Bengidi ba Leza ba Dyalelo—Lelo I Bāni?

“Kubwanya kwetu i kwa kudi Leza; wakwitubwaninya ke tudi bengidi ba kipwano kipya.”​—2 KODINDA 3:5, 6.

1, 2. I kiselwa’ka kyādi na bene Kidishitu bonso mu myaka katwa imbajinji, ino bintu byāalamukile namani?

 MU MYAKA katwa imbajinji ya mu kino Kyetu Kitatyi, bene Kidishitu bonso bādi na kiselwa kya mvubu mpata​—kya kusapula myanda miyampe. Abo bonso bādi bashingwe-māni, bengidi ba kipwano kipya. Bamo umbukata mwabo bādi na biselwa bya ntentekelo mu kipwilo, kifwa kiselwa kya kufundija. (1 Kodinda 12:27-29; Efisesa 4:11) Bambutwile nabo bādi na biselwa bilēma bya kuvuija mu kisaka. (Kolose 3:18-21) Ino abo bonso bādi na mwingilo mwine mukatampe ne wa kamweno, mwingilo wa busapudi. Mu Kingidiki kibajinjibajinji kya mu Bisonekwa bya bwine Kidishitu, kino kiselwa kyādi kitelwa bu di·a·ko·niʹa​—mwingilo nansha bwingidi.​—Kolose 4:17.

² Ino mwenda myaka bintu byāalamuka. Kwābundwa kabumbo katelwa bu ka bendeji [le clergé], kepa ako kene kiselwa kya kusapula. (Bilongwa 20:30) Bano bendeji bādi bantu batyetye mpata ba mu boba bētela abo bene bu bene Kidishitu. Ino bavule i boba baityilwe mwenda mafuku bu bana ba kipwilo [les laïcs]. Bano bana ba kipwilo balombolwanga amba nabo badi na biselwa kampanda bya kuvuija, kifwa kutūla bya mulambu bya kukwatakanya nabyo bendeji, ino bavule bāfulanga ku kwikala bemvwaniki bitupu ba busapudi, abo bene kusapula mpika.

3, 4. (a) I muswelo’ka wikalanga bantu ke bengidi mu Bipwilo bya Ki-kidishitu? (b) I bāni batelwa bu bengidi mu Bipwilo bya Ki-kidishitu, ne mwanda waka kekidipo uno muswelo umbukata mwa Batumoni ba Yehova?

 ³ Bendeji bētelanga bu bengidi (mu Kilateni di·aʹko·nos, “mwingidi”). * O mwanda bapebwanga mapolome ku inivelesite nansha ku maseminele ne kutombolwa pa mulongo. Dibuku dimo (The International Standard Bible Encyclopedia) dinena’mba: “ ‘Kutombola’ ne ‘kutombolwa’ kufunkila nakampata pa kyepelo kya pa bula kipelwe bengidi nansha bamupe kupityila ku bisela biyukane kala, bimanine ne pa kwibatwika lupusa lwa kusapula Kinenwa nansha lwa kupāna sakramenta, pakwabo lwa kulonga byonso bibidi.” Lelo i ani utombolanga bano bengidi? Dibuku dikwabo (The New Encyclopædia Britannica) dinena’mba: “Mu bipwilo bilamine kitenta kya bu eveke bwa kala, eveke ye unenwe kutombola bengidi. Ino mu bipwilo bya Mishoni, kutombola i kiselwa kya bengidi ba bakulumpe pa kipwilo.”

⁴ Bine, mu Bipwilo bya Ki-kidishitu, madyese a kwikala mwingidi ke a bonsopo. Ino kekidipo uno muswelo umbukata mwa Batumoni ba Yehova. Mwanda waka? Mwanda kekyādipo namino ne mu kipwilo kya bwine Kidishitu kya mu myaka katwa imbajinji.

Lelo Bengidi ba Leza Bene I Bāni?

5. Kukwatañana na Bible, i bāni babadilwa mu boba bengila bu bengidi?

⁵ Kukwatañana na Bible, batōtyi ba Yehova​—ba mūlu ne ba pano panshi​—bonso i bengidi. Bamwikeulu bādi bengidila Yesu. (Mateo 4:11; 26:53; Luka 22:43) Kadi ‘bengidilanga boba basa kupyana lupandilo.’ (Bahebelu 1:14; Mateo 18:10) Yesu nandi wādi mwingidi. Wānene amba: “Monka mwaīdile Mwanā muntu, aye kaīdile’mba ēngidilwe mīngilo, mhm poso’mba ayeko ēbēngidile.” (Mateo 20:28; Loma 15:8) Balondi ba Yesu byobafwaninwe “kumulonda . . . mu māyo andi,” nanshi ke kya kutulumukapo pa kuyuka amba nabo bafwaninwe kwikala bengidi.​—1 Petelo 2:21.

6. Yesu wālombwele namani amba bandi bana-babwanga bafwaninwe kwikala bengidi?

⁶ Yesu wānene bandi bana-babwanga kumeso kwa kukanda mūlu amba: “Endai . . . mukafundijei mizo yonso ya bantu nabo ke bāna-babwanga, kwibabatyija mu dijina dya Tata, ne dya Mwana, ne dya [m]ushipiditu [s]andu. Kadi ne kwibalombola balaminine byonso byo nemulaīle ami mwine.” (Mateo 28:19, 20) Bana-babwanga ba Yesu bādi banenwe kulonga bana-babwanga bakwabo​—nanshi nabo bādi bengidi. Bana-babwanga bapya nabo bādi bafwaninwe kulama bintu byonso byālaile Yesu, kubadila’mo ne musoñanya wa kwenda kukalonga bana-babwanga. Ko kunena’mba mwana-mulume, mwana-mukaji, mutame ne mwanuke, shi i mwanā-bwanga wabine wa Yesu Kidishitu, ufwaninwe’nka kwikala mwingidi.​—Yoela 2:28, 29.

7, 8. (a) I bisonekwa’ka bilombola amba bene Kidishitu bonso i bengidi? (b) I bipangujo’ka biipangulwanga pa mwanda utala kutombolwa?

⁷ Kukwatañana na uno mwanda, mu difuku dya Pentekosa wa mu 33 K.K., bana-babwanga ba Yesu, bana-balume ne bana-bakaji, bāsapwile abo bonso “bintu bikatampe bya Leza.” (Bilongwa 2:1-11) O mwanda mutumibwa Polo wāsonekele amba: “Ku mutyima ko kwitabija muntu pa boloke, ne ku kyakanwa nako ko kune[na ku meso a bantu bonso] ku lupandilo.” (Loma 10:10) Polo pa kunena bino bishima, kādipo usapwila kabumbo ka bendeji kete, mhm, i “ku bonsololo badi mu Loma, basanshibwe kudi Leza.” (Loma 1:1, 7) Kadi, bonso “bapandulwemo badi mu Efisesa, . . . babinebine mudi Kidishitu Yesu” bādi bafwaninwe “kuvwala ku maulu bilato bya mutyima wa kupyasakana ku busapudi bwa myanda-miyampe ya ndoe.” (Efisesa 1:1; 6:15) Ne kadi, bonso bāivwene mukanda watumīnwe Bahebelu nabo bādi ‘banenwe kūminina konka ku kulombola bantu bonso lukulupilo lwabo ne kutelententa kwine mpika.’​—Bahebelu 10:23.

⁸ Penepo i kitatyi’ka kikalanga muntu ke mwingidi? Mu muneneno mukwabo, muntu utombolwanga kitatyi’ka? I ani ufwaninwe kumutombola?

Kutombolwa bu Mwingidi​—Kitatyi’ka?

9. Yesu wātombwelwe kitatyi’ka, ne i ani wāmutombwele?

⁹ Pa kuyuka kitatyi ne mwine ufwaninwe kutombola bantu, tubandaulei kifwa kya Yesu Kidishitu. Yesu kāpelwepo mukanda wa kutombolwa nansha dipolome dya ku seminele kampanda dilombola amba pano ke mwingidi, kadi ke bantupo bāmutombwele. Ino i kika kyotunenena amba wādi mwingidi? Mwanda binenwa bya Isaya bya  ku bukomo bwa mushipiditu byāfikidile padi, binena’mba: “Mushipiditu wa Yehova wangikadilako, ke-muntu wanshingile mani ngikale [kusapula] myanda-miyampe.” (Luka 4:17-19; Isaya 61:1) Bino binenwa i bilombole patōka amba Yesu wāpelwe mwingilo wa kusapula myanda miyampe. Wāpelwe’o na ani? Na Yehova Leza, ye mwine wāmutombwele, mwanda mushipiditu Wandi wāmushingile māni amba engile mingilo. Lelo kyādi kitatyi’ka? I kitatyi kyaābatyijibwe, mwanda kyo kitatyi kyāmutūkile mushipiditu wa Yehova. (Luka 3:21, 22) Bine, Yesu wātombwelwe pa kubatyijibwa kwandi.

10. I ani ‘ubwanijanga’ mwingidi mwine Kidishitu senene?

¹⁰ Lelo balondi ba Yesu ba mu myaka katwa imbajinji nabo? Kyepelo kyabo kya bu bengidi nakyo kyātambile kudi Yehova. Polo wānene amba: “Kubwanya kwetu i kwa kudi Leza; wakwitubwaninya ke tudi bengidi ba kipwan[o] kipya.” (2 Kodinda 3:5, 6) Lelo Yehova ubwanijanga namani batōtyi bandi mwa kwikadila’bo bengidi? Ivwana kifwa kya Temote, wātelelwe na Polo bu “mwingidi wa Leza mu myanda-miyampe ya Kidishitu.”​—1 Tesalonika 3:2.

11, 12. Temote wāendelele kumeso namani wāikala ke mwingidi?

¹¹ Ino myanda ilonda’ko yāsapwidilwe Temote itukwasha tuyuke mwaāikadile ke mwingidi, inena’mba: “Nanshi abewa nobe uminina’tu mu bino bintu byo wafundijibwa, ne mo wasumininwa namo, pa kuyūka boba bakukufundija’byo, kadi, ne byo wayūkile kala pa bwanuke bisonekwa bikola, biyūkile ne mwakukupela ñeni ya ku lupandilo pa kwitabija kwa monka mudi Kidishitu Yesu.” (2 Temote 3:14, 15) Kyalwilo kya lwitabijo lwa Temote, lwāmufikije ku kunena ku meso a bantu bonso, i buyuki bwa Bisonekwa. Lelo pa kwikala na buno buyuki wādi ufwaninwe’nka kutanga kasuku kandi kete kubapu? Mhm. Bāmukweshe wāikala na buyuki bwabinebine ne kwivwanija kwa ku mushipiditu kwa byobya byaādi utanga. (Kolose 1:9) O mwanda Temote ‘wānekenibwe waitabija.’ Ne kadi aye wāyukile Bisonekwa “pa bwanuke,” ko kunena’mba bafundiji bandi bādi ba inandi ne nkambo wandi, ke bantu bangipo, mwanda shandi kādipo mwitabije.​—2 Temote 1:5.

¹² Inoko, pa kusaka Temote ekale mwingidi, pādi palomba bivule. Dibajinji, lwitabijo lwandi lwākomejibwe na kisense kyaādi nakyo na bene Kidishitu ba mu bipwilo bya kubwipi. Mwanda waka tubanena namino? Mwanda pētene Polo dibajinji na Temote, uno nkasampe wādi kala “utendelwako kudi bāna babo ba mu Lesetala ne mu Ikoniuma.” (Bilongwa 16:2) Kadi mu mene mafuku’a kwādi banabetu bamo bādi batumina bipwilo mikanda mwanda wa kwibikankamika. Batadi nabo bādi bapempula bipwilo ne kwibyūbaka. Bino byonso byākweshe bene Kidishitu, ne Temote kumo, bendelele ku mushipiditu.​—Bilongwa 15:22-32; 1 Petelo 1:1.

13. Temote wātombwelwe bu mwingidi kitatyi’ka, ne i kika kinenenwa amba kwendelela kwandi kwa ku mushipiditu kekwāimaninepo pa kutombolwa kete?

¹³ Mungya musoñanya wa Yesu udi mu Mateo 28:19, 20, tukokeja kunena na kikulupiji kyonso amba, pa ditabula kampanda, lwitabijo lwa Temote lwāmufikije ku kwiula Yesu ne ku kubatyijibwa. (Mateo 3:15-17; Bahebelu 10:5-9) Kino kyo kyādi kyelekejo kya kwipāna kwaēpēne kudi Leza na mutyima umo. Bine, Temote wāikele ke mwingidi pa kubatyijibwa kwandi. Tamba penepa, būmi bwandi, bukomo bwandi ne byonso byaādi nabyo  byāikala ke bya Leza. Kino kyādi kipindi kikatampe kya mu butōtyi bwandi, bine yo “mingilo ikola.” Inoko Temote kādipo wilemena’nka ntumbo ya bu mwingidi kete, mhm. Wāendelele kutama ku mushipiditu, wāikala ke mwingidi mwine Kidishitu mupye. Kintu kyāmufikije ku kupya i kipwano kyaādi upwene na bene Kidishitu bapye, kifwa Polo, pamo ne kifundwa kyandi kya kasuku, ne bupyasakane bwandi mu busapudi.​—1 Temote 4:14; 2 Temote 2:2; Bahebelu 6:1.

14. Dyalelo, muntu udi “mu ngikadilo ya kukamona būmi bwa nyeke” ukokeja kwendelela kumeso namani kufika ne byaikala mwingidi?

¹⁴ Ne dyalelo nadyo mo monka, kutombolwa mu mwingilo wa bwine Kidishitu kekushintyilepo. Muntu yense udi “mu ngikadilo ya kukamona būmi bwa nyeke” ufundijibwanga myanda itala padi Leza ne pa mpango yandi kupityila ku kifundwa kya Bible. (Bilongwa 13:48, NW) Kupwa wayuka kwingidija misoñanya ya mu Bible mu būmi bwandi ne kulombela kudi Leza milombelo mipotoloke. (Mitōto 1:1-3; Nkindi 2:1-9; 1 Tesalonika 5:17, 18) Ebiya washilula kwilunga na banababo betabije ne kumwena kamweno mu mpangiko yonso ikwatwa na “umpika wabinebine ne wamanwa.” (Mateo 24:45-47, NW; Nkindi 13:20; Bahebelu 10:23-25) Kupwa kaendelela kumeso mu bufundiji bonso buletwa.

15. Bikalanga namani shi muntu wabatyijibwa? (Tala kunshi kwa dyani.)

¹⁵ Mwifundi wa Bible, shi watamija buswe bwa kuswa Yehova Leza ne lwitabijo lukomo mu kitapwa kya kinkūlwa, ukakimba kwipāna aye yense kudi Shandi wa mūlu. (Yoano 14:1) Ukepāna mu milombelo ya pa bunka ne kukimba kubatyijibwa ku meso a bantu bonso bu kyelekejo kya kwipāna kwandi kwaepēne kufula. Lubatyijo ko kutombolwa kwinekwine, mwanda kyo kitatyi kyayukana amba ke di·aʹko·nos, mwingidi mwipāne wa Leza. O mwanda ufwaninwe kushala nyeke mwisansanye na ntanda. (Yoano 17:16; Yakoba 4:4) Ukepāna aye yense “ke kitapwa kyumi, kikola, kya kuloelelwa Leza,” pampikwa kwikaka nansha kutūla’po mikalo. (Loma 12:1) * Papo ke mwingidi wa Leza, wiula Kidishitu.

Mwingilo wa Bwine Kidishitu I Mwingilo’ka?

16. I mingilo’ka imoimo yādi ingila Temote bu mwingidi?

¹⁶ Lelo mwingilo wa Temote wādi mwingilo’ka? Wādi na mingilo ya pa bula ya kwenda ñendo pamo na Polo. Ino paāikele ke mukulumpe, wādi kaputuma na mwingilo wa kufundija ne kukankamika balunda nandi bene Kidishitu. Inoko, mwingilo wandi mwinemwine i owa wādi nao ba Yesu ne Polo, mwingilo wa kusapula myanda miyampe ne kulonga bana-babwanga. (Mateo 4:23; 1 Kodinda 3:5) O mwanda Polo wānene Temote amba: “Abe nanshi, wikale kwibēja mu bintu byonso, mona’tu onka malwa, uyūke mīngilo yobe ya busapudi, ne bwingidi bobe nabo bulumbuluke, senene, shē.”​—2 Temote 4:5.

17, 18. (a) I mwingilo’ka wingila bengidi bene Kidishitu dyalelo? (b) Lelo mwingilo wa busapudi udi na mvubu’ka ku mwingidi mwine Kidishitu?

¹⁷ Ne bengidi bene Kidishitu ba dyalelo nabo mo monka. Bengilanga mwingilo wa kukwasha bantu, mwingilo wa kusapula, balombola bakwabo amba pa kitapwa kya Yesu po pemanine lupandilo lwetu, kadi bafundija batūkanye bete pa dijina dya Yehova. (Bilongwa 2:21; 4:10-12; Loma 10:13) Baletanga bubinga bwa mu Bible bulombola amba Bulopwe lo lukulupilo lumo kete lwa kupwa masusu a bantu, ne amba kwingidija misoñanya ya Leza kulumbululanga ne būmi bwa dyalelo bwine. (Mitōto 15:1-5; Mako 13:10) Inoko mwingidi mwine Kidishitu kasapulangapo amba ino misoñanya  ipwanga makambakano onso a bantu dyalelo. Ino ufundijanga amba ‘lulamato lwa kudi Leza ludi na mulao wa būmi bwa pano ne bwa mu mafuku akāya kumeso.’​—1 Temote 4:8.

¹⁸ Eyo, bengidi bavule badi na mingilo mikwabo ya kwingila, mishile ku mwine Kidishitu ne mwine Kidishitu. Bamo badi na biselwa bya bisaka. (Efisesa 5:21–6:4) Bakulumpe ne bengidi ba mingilo nabo badi na biselwa mu kipwilo. (1 Temote 3:1, 12, 13; Tetusa 1:5; Bahebelu 13:7) Bene Kidishitu bavule badi na mingilo ya kūbaka Mobo a Bulopwe. Bakwabo badi na madyese a kutendelwa a kwingila pampikwa nsengwa ku Mabetele, mobo a Sosiete Watch Tower. Inoko, bengidi bonso bene Kidishitu basapulanga myanda miyampe. Uno o mwingilo utala mwingidi yense, shi ani shi ani. Kwingila uno mwingilo ko kayukeno kayukilwa’po mwingidi wabine mwine Kidishitu ku bantu bonso.

Ngikadilo ya Mwingidi Mwine Kidishitu

19, 20. I ngikadilo’ka ifwaninwe kutamija mwingidi mwine Kidishitu?

¹⁹ Bengidi bavule ba mu Bipwilo bya Ki-kidishitu basakanga kupebwa bulēme bukatakata, o mwanda bepanga bitenta, kifwa kitenta kya bu “Pashitele Levela” ne bu “Mumpele.” Ino mwingidi mwine Kidishitu aye uyukile amba Yehova kasuku kandi ye ufwaninwe kupebwa buno bulēme. (1 Temote 2:9, 10, BB) Kekudipo mwingidi mwine Kidishitu wisakilanga buno bulēme nansha kwabila bino bitenta bya pa bula. (Mateo 23:8-12) Mwanda uyukile amba buluji bwinebwine bwa kishima di·a·ko·niʹa i “mingilo.” Kyubwa kikwatañene nakyo kingidijibwanga kyaba kimo mu Bible mwanda wa kwisambila pa mingilo ingidilwa bantu, kifwa kwipwila ba bidibwa ku meza. (Luka 4:39; 17:8; Yoano 2:5) Eyo, mwingidijo okingidijibwe pa mwingilo wa bwine Kidishitu shao i wa bulēme, inoko di·aʹko·nos i mwingidi nyeke.

²⁰ I kutupu mwingidi mwine Kidishitu udi na bubinga bwa kwianya. Bengidi babine bene Kidishitu​—nansha ke boba badi na biselwa bya pa bula mu kipwilo bene​—bonso i bapika betyepeje. Yesu wānene amba: “Yewa usaka kwikala mukatampe mwenu, nabya ēmwingidile mīngilo. Kadi yewa usaka kwikala mukatampe mwenu, nanshi ēkale umpika wenu.” (Mateo 20:26, 27) Yesu, pa kusaka kulombola bandi bana-babwanga ngikadilo miyampe kutamija, wēboije ku maulu, uno i mwingilo wādi wingila umpika wa mfulo ku bapika bonso. (Yoano 13:1-15) Bine, uno i mwingilo wa kwityepeja mpata! Ne bengidi bene Kidishitu nabo mo monka, bengidilanga Yehova Leza ne Yesu Kidishitu na kwityepeja. (2 Kodinda 6:4; 11:23) Badi na bumvubumvu ku mutyima mu mingilo yobeingidila abo bene na bene. Kadi pobasapulanga myanda miyampe, bengilanga pambulwa kwisakila pangala  pa balondakani nabo bampikwa kwitabija.​—Loma 1:14, 15; Efisesa 3:1-7.

Kūminina mu Mwingilo

21. Polo wāpadilwe mpalo’ka pangala pa kūminina kwandi mu mwingilo?

²¹ Ku mutamba wa Polo, kwikala mwingidi kwādi kumulomba kūminina. Wāvulwije bene Kolose amba wāsusukile mwanda wa kwibasapwila myanda miyampe. (Kolose 1:24, 25) Kūminina kwandi kwākunkile mityima ya bavule bāitabija myanda miyampe, nabo baikala bengidi. Bābutulwa ke bana ba Leza, banababo na Yesu Kidishitu, badi na kyepelo kya kukekala bipangwa bya ku mushipiditu pamo nandi momwa mūlu. Bine, ino yo mpalo ya ntumbo ya kūminina kwabo!

22, 23. (a) Mwanda waka bengidi bene Kidishitu ba dyalelo bafwaninwe kūminina? (b) I bipa’ka bya kutendelwa bilupuka ku kūminina kwa bene Kidishitu?

²² Bengidi ba Leza babine ba dyalelo nabo bafwaninwe kūminina. Bavule bekondanga na misongo ya bukile bukya nansha kusosomwa mu ngitu kwa bununu. Bambutwile baputumanga na mingilo​—bavule kebadipo na bene pabo​—mwa kulelela bana. Bana nabo banekenyanga na kininga kyonso lupusa lubi lwibajokolokele ku masomo. Bene Kidishitu bavule nabo bakambanga na bufudile bwa malwa. Bakwabo baponenwa na kupangwapangwa nansha na bikoleja bya mu ino “myaka ya malwa”! (2 Temote 3:1) I bine, bengidi ba Yehova bonso basenselela ku midiyo isamba dyalelo bakokeja kunena mwānenene mutumibwa Polo amba: “Twimwekeja bu bengidi ba Leza umbyonso [ne mu kūminina] mu byamalwa.” (2 Kodinda 6:4, MB) Bengidi bene Kidishitu kebakōkangapo. Bine bafwaninwe kutendelwa pangala pa kūminina kwabo.

²³ Pakwabo kadi, kūminina kwitumwejanga bipa bya kutendelwa mwāmwenine’byo Polo. Ako ko kwitulamija kipwano kya mpwaninine kyotupwene na Yehova ne kusangaja mutyima wandi. (Nkindi 27:11) Kadi ko kukomeja lwitabijo lwetu ne kwitulongeja bana-babwanga, mwa kubaijija kisaka kyetu kya bu bana na bana bwa bwine Kidishitu. (1 Temote 4:16) Bine Yehova ukwatakanyanga bengidi bandi ne kwibesela mu mwingilo wabo mu ano mafuku a mfulo. O mwanda tumona kukongakanibwa kwa bantu ba mfulo ba mu 144 000, ne kwa bantu midiyo ne midiyo bakulupile kukekala na būmi bwa nyeke mu paladisa pano panshi. (Luka 23:43; Kusokwelwa 14:1) Bine, mwingilo wa bwine Kidishitu i kilomboji kya lusa lwa Yehova. (2 Kodinda 4:1) Nanshi batwe bonso tukwatei’o makasa abidi ne kufwija’ko Leza, mwanda bipa byao i bya kulādila nyeke ne nyekeke.​—1 Yoano 2:17.

[Kunshi kwa dyani]

Le Ukokeja Kushintulula?

• I kiselwa’ka kyādi na bene Kidishitu bonso mu myaka katwa imbajinji?

• Mwine Kidishitu utombolwanga kitatyi’ka, ne i ani umutombola?

• I ngikadilo’ka ifwaninwe kutamija mwingidi mwine Kidishitu?

• Mwanda waka mwingidi mwine Kidishitu ufwaninwe kūminina mu bikoleja byatanwa nabyo?

[Bipangujo bya Kifundwa]

[Kifwatulo pa paje 15]

Lubatyijo i kyelekejo kya kwipāna kudi Leza, kyo kiyukeno kya kutombolwa bu mwingidi

[Bifwatulo pa paje 16, 17]

Temote wāfundijibwe Kinenwa kya Leza ukidi mwanuke. Wāikala ke mwingidi mutombolwe pa kubatyijibwa kwandi

[Kifwatulo pa paje 18]

Bengidi bene Kidishitu bengilanga pampikwa nsengwa