe kebāijijepo, bāsoneka butyibi bobākwete, bātumina’bo balunda nabo bene Kidishitu amba bumone kwibaludika.—Bilongwa 15:12-29; 16:4.
7. I muswelo’ka wāikele kwendelela kumeso bene Kidishitu ba mu myaka katwa imbajinji?
7 Bayuda bendeji ba bipwilo bādi balamete ku bisela bya bankambo babo. Ino bene Kidishitu Bayuda bavule abo bādi beshidile nabo, mwanda bāsangele pa kutambula kuno kwivwanija kupya kwa kutendelwa kwa mpango ya Leza ya kulēmeka bantu ba mizo, nansha byokyādi kibalomba kushinta mumweno obādi bamona Bajentaila bonso. Yehova wēbesela pa uno mushipiditu wabo wa kwityepeja, ne “bipwilo byonso byakankamana ne kukankamana monka mu lwitabijo, bantu ke benda bavulamo mafuku onso mo bukila, mo bukila.”—Bilongwa 15:31; 16:5.
8. (a) Tuyukile namani amba kupwa kwa myaka katwa imbajinji kwādi kwa kwikala mwinya mukatampe? (b) I bipangujo’ka bya mvubu byotusaka kubandaula?
8 Mwinya mukatampe wa kumushipiditu wāeñenye mu myaka katwa imbajinji yonso. Ino Yehova kāsokwedilepo bene Kidishitu babajinji bintu byonso bya mu mpango yandi. Mutumibwa Polo wāsapwidile balunda nandi mu lwitabijo ba mu myaka katwa imbajinji amba: “Pano tukitala bwa mu kitalo na kafi.” (1 Kodinda 13:12) Kino kitalo kyākidi kibumbudima. Ko kunena’mba dibajinji kwivwanija kwa mwinya wa kumushipiditu kwākidi kutyetye. Kupwa, batumibwa pa kufwa, mwinya nao wāshilula kutyepa mu myaka’ya, ino mu ino myaka yotwenda nayo, buyuki bwa Bisonekwa bubavula ke bungibungi. (Danyele 12:4) Lelo Yehova upanga bantu bandi ba mu ano mafuku kitōkeji namani? Ne i muswelo’ka otufwaninwe kwitaba ku kuno kwilundila’ko kwa kwivwanija kwetu kwa Bisonekwa?
Mwinya Wenda Ukamba Bityebitye
9. I mwifundilo’ka umo kete mufike’po wa kwifunda Bible wadi ulonda Befundi ba Bible babajinji?
9 Mu ino myaka, bitōkeji binebine bibajinji bya mwinya byashilwile kumweka ku mvuyo kwa myaka tutwa 19, paanzile kisumpi kya bene Kidishitu bana-balume ne bana-bakaji kwifunda Bisonekwa na kininga. Basokola mwifundilo muyampe wa kwifunda Bible. Bādi balonga namino: Muntu umo ulupula kipangujo; penepa kisumpi kyonso kekibandaula Bisonekwa byonso bikwatañene nakyo. Shi bano bene Kidishitu bakubulwa budimbidimbi abamone amba vese kampanda umweka bu upatanya binene vese kabidye, balonga bukomo bwa kukwatañanya mavese onso abidi. Befundi ba Bible (mwityilo wadi witwa Batumoni ba Yehova) badi beshile na bendeji ba mitōtelo ingi ba mu abo mafuku’a, mwanda badi basumininwe kuleka Bisonekwa Bikola bibaludike, kupita’ko kulonda bisela nansha mfundijo ya bantu. Shi abapu kubandaula bukamoni bonso bwa Bisonekwa bobatene, balemba myanda yonso yobakwata. Mu uno muswelo, kwivwanija kwa bufundiji buvule bwa Bible bwa kyalwilo kwashilula kutōkejibwa.
10. Charles Taze Russell wasonekele mabuku’ka adi ebakwasha pa kwifunda Bible?
10 Umo wadi utelwa bininge mu bano Befundi ba Bible i Charles Taze Russell. Wasonekele mabuku asamba adi ebakwasha pa kwifunda Bible adi atelwa bu Bwifundi bwa Bisonekwa, a mu Angele. Tutu Russell wadi na mulangwe wa kulemba dibuku dya busamba-bubidi, dya kushintulula mukanda wa Ezekyele ne wa Kusokwelwa. “Po-ponso ponkamona ñeni,” ye aye unena, “nkasoneka Dibuku dya Busamba-Bubidi.” Inoko wabweja’ko amba: “Shi Mfumwetu wape muntu mukwabo ino ñeni, nabya ye ukasoneka’dyo.”
11. I kukwatañana’ka kudi pa bukata bwa kitatyi ne kwivwanija kwa mpango ya Leza?
11 Bino binenwa biselele mulangwe wa mwingilo waendaenda byanene C. T. Russell bilombola kintu kampanda kya mvubu mu kwivwanija kwetu kwa bisonekwa bya mu Bible—kino kintu i kitatyi. Tutu Russell wayukile amba kabwanyapo kuningila mwinya ulete kitōkeji pa mukanda wa Kusokwelwa, pamo’nka bwa ñenda, kakokejapo kutonona dyuba ditambe kumeso kwa kitatyi kyoditambanga.
Bwenda Busokolwa—Ino mu Kitatyi Kitungilwe na Leza
12. (a) I kitatyi’ka kimvwanwanga bupolofeto bwa Bible senene? (b) I bifwa’ka bilombola amba ñeni yetu ya kwivwanija bupolofeto bwa Bible imanine pa kitatyi kya Leza? (Tala kunshi kwa dyani.)
12 Batumibwa bāivwanije bupolofeto buvule butala padi Meshiasa kunyuma kwa lufu ne lusangukilo lwa Yesu; ne bene Kidishitu ba dyalelo nabo mo monka, bevwanijanga bupolofeto bwa mu Bible kamo ne kamo enka shi bubapu kufikidila. (Luka 24:15, 27; Bilongwa 1:15-21; 4:26, 27) Mukanda wa Kusokwelwa i wa bupolofeto, nanshi tukokeja kwiwivwanija patōkelela enka shi binkumenkume bisonekelwe’mo bibamweka. Kifwa C. T. Russell kadipo mwa kwivwanijija biyampe buluji bwa kinyema kya kyelekejo kityilakana kitelelwe mu Kusokwelwa 17:9-11, mwanda malongolodi elekejibwe na kino kinyema, Kitango kya Mizo ne Kitango kya Bumo bwa Mizo, adi keaikele’ko kutūla ne mu myaka yaafwile. *
13. I bika bimwekanga kyaba kimo shi kudi mwanda kabidye wa mu Bible waletwa’po kitōkeji?
13 Bene Kidishitu babajinji pobāivwene amba Bajentaila bampikwa kutwela kwisao ke balunda nabo mu lwitabijo, byāletele kipangujo kikwabo kya kusaka kuyuka shi bano bantu ba mizo nabo bakokeja kutwejibwa kwisao. Uno mwanda wāfikija batumibwa ne bakulumpe ku kubandaula dipya mwanda utala disao onso mutuntulu. Kino kifwa kyo kyonka kilondwanga ne dyalelo. Wivwane kudi kitōkeji kya mwinya kisaka kuletwa pa mwanda kabidye wa mu Bible, bengidi bashingwe-māni ba Leza, babundile “umpika wabinebine ne wamanwa,” babandaulanga dipya myanda yonso ikwatañene nao, monka mwikilombwela kifwa kya panopano kidi kunshi’ki.—Mateo 24:45, NW.
14-16. Busenduludi bwa mumweno wetu wa tempelo ya kumushipiditu bwaikele kutenga namani mwivwanino wetu wa Ezekyele shapita wa 40 kutūla ku wa 48?
14 Mu 1971, bushintuludi bwa bupolofeto bwa Ezekyele bwalupwilwe mu dibuku “Les nations sauront que je suis Jéhovah”—Comment? Shapita umo mu dino dibuku wēsambile mu kīpi pa kimonwa kya Ezekyele kya tempelo. (Ezekyele, shapita 40-48) Mu kine kitatyi’kya, badi bakimba nakampata kuyuka muswelo ukafikidila kimonwa kya Ezekyele kya tempelo mu ntanda impya.—2 Petelo 3:13.
