Myanda Miyampe ya Bulopwe—Lelo I Myanda’ka?

Mwaka wadi’mo, mu matanda 235 kujokoloka ntanda yonso, bantu 6 035 564, bankasampe ne batame, bapityije nsaa 1 171 270 425 mu kwisamba ino myanda na bakwabo. Kutentekela pa kusapula kobasapwile’yo ku kanwa, bapele bantu mabuku midiyo 700 ne kupita, mwanda wa kwiiyukanya ne kushintulula’yo. I bapāne tununu ne tununu twa mabande a kasete ne a video mwanda wa kusambakanya’yo. Lelo ayo mine i “myanda’ka”?

I“MYANDA” miyampe ya Bulopwe bwa Leza. Bine kashā, mu mānga yonso ya bantu, “Myanda Miyampe ino’i ya Bulopwe” yadi keyasapwilwe pamo na motumwena dyalelo.​—Mateo 24:14, MB.

Boba bengila uno mwingilo wa kusapula ne kufundija ntanda yonso i bengidi ba kwituma. Mungya mumweno wa bantu, bamweka bu kebafundilepo bintu bivule kufikila pa ditabula dya kwingila uno mwingilo. Penepo i kika kibapēle bukankamane ne kubwanya mu mwingilo wabo? I bukomo budi na myanda miyampe ya Bulopwe kyo kintu kine kikatampe, mwanda i misapu ya madyese akapungulwilwa bantu. Ano o madyese abila bantu bonso​—būmi bwa nsangaji, bwanapabo ku masusu a kubulwa kwa lupeto, kwa umbikalo muyampe, kwa ndoe ne mutyima-ntenke, ne kyokya kyokebabwanyapo kulangila​—būmi bwa nyeke! Ino yo myanda miyampe ku boba bonso bakimba kitungo ne buluji mu būmi bwabo. Eyo, ano madyese onso ne makwabo’po abwanya kukweselwa ne abe enka shi witabije ne kwitaba senene ku busapudi bwa myanda miyampe ya Bulopwe.

Lelo Buno Bulopwe I Bulopwe’ka?

Le Bulopwe bwine busapulwa bu myanda miyampe i Bulopwe’ka? I Bulopwe bobafundije bantu midiyo ne midiyo kulombela na bino bishima byobebidile amba: “Abe Tata wetu wa mūlu, dijina dyobe dijile kijila. Bulopwe bobe bufike. Muswidile mutyima obe mūlu ne panopantanda pene i monka.”​—Mateo 6:9, 10.

I Bulopwe bwānenene’po Danyele mupolofeto Muhebelu myaka tutwa 25 kunyuma paāsonekele’mba: “Leza wa mūlu ukemika bulopwe kebukōnakanibwapo nansha patyetye, nansha bulopwe bwine bwabo kupityila ku bantu bangi, ehe; ino bukatyumuna bipindibipindi ne kukubija malopwe ano’a onsololo, kadi bukemananga nyeke.”—Danyele 2:44.

Nanshi ino myanda miyampe i myanda ya Bulopwe, umbikalo wa Leza ukafundula bubi bonso ebiya ke kubikadila ntanda yonsololo mu ndoe. Bo Bulopwe bukajokeja mpango imbajinjibajinji ya Umpangi itala bantu ne ntanda.​—Ngalwilo 1:28.

 “Bulopwe bwa mu Madiulu Bubafwena”

Kintu kya myaka 2 000 kunyuma, myanda miyampe ya Bulopwe yāshilwilwe kusapulwa na mwana-mulume wādi na mumwekelo ne miswelo yālengeje bantu bamute mutyima. Uno mwana-mulume i Yoano Mubatyiji, mwanā ba Zekadia, kitobo Muyuda, ne Edisabeta. Yoano wādi uvwele mutwelo wa moya a ngamedia, ne kikaya kya kiseba mu kifuka, pamo bwa mupolofeto Ediya, kyelekejo kyandi. Ino musapu wandi o wākokele milangwe ya bavule. Wādi wela lubila’mba: “Alamukai pa mutyima, mwanda Bulopwe bwa mu madiulu bubafwena!”​—Mateo 3:1-6, MB.

Bano bantu bādi bemvwana byādi bisapula Yoano i Bayuda, bādi betela bu batōtyi ba Yehova, Leza wabine. Abo bonso muzo mutuntulu bāpelwe Bijila bya kipwano kupityila kudi Mosesa kintu kya myaka 1 500 kunyuma. Kadi bādi bakidi na tempelo ya dyangi mu Yelusalema, mobādi bela bitapwa mungya mwādi munenena Bijila. Bayuda bādi basumininwe amba butōtyi bwabo bo boloke ku meso a Leza.

Ino pa kwivwana Yoano, bantu bamo bāmona amba mutōtelo wabo keukidipo na mobādi balangila. Bibidiji ne mafilozofi a Bangidiki byādi ke bitwele kala mu bufundiji bwa mutōtelo wa Bayuda. Bijila byātambwilwe kudi Leza kupityila kudi Mosesa byādi ke binyengakanibwe, pakwabo ke byonwe na nkulupilo ne bisela bya bantu. (Mateo 15:6) Bavule kebādipo bakitōta kadi Leza mwasakila, mwanda bādi ke balubijibwe kala na bendeji ba mitōtelo ba mityima myūmu, bampikwa lusa. (Yakoba 1:27) Bādi bafwaninwe kwalamuka pa mutyