Lelo Buswe Bobe I Bukatampe Namani?

“Ukasanswa mukwenu na abe mwine.”​—MATEO 22:39.

1. Shi tuswele Yehova, mwanda waka tufwaninwe kuswa ne mukwetu?

 KITATYI kyobāipangwile Yesu amba kijila kikatampe i kyepi, wālondolwele amba: “Ukasanswa Yehova Leza obe, ne mutyima obe onso, ne muya obe onso, ne manwa obe onso.” Kupwa wātela kijila kya bubidi kidingakene na kibajinji amba: “Ukasanswa mukwenu na abe mwine.” (Mateo 22:37, 39) I amo, buswe bwa kuswa mukwetu kyo kiyukeno kiyukilwa’po mwine Kidishitu. I bine, shi tuswele Yehova, tufwaninwe kuswa ne mukwetu mwine. Mwanda waka? Mwanda shi tumuswele, tukakōkela Kinenwa kyandi, kino Kinenwa nakyo kyo kitusoñanya kuswa mukwetu. Nanshi shi ketuswelepo batutu ne bakaka, nankyo buswe botuswele Leza ke bwabinebinepo.​—Loma 13:8; 1 Yoano 2:5; 4:20, 21.

2. I buswe’ka botufwaninwe kuswa mukwetu?

² Pānene Yesu amba tufwaninwe kuswa mukwetu, wādi wisambila pa kintu kipite ne pa bulunda bwine. Kadi wādi unenena pa buswe bwishile na buswe bwa kibutwila bwikalanga na bantu ba mu kisaka kimo nansha bwiswanga ba mwana-mulume ne mwana-mukaji. Yesu wādi wisambila pa buswe buswele Yehova bengidi bandi bepāne ne pa buswe nabo bobamuswele. (Yoano 17:26; 1 Yoano 4:11, 19) Musonekeji Muyuda​—wānenwe na Yesu amba ubalondolola bya ñeni​—wāitabije binenwa bya Yesu amba tufwaninwe kuswa Leza “ne mutyima onso, ne ñeni yonso, ne muya onso, ne bukomo bonso.” (Mako 12:28-34) Wānene byabine. Buswe bwa kuswa Leza ne mukwetu butamijanga mwine Kidishitu bwikalanga mu malango ne mu milangwe mine. Bukunkanga ku mutyima ne kuludikwa na ñeni.

3. (a) Yesu wāfundije namani ‘mwana-mulume upotolwele bijila’ amba ufwaninwe kushinta mumweno wandi wamwene mukwabo? (b) Kyelekejo kya Yesu kitala ne pa bene Kidishitu ba dyalelo namani?

 ³ Mungya kunena kwa Luka, Yesu wānene amba tufwaninwe kuswa mukwetu, ino ‘mwana-mulume umo upotolwele bijila’ wāmwipangula’mba: “Lelo mukwetu kadi i ani le?” Yesu wāmulondolola na kyelekejo. Amba muntu umo wākupilwe ne kwibwa bintu byandi, bāmushiya mupungile kufula kwa dishinda. Dibajinji kitobo wapityila dyonka dishinda’dya, kupwa ke mwine Levi. Abo bonso bamushiya ulēle. Ku mfulo, mwine Samadia wāiya, wāmona muntu mutapwe bilonda, wāmuboya na kanye konso. Lelo mukwabo na mutapwa pa bano basatu i ani? Kilondololwa kidi patōka. (Luka 10:25-37) Ino uno mwana-mulume upotolwele Bijila kabudilwe kutenekwa mutyima pa kwivwana Yesu unena amba ne mwine Samadia nandi ukokeja kwikala mukwetu mulumbuluke kupita’ko kitobo ne mwine Levi mwine. Bine, Yesu wādi ukwasha uno mukelenge ayuke kuswa mukwabo buswe bukatampe mpata. Bene Kidishitu nabo badi na buswe bwa uno muswelo. Ivwana bidi bantu pala pala bobalombolanga buswe bwabo.

