Batumoni ba Yehova—Bendelela Kumeso na Kusumininwa Kukatampe!

Lapolo wa Kupwila kwa Mwaka ne Mwaka

MU INO myaka ya lupata ne kutatana, Batumoni ba Yehova i bemanije bu bene Kidishitu badi na kusumininwa kukatampe. Kino kyalombwelwe patōka mu kupwila kwa Watch Tower Bible and Tract Society of Pennsylvania, kwapwidilwe mu Jersey City, New Jersey, mu Njibo ya Kubungakena’mo ya Batumoni ba Yehova mu dya Mposo mafuku 7 Kweji 10, 2000. *

Mwendeji waimanine kupwila John E. Barr, umo wa mu Kitango Kyendeji kya Batumoni ba Yehova, wanene mu binenwa byandi bya ñanjilo amba: “Mu midiyala ya bantu badi pano pa ntanda, batwe tuyukile ne kukulupila amba Kidishitu Yesu, Mwana muswedibwe wa Yehova, pano i mubikikwe mūlu, mubikale umbukata mwa balwana nandi.” Bukamoni bwa kuno kusumininwa kukatampe bwalombwelwe mu malapolo asamba asangaja atambile koku ne koku pano pa ntanda.

Kunekenya majende na bubinebine bwa mu Bible mu Haiti

Majende i matumbe bininge mu Haiti. Tutu John Norman, mwimaniji wa Komite wa Musambo wasekunwine amba: “Divule, bantu bapakanga manga a kwishīka.” Bwanā-vidye umo waikele na milangwe mivule ya kwalakana pamutyibikile kulu mu akishida. Weipangula’mba: ‘Le kino kimbalembale kibantana namani ami muntu na bavidye bandama?’ Uno mukelenge wafundijibwe bubinebine na Batumoni ba Yehova monka mufundijibwanga’bo bantu bavule, wakwashibwa, mulume nobe wenyongolola mu byamajende. Kutanta kwa mwingilo mu Haiti pano i kumweke patōka, mwanda mu mafuku 19 Kweji 4, 2000, buvule bwa bantu batenwe ku Kivulukilo kya lufu lwa Kidishitu mu mine ntanda’yo bwadi butabuke bwa basapudi ba Bulopwe misunsa iná mituntulu.

Bupyasakane mu mwaba mukatampe wa Korea

Mu Korea, Batumoni ba Yehova 40 pa katwa badi mu mwingilo wa kitatyi kyonso. Tutu Milton Hamilton, mwimaniji wa Komite wa Musambo wanene amba: “Na kino kibumbo kikatampe uno muswelo, mwaba wetu udi na bantu midiyo 47 ne kupita usambakanibwanga onso mu kweji umo.” Mu bipwilo bya ludimi lwa batumama mo mwine mudi kwilundila’ko kukatampe. Mu kipindi kimo kya bipwilo bya ludimi lwa batumama mwendejibwanga bifundwa bya Bible 800. Uno i mwayene wa kifundwa kimo ku musapudi. Ino i kya bulanda: batutu bankasampe bakikutwa mwanda wa kupela kobapela kwikuja mu bimyanda bya ntanda.  Inoko bano bene Kidishitu bakikōkeji balongelwanga bintu senene, mwanda bapebwanga twaji tulomba divule kwikala muntu mukulupilwe.

Kubwanya bisakibwa pangya kwilundila’ko kudi mu Mexike

Kibalwa kikande kya basapudi 533 665 ba Bulopwe kyatūdile lapolo wa mingilo ya budimi mu Mexike mu Kweji 8, 2000. Ino kibalwa kya bantu batenwe ku Kivulukilo kyadi kikatampe misunsa isatu kupita kya basapudi. Tutu Robert Tracy mwimaniji wa Komite wa Musambo wanene amba: “Kitungo kyetu uno mwaka i kūbakila’ko Mobo a Bulopwe makwabo 240.” Kadi wabweja’ko amba: “Nansha namino, kukitusakila mavulevule.”

Bankasampe ba mu Batumoni ba Yehova ba mu Mexike i bifwa bilumbuluke. Mumpele wa mu Katolika wanene pangala pa nkasampe umo amba: “Shi nami nadi’po nansha na umo udi pamo bwa aye mu balondi bami. Ntendelanga bano bantu mwanda wa dyabo dityima dikomo ne tunangu tobadi nato mu kwingidija Bible. Babingijanga Leza, nansha shi būmi bwabo budi mu kyaka.”

Bululame umbukata mwa tuvutakanya twa mu Siera Leone

Tamba mu Kweji 4, 1991, kasha divita dishilula mu Siera Leone, bantu tununu ne tununu bepaibwanga’mo, bakwabo batapwa bilonda, nansha kulemekwa. Tutu Bill Cowan mwimaniji wa Komite wa Musambo waletele lapolo amba: “Divita ne kufudilwa bibamwesha bantu malwa. Bavule badi bapela musapu wetu pano kebetwivwananga na mutyima umo. Kekikidipo kyeni kumona bantu beila abo bene kutanwa musunsa umbajinji ku kupwila ku Mobo a Bulopwe. Batutu bemikwanga divule mu bipito ne kulombwa kifundwa kya Bible.” Nansha byokudi bimbidikita bya bukile bukya mu mine ntanda’yo, mwingilo wa busapudi bwa Bulopwe upanga bipa mu Siera Leone.

Mpangiko mikatampe ya lūbako mu Afrika wa Kunshi

Pano kusakibwa Mobo a Bulopwe maelefu mu mwaba utalwa na bilo bya musambo wa Afrika wa Kunshi. Mobo tutwa na tutwa ke mobakwe kala. Tutu John Kikot, umo wa mu Komite wa Musambo wanene amba: “Banabetu pano bapwidilanga mu kifuko kiyampe mudi ne bishikatwa bifwaninwe, kupita’ko kupwidila mu kitānda nansha mu kitako kya mutyi, na mobadi balongela mafuku a kunyuma. Nansha Mobo a Bulopwe mavule byoadi a bulanda, ino amwekanga bu mobo a bulēme mu bifuko mobobakile’o. Mu bibundi bimo, shi Njibo ya Bulopwe ibapu kūbakwa, kipwilo kikalanga kīlundila’ko misunsa ibidi mu mwaka ulonda’po.”

Lukongo lupya lwa batumoni mu Ikrene

Mu mwaka wa mingilo wa 2000, ino ntanda yafikīle pa kibalwa kikande kya basapudi 112 720. Basapudi 50 000 ne musubu mu bano i boba bafundile bubinebine bwa Bible mu myaka itano ya kunyuma’i. Tutu John Didur mwimaniji wa Komite wa Musambo wanene amba: “Bine, Yehova wasangula lukongo lupya lwa bankasampe mu Batumoni lwa kusapula dijina dyandi!” Kupwa wabweja’ko amba: “Mu myaka ibidi ya kunyuma’i, twapēne mapepala midiyo 50 ne kupita, monka muvudīle bekadi ba ntanda yetu. Kweji ne kweji, tutambulanga kintu kya mikanda elefu itumwa na bantu basangela musapu basaka kuyukila’ko myanda mikwabo.”

Bintu bikwabo bisangaja byadi ku mpangiko

Daniel Sydlik, umo wa mu Kitango Kyendeji, wanene kishinte kitobala. Mutwe wa mwanda unena’mba “Mwishidile Kitango Kyendeji na Kitango Kiyukene Mungya Bijila bya Leta,” ulupwilwe mu dino dipepala wimanine pa myanda yaanene.

Theodore Jaracz wa mu Kitango Kyendeji wanene dishikulu dikunka mityima munda dyadi dinena’mba “Batadi ne Bengidi ba Mingilo Batoñwanga Mungya Kiteokratike.” Kishinte kimo kya mu dino dipepala kimanine pa uno mwanda.

Ku kupwila kwa ku mwaka kwadi kadi ne dishikulu dyanene David Splane wa mu Kitango Kyendeji dimanine pa kisonekwa kya mwaka wa 2001. Diselele mulangwe wa binenwa bya mutumibwa Polo bya amba: ‘Imanijai kemudi batuntulu bonka, ne kusumininwa monso muswidile mutyima wa Leza.’ (Kolose 4:12) Batumoni ba Yehova kujokoloka ntanda yonso i basumininwe kulonga kino monso mobenda basapula na kikōkeji myanda miyampe ya Bulopwe bwa Leza pano panshi ponsololo.​—Mateo 24:14.

[Kunshi kwa dyani]