Bene Kidishitu Badi na Nsangaji mu Mingilo

“Dyese [“nsangaji,” NW] dya kupana ditabukile dya kupebwa.”​—BILONGWA 20:35.

1. I ngikadilo’ka mityani isambakene konso konso dyalelo, ne mwanda waka ke miyampepo?

 UMBULA mwa myaka makumi ya mfulo ya 1900, mwamwekele mushipiditu wa “kami-kami” mu bintu bivule. Kino kishima “kami-kami” kishintulula’mba “ami bidi,” kadi kiselele mulangwe wa mwino ne lwiso bityange pamo na ngikadilo ya kuleka kulangila bakwabo. Kunena na bubine, uno mushipiditu wa kami-kami keujiminepo ne mu uno mwaka wa 2000 mwine. Bine, kubudilwepo kwivwana bantu bepangula divule amba, “Kyami’mo papo i kyepi?” nansha’mba, “Le kyonkamwena’mo nami i kika?” Ngikadilo ya mwino ya uno muswelo keiletangapo nsangaji. I mishile kulampe na musoñanya wāletele Yesu, unena’mba: “Dyese [“nsangaji,” NW] dya kupana ditabukile dya kupebwa.”​—Bilongwa 20:35.

2. I kika kinenenwa amba bine kupāna kuletanga nsangaji?

² Lelo bine kupāna kuletanga nsangaji mikatampe kupita’ko kupebwa? Eyo, kuletanga’yo. Pa kino, ela bidi milangwe kudi Yehova Leza. “Nsulo ya būmi” idi kwadi. (Mitōto 36:9) I aye witupele byonso bitusakila mwa kwikadila na nsangaji ne maloa. Bine, aye ye Nsulo ya “byonso byakupanwa bilumbuluke, ne byabuntu bibwane.” (Yakoba 1:17) Yehova, “Leza wa nsangaji,” upānanga bya kupāna nyeke. (1 Temote 1:11, NW) Uswele bantu, bipangwa byandi, o mwanda wibapele bivule. (Yoano 3:16) Shi ke pano ela milangwe kudi bantu nako. Shi wi mbutwile, uyukile amba kutamija mwana kulomba kwisuminwa bivule ne kupāna bivule. Mu myaka mivule mwana kayukangapo byonso byomulongela. Kebikwatapo na mutyika mukatampe. Inoko abe usangalanga pa kumona obe mwana wenda utama biyampe pangala pa bintu byonso byomulongela pampikwa kakama. Mwanda waka usangalanga? Mwanda umuswele.

3. Mwanda waka kwingidila Yehova ne banabetu betabije kuletanga nsangaji?

³ Ne mutōtelo wabine nao mo monka, uyukenanga ku kupāna koupāna bintu na buswe. Byotuswele Yehova ne banabetu betabije, tudi na nsangaji ya kwibengidila ne kwipānina pangala pabo. (Mateo 22:37-39) Muntu yense utōta aye koku na mwino ku mutyima, kakekalapo na nsangaji mivule. Ino boba bengila pambulwa mwino, batele mutyima mpata ku byobakokeja kupāna kutabuka’ko ku byobasaka kupebwa, bine bakamona nsangaji. Buno bubinebine bukamweka patōka shi tubandaule muswelo wingidijibwe mu Bisonekwa bishima bimobimo bikwatañene na butōtyi bwetu. Mu bino bishima, tukayata’mo bisatu kete byotusa kwisambila’po mu kino kishinte ne mu kikwabo kilonda’ko.

Mwingilo wa Yesu wa Kukwasha Bantu

4. Lelo “mwingilo wa kukwasha bantu” wingilwa mu Bipwilo bya Ki-kidishitu i mwingilo wa muswelo’ka?

⁴ Mu Kingidiki kya kala, kishima kimo kya mvubu  kikwatañene na butōtyi bwetu i lei·tour·giʹa, kyalamwinwe mu Bwalamuni bwa Ntanda Impya bu “mwingilo wa kukwasha bantu.” Mu Bipwilo bya Ki-kidishitu, ku kishima lei·tour·giʹa ko kulupwilwe kishima kya mu Falanse “la liturgie.” * Ino kunena na bubine, mwingilo obatela bu wa kukwasha bantu mu Bipwilo bya Ki-kidishitu ke mwingilopo umwena’mo bantu bonso.