Buswe mu Kisaka

4. I kwepi kubadikilanga mwine Kidishitu kulombola buswe bwandi?

⁴ Bene Kidishitu baswele ba mu bisaka byabo​—bakaji baswele balume, balume bakaji, bambutwile nabo bana. (Musapudi 9:9; Efisesa 5:33; Tetusa 2:4) Eyo, bisaka bivule bidi kala na kijimba kya buswe bwa kibutwila. Inoko malapolo a masongi apomoka, a kususula bene pabo, ne a kusūlwa nansha kōnwa kwa bana alombola amba bisaka biselele mityima kūlu dyalelo, ne amba ngikadilo ya kibutwila ikalanga mu bisaka keikibwanyapo kwibilunga pamo. (2 Temote 3:1-3) Pa kusaka bene Kidishitu bamone kunekenya būmi bwa mu kisaka kyabo, bafwaninwe kwikala na buswe budi na Yehova ne Yesu.​—Efisesa 5:21-27.

5. Bambutwile bafwaninwe kunyemena kudi ani wa kwibakwasha pa kutamija babo bana, ne bavule i bangule bipa’ka biyampe?

⁵ Bambutwile bene Kidishitu bamonanga babo bana pamo bwa bilobekwa byobalobekelwe na Yehova, o mwanda bamwabijanga ebape bukwashi mwa kwibatamijija biyampe. (Mitōto 127:3-5; Nkindi 22:6) Kulonga namino ko kutamija kobatamijanga buswe bwa bwine Kidishitu bwibapa muswelo wa kulama babo bana ku lukutukutu lubi lwikuja’mo bansongwanzele bavule. Pa kino, bambutwile bavule bene Kidishitu bangulanga nsangaji pamo bwa yoya yaangwile inabana umo wa mu Pays-Bas. Pa kupwa kutanwa ku lubatyijo lwa wandi mwana mwana-mulume​—umo wa mu bantu 575 babatyijibwe mu Pays-Bas mu mwaka wadi’mo​—wasonekele amba: “Pano napalwa mpalo ya mingilo yonso yonaingile mu bula bwa myaka 20. Kitatyi ne bukomo bonso bonajimije​—pamo ne mutyima kusansa, nkondo, ne masusu onasusukile​—pano nailwa’byo.” Bine, wadi na nsangaji mikatampe mpata pa kumona wandi mwana witongela aye mwine kwingidila Yehova. Mu buvule bwa basapudi 31 089 batūdile lapolo mu Pays-Bas mu mwaka wadi’mo’u mubadilwa ne bavule bafundijibwe na bambutwile babo kuswa Yehova.

6. Buswe bwa bwine Kidishitu bukokeja namani kuningija kijimba kya busongi?

⁶ Polo wātelele buswe bu ‘kijimba kibwaninine kya bumo,’ ne amba bubwanya kulamankanya busongi nansha ke mu bitatyi bya tuvutakanya. (Kolose 3:14, 18, 19; 1 Petelo 3:1-7) Muntu umo wa mu Rurutu, kakisanga katyetye kadi ku kintu kya makilometele 700 na Tahiti, washilwile kwifunda Bible na Batumoni ba Yehova, ino mukajandi wadi umulwa bininge. Mwenda mafuku, uno lolo wanyema mulume, wasela bana wakashikata nabo mu Tahiti. Ino mulume wadi wibaswele nyeke, wibatumina lupeto kitatyi ne kitatyi ne kwibeta ku telefone mwanda wa kuyuka shi mukaji ne bana babudilwe bintu kampanda. Wadi ulonga namino mwanda wa kuvuija kiselwa kyandi kya bwine Kidishitu. (1 Temote 5:8) Wadi ulombela nyeke amba kisaka kyandi kimone kwilunga umbumo dipya. Mafuku pa kupita’po, mukajandi wajoka. Pa kujoka, mulume washikata nandi biyampe, bya ‘buswe, ne kitūkijetyima, ne kikōkeji.’ (1 Temote 6:11) Mulume wabatyijibwe mu 1998, kadi wasangele mpata mwanda mukajandi nandi waitabije kwifunda Bible. Kino i kimo kya mu bifundwa 1 351 byaendejibwe mu mwaka wadi’mo mu uno mwaba uludikwa na musambo wa Tahiti.

7. Kukwatañana na mwana-mulume wa mu Alemanye, i kika kyaningije busongi bwabo?

⁷ Mu Alemanye mwadi mwana-mulume umo wadi upelele wandi mukaji alonde bubinebine  bwa mu Bible, kadi wadi musumininwe amba Batumoni ba Yehova basakanga kumongwela mukaji. Ino mwenda mafuku, watumina kaka washilwile kwisamba na wandi mukaji mukanda, amba: “Wafwa’ko bininge pa kutweja mukajami mu Batumoni ba Yehova. Dibajinji nadi ntompola mwanda nadi ngivwana bemunenena mabi. Ino pano ponashilula kutanwa ku kupwila na wami mukaji, namone amba nadi mu kilubo kikatampe. Nayuka pano amba buno bonaivwana bo bubinebine, kadi bubaningija busongi bwetu mpata.” Mu Batumoni ba Yehova 162 932 ba mu Alemanye​—ne 1 773 ba mu bisanga bitalwa na musambo wa Tahiti​—mutanwa bisaka bivule bilungilwe umbumo na buswe bwa bwine Leza.

Buswe bwa kuswa banabetu bene Kidishitu

8, 9. (a) I ani witufundije kuswa banabetu, ne buswe bwitutonwenanga ku kulonga bika? (b) Leta kifwa kilombola buswe mobupelanga banabetu muswelo wa kwiangula abo bene na bene.

⁸ Polo wānene bene Kidishitu ba mu Tesalonika amba: “Bānwe mwi bapwe kala kufundijibwa na Leza kwisanswa bānwe bene.” (1 Tesalonika 4:9) I amo, boba ‘bafundijibwe na Yehova’ beswele abo bene na bene. (Isaya 54:13) Buswe bwabo bumwekanga mu bilongwa, pamo’nka na mwānenene’kyo Polo amba: “Iingidilei banwe bene na bene mu buswe.” (Ngalatea 5:13, BB; 1 Yoano 3:18) I bine beingidilanga, kifwa na kupempula batutu ne bakaka babela, kukankamika ba mityima ipepa, ne kukomeja bakōkekōke. (1 Tesalonika 5:14) Buswe bwetu bwabinebine bwa bwine Kidishitu bo butamija paladisa yetu ya ku mushipiditu.

⁹ Mu kipwilo kya Ancón​—kimo kya mu bipwilo 544 bya mu Ekwatere​—banabetu balombwele buswe mu muswelo mumweke. Kupona kwa lupeto kwashile basapudi bavule pambulwa kaji ne misokwe, penepa batyiba mbila ya kukimba lupeto na kupoteja bidibwa ku babiluwe bajoka kobakatele bufuku. Muntu ne muntu wadi ulunga’ko kuboko, ne bana bene kumo. Badi bashilula kuteka na nsaa ya 1:00 ya lubanga mwanda wa bidibwa bipye kumeso kwa 4:00 ya lubanga yadi ijoka babiluwe. Kupwa lupeto lobamona beabila’lo mungya bisakibwa byabo. Kwiangula kwa uno muswelo kwalombwele amba badi na buswe bwabinebine bwa bwine Kidishitu.

10, 11. I muswelo’ka otukokeja kulombola buswe ku banabetu boketwiyukile nabo?

¹⁰ Inoko, buswe bwetu kebwimaninepo enka pa bene Kidishitu botuyukile kete. Mutumibwa Petelo wānene amba: ‘Ikalai na buswe ku kisaka kyonso kya banabetu.’ (1 Petelo 2:17) Tuswele batutu ne  bakaka bonso mwanda abo bonso i batōtyi botutōta nabo Yehova Leza. Bitatyi bya tusua bikokeja kwitupa mukenga wa kulombola buno buswe. Kifwa, mu mwaka wa mingilo wa 2000, kwaikele malobe makatampe mu Mozambike, ne divita dyakubulwa mpwilo mu Angola, bino bintu byashile bavule umbulanda. Ne banabetu bavule, 31 725 ba mu Mozambike ne 41 222 ba mu Angola, baponenwe na bino binkumbulu. O mwanda Batumoni ba mu Afrika wa Kunshi bobalondakene nabo batumine byabuntu bivule mpata bya kupēleja’ko makambakano a banabetu ba mu ano matanda. Mutyima wabo wa kupāna pampikwa nsengwa bya “kuvudilwa” byabo ku banabetu badi mu bufudile i kilomboji kya buswe bobadi nabo.​—2 Kodinda 8:8, 13-15, 24.

