Mwikadilo Wanwa Wendanga Oneka

“KASHĀ byabyo batwe ketwebimwene,” mo mwesambile Helmut Schmidt, mulungu mwine Alemanye. Wadi utompola pa budimbidimbi bwa mu meso fututu bwalongele balungu ba lupusa, bwasonekwa ne pangala pa majulunale. Ubweja’ko amba: “Misoñanya miyampe ya mu mwikadilo ibajimina pa mwanda wa lwiso.”

Bavule bakokeja kwitabija amba i munene byabine. Mwikadilo wanibwa ulombwelwe mu Bible, Kinenwa kya Leza, wādi ulondwa na bavule mu bula bwa myaka amba ko kalombwe ka kulombola biyampe ne bibi, pano ke mufutululwe. Kino i kimweke ne mu matanda atelelwa bwine Kidishitu bwa dijina bitupu.

Lelo Mwikadilo Ulombwelwe mu Bible Ukidi na Mvubu?

Mwikadilo ufundijibwa mu Bible utala ne pa kwikala mululame, wakubulwa budimbidimbi. Kudimba, kutyiba milomo, ne manyengenyenge bibasambakana konso. Julunale umo wa Londoni (The Times) unena’mba bampulushi bakwata bangivi “bo abo banyoñomonanga kubwipi kwa mfalanga 100 000 ya bene Angeletele ku lwendo lumo, mwanda wa kwaluja dyamba nansha kufya myanda ya boba bakuma myanda ya munshimunshi.” Kadi bantu banenanga’mba mu Otrishe, manyengenyenge o ke mwanda wa bukile bukya. Mu Alemanye namo bantu balonda myanda ya sianse batapilwe ku mityima mpata pasokwele bakimbi “myanda ya manyengenyenge a mwiko mu sianse ya Alemanye.” Polofesele, “mutumbe umbukata mwa befundi ba nsange bene Alemanye,” watopekelwe amba wadi ushinta ne kulemba bibalwa bya bubela bivulevule.

 Mwikadilo ulombwelwe mu Bible utala kadi ne pa kwilamata mu busongi, kwikala mu kipwano kya mpwaninine na mwine pobe. Ino yō, masongi afula ku bidye bya kukimba kwilubula endanga avudila’ko. Dipepala dimo dya bene Katolika (Christ in der Gegenwart) dinena’mba “nansha ke mu Suise ‘mobalamine bibidiji bya kala,’ namo masongi mavulevule apomokanga’mo.” Mu Pays-Bas, masongi 33 pa katwa afulanga ku dilubu. Lolo umo wajingulwile mwashintyile mwikadilo mu Alemanye mu myaka mityetye yapityile’i, wafula ku kusoneka’mba: “Busongi dyalelo ke budi pamo bwa kintu kya kala, kityelewe. Bantu kebakisongelangapo kushikata lonso.”

Ino kudi midiyo ne midiyo ya bantu bamwene amba mwikadilo muyampe obefunda mu Bible i ukulupilwa kadi wa mvubu mu būmi bwa dyalelo. Ba mulume ne mukaji bashikatanga ku mukalañano wa Suise ne Alemanye bajingulwile amba kwikala na būmi bukwatañene na mwikadilo ulombwelwe mu Bible kyo kintu kyebapele nsangaji mikatampe mpata. Ku wabo mutamba, “kudi’nka kalombwe kamo kete mu myanda yonsololo ya umbūmi. Kano kalombwe i Bible.”

Le nobe ulanga’po namani? Lelo Bible ukokeja kwikala kalombwe ka kukulombola myanda ya mvubu? Lelo mwikadilo ulombwelwe mu Bible ukidi na mvubu dyalelo?