Musapu wa pa Bula

KU MVUYO ya kupwila kwa mwaka ne mwaka kwa Watch Tower Bible and Tract Society of Pennsylvania kwa mu mafuku 7 Kweji 10, 2000, Tutu John E. Barr, wa mu Kitango Kyendeji kadi mwendeji wimanine kuno kupwila, waletele musapu wa pa bula. Uno musapu waimanine pa mashikulu anenwe kala na Tutu Theodore Jaracz ne Tutu Daniel Sydlik.​—Tala paje 6-10 ne 29-32 mu dino dipepala.

Tutu Barr wasabididila mwanda mwine amba: “ ‘Umpika wabinebine ne wamanwa’ ne kyandi Kitango Kyendeji i bapebwe tumweno twa mvubu mikatampe mpata, kadi tuvule kupita totwa tupelwe bitango biyukene mungya bijila bya Leta. Mingilo ilombwelwe mu mukanda wa bijila wa bino bitango i mityetye. Ino Mfumwetu Yesu Kidishitu wātūdile kabumbo ka umpika wabinebine peulu pa ‘kipango’ kyandi kyonso, ke tumweno tonso twa Bulopwe tudi pano pa ntanda kadi.”​—Mateo 24:45-47.

Tutu Barr wesambile myanda ya kitango kya Pennsylvania, wabwejeje’ko amba: “Kino kitango kya Watch Tower Bible and Tract Society of Pennsylvania, kutamba ku kwitabijibwa kwakyo mu 1884, kingilanga mwingilo wa mvubu mikata mu mānga ya ino yetu myaka. Nansha namino, i kingidilwa’tu kiyukene mungya bijila bya Leta kingidijibwa na ‘umpika wabinebine ne wamanwa’ ponso pokidi na bukwashi.”

Batutu Sydlik ne Jaracz i bashintulule mu mashikulu abo amba kupa kupelwe “umpika wabinebine ne wamanwa” kipango kyonsololo kya pano panshi kya Mfumwetu ke kijikapo kibwanya kulekela kano kabumbo ka umpika kupa bana-balume ba mu “mikōko mikwabo” babwenye bisakibwa biselwa kampanda bya buludiki. (Yoano 10:16) Kadi i kutupu buluji nansha bumo bwimanine pa Bisonekwa bwa kuningila’po amba batangidiji bonso nansha shi ani shi ani wa mu batangidiji ba bitango biyukene mungya bijila bya Leta bingidijibwa na Batumoni ba Yehova poso’nka bekale bene Kidishitu bashingwe-māni.

Tutu Barr walombwele bemvwaniki amba panopano ponka bamobamo ba mu Kitango Kyendeji kya Batumoni ba Yehova badi bengila bu batangidiji ne bengidi baimikile ku kusaka kwabo mingilo yobadi bengila mu mabilo a bitango bya mu États-Unis byobengidija kudi “umpika wabinebine ne wamanwa.” Kwatongwa batutu bangi bakulupilwe ba mu kibumbo kya mikōko mikwabo ba kwibapingakena.

Buno butyibi budi na kamweno mpata. Busa kushila ba mu Kitango Kyendeji kyaba kikatampe kya kuteakanya bidibwa bya ku mushipiditu ne kukwatakanya bisakibwa bikwabo bya ku mushipiditu bya banabetu basambakene ntanda yonso.

Ku mvuyo, mwendeji wa kupwila wasapwidile bemvwaniki bandi badi na nsangaji amba: “Nansha bino biselwa bishileshile biyukene mungya bijila bya Leta ne bya buludiki byobyapebwa batadi ba bwino, . . . abo bonso bengidilanga munshi mwa bwendeji bwa ku mushipiditu bwa Kitango Kyendeji. . . . Batwe bonso tulombela kudi Yehova etwesele pa bukomo botulonga mwa kimo mwanda wa kulonga kiswa-mutyima kyandi, pa mwanda wa ntumbo ne bulēme bwa dijina dyandi dikatakata.”