¹¹ Buswe bumwekanga ne kitatyi kiluñanga banabetu ba mu matanda mavule kuboko ku lūbako lwa Mobo a Bulopwe ne Mobo a Kubungakena’mo mu matanda malanda. Tutele bidi kifwa kya mu Bisanga bya Salomo. Nansha byokemudipo talala, ino kwadi kwilundila’ko kwa basapudi 6 pa katwa mu mwaka wadi’mo, na kibalwa kikande kya basapudi 1 697. O mwanda badi basakilwa Njibo ya Kubungakena’mo. Nansha byadi binyema bekadi ba pa bino bisanga, ino bengidi ba kubulwa nsengwa badi batamba mu Ostrali bāya kukwasha ku lūbako. Mfulo mfulo bano bengidi badi bafwaninwe’nka kujokela kwabo, ino kebashilepo banababo pambulwa kufundijibwa mwa kuvuila kyalwilo kyonso kya lūbako. Kadi byuma bipungwe kala bya kushimika nabyo njibo byadi biselwa mu Ostrali. Bine, ino njibo miyampe ya kutōtela’mo poikapwa​—mobo makwabo papo ashele masala​—ikaleta bukamoni butumbija dijina dya Yehova ne kulombola buswe bwa bu bana na bana.

Tuswele ntanda mwiiswelele Leza

12. I muswelo’ka otukokeja kwiula Yehova mu mumweno otumona boba boketudipo nabo mu lwitabijo lumo?

¹² Lelo buswe bwetu tuswanga’bo enka ba mu kisaka kyetu ne banabetu bene Kidishitu kete? Mhm, ke amopo, mwanda twi ‘beudi ba Leza.’ Yesu wānene amba: “Leza wāswele ntanda mpata, o mwanda wāpēne wandi Mwana wa bunka, amba muntu yense ulombola lwitabijo mudi aye kakonakanibwapo, ehe, ino ukekala na būmi bwa nyeke.” (Efisesa 5:1; Yoano 3:16, NW) Netu tulongelanga bantu bonso bilongwa bya buswe pamo na mulongelanga’byo Yehova Leza​—tulongela’byo ne boba boketudipo nabo mu lwitabijo lumo. (Luka 6:35, 36; Ngalatea 6:10) Kupityididila, tusapwilanga bakwetu myanda miyampe ya Bulopwe ne kwibayukija kilongwa kikatampe kya buswe kibalongēle Leza. Yense wivwana ubwanya kukamona lupandilo.​—Mako 13:10; 1 Temote 4:16.

13, 14. I myanda’ka imoimo ilongekele ilombola buswe bwalombwele banabetu pa bantu ba panja, nansha byobadi na makambakano pa kwibulombola?

 ¹³ Ivwana bilongele bapania baná ba pa bula ba mu Nepale. Bapelwe mwaba wa kibundi kya mu bwikike bwa kunshi ne kushika kwa ntanda yabo. Mu myaka itano ishele kunyuma’i, balombwele buswe bwabo na kusapula na kitūkijetyima mu kino kibundi ne mu tubundi twa mufula. Pa kusambakanya mwaba wabo, badi bafwaninwe kwenda na makinga mu bula bwa nsaa mivule, mu dyuba kampumpu dileta kyanga kipite pa 40°C. Buswe bwabo ne “kininga kya kulonga biyampe” byalupwile bipa bilumbuluke mwanda kwabundilwe kisumpi kya kifundwa kya kitabo mu kabundi kamo. (Loma 2:7) Mu Kweji 3, 2000, bantu 32 baile kwivwana kishinte kya bantu bonso kyanenwe na mutadi wa kipindi. Nepale wabwenye buvule bwa basapudi 430 mu mwaka wadi’mo​—kuno i kwilundila’ko kwa bantu 9 pa katwa. Bine Yehova weselanga banabetu ba mu ino ntanda pangala pa bupyasakane ne buswe bwabo.

¹⁴ Mu Kolombi, bapania ba pa bula ba kwingila kitatyi kityetye bakasapwile mu Bawayuu bene India. Pa kubwanya kwibasapwila, badi bafwaninwe kwifunda bidi ludimi lwabo. Bine buno buswe bwabo bwapadilwe mpalo, mwanda nansha byokwanokele mvula ukuka milungu, bantu 27 batenwe ku kishinte kya bantu bonso. Bupyasakane bwa buswe, pamo bwa buno bwalombwele bano bapania, bo bwalengeje kwikale kwilundila’ko kwa bantu 5 pa katwa mu Kolombi, bafikila pa kibalwa kikande kya basapudi 107 613. Kaka umo mununu wa mu Danemarke nandi wadi na mutyima wa kusapwila bakwabo myanda miyampe, ino yō, bulema nabo bumukoleje. Inoko kazozelepo, washilwile kwisamba na bantu kupityila ku mikanda. Pano utuminanga bantu 42 mikanda ne kwendeja bifundwa bya Bible 11. Uno kaka i umo wa mu basapudi bonso 14 885 batūdile lapolo mu Danemarke mu mwaka wapityile’u.