15 Ino bishinte bibidi byalupwilwe mu Kiteba kya Mulami kya difuku 1 Kweji 3, 1973, byaalamwine mwivwanino wetu wa kimonwa kya Ezekyele. Besambile’mo myanda ya tempelo mikatampe ya kumushipiditu itelelwe na Polo mu Bahebelu shapita 10. Kiteba kya Mulami kimo kyonka kyashintulula amba kadimbwa ka Kikola ne munda mwa kipango kya tempelo ya kumushipiditu i ngikadilo idi’mo bashingwe-māni pobakidi pano panshi. Pa kupituluka dikwabo mu Ezekyele shapita wa 40 kutūla ku wa 48, byamweka amba ino tempelo ya kumushipiditu byoikidi’ko dyalelo, nanshi tempelo yāmwene Ezekyele mu kimonwa ingilanga mu ano mafuku. I kika kinenenwa namino?
16 Mu kimonwa kya Ezekyele, babitobo i bamonwe bengila mu bipango bya tempelo mobengidila bisaka bikwabo byakubulwa butobo. Bano babitobo belekeja patōkelela “babitobo ba Mulopwe,” bengidi bashingwe-māni ba Yehova. (1 Petelo 2:9, MB) Inoko kebakengilapo mu bipango bya tempelo ya pano panshi mu Myaka Kanunu ya Umbikalo wa Kidishitu. (Kusokwelwa 20:4) Mu kitatyi kivule kya mine myaka’ya, pakwabo mu myaka yonso’ya, bano bashingwe-māni bakengidila Leza mu Kikola Nakampata kya tempelo ya kumushipiditu, “momwa mūlu.” (Bahebelu 9:24) Babitobo byobamwenwe bapitakana mu bipango bya tempelo yāmwene Ezekyele, nanshi kino kimonwa kifikidilanga mu ano etu mafuku motukidi na bashingwe-māni pano panshi. Pa kino, dipepala dya difuku 1 Kweji 3, 1999 dyaikele kusendulula mumweno wa bintu pa uno mwanda. Enka namino, mwinya wa kumushipiditu waleta kitōkeji pa bupolofeto bwa Ezekyele ku mvuyo kwa myaka tutwa 20.
Itabija Kusendulula Mumweno Obe
17. I busenduludi’ka bokodi musendulule mumweno obe tamba kasha wikala na buyuki bwa bubinebine, ne i bika byokodi mumwene’mo?
17 Muntu ye-yense usaka kwikala na buyuki bwa bubinebine ufwaninwe kwitabija “kuleta milangwe yonso, shi yaka, shi yaka, monka mu bupika bwa kikōkeji kya Kidishitu.” (2 Kodinda 10:5) Kino ke kintupo kipēla, nakampata shi o mumweno wa bintu otwibidile. Kifwa, kumeso kwa kufunda bubinebine bwa Leza, padi wadi usangela kusoba masobo a mafuku a mafetyi a bipwilo pamo na kisaka kyenu. Kupwa washilula kwifunda Bible, wamona amba ano masobo atambile ku Bajentaila. Padi wadi bidi wikaka pa kulonda bintu byowadi wifunda. Ino ku mfulo buswe bobe padi Leza bwatabuka mwididi owadi nao pa bimyanda bya bipwilo, ko kuleka waleka’byo kusoba bimasobo bifityija Leza mutyima. Mwene Yehova wakwesele pangala pa buno butyibi bobe?—Dingakanya na Bahebelu 11:25.
