Madyese a Bulopwe Nobe Ukokeja Kweselwa’o

POLO, mutumibwa mwine Kidishitu, wādi uyukile kwisamba ndimi mikatampe yādi inenwa mu yabo myaka’ya. Wāfundile masomo adingakene pamo na inivelesite mu ano mafuku. Byaādi mwanā kibundi mwine Loma, wādi na byepelo ne byabuyabuya bivule. (Bilongwa 21:37-40; 22:3, 28) Bino byonso byādi bikokeja kumwikadija mpeta kadi muntu mutumbe. Ino wānene amba: “Bino byonso byo nadi nanga bu kamweno, ino pano po ke ndi ne Kidishitu nebimone bu byampikwa kamweno. . . . Nebimone byonso’nka bwa bintya na’mba ngikale’nka ne Kidishitu bu kamweno kami.” (Fidipai 3:7, 8, MB) Mwanda waka Polo wēsambile uno muswelo?

Dibajinji Polo, wādi uyukene pa kala bu Solo mwine Tasusa, wādi upangapanga boba “ba mu dyodya dishinda,” kupwa wāikala ke mwitabije pa kumona kimonwa kya Yesu musanguke, mutumbijibwe ntumbo. (Bilongwa 9:1-19) Ku mutamba wa Polo, kyāmufikile paādi wenda ku Damakasa kyo kilomboji kekidipo ne mwa kutunina kilombola amba Yesu ye Meshiasa, Kidishitu, wālailwe, mulopwe wa Bulopwe bwālailwe amba bukāya’ko. Kadi kyāalamwine bintu bivule mu būmi bwa Polo, monka mwikilombwela binenwa byandi bya bukomo bidi kūlu’ku. Kushintulula ko kunena amba, byanena Polo namino, i bine wāalamukile pa mutyima, mwanda wādi muntu  wa bubinebine, wampikwa budimbidimbi.​—Ngalatea 1:13-16.

Mu Bible, kyubwa “kwalamuka pa mutyima” kyalamunwanga divule ku kyubwa kya Kingidiki kishintulula pa bute pa bute “kuyuka mungya kala” kwishidile na “kubadikila kuyuka.” Nanshi kwalamuka pa mutyima kwa muntu i kushinta milangwe, ngikadilo, nansha bitungo, kusumbula mashinda a kala amba ke mayampepo. (Bilongwa 3:19; Kusokwelwa 2:5) Kudi Polo, binkumenkume byaāmwene paādi mu dishinda dyenda ku Damakasa kebyāshelepo bu kwienga na kitumbuzaji bitupu nansha bu bino bitembaulwa dyalelo mu kanwa bitupu bu bimonwa bya ku mushipiditu. Ku mutamba wandi, kyādi kidyumu kimudyumuna amba lwendo lwandi lwa kala, lwa kwikala bitupu wakubulwa kuyuka Kidishitu, i lwendo lufwe. Wāyuka kadi amba pa kusaka amba amwene kamweno mu buyuki bwandi bupya butala padi Kidishitu, ufwaninwe kulonga kintu kampanda mwanda wa kusendulula lwendo lwandi lwa umbūmi.​—Loma 2:4; Efisesa 4:24.

Kwalamuka Kwāletele Madyese

Polo wādi kala uyukile bivule bitala padi Leza paādi ukidi umo wa mu katangotango ka Bafadiseo. Nkulupilo yabo yādi na mafilozofi ne na bisela bya bantu bivule. Bukomo ne bupyasakane bwa Polo byādi byakubulwa kwendela’mo, mwanda wa mfwatakani yobādi nayo pa mitōtelo ingi. Wādi ulwa na Leza, nansha byaādi ulanga amba ye aye waādi wingidila.​—Fidipai 3:5, 6.

Polo pa kutambula buyuki bwabinebine butala padi Kidishitu ne pa mwingilo waingila mu mpango ya Leza, wāmwene amba udi kumeso kwa butongi: Lelo wādi wa kushala Mufadiseo na kitenta kyandi kya bulēme’ni, nansha wādi wa kwalamuna būmi bwandi ne kushilula kulonga byobya byādi bilombwa mwanda wa kwitabijibwa na Leza? Bya dyese, Polo wātongele butongi boloke, mwanda wānene amba: “Ami nkifupo bumvu kusapula Myanda Miyampe, mwanda i bukomo bwa Leza bupandija bonso betabija, kubadikila ku Bayuda ke ku [Bangidiki].” (Loma 1:16, MB) Enka namino, Polo wāikala ke musapudi mupyasakane wa myanda miyampe ya Kidishitu ne ya Bulopwe.

Myaka mivule pa kupita’po, Polo wānena banababo bene Kidishitu amba: “Nkifwatakanyapo munda na’mba, napu kukwatako, mhm; ino i kimo kyonka kyo nonga, kuvulaminwa bintu bidi kunyuma, ne kobolola ku bintu bya kumeso, ningije ne kuningija konka ku kitūlo, kudi mpalo ya lwito lwa momwa mūlu lwa Leza mudi Kidishitu Yesu.” (Fidipai 3:13, 14) Polo wāmwenene mu myanda miyampe mwanda wālekele ku kusaka kwandi bintu byādi bimupalula kudi Leza, kalonda na mutyima umo bitungo bikwatañene na mpango ya Leza.