Tuswei balwana netu

15, 16. (a) Yesu wānene amba buswe bwetu bufwaninwe kwikala bukatampe namani? (b) Batutu bamo bemanine mingilo besambile na buswe namani na muntu wadi unenena Batumoni ba Yehova myanda ya bubela?

¹⁵ Yesu wāsapwidile mwana-mulume upotolwele Bijila amba mwine Samadia nandi i mukwabo. Kadi wānena bipite ne pano pene mu Busapudi bwandi bwa pa Lūlu, amba: “Mwaivwene byo kyadi kinenwe’mba: Ukasanswa mukwenu, ino wakukushikwa nobe ukamushikwe. Nanshi ami nami nemunena’mba: Sanswai bakwimushikwa, ne bakwimumweshamwesha malwa nabo mwikale kwibalombelelapo, amba mwikale bāna ba Shenu wa mūlu.” (Mateo 5:43-45) Nansha shi muntu witulwa, tuloñanga buninge bwa ‘kushinda bubi na bulumbuluke.’ (Loma 12:19-21) Shi bibwanika, tumulombola’nka ne kintu kyetu kya bulēme mpata, ke bubinebine kadi.

¹⁶ Mu Ikrene, kishinte kya mu dipepala dimo (Kremenchuk Herald) kyanene amba Batumoni ba Yehova i katango kaleta kyaka. Uno wadi mwanda mukomo, mwanda bantu bamo mu Bulaya banenanga namino mwanda wa bantu bamone amba mingilo ingila Batumoni ba Yehova ifwaninwe kukankajibwa nansha kwimikwa. O mwanda batutu baketene na mulembi wa kino kishinte, bamunena alupule kishinte kikwabo kya kubepulula byaanene. Nandi waitabija’tu biyampe, ino pa kulupula myanda mipya, wabweja’mo musemwa unena’mba myanda yanenwe mu kishinte kibajinji’kya i yabine. Ponka’po batutu bemanine mingilo bamwendela’ko dikwabo, bamusapwila myanda mivule. Ku mfulo, mulembi wajingulula amba kishinte kibajinji kyanene myanda ya bubela, ko kulupula walupula kishinte kya kubepulula bubela’bwa. Kwisamba kwesambilwe nandi na bubine ne na kanye dyo dishinda dya buswe dyapwijije uno mwanda, ne kulupula dyalupula bipa bilumbuluke.

Tukatamija buswe namani?

17. I bika bilombola amba kulongela bakwetu bintu na buswe kekwikalangapo nyeke kupēla?

¹⁷ Shi mwana wabutulwa, bambutwile bandi bamuswanga ponka na ponka. Ino kulongela batame bintu na buswe kekwikalangapo nyeke namino. O mwanda Bible witulombola misunsa ne misunsa amba mwiswei banwe bene na bene​—bine buswe i kintu kifwaninwe kutamija. (1 Petelo 1:22; 4:8; 1 Yoano 3:11) Yesu wādi uyukile amba buswe bwetu bukatūlwa pa ditompo, o mwanda wānene amba tufwaninwe kufwila banabetu lusa ‘misunsa makumi asamba-abidi ne isamba-ibidi.’ (Mateo 18:21, 22) Polo nandi  witusoñanya’mba mwikale “kwifudila bānwe bene na bene.” (Kolose 3:12,  13) O mwanda nanshi betunena’mba: ‘Londai buswe’! (1 Kodinda 14:1) Le tukokeja kwibulonda namani?

18. I bika biketukwasha tutamije buswe botuswele bakwetu?

¹⁸ Kintu kibajinji, tuyukei nyeke amba tufwaninwe kwikala na buswe bwa kuswa Yehova Leza. Buno buswe bo buketutonona tuswe bakwetu. Mwanda waka tunena namino? Mwanda shi tudi na buswe, twiulanga Tata wetu wa mūlu, tumutumbija ne kumutendela. (Yoano 15:8-10; Fidipai 1:9-11) Kya bubidi, tufwaninwe kumona bintu mwibimwena Yehova. Kitatyi kyonso kyotuluba, tulubilanga Yehova; ino aye witufwila lusa kyaba ne kyaba, kadi wendelela na kwituswa. (Mitōto 86:5; 103:2, 3; 1 Yoano 1:9; 4:18) Wivwane tutamije mumweno umona Yehova bintu, bine ketukabulwepo kuswa bakwetu ne kwibalekela bilubo byabo. (Mateo 6:12) Kya busatu, tufwaninwe kulongela bakwetu bintu pamo na motusakila betulongele’byo. (Mateo 7:12) Byotudi bakubulwa kubwaninina, tusakanga kufwilwa lusa divule. Kifwa, shi tubasanshija mukwetu mu binenwa, twikalanga na kikulupiji amba usa kuvuluka amba muntu yense ulubanga kyaba ne kyaba na ludimi. (Yakoba 3:2) Shi tusaka bakwetu betulongele bintu na buswe, netu tufwaninwe kwibalongela bintu na buswe.