18. Tufwaninwe kwitaba muswelo’ka kitatyi kyotupebwa kitōkeji pa kwivwanija kwetu kwa bubinebine bwa Bible?
18 Batwe bonso tumwenanga’mo shi tubalonga bintu musakila Leza. (Isaya 48:17, 18) Nanshi shi mu mumweno wetu kudi kisonekwa kampanda kya mu Bible kyotwapebwa’po kitōkeji, tusangelei kwendelela kumeso mu bubinebine! Bine, kuno kwetu kwendelela na kupebwa bitōkeji kwitukulupija amba tudi mu dishinda dyoloke. Ko “kashinda ka boloke kadi pamo’nka bwa mwinya weñenya to-o, wenda ukamba kweñenya, ne kweñenya, kufika enka ne mubukata mwa dyuba.” (Nkindi 4:18) Eyo, pano tukimona bintu bimobimo bya mu mpango ya Leza “na kafi.” Ino kitatyi kya Leza pokikafika, wivwane maulu etu i memanije nshinkidingi mu “kashinda,” tukemwena bubinebine bonso mobuneñanine. Pano bidi tusepelelei bubinebine bwitulombola Yehova patōka, koku tutengele kupebwa kitōkeji pa bobwa boketwaivwanije patōkelela.
19. Lelo i muswelo’ka umo wa kulombola amba tuswele bubinebine?
19 I muswelo’ka otukokeja kulombola mu būmi bwetu amba tuswele mwinya? Muswelo umo i kutanga Kinenwa kya Leza kitatyi ne kitatyi—difuku ne difuku shi kibwanika. Lelo nobe ulondanga mpangiko yobe ya butangi bwa Bible kitatyi ne kitatyi? Mapepala Kiteba kya Mulami ne Amkeni! nao etupanga bidibwa bilumbuluke bya kumushipiditu bya ntanda ne miseke. Tanga ne mabuku, mikanda, ne bitabo bikwabo biteakanibwe pangala pa kamweno ketu. Lelo wabulwa’po kubandaula ne malapolo akankamika a mingilo ya busapudi bwa Bulopwe alupulwanga mu Kitabu-Mwaka cha Mashahidi wa Yehova?
20. I kukwatañana’ka kudi pa bukata bwa mwinya ne bubinebine butamba kudi Yehova ne kutanwa kwetu ku kupwila kwa bwine Kidishitu?
20 Bine, Yehova i mulondolole mu muswelo wa kutendelwa lulombelo lwa mu Mitōto 43:3. Tutanga ku mfulo kwa vese amba: “[Mwinya obe ne bubinebine bobe] bindete ku lūlu lobe lukola, ne ku mapema obe.” Lelo uloelelwe kutōta Yehova pamo na kibumbo kya bakwenu? Bufundiji bwa kumushipiditu bupānwanga ku kupwila kwetu o muswelo mwine mukatampe witupanga Yehova kitōkeji dyalelo. I bika byotufwaninwe kulonga tumone kusepelela bininge kupwila kwa bwine Kidishitu? Bandaula na kusumininwa uno mwanda mu kishinte kilonda’po.
[Kunshi kwa dyani]
^ C. T. Russell pa kufwa, kwateakanibwa dibuku dya busamba-bubidi dya Bwifundi bwa Bisonekwa (mu Angele) dyadi dileta bushintuludi pa mukanda wa Ezekyele ne wa Kusokwelwa. Dino dibuku dyadi dimanine pavule pa byanene Russell pa ino mikanda ya mu Bible. Inoko, kitatyi kya kusokola bushintuludi bwa buno bupolofeto kyadi kekyabwene, o mwanda bushintuludi buvule bwaletelwe mu dino dibuku dya Bwifundi bwa Bisonekwa bwadi bukibumbudima. Mu myaka yalondele’po, buntu bwa Yehova ne myanda ilongeka mu ino ntanda byapa bene Kidishitu muswelo wa kupotolola biyampe nshintulwilo myoloke ya buno bupolofeto.
Le Ubwanya Kulondolola?
• Mwanda waka Yehova witusokwelanga mpango yandi bityebitye?
• I muswelo’ka wāpwijije batumibwa ne bakulumpe ba mu Yelusalema mwanda wa disao?
• I mwifundilo’ka wa kwifunda Bible wadi ulonda befundi ba Bible babajinji, ne i kika kinenenwa amba wadi wa pa bula?
• Lombola muswelo witusokwelwanga mwinya wa kumushipiditu mu kitatyi kifwaninwe mungya musakila Leza.
[Bipangujo bya Kifundwa]
[Kifwatulo pa paje 10]
Charles Taze Russell wayukile amba mwinya ukaletanga kitōkeji pa mukanda wa Kusokwelwa mu kitatyi kifwaninwe kya Leza