Kikōkeji—Lelo I Bufundiji Bukatampe mu Bwanuke?

“BAMBUTWILE Basakanga Bana Badi na Bumuntu, Ke’nkapo Bana Bakōkele.” Uno i mutwe wa mwanda wadi pangala pa julunale. Uno lapolo mwīpi wadi mwimanine pa bwipangudi bwalongelwe mu Nuvele Zelande, bwalombwele amba enka “bantu 22 pa katwa mu balondolwele bo balangile amba bana bafwaninwe kufundijibwa kikōkeji ku njibo.” Bwipangudi bwasokwele kadi amba dyalelo bambutwile i betabije amba bana bafwaninwe kufundijibwa nakampata bintu pamo bwa mikadilo miyampe, bwanapabo ne kwiibidija kusela biselwa.

Mu ino myaka ya mwino ne kwisakila, ke kya kutulumukapo shi bantu bavule batalanga kikōkeji na diso dibi ne muswelo mwine okifundijibwa ku bana. Ino le kufunda kikōkeji mu bwanuke i kintu kya kala ke kityelewe? Lelo kikidi na mvubu kikokeja kufundijibwa bana amba bamwene’mo kamweno? Kupityidila, i muswelo’ka umwene Yehova Leza, Mwanziji wa mpangiko ya kisaka, kikōkeji kyabo ku bambutwile, ne i tumweno’ka tumotumo tumwenwanga’mo?—Bilongwa 17:28; Efisesa 3:14, 15.

“Binobi Byo Byoloke”

Mu myaka katwa imbajinji, mutumibwa Polo wātumīne kipwilo kya bwine Kidishitu kya mu Efisesa mukanda amba: “Bana, kokelai bambutwile mudi Mfumwetu: Binobi byo byoloke.” (Efisesa 6:1, BB) Nanshi buluji bubajinji bwa kino kikōkeji i kukwatañana kokikwatañene na musoñanya wa Leza wa bintu byoloke. Monka mwesambila Polo amba “binobi byo byoloke.”

Pa kino, tumona amba Kinenwa kya Leza i kidingakanye madingi a buswe a bambutwile na kintu kidyangulwe dyangi, “nsapi ya buntu ku mutwe obe, kadi ne nkano ku nshingo yobe,” ne bu kintu “kyakumutōkeja Mfumwetu ku mutyima.” (Nkindi 1:8, 9; Kolose 3:20) Ino kubulwa kikōkeji ku bambutwile i kintu kingi, mwanda kutwalanga muntu ku kupelwa na Leza.​—Loma 1:30, 32.

“Amba Umone Biyampe, Shē”

Polo i mutele byabuyabuya bikwabo bimwenwanga mu kikōkeji, amba: “Lemeka shobe ne inobe mwine kumo; (kyo kijila kibajinji kino kya pa mwanda-wamulao) amba umone biyampe, shē, ne myaka yobe īvule ya kwikala panopantanda.” (Efisesa 6:2, 3; Divilu 20:12) Lelo kikōkeji ku bambutwile kikokeja kukumwesha biyampe shē namani?

Dibajinji bidi, mwene bambutwile bobe i bakukudile, kadi ke bamone bintu bivule umbūmi? Penepo nansha byobamweka bu kebayukile bivule bya makompyuta ne bikwabo byomwifunda ku masomo, ino bayukile myanda mivule itala pa būmi ne pa mwa kulwila na bikambija bya umbūmi. Bankasampe ku wabo mutamba, kebaikele na bujalale mu milangwe yabo, mwanda kebatamine. O mwanda bakwatanga butyibi bwa bukidibukidi, divule na kulonda bakwabo bebatyinya mbavu, ku mfulo bekokela musala abo bene. Bible kabepelepo pa kunena’mba: “Bulembakane i bukutwe umutyima wa mwana.” Penepa i bwanga’ka bumusakila? “Kamama  ka madingi kakapangila’bo kulampe.”​—Nkindi 22:15.

Tumweno tutamba ku kikōkeji i tutabuke ne kipwano kya bambutwile na bana kine. Pa kusaka bantu bengile mingilo yendelela kumeso ne ilupula bipa, bafwaninwe kumvwañana, ako kumvwañana nako kulombanga kyaba kimo kwikala na kikōkeji. Kifwa mu busongi, mutyima unekena ne witaba pampikwa nsengwa ku bisakibwa ne malango a bakwabo o ubutulanga ndoe, bumo ne nsangaji, ke mutyimapo wa kaninga-mpo, mutyima mūmu, ehe. Mu kaji namo monka na monka, mwingidi wa kikōkeji ye wa mvubu mu busunga bo-bonso nansha mu mwingilo ulupula bipa. Mu mwanda utala bijila ne mbila ya Leta, kikōkeji kekikūlangapo muntu ku kupebwa mfuto kete, mhm, kimwepukijanga ne kumukinga ku bīka mu ludingo kampanda.​—Loma 13:1-7; Efisesa 5:21-25; 6:5-8.

Divule bankasampe bapela kukōkela balupusa bōnanga kibundi. Ino kwifunda kukōkela tamba mu bwanuke kubwanya kuleta mpalo mikatampe mu būmi bonso bwa muntu. Bine, i kilumbuluke mpata kufunda kikōkeji mu bwanuke!

Mpalo Mikatampe ya Kikōkeji

Kikōkeji kekiletangapo enka nsangaji mu kisaka ne tumweno tukwabo twa umbūmi, kiletanga ne kyalwilo kya kūbaka’po kipwano kya kamweno kakatampe kupita byonso​—kipwano kya muntu na Umpangi wandi. Yehova Leza ‘Umpangi Mukatampe’ ye “nsulo ya būmi,” kadi ye ufwaninwe kukōkelwa na batwe bonsololo ne pa mfulo.​—Musapudi 12:1; Mitōto 36:9.

Kishima “kukōkela” ne miswelo yakyo yonso itanwa misunsa 160 ne musubu mu Bible. Kadi, kudi misunsa tutwa na tutwa itelelwe bijila, ndudi, mbila, kutyiba mambo ne misoñanya ya Leza, byonso bino bilomba muntu ekale kukōkela. Bine, ketushilwepo mu kitonto, Leza umwene kikōkeji bu kisakibwa ku boba bonso bakimba kwitabijibwa na aye. Eyo, kikōkeji kidi na mvubu mu kutamija kipwano kyetu na Yehova. (1 Samwele 15:22) I kya bulanda, mwanda kibutwila kya muntu ke kikōkejipo, i kubulwa kikōkeji. Bible unena’mba: “Mifwatakanyo ya mutyima wa muntu i mibi’tu ne ku bwanuke bwandi kwine.” (Ngalwilo 8:21) Nanshi kwifunda kikōkeji ke kintupo kifwaninwe kwifunda enka mu bwanuke, ino i mu būmi bonso. Kino kyo kiletanga mpalo mikatampe.

Vuluka, mutumibwa Polo usonekele amba mbila ya kukōkela bambutwile idi na mulao umo pabidi, amba “umone biyampe, shē, ne myaka yobe īvule ya kwikala panopantanda.” Uno mulao i mubingijibwe na bino binene Nkindi 3:1, 2, amba: “Wami mwana kokavulaminwapo lufundijo lwami, ino mutyima obe ulame bijila byami; mwanda bikalunda kodi kulēpa kwa mafuku, ne myaka ya būmi, ne ndoe mine.” Mpalo mikatampe ku boba bonso bakōkela i kipwano kya kupwana kasuku na Yehova pano ne nyeke ne nyekeke mu ntanda impya ya ndoe.​—Kusokwelwa 21:3, 4.

[Bifwatulo pa paje 31]

Kikōkeji kiletanga kipwano kya nsangaji mu kisaka, ku kaji, ne na Yehova