19. I muswelo’ka otukokeja kukimba bukwashi bwa mushipiditu sandu mwa kutamijija buswe bwetu?

¹⁹ Kya buná, tufwaninwe kulomba bukwashi bwa mushipiditu sandu mwanda buswe i kipa kya mushipiditu. (Ngalatea 5:22, 23) Bulunda, bubutule, ne bukena, byonso bino bīyanga na kitetyima. Ino tusakilwanga mushipiditu wa Yehova pa kusaka kutamija buswe budi na Yehova, butelwa bu kijimba kibwaninine kya bumo. Tukatambula bukwashi bwa mushipiditu sandu enka shi tutanga Bible, dibuku disonekwe ku bukomo bwa mushipiditu. Kifwa, shi twifunda būmi bwa Yesu, tukamona mwaādi wikadile na bantu, netu twayuka mwa kumwiwila. (Yoano 13:34, 35; 15:12) Kadi tukokeja kulomba mushipiditu sandu kudi Yehova, nakampata popa potumona amba i kikomo kulonga bintu na buswe. (Luka 11:13) Kya mfulo, tukokeja kulondalonda buswe na kulamata nyeke ku kipwilo kya bwine Kidishitu. Kwikala pamo na batutu ne bakaka ba buswe kwitupanga netu muswelo wa kutamija buswe.​—Nkindi 13:20.

20, 21. I bika bilongele Batumoni ba Yehova mu mwaka wa mingilo wa 2000 bilombola amba badi na buswe bukatampe mpata?

²⁰ Mu mwaka wadi’mo, kwadi basapudi 6 035 564 basapwile myanda miyampe kujokoloka ntanda yonso. Batumoni ba Yehova bapityije bungi bwa nsaa 1 171 270 425 mobadi bakimba bantu ba kusapwila myanda miyampe. Buswe bo bwebakankamikile batyumwine umanwi kyanga, mvula ne mashika pobadi bengila uno mwingilo. Kadi i buswe bonka bwebatonwene besambe na bobafunda nabo ku masomo, bobengila nabo ku kaji, ne bantu bokebayukilepo nansha dimo bobadi betana nabo mu bipito ne mu bifuko bikwabo. Mu bantu badi bapempulwa na Batumoni, bavule badi bañumauma, batyetye bo badi bapela. Inoko bamo badi basepelela musapu, o mwanda Batumoni balongele kujokela’mo kupya 433 454 049, baendeja ne bifundwa bya Bible 4 766 631. *

²¹ Bine, kino kilombola patōkelela amba Batumoni ba Yehova badi na buswe bobaswele Leza wabo ne bakwabo! Buno buswe kebukatalalapo nansha dimo, mhm. Tukulupile amba uno mwaka wa mingilo wa 2001 o mwine usa kupebwa’mo bantu bukamoni bukatampe kutabuka. Tulomba Yehova esele madyese batōtyi bandi badikōkeji kadi bapyasakane, ponso ‘pobalonga bintu byonsololo na buswe’!​—1 Kodinda 16:14.

[Kunshi kwa dyani]

Le Ukokeja Kushintulula?

• I ani otwiulanga kitatyi kyonso kyotuswa mukwetu?

• Buswe bwetu bufwaninwe kwikala bukatampe namani?

• I myanda’ka ilongekele ilombola amba buswe bwa bwine Kidishitu budi’ko?

• Tukokeja kutamija buswe bwa bwine Kidishitu namani?

[Bipangujo bya Kifundwa]

 [Tabulo pa paje 28-31]

LAPOLO WA NTANDA YONSO WA BATUMONI BA YEHOVA WA MWAKA WA MINGILO WA 2000

(Tala volime)

[Bifwatulo pa paje 25]

Buswe bwa bwine Kidishitu bukutyilanga kisaka umbumo

[Bifwatulo pa paje 26]

Buswe bo bwitutononanga tusapwile bakwetu lukulupilo lwetu