Basapudi Ba Bulopwe Bafumika

India​—“Bumo mu Bantu Beshileshile”

“BUMO mu Bantu Beshileshile” i musaswilo mutumbe ulombola mwikadile bantu ba mu muzo wa India. Kutūla’ko bumo mu ino ntanda mikatampe idi na bibidiji, ndimi, mitōtelo, tubila, mivwadilo ne midīlo, byonso bishileshile, ke mwandapo munekene. Inoko bumo bwa uno muswelo i bumweke ku bilo bya musambo wa Batumoni ba Yehova mu India, nansha bengidi ba kwituma bengila’ko byobatambile mu matanda ne myaba pala pala ne kwisamba ndimi mivule mishileshile.

• Tala bidi kifwa kya Rajrani​—nsongwakaji utambile mu Punjab, ku bwikike bwa kutunduka ne kushika kwa India. Rajrani wadi ukifunda masomo, mulunda nandi wa mu kalasa waanza kwifunda Bible na Batumoni ba Yehova. Uno nsongwakaji washilula kulombola Rajrani myanda ya mu Bible. Byaadi kayukile Angele biyampe, Kiteba kya Mulami nakyo papo kekyashilwile kulupulwa mu Punjabi, wanena Rajrani nandi ekale kumukwasha’ko ku kumwalamwina myanda idi mu dipepala. Bintu byadi bitanga Rajrani mu Kiteba kya Mulami byashilula kumutenga bininge, nansha byadi bimukankaja bambutwile bandi, wafula ku kwendelela kumeso kufika ne ku kupāna būmi bwandi kudi Yehova Leza. Dyalelo wingilanga ku Betele ya India mwingilo umo onka wamufikije ku kuyuka bubinebine. Walamunanga mabuku a bwine Kidishitu mu Punjabi!

• Ivwana monka kifwa kya Bijoe, utambile ku kipindi kikwabo kya India​—mu bwikike bwa kunshi ne kushika kwa Kerala. Bijoe wapangilwe ku masomo a sekondele mwanda wa kupela kwikuja mu bisela bya kufwila ntanda. Papwile bisambo mu bidye bikatampe byafikije mutōtelo utōka ku bushindañani bwa kasekuseku, Bijoe wajōkele ku masomo. * Wakafunda ne ku inivelesite. Inoko, mwikadilo mubole waatene’ko wamufityija mutyima wandi wa mundamunda, walekela’o mu ka kwanza. Pano kadi na myaka dikumi ku Betele, unena’mba wamwena biyampe bivule mu kwikala umo wa mu kisaka kya Betele kikutyile umbumo, ino kya bantu beshileshile, kutabuka byonso byaadi wa kumwena mu kulondalonda masomo malamala.

• Ba Norma ne Lily kebadi na myaka 70 ne kupita kadi abo bonso i bakaji ba bishala myaka mivule. Umo ne umo kadi na myaka 40 ne kupita mu mwingilo wa kitatyi kyonso. Lily ke mwingile ku musambo kintu kya myaka 20 bu mwalamuni mu ludimi lwa Tamil. Norma wafwidilwe’tu mulumyandi, palāla myaka 13 wakatwela ku Betele. Bano bakaka i bifwa bilumbuluke bya bengidi bepāne bengila na mutyima umo, kadi badi na mushipiditu ukutyila kisaka kya Betele umbumo. Baswele kwisamba na bēni, kwikala pamo na bankasampe ba mu kisaka kya Betele, bebasekunwina nsangaji ya mu būmi bwabo bwa bwine Kidishitu. Bankasampe nabo bebeta ku byumba byabo kudya nabo ne kwibapa bukwashi bwibasakilwa. Bine, i bifwa bilumbuluke byabinebine!

Bano bengidi bengila pampikwa nsengwa i banekenye kwishila kuletanga nkalañani ne lupotopoto mu bifuko bivule, ino abo bengidilanga bakwabo umbumo bu ba mu kisaka kikutyile pamo kya Betele mu India.—Mitōto 133:1.

[Kunshi kwa dyani]

[Kifwatulo/Kutambile Kifwatulo pa paje 18]

Munyuma: Mountain High Maps® Copyright © 1997 Digital Wisdom, Inc.