Lelo Nobe Ukwete Bubinebine ke Bobe?

“Mwikale kupalukako ponka pa kwisambula mityima yenu, amba mutompe kiswa-mutyima wa Leza, ne mwikadile bulumbuluke, kuloelelwa, ne bu-bwaninine monka.”​—LOMA 12:2.

1, 2. I kika kinenenwa’mba kwikala mwine Kidishitu ke mwandapo munekene dyalelo?

 KWIKALA mwine Kidishitu mu ano mafuku a mfulo​—ino “myaka ya malwa”​—ke mwandapo munekene. (2 Temote 3:1) I kikomo, mwanda pa kulonda kifwa kya Kidishitu, muntu ufwaninwe bidi kunekenya ntanda. (1 Yoano 5:4) Vuluka byānene Yesu pa mwanda utala dishinda dya bwine Kidishitu, amba: “Twelelai pa kakibelo katyetye, ke-kintu kyokya kibelo i kikatampe kyenda kukoneka, ne dishinda nadyo monka, kadi bakatwela monka i bangi bangi. Ino kabelo ka kutwala ku būmi a! a! a! butyeko! ne dishinda monka: ne bakwikamona i batyetye.” Kadi amba: “Shi kudi muntu usaka kunonda nankyo ēkale kwipel[a] aye mwine, ebiya atekune [mutyi wandi wa masusu], dyuba, ku dyuba, ēkale kunonda.”​—Mateo 7:13, 14; Luka 9:23.

² Shi mwine Kidishitu wapu kutana kakibelo katyetye, kikoleja kikwabo kikomo i kushala’mo nyeke. Mwanda waka i kikomo? Mwanda kwipāna kwetu ne lubatyijo lotubatyijibwa bitwikadijanga bu bikwatwa bipēla ku bunwanwa bwa Satana, ne ku byongo byandi bya munshimunshi. (Efisesa 6:11) Uyukanga bukōkekōke bwetu, washilula kwibutamija mwanda wa kusaka kwituponeja ku mushipiditu. Le Yesu mwine ye Yesu, Satana waādi usaka kutyumwina panshi, le batwe bo basa kuleka ku kanwa talala?​—Mateo 4:1-11.

Bunwanwa bwa Satana

3. Satana wākunine kutatana mu mutyima wa Eva namani?

³ Bunwa bumo bwingidijanga Satana i kukuna kutatana mu mityima yetu. Utalanga pantu pazozele panopele yetu ya ku mushipiditu. Ku ngalwilo, wāingidije bunwa bumo bonka pa kwipangula Eva amba: “Lelo i nankyo nanshi Leza wanene’mba: Kemukadyako ku mityi yonso, shi mityi ka, shi mityi ka, idi mu budimi’ni, a?” (Ngalwilo 3:1) Mu muneneno mukwabo, Satana wānene amba, ‘Lelo bine Leza wimujidikile kyakyo kijila? Mwene kudi kintu kampanda kiyampe kyaemufidile? Ke-muntu Leza uyukile amba difuku dine dyomukadya ku mutyi, ponka’po meso akemupūtuka, kabidi mukekadidila bwa Leza, kuyuka biya ne bibi!’ Ponka’po Satana wākuna nkunwa ya kutatana, katengele’nka imene.​—Ngalwilo 3:5.

4. I kutatana’ka kwikalanga na bamobamo dyalelo?

⁴ Lelo Satana wingidijanga buno bunwa namani dyalelo? Wivwane tusūle kutanga Bible, kifundwa kya kasuku, milombelo, kupwila ne mwingilo wetu wa bwine Kidishitu, nabya kutatana kwa bamobamo kekukejepo kwitusambukila. Kifwa: “I muswelo’ka otuyukile amba buno bo bubinebine bwāfundije Yesu?” “Kunena na bubine, lelo ano o mafuku a mfulo? Tala’po tubatwela ne mu myaka ya tutwa 21.” “Lelo ketudi kubwipi na Amakedona’ni, tukidi kulampe?” Shi ketudi na kutatana kwa uno muswelo, lelo tukekufundula namani?

5, 6. Wivwane tushilule kutatana, i bika byotufwaninwe kulonga?

⁵ Yakoba wāletele madingi mayampe amba: “Wivwane shi kudi umo wa mwenu wakubulwa ñeni, nankyo alombe kudi Leza, kyaba bulale, wakubulwa ne mitoto mīne; nabya kikamupebwanga; nanshi alombe ne kwitabija ponka, kulangalanga mpika; mwanda aye ulangalanga i pamo ponka bwa dintanki dya pa dijiba ditwalwa na luvula ne kusunkanibwa. Ino yao muntu kakifwatakanya’mba: Nkatambula kintu kudi Mfumwami; mhm; ke-muntu udi bibi na mityima ībidi  ya kulangalanga monso mwāendele.”​—Yakoba 1:5-8.

⁶ Penepa i bika byotufwaninwe kulonga? Tufwaninwe ‘kulomba nyeke kudi Leza’ mu milombelo etupe lwitabijo ne kwivwanija ne bukomo bwa kwifunda kasuku myanda yonso yotwalakana ne kutatana. Tukokeja kadi kulomba bukwashi ku boba bakomo mu lwitabijo, pambulwa kwalakana amba Yehova uketupa byotusaka’ni, kaketupe’byopo. Yakoba enka wānene amba: “Penepo kōkelai Leza; mumukomene dyabola, nandi ukemunyema. Kadi fwenai kudi Leza, nandi ukemufwena.” Bine, kutatana kwetu kukapwa shi tubafwena Leza kupityila ku kifundwa ne ku milombelo.​—Yakoba 4:7, 8.

7, 8. I biyukeno’ka bimobimo bikatampe biyukilwa’po mutōtelo wāfundije Yesu, ne i bāni babwenye bino biyukeno?

⁷ Kifwa, tala bidi kino kipangujo: Lelo tuyukile namani amba mutōtelo otutōta o onka wāfundije ne Yesu? Pa kulondolola ku kino kipangujo, i biyukeno’ka bya kuyukila’po byotukabandaula? Bible unena amba bene Kidishitu babine bafwaninwe kwiswa buswe bwabine abo bene na bene. (Yoano 13:34, 35) Bafwaninwe kuyukanya buujila bwa dijina dya Leza, Yehova. (Isaya 12:4, 5; Mateo 6:9) Kadi bafwaninwe kusapula dino dijina.​—Divilu 3:15; Yoano 17:26.

⁸ Kiyukeno kikwabo kiyukilwa’po mutōtelo wabine i bulēme boulēmekele Bible, Kinenwa kya Leza. Mwanda dino dyo dibuku dimo kete disokola bumuntu ne mpango ya Leza. (Yoano 17:17; 2 Temote 3:16, 17) Pakwabo kadi, bene Kidishitu babine basapulanga Bulopwe bwa Leza amba lo lukulupilo lumo kete lupelwe bantu pa kukamona būmi bwa nyeke mu paladisa pano pa ntanda. (Mako 13:10; Kusokwelwa 21:1-4) I besansanye na myanda ya kipolitike ya ino ntanda mibole ne būmi bwayo boneke. (Yoano 15:19; Yakoba 1:27; 4:4) Lelo i bāni dyalelo babwenye bino biyukeno? Pakubulwa ne kutatana kwine, kilondololwa i kimo kete​—i Batumoni ba Yehova.

Tukalonga namani shi kutatana kujiajia

9, 10. I bika byotukokeja kulonga pa kusaka kufundula kutatana kujiajia mu mityima yetu?

⁹ Bikekala namani shi tubaikala na kutatana mu mityima yetu? Tukalonga’po namani? Solomone Mulopwe wa tunangu ulondolola amba: “Wami mwana shi utambula binenwa byami, kadi ne kubika bijila byami kodi; nankyo uté kutwi kobe ku ñeni, ne kwiela mutyima obe ku kwivwanija; eyo, shi wita ku kusansanya, kabidi ne kutulula diwi dyobe ku kuyukidija; shi umukimba bwa ndalama, kadi ne kumukimbidila pamo’nka bwa bilēme bifibwe; penepa nankyo ukevwanija kwakamwa Yehova, ne kutana [buyuki bwinebwine bwa] Leza.”​—Nkindi 2:1-5.

¹⁰ Mwene uno i mulangwe utulumuja mpata? Shi tusakanga kuta mutyima na katentekeji ku tunangu twa Leza, ketukabulwepo ‘kutana buyuki bwinebwine bwa Leza.’ Eyo, tukokeja kwikala na buyuki bwa Mfumwetu Mulopwe wa diulu ne  ntanda mu mityima yetu enka shi tudi kala na mutyima wa kutambula binenwa byandi ne kwibikwata na bulēme. Ko kunena’mba kuvundamukila kudi Yehova mu milombelo ne kupityila ku kifundwa kya kasuku. Byabulēme bifyame bidi mu Kinenwa kyandi bikafundula kutatana ko-konso ne kwitupa kitōkeji kya bubinebine.

11. Mwingidi wa Edisha wāikele na kutatana muswelo’ka?

¹¹ Kifwa kilombola patōka milombelo moyākwashishe mwingidi wa Leza wāfundula moyo ne kutatana kitanwa mu 2 Balopwe 6:11-18. Mwingidi wa Edisha wābudilwe mumweno wa bintu wa ku mushipiditu. Kādipo mwa kumwena bibumbo bya bulwi bya mūlu byādi bitengele kukwasha mupolofeto wa Leza wādi utēkelwe kasāla na bashidika bene Shidea. O mwanda moyo wāmukwete kadila’mba: “E! mfumwami, lelo tukalonga namani, a?” Lelo Edisha wāmulondolwele namani? Amba: “Kokakwatwa moyo, mwanda boba badi netu batabukile bungi boba bo badi nabo.” Lelo mwingidi wādi wa kukulupila’byo namani aye kumona bibumbo bya bulwi bya mūlu mpikila?

12. (a) Kutatana kwa mwingidi kwāpwile namani? (b) I muswelo’ka otukokeja kupwija kutatana ko-konso kotubwanya kwikala nako?

¹² “Penepo kadi Edisha walombela’mba: Yehova, nakwisashila, baputule meso andi amone. Kabidi Yehova waputula meso a nsongwalume’wa; nandi wamona, ino talapo bidi, lūlu lwadi luyule tubalwe ne makalo a mudilo kujokoloka Edisha.” Yehova wālombola mwingidi bibumbo bya bulwi bya mūlu byādi bilamine Edisha. Eyo, dyalelo ketufwaninwepo kutengela amba Leza etupe bukwashi bwa uno muswelo. Vuluka amba mwingidi wa mupolofeto kādipo na Bible yense mutuntulu wa kwifunda’mo mwanda wa kukomeja lwitabijo lwandi. Ino batwe tudi na Bible. Ekale tumwingidija biyampe, ketukabulwepo netu kukomeja lwitabijo lwetu. Kifwa, tubwanya kulanguluka pa nsekununi imoimo ilombola mushikatyile Yehova mu kidye kya mūlu. Kino kikafundula kutatana kotukokeja kwikala nako pa bulongolodi bwa Yehova budi momwa mūlu, bukwatakanya bengidi bandi ba pano panshi mu mwingilo wa bufundiji wingilwa ntanda yonso.​—Isaya 6:1-4; Ezekyele 1:4-28; Danyele 7:9, 10; Kusokwelwa 4:1-11; 14:6, 7.

Dyumuka byongo bya Satana!

13. Satana wingidijanga miswelo’ka imoimo mwanda wa kusaka kuzozeja lulamato lotulamete ku bubinebine?

¹³ I miswelo’ka imoimo itompanga Satana kuzozeja būmi bwetu bwa ku mushipiditu ne lulamato lotulamete ku bubinebine? Muswelo umo bidi i busekese, ne milongelo yabo pala pala. Mu  ino ntanda ya dyalelo mitomboke na bwitwa, byobya byobeta bu kudya kafyame (kishima kya kufya makoji alongwa na kishinka), nansha bu kwiba mpemba (busekese bwa difuku dimo) ye ke mufomeno wa luno lukongo lwitobelwe’nka kwisangaja pampikwa kubanga byonso bikalupuka’ko. Masinema, matelevijo ne mavideo bitembaulanga’nka ino mikadila. Myanda ya buenda yo yatumbalala mu majulunale, ku binanda, nakampata ku Entelenete. Yewa kaso kudingilwa usaka kwimwena kejepo waponena’mo.​—1 Tesalonika 4:3-5; Yakoba 1:13-15.

14. Mwanda waka bene Kidishitu bamobamo baponenanga mu byongo bya budyumuku bwa Satana?

¹⁴ Bene Kidishitu bamobamo i baleke kiyukuyuku kya kusaka kuyuka bintu kibatādila ne kwibōna ñeni ne mityima mobatala bifwatulo bilombola myanda ya busekese mu lufīla, pakwabo bimwekelele patōka. I belekelele abo bene’nka ne byobaponena mu dikinga dya longola dya Satana. Kino kyo kintu kifikijanga bavule ku kulobela ku mushipiditu. Bano bantu bakomenwanga kushala “bana ba lukeke mu bibi.” Kebafikilangapo pa kwikala “batame mu manwa a kwimvwanija.” (1 Kodinda 14:20, NW) Mwaka ne mwaka, tununu ne tununu twa bantu bangulanga bipa bilula pa kupela kulamata ku misoñanya ne ku mbila ya mu Kinenwa kya Leza. Bine bafutululanga kuvwala ne kulama “panopele yonso ya Leza.”​—Efisesa 6:10-13; Kolose 3:5-10; 1 Temote 1:18, 19.

Tulamei na bulēme kyotudi nakyo

15. Mwanda waka bamo bakomenwanga kukwata bupyani bwabo bwa ku mushipiditu na mutyika?

¹⁵ “Mukayūkidijanga bya bu-binebine, nabyo bikemukūlanga ke mudi bāna-pabo,” mo mwānenene Yesu. (Yoano 8:32) Batumoni bavule balekanga bibidiji byabo bibi ne mitōtelo yabo ya kala. Bashilula bukidi bonka kukwata na mutyika bwanapabo bwibapele bubinebine. Ino bankasampe bamobamo batamijibwanga na bambutwile badi mu bubinebine bakomenwanga kukwata na mutyika kino kipyanwa kya ku mushipiditu. Kashā, kebatwelele mu mutōtelo wa bubela nansha kwikuja mu bya ino ntanda itobelwe kulondalonda nsangaji, kwiponga dyamba ne busekese. O mwanda bakomenwanga kumona kwishila kukatampe kwishidile paladisa yetu ya ku mushipiditu na ino ntanda mibole ya Satana. Bamo padi baponenanga ne mu byongo bya kusaka kutompa ku bulembe bwa ino ntanda mobasaka kwimwena abo bene bintu byobabulwanga!​—1 Yoano 2:15-17; Kusokwelwa 18:1-5.

16. (a) I bipangujo’ka byotufwaninwe kwiipangula? (b) Le i bika byobetufundija ne byobetukankamika kulonga?

¹⁶ Lelo kukuja minwe mu kyoto ko konka kubwanya kwituyukija mudilo mousanshilanga ne moupepelanga? Mwene tukokeja ne kuboila ñeni ku bibi bifikila bakwetu? Ne ino ntanda nayo mo monka, lelo tunenwe’nka kwilamba bidi “umbitoto” byayo penepa ketuyuka shi bine kudi bintu byotwadi tubulwa? (2 Petelo 2:20-22) Petelo wāvulwije bene Kidishitu ba mu myaka katwa imbajinji bādi mafuku kunyuma mu ntanda ya Satana amba: “Ke-kintu kyokya kyaba kya pa kala kibabwana [kyomwadi mulonga] kiswa-mutyima kya baJentaila, ne kunangila mu byakulondalonda bya mutyima umbi, ne bilokoloko, ne kutoma vinyu nakampata, ne kupotoma byamalwa, ne lupotopoto lwa byakukolwa, ne kutōta bakishi baji[diki]lwe.” Kunena na bubine i kutupu usakanga kujokela ‘mu dilobe dya byabulongelonge bya bubi’ bwa ino ntanda mwanda wa kwimwena  būmi mobonekele. (1 Petelo 4:3, 4) Ino tufundijibwanga misoñanya milumbuluke ya Yehova ku etu Mobo a Bulopwe, bité bya bufundiji bwa Bible. Kadi tukankamikwanga kwingidija bukomo bwa buluji bwetu mwanda wa kulombola amba tudi na bubinebine ne amba pano twibukwete ke bwetu.​—Yoshua 1:8; Loma 12:1, 2; 2 Temote 3:14-17.

Dijina dyetu ke kayukenopo bitupu

17. I muswelo’ka otukokeja kwikala Batumoni ba Yehova bafike’po?

¹⁷ Wivwane tukwete bubinebine ke bwetu, ketukatunyapo kuyukija’bo ne bakwetu ponso potumona mukenga. Ke kunenapo amba tukanza kuningila’bo boba kebebusangelapo nansha bityetye. (Mateo 7:6) Ino ketukafupo bumvu bwa kwiyukanya ku bantu amba twi Batumoni ba Yehova. Shi muntu wasangela musapu nansha’tu bityetye na kwipangula kipangujo kitamba ku mutyima, nansha padi waitabija dibuku disambila pa Bible, tukapēlakana kumusapwila lukulupilo lwetu. Eyo, kino kitulomba ne kwilamija nyeke mabuku amoamo konso kotudi​—ku njibo, ku kaji, ku masomo, ku mangajini, nansha ke konso kotukepwija mukose.​—1 Petelo 3:15.

18. Kwiyukanya batwe bene bu bene Kidishitu kudi na kamweno’ka mu būmi bwetu?

¹⁸ Ponso potwiyukanya batwe bene bu bene Kidishitu, tuningijanga byabulwi byetu bya kwikinga nabyo ku divita ditutamba Satana munshimunshi. Kifwa, shi kudi masobo a kuvuluka difuku dya kubutulwa kwa muntu kampanda, fetyi ya Noele nansha makayo a tombola, ukevwana bengidi nobe banena divule amba, “Yao mulekei, kemwakamukambakanyai. I Kamoni wa Yehova.” Pa kino, tukamona padi bantu banza ne kwikaka kuzaula mizaulo ya bya busekese potudi. Nanshi kuyukanya mwimanino wetu wa bwine Kidishitu kudi na kamweno mpata mu būmi bwetu, mo mwānenene’kyo mutumibwa Petelo amba: “Lelo i ani ukemulonga bibi, shi mudi ne mutyima wa kupyasakena kulonga kilumbuluke, a? Ino kadi, shi mususuke pa mwanda wa boloke, mwi batōkwe.”​—1 Petelo 3:13, 14.

19. Tuyukile muswelo’ka amba ketudi batakamane bininge mu mafuku a mfulo?

¹⁹ Kamweno kakwabo kadi mu kukwata bubinebine ke bwetu i kano, tukayuka biyampe amba bine ano otudi’mo i mafuku a mfulo ya ino ngikadilo ya bintu. Ne amba bupolofeto buvule bwa mu Bible bufikidilanga bikatampe mu kino kyetu kitatyi. * Kidyumu kyādyumwine Polo amba “myaka ya malwa īkāyangako mu oa mafuku a kumfulo’a” i kimweke patōka mu binkumbulu byotwemwenine mu myaka katwa yadi’mo’i. (2 Temote 3:1-5; Mako 13:3-37) Dipepala dimo dya panopano, disambila pa myaka tutwa 20, dyadi na mutwe wa mwanda unena’mba “Ikavulukwa bu Myaka ya Busenji.” Kishinte kyadyo kinena’mba: “Mwaka wa 1999 o waikele mwaka wa butapani bwa mu meso fututu mu kipindi kya bubidi kya ino myaka katwa ya butapani bwa mu meso fututu.”

20. Kino kyo kitatyi kya kulonga bika?

²⁰ Bine, kino ke kitatyipo kya kutelententa. Madyese a Yehova amwekanga patōka mu mwingilo mukatakata wa kufundija Bible kewaingilwe kashā namino kujokoloka ntanda yonso mwanda wa kuleta bukamoni ku mizo. (Mateo 24:14) Kwata bubinebine ke bobe, yukija’bo ne bakwenu. Būmi bobe bwa nyeke bokatambula kumeso bwimanine pa bintu byolonga dyalelo. Shi wingila na mulēle yuka’mba ubabulwe madyese a Yehova. (Luka 9:62) Bine kino kyo kitatyi, “kankamanai, ne kujina kwine mpika, muvudilwe pakatampe pene, mafuku onso nyeke, monka mu mingilo ya Mfumwetu, pa mwanda o mwayūka’mba, kuputumina kwa mu mīngilo yenu kekudipo kwa bitubitupu mudi Mfumwetu; ehe.”​—1 Kodinda 15:58.

[Kunshi kwa dyani]

Lelo Ukivulukile?

• I muswelo’ka wa kutalula kutatana mu mityima yetu?

• I ñeni’ka yotukokeja kuboila ku kifwa kya mwingidi wa Edisha?

• I ku byongo’ka bya mu mwikadilo kotufwaninwe kwilama kyaba kyonso?

• Mwanda waka tufwaninwe kwiyukanya batwe bene bu Batumoni ba Yehova?

[Bipangujo bya Kifundwa]

[Bifwatulo pa paje 19]

Kwifunda Bible ne kulombela kyaba ne kyaba kufundulanga kutatana

[Kifwatulo pa paje 20]

Mwingidi wa Edisha wāfundwile kutatana kwandi pa kupwa kumona kimonwa

[Kifwatulo pa paje 21]

Tufundanga misoñanya milumbuluke mpata ya Yehova ku Mobo a Bulopwe pamo bwa ino ya mu Bénin