5, 6. (a) Mwingilo wa kukwasha bantu wādi wingilwa mu Isalela i mwingilo’ka, ne wādi na byabuyabuya’ka? (b) I mwingilo’ka mukatampe wa kukwasha bantu wāpingakenine owa wādi wingilwa mu Isalela, ne mwanda waka?

⁵ Mutumibwa Polo wingidije kishima kya Kingidiki kiifwene na lei·tour·giʹa pa kwisambila pa babitobo ba mu Isalela. Wānene amba: “[Babitobo] bonso i binebine bēmananga nyeke, mo bukila, mo bukila, kwingila [muswelo wa lei·tour·giʹa] ne kwela dingidingi bitapwa bimo byonka.” (Bahebelu 10:11) Babitobo bene Levi bādi bengidila Isalela mwingilo wa mvubu mpata wa kukwasha bantu. Bādi bafundija Bijila bya Leza, bela ne bitapwa bya kupūta bubi bwa bantu. (2 Bilongwa 15:3; Malaki 2:7) Muzo onso wādi usangala pādi palonda babitobo ne bantu Bijila bya Yehova, bine wādi na buluji bwa kusangela.​—Kupituluka 16:15.

⁶ Kwingila mwingilo wa kukwasha bantu mu myaka yādi ilondwa Bijila ādi madyese makatampe ku babitobo bene Isalela, ino mwingilo wabo wāpwile mvubu pāpelelwe Isalela pangala pa kubulwa kikōkeji kwandi. (Mateo 21:43) Inoko Yehova wākwete mpangiko ya kutūla’ko kintu kya mvubu mikatampe mpata​—mwingilo wa kukwasha bantu wādi wingila Yesu, Kitobo Mukatampe kutabuka. Tutanga pa mwanda wandi amba: “Aye uno pa mwanda wa pa kwikala nyeke ne nyeke udi ne [butobo] bwampikwa umupingakana’bo. E ponka pa mwanda mwine mwine pano pāyūkile kwibapandijija mafuku onso nyeke boba bafwena kudi Leza [kupityila kudi] aye; mwanda aye i wa būmi bwa nyeke na nyeke wakwibasengela.”​—Bahebelu 7:24, 25.

7. Mwanda waka mwingilo wa Yesu wa kukwasha bantu i mulete byabuyabuya biyampe kutabuka?

⁷ Yesu i kitobo, kadi ukekala nyeke kitobo pambulwa umupingakena. Nanshi aye ye ubwanya kupandija bantu lonsololo. Wingilanga mwingilo wa kukwasha bantu keudingakanibwapo na wa bantu bakwabo, kadi kewingidilangapo mu tempelo ishimikilwe ku makasa a bantu, mhm, i mu tempelo ya kyelekejo, mpangiko mikatampe ya Yehova ya butōtyi yāshilwile kwingila tamba mu 29 K.K. Yesu pano wingilanga mu Kikola Nakampata kya ino tempelo, ke mūlu kadi. I “mwingidi [wa kukwasha bantu, lei·tour·gosʹ] wa bintu bikola ne wa kipema-kyakikalo kilumbuluke kyāpopele Mfumwetu [Yehova], kekumuntupo, ehe.” (Bahebelu 8:2; 9:11, 12) Yesu i ‘mwingidi wa kukwasha bantu’ nansha byadi na kitenta kikatampe namino. Wingidijanga kitenta kyandi kikata mwanda wa kupāna, ke mwandapo wa kusompola, mhm. Kadi kupāna kwapāna kumuletelanga nsangaji ibadilwa mu “nsangaji yadi imutudilwe kumeso,” yādi imukankamika ekale kūminina mu būmi bwandi bonso bwa pano panshi.​—Bahebelu 12:2, MB.

8. I mwingilo’ka wa kukwasha bantu wāingile Yesu wāpingakenine pa kipwano kya Bijila?

⁸ Mwingilo wa kukwasha bantu wa Yesu utala ne pa kintu kikwabo. Polo wāsonekele amba: “Yesu utwikilwe [mwingilo wa kukwasha bantu u]tabukile yabo mwanda i nsenga wa kipwano kitabukile kunengela, kishimikilwe pa milao itabukile kunengela.” (Bahebelu 8:6, MB) Mosesa wādi nsenga wa kipwano kyāsambile bene Isalela na Yehova. (Divilu 19:4, 5) Yesu nandi i nsenga wa kipwano kipya, kilengeje kubutulwa kwa muzo mupya, “Isalela wa Leza,” ubundilwe na bene Kidishitu bashingwe-māni batambile mu mizo mivule. (Ngalatea 6:16, MB; Bahebelu 8:8, 13; Kusokwelwa 5:9, 10) Bine, uno o mwingilo wa kukwasha bantu mulumbuluke kashā! I bine tudi na nsangaji mpata pa kuyuka Yesu, mwingidi wa kukwasha bantu, mwanda i kupityila kudi aye kotukokeja kutōta Yehova butōtyi bwaitabije!​—Yoano 14:6.

Bene Kidishitu Nabo Bengilanga Mwingilo wa Kukwasha Bantu

9, 10. Le i mingilo’ka imoimo ya kukwasha bantu ingila bene Kidishitu?

⁹ Kekudipo muntu wingila mwingilo wa kukwasha bantu muzunzulwe muzunzwidilwe wa Yesu. Inoko papalwanga bene Kidishitu bashingwe-māni mpalo yabo ya mūlu, bashikatanga kubwipi na Yesu ne kwingila nandi pamo mwingilo wa kukwasha bantu bu balopwe ne babitobo ba mūlu. (Kusokwelwa 20:6; 22:1-5) Bene Kidishitu pano pa ntanda nabo bengilanga mwingilo wa kukwasha bantu,  kadi bamwenanga’mo nsangaji mikatampe mpata. Kifwa, pāponene kipupo kya nzala mu Paleshitina, mutumibwa Polo wāselele mukongo wa banababo ba mu Bulaya wākakwasha nao bene Kidishitu Bayuda ba mu Yudea. Uno wādi mwingilo wa kukwasha bantu. (Loma 15:27; 2 Kodinda 9:12) Ne dyalelo nadyo mo monka, bene Kidishitu badi na nsangaji ya kwingila mwingilo wa uno muswelo, bakwashanga banababo badi mu masusu, ne baponenwa na bimpengele bya ntanda ne binzengele bikwabo.​—Nkindi 14:21.

¹⁰ Polo wēsambile pa mwingilo mukwabo wa kukwasha bantu pa kusoneka’mba: “I binebine, shi mwangwe bu-mema pa kitapwe ne [mwingilo wa kukwasha bantu wa] kwitabija kwenu, nankyo nsepa ne kusepelela na bānwe bonso kumo.” (Fidipai 2:17) Mwingilo wa kupampa byanga wāingile Polo pangala pa bene Fidipai wādi mwingilo wa kukwasha bantu wingilwe na buswe ne na kininga. Mwingilo wa kukwasha bantu wa uno muswelo wingilwanga ne dyalelo, nakampata na bene Kidishitu bashingwe-māni bengila bu “umpika wabinebine ne wamanwa” upāna bidibwa bya ku mushipiditu pa kitatyi kifwaninwe. (Mateo 24:45-47, NW) Ne kadi abo bonso kikonge i babunde ‘butobo bwa buujila,’ bupelwe mwingilo wa “kwela bitapwa bya mushipiditu, bya kwitabijibwa na Leza [kupityila] kudi Yesu Kidishitu” amba “[ba]sapule byobya byabuya byandi bitabukilemo kunengela aye we[be]tyile mu fukutu ku mwinya wandi wakutendelwa.” (1 Petelo 2:5, 9) Bine, bano bantu basangedile ano madyese mwādi musangedile’o Polo, kadi nabo ‘bemwañanga bwa mema’ pa kuvuija biselwa byabo. Bapwani nabo, “mikōko mikwabo,” nabo belungile kobadi ne kwibakwasha mu mwingilo wa kusapwila bantu myanda itala padi Yehova ne pa mpango yandi. * (Yoano 10:16; Mateo 24:14) Bine, uno o mwingilo wa kukwasha bantu mukatampe mpata, kadi uleta nsangaji!—Mitōto 107:21, 22.

Kwingila Mingilo Ikola

11. Ana, mupolofeto mukaji, wāshidile bene Kidishitu bonso kifwa’ka kiyampe?

¹¹ Kishima kikwabo kikwatañene na butōtyi bwetu i la·treiʹa, kyalamwinwe bu “mingilo ikola” mu Bwalamuni bwa Ntanda Impya. Mingilo ikola imanine pa bilongwa bya butōtyi. Kifwa Ana, mupolofeto mukaji wa kishala wa myaka 84, utelwa bu muntu ‘kādipo ubulwa kutanwa mu tempelo, wingila mingilo ikola [kishima kya Kingidiki kityibila ku la·treiʹa] bufuku ne mwinya na kujila nzala ne milombelo ponka.’ (Luka 2:36, 37) Ana wādi utōta Yehova kitatyi ne kitatyi. I kifwa kilumbuluke ku batwe bonso​—ku bakulu ne banuke, ku bana-balume ne bana-bakaji bene. Ana wādi ulombela kudi Yehova na mutyima umo ne kumutōta kitatyi ne kitatyi ku tempelo. Ne mu mingilo yetu ikola namo mo monka, mudi kulombela ne kutanwa ku kupwila.​—Loma 12:12; Bahebelu 10:24, 25.

12. I kintu’ka kikatampe mu mingilo yetu ikola yotwingila, ne nakyo kitelwa namani bu mwingilo wa kukwasha bantu?

¹² Mutumibwa Polo wātelele kintu kikatampe mu mingilo yetu ikola pa kusoneka’mba: “Ke-muntu Leza i kamoni kami, o ñingidila [mingilo ikola] umushipiditu wami mu myanda-miyampe ya Mwana wandi, byo nkishikilwangapo kwimutela mu milombelo yami nyeke ne nyeke.” (Loma 1:9) I bine, busapudi bwa myanda miyampe i mingilo ikola ku boba bemvwana’yo, ino ke enkapo mingilo ikola kete, mhm, kadi i kilongwa kya butōtyi bwa kutōta Yehova Leza. Tutane nansha ketutene bantu betwivwana, busapudi i mingilo ikola yotwingidila Yehova. Buninge botulonga pa kulombola bakwetu ngikadilo miyampe ya Tata wetu muswe wa mūlu, pamo ne mpango yandi ya kamweno, bwituletelanga nsangaji mikatampe.​—Mitōto 71:23.

 I Kwepi Kotwingidila Leza Mingilo Ikola?

13. I lukulupilo’ka ludi na boba bengila mingilo ikola munda mwa kipango kya mu tempelo ya Yehova ya ku mushipiditu, ne i bāni basangala nabo pamo?

¹³ Polo wāsonekele pangala pa bene Kidishitu bashingwe-māni amba: “Pa kutambula bulopwe bwampikwa kuyūka kutenkana, twikale ne buntu bwa kumwingidila Leza mīngilo [ikola] ya kumuloeleja ku mutyima, ne ya kwakamwa kwa Leza, ne luzakalo ponka.” (Bahebelu 12:28) Bashingwe-māni batengele na kikulupiji kupyana Bulopwe, o mwanda batōtanga Mwine Mukatakata Mwine na lwitabijo lwakubulwa kutelententa. Inoko bakingidila bidi Yehova mingilo ikola mu kifuko Kikola ne mu kipango kya munda mwa tempelo yandi ya ku mushipiditu, koku batengele na kipyupyu kukamwingidila pamo na Yesu mu Kikola Nakampata, ke mūlu mwine kadi. Bapwani nabo, kabumbo ka mikōko mikwabo, basepelelanga pangala pa lukulupilo lwabo lwa kutendelwa.​—Bahebelu 6:19, 20; 10:19-22.

14. Kibumbo kikatampe kimwenanga namani mu mwingilo wa Yesu wa kukwasha bantu?

¹⁴ Lelo i kwepi kwingidila mikōko mikwabo? Monka mwēkimwenine mutumibwa Yoano, kibumbo kikatampe kya ino mikōko mikwabo i kimweke mu ano mafuku a ku mfulo, i bantu bakendeje “bivwalwa byabo ne kwibitōkeja, tō, mu mashi a Kāna-ka-mukōko.” (Kusokwelwa 7:14) Ko kushintulula amba, pamo’nka bwa batōtyi nabo bashingwe-māni, nabo bakulupile mu mwingilo wa kukwasha bantu wingile Yesu, wa kwelela bantu kitapwa kya būmi bwandi bwa bu muntu mubwaninine. Bonso babadilwa mu mikōko mikwabo bamwenanga mu mwingilo wa Yesu wa kukwasha bantu, ke-pantu ‘balamete ku kipwano kya Yehova.’ (Isaya 56:6) Eyo, abo kebadipo umbukata mwa basambile kipwano kipya, ino balamete’ko mwanda bakōkele ku bijila bitala pa kino kipwano ne kumwena biyampe mu mpangiko yakyo. Belungile na Isalela wa Leza, badya ku meza amo a ku mushipiditu, bengila pamo nabo, batendela Leza ku meso a bantu bonso ne kwela bitapwa bya ku mushipiditu bimusangaja.​—Bahebelu 13:15.