Lelo Nobe Ukalonga Bika?

Pakwabo ino myanda miyampe ya Bulopwe waivwene’yo enka panopano. Lelo lukulupilo lwa kwikala mūmi nyeke mu paladisa lukusangaja? Bine lufwaninwe’nka kukusangaja, mwanda batwe bonso twābutwilwe na mutyima wabila kwikala na būmi bwa ndoe ne mutyima-ntenke. Bible unena amba Leza watūdile “kitatyi kyakubulwa mpwilo” mu mityima yetu. (Musapudi 3:11) Nanshi i kyendele’mo kwikala na lukulupilo amba dyakadilwe kantu dino’di bantu bakekalanga na būmi bwa nyeke mu ndoe ne nsangaji. Kino kyo kintu kitupa myanda miyampe ya Bulopwe.

Inoko pa kusaka luno lukulupilo lwikale lwabine kodi, ufwaninwe kukola ne kutana byobya binena’po myanda miyampe. Mutumibwa Polo wādyumwine amba: “Mutompe [banwe bene] kiswa-mutyima wa Leza, ne mwikadile bulumbuluke, kuloelelwa, ne bu-bwaninine monka.” (Loma 12:2) Nanshi shi ubapu kwikala na buyuki ne kwivwanija, ufwaninwe kutonga butongi pamo bwa Polo.

Ku mutamba mukwabo, padi kodi kala na nkulupilo kampanda itala pa būmi bwa kumeso. Vuluka amba Solo wādi kala na milangwe yandi itala pa kiswa-mutyima kya Leza kumeso kwa kwikala mutumibwa Polo. Lelo nobe wabulwa’po kubandaula myanda moikadile, pa kyaba kya kutengela Leza akusokwele’yo mu kingelengele? Wiipangule abe mwine amba: ‘Lelo binebine ami uno ndyukile kiswa-mutyima kya Leza kitala pa bantu ne ntanda? Le ndi na bukamoni bubingija nkulupilo yonkulupile? Lelo ayo ino shi nabandaula’yo kukwatañana na Bible, Kinenwa kya  Leza, ikokeja kushala yabine?’ I kutupu ne kyojimija kine shi ubandaule nkulupilo ya mutōtelo obe mu uno muswelo. Na bubine ufwaninwe kulonga kino, mwanda Bible witusoñanya’mba: “Tompai bintu byonso; mukwatyijei kyokya kilumbuluke.” (1 Tesalonika 5:21) Ne kadi, mwene kwitabijibwa na Leza kyo kintu kya mvubu kutabuka?​—Yoano 17:3; 1 Temote 2:3, 4.

Bendeji ba mitōtelo bakokeja kwitutandila būmi bwa nyeke. Ino ketukamonepo madyese a Bulopwe bwa Leza, poso’nka uno mulao wikale mwimanine pa bufundiji bwa Bible. Yesu wādyumwine mu bwandi Busapudi bwa pa Lūlu bushele busekununwa amba: “Ke bonsololopo bantu bakuntela’mba; Mfumwami! Mfumwami! bakatwele umbulopwe bwa mūlu, ehe, poso enka wakulonga kiswa-mutyima wa Tata udi mūlu.”​—Mateo 7:21.

Ivwana mwanda ukoma Yesu pano, kulonga kiswa-mutyima kya Shandi kyo kintu kine kiketupeja madyese a Bulopwe bwa Leza. Mu muneneno mukwabo, mumwekelo wa panja wa bwine Leza ke aopo ulengeja twitabijibwe na Leza. Mwanda Yesu wābwejeje’ko amba: “Mu dyodya difuku bangi bakanena’mba; Abe Mfumwetu! Abe Mfumwetu! ketwadipo tufumika mu dijina dyobe, a? Kadi mu dijina dyobe ketwadipo tupanga bademona, a? Kadi mu dijina dyobe ketwadipo tulonga byonka bikata? Ino nami nkebatentulula’mba: Mhm! Ami nkimuyūkilepo, mfundukei papo bānwe bakulonga bubi.” (Mateo 7:22, 23) I kimweke patōka amba kintu kya mvubu i kujingulula shi binebine twivwanije myanda miyampe ya Bulopwe byabinebine, kupwa twalongela monka moinenena.​—Mateo 7:24, 25.

Bukwashi Budi’ko

Pano ke myaka katwa ne kupita, Batumoni ba Yehova basapula’nka kusapula myanda miyampe ya Bulopwe bwa Leza. Bakwasha bantu na mabuku ne na binenwa bya ku kanwa kujokoloka ntanda yonso amba nabo bamone buyuki bwabinebine bwa buno Bulopwe, madyese obukaleta, ne kya kulonga boba basaka kweselwa’o.

Tukwita nobe wivwane musapu usapula Batumoni ba Yehova. Shi witabije myanda miyampe ne kulongela monka, ukokeja nobe kweselwa madyese makatampe mu ano mafuku ne mu mafuku āya kumeso pakaludika Bulopwe bwa Leza ntanda yonsololo.​—1 Temote 4:8.

Alwila’ko pakidi mema mu manwi pano, madyese a Bulopwe bwa Leza keadi pabwipi!

[Bifwatulo pa paje 7]

Batumoni ba Yehova basapulanga myanda miyampe ya Bulopwe bwa Leza na mabuku ne na binenwa bya ku kanwa