Kulwa na Bulanda—Le I Kisolo Kyobetutapile Kala?

BANANGI bapempula Kitango kya Bumo bwa Mizo mu New York City bamonanga Kyumba kya Kidye Kitala Busunga ne Mwikadilo wa bantu, babandila mapompi a mema ne a shinga ya mudilo ashilwe bitupu mu musaka wa pitapita. Kalombwe mwendeji ushintululanga’mba: “Uno musaka ‘wampikwa kupwa’ umonwanga bu kyelekejo kivuluja bantu amba mwingilo wa Kitango kya Bumo bwa Mizo wa kutala myanda ya busunga ne ya mwikadilo keupungapo; ne amba kukekala nyeke kintu kampanda kifwaninwe kulonga mwanda wa kulumbulula mushikatyilo wa bantu ntanda yonso.”

Eyo, kino Kidye i kipebwe mwingilo mufwaninwe wa kukankamika bantu bonso bekale na mwikadilo muyampe, ino umweka bu mwingilo keudi mpwilo. Kintu kisangaja i kyokya kyānene Yesu Kidishitu paādi wingila mwingilo pano panshi mu myaka katwa imbajinji K.K., amba: “Mushipiditu wa Yehova wangikadilako, ke-muntu wanshingile mani ngikale wakusapwila myanda-miyampe ku balanda.” (Luka 4:18) Lelo “myanda-miyampe” yaāsapwile i myanda’ka? I musapu wa Bulopwe unena’mba Yehova Leza, “nsakwa ya mufudilwe [udi] mu tusuwa,” ukabikika Yesu Kidishitu bu Mulopwe. Lelo buno Bulopwe bukalonga bika? Isaya wānene mu bupolofeto amba: “Yehova wa bibumbo ukatēkeja masobo a bintu binune a bantu bonso, ne a vinyu misāse, bintu binune biyule bya mani a mikondo, vinyu misāse mitōkejibwe to-o. Wapu kumininina lufu nyeke ne nyeke; ino Mfumwetu Leza ukapampula mipolo ku mapala onso.”​—Isaya 25:4-6, 8.

Lelo usakanga kuyuka myanda mivule ya mukalumbulwila Bulopwe bwa Leza “mushikatyilo wa bantu ntanda yonso,” ke kutupu kadi bulanda? Tala kunshi uyuke mwa kusokwela muntu uyukile kufundija, wa kwiya kukumona mwanda wa kukulombola bintu bivule bisamba Bible pa ino myanda.