15. I kwepi kwingidila kibumbo kikatampe mingilo ikola, ne kino kibaletelanga bika?

¹⁵ Ino ba mu kibumbo kikatampe i bamonwe  “bēmene mu kifuko kya lupona, ne kya Kāna-ka-mukōko, bavwele bivwalwa bitōka.” Kadi ‘badi ku meso a lupona lwa Leza; bamwingidila mingilo ikola mwinya ne bufuku mu tempelo yandi; ne Yewa ushikete pa lupona ukebapūta dipema dyandi.’ (Kusokwelwa 7:9, 15) Mu Isalela wa kala, bantu bētūtyile mu mutōtelo wa Bayuda bādi batōtela mu kipango kya panja kya tempelo ya Solomone. Ne kibumbo kikatampe nakyo monka na monka, kitōtelanga Yehova mu kipango kya panja kya tempelo ya ku mushipiditu. Kwingidila kobengidila mu kino kipango kwibapanga kuloelelwa kukatampe. (Mitōto 122:1) Nansha pakatambula wa mfulo wa mu bapwani nabo bashingwe-māni kipyanwa kya mūlu, abo bakendelela nyeke na kwingidila Yehova mingilo ikola bu bantu bandi.​—Kusokwelwa 21:3.

Mingilo Ikola Yampikwa Kwitabijibwa

16. I bidyumu’ka byotudyumwinwe pangala pa mingilo ikola?

¹⁶ Mu myaka ya Isalela wa kala, mingilo ikola yādi inenwe kwingilwa mwendele bijila bya Yehova. (Divilu 30:9; Levi 10:1, 2) Ne dyalelo nadyo mo monka, kudi bisakibwa bilombwa kulama shi tusaka mingilo yetu ikola itabijibwe na Yehova. O mwanda Polo wātumīne bene Kolose mukanda’mba: “[Ketushikilwangapo], kushilwila konka ku dyodya difuku dyo twaivwene, kwimulombela ne kusaka’mba, muyūle kuyūkidila konso kwa muswidile mutyima wandi mu [tunangu tonso ne kwivwanija kwa ku] mushipiditu, ne mu manwa a kuyūkidila, ne kunanga mwakufwaninwa Mfumwetu, mwakumutōkejeja ku mutyima tō; ne kupa bipa bya mu mīngilo yonso milumbuluke, ne kwenda mwenda muvudilwa ñeni ya kuyūka Leza.” (Kolose 1:9, 10) Ke batwepo ba kwitongela muswelo mulumbuluke wa kutōta Leza, mhm. Ino buyuki bwabinebine bwa Bisonekwa, kwivwanija kwa ku mushipiditu, ne tunangu twa bwine Leza byo bisakibwa. Shi bitupu, bintu byonso bikoneka onekē.

17. (a) Mingilo ikola yānyengakanibwe namani mu mafuku a Mosesa? (b) Dyalelo nadyo mingilo ikola ikokeja kunyengakanibwa namani?

¹⁷ Vuluka kyāfikile bene Isalela mu mafuku a Mosesa. Tutanga’mba: “Leza w[eb]avundaminako webapana ke bēngidila bibumbo bya mūlu mīngilo [ikola].” (Bilongwa 7:42) Bano bene Isalela bēmwenine bilongwa bya nkuo byēbalongēle Yehova. Ino bādi bavundamukila ku bilezaleza ne kufwatakanya’mba bakamwena’ko byabuyabuya. Ponka’po, bābulwa dikōkeji, adyo nadyo dyo disakibwa pa kunena’mba mingilo yetu ikola isangaje Leza. (Mitōto 18:25) Eyo, dyalelo ke bavulepo babwanya kuvundamina Yehova kebatōta ñenyenye nansha bañombe ba nsahabu, ino kudi miswelo mikwabo ya kutōta bilezaleza. Yesu wādyumwine bantu baleke kwingidila “lupeto.” Polo nandi wātela kwabila bu kutōta bankishi. (Mateo 6:24; Kolose 3:5) Pakwabo kadi Satana wilombolanga aye mwine bu leza. (2 Kodinda 4:4) Ino miswelo pala pala ya kutōta bilezaleza idi konso, kadi i dikinga dite. Langa’po bidi, shi muntu witela bu mulondi wa Yesu ino aye koku na bitungo bya kwikala mpeta umbūmi,  nansha wikulupile aye mwine ne kulonda’nka milangwe yandi, lelo mwine waingidila papo i ani? Mwene i kutupu paeshidile na Bayuda ba mu mafuku a Isaya bādi batyipa mu dijina dya Yehova inoko bilongwa bya kutendelwa byaādi ulonga batelela’byo bankishi ba munyanji?​—Isaya 48:1, 5.

18. I muswelo’ka mufwe wāingilwe mingilo ikola pa kala ne oingilwa mu ano mafuku?

¹⁸ Yesu wādyumwine monka’mba: “Kukaibwanga kudi wakwimwipaya ino aye ukēsambanga’mba: I mīngilo [ikola] ya Leza īno yo ñingila.” (Yoano 16:2) Padi Solo, wāikele ke mutumibwa Polo, nandi wādi ulanga amba waingidila Leza ‘pa kwitabija Shitevani epaibwe’ ne ‘pa kulondalonda ne kutapa bana-babwanga ba Mfumwetu.’ (Bilongwa 8:1; 9:1) Ne dyalelo nadyo mo monka, bantu bamo bepayañananga mu mikubo ya kukolopa tubila, ne mu kwitapa kwa bana na bana, ino abo betela’nka bu batōtyi ba Leza. Kudi bantu bavule betela bu batōtyi ba Leza, ino mutōtelo wabo na bubine i wa baleza ba kufwila muzo, kufwila tubila, bupeta, kwisakila, ne bilezaleza bikwabo.

19. (a) Lelo tumwene namani mingilo yetu ikola? (b) I mingilo’ka ikola iketuletela nsangaji?

¹⁹ Yesu wānene amba: “Ukafukatyila kutōta’nka Yehova Leza obe. E yenka ōkēngidila mīngilo [ikola].” (Mateo 4:10) Pano Yesu wādi unena Satana, ino batwe bonso tufwaninwe kulama bino binenwa byaānene! Kwingidila Mfumwetu Mulopwe wa umbuo wa diulu ne ntanda mingilo ikola i dyese dikatampe mpata dyotufwaninwe kuzakela. Le mwingilo wetu wa kukwasha bantu otwingila mungya butōtyi bwetu nao udi namani? Kwingidila bantu netu uno mwingilo kyo kintu kya nsangaji kitupa kuloelelwa kukatampe. (Mitōto 41:1, 2; 59:16) Ino uno mwingilo uketupa nsangaji yabinebine enka shi twingila’o na mutyima wetu onso, mu muswelo mufwaninwe. Shi ke pano, lelo bine i bāni batōtanga Yehova Leza mwasakila? I bāni bamwingidila mingilo ikola yaitabije? Tukalondolola bino bipangujo enka shi tubapu kubandaula kishima kya busatu kya mu Bible kikwatañene na butōtyi bwetu. Tukabandaula’kyo mu kishinte kilonda’ko.

[Kunshi kwa dyani]

Usa Kulondolola Namani?

• I mwingilo’ka mukatampe wa kukwasha bantu wāingile Yesu?

• I mwingilo’ka wa kukwasha bantu wingila bene Kidishitu dyalelo?

• Mingilo ikola ya mwine Kidishitu i mingilo’ka, ne i kwepi kwaingidila’yo?

• I bika byotufwaninwe kulonga pa kusaka’mba mingilo yetu ikola isangaje Leza?

[Bipangujo bya Kifundwa]

[Kifwatulo pa paje 8]

Bambutwile bekalanga na nsangaji mikatampe mu kupāna

[Bifwatulo pa paje 11]

Bene Kidishitu bengilanga mwingilo wa kukwasha bantu na kwibapa bukwashi ne na kwibasapwila myanda miyampe

[Kifwatulo pa paje 12]

Tufwaninwe kwikala na buyuki bwabinebine ne kwivwanija pa kusaka mingilo yetu ikola itabijibwe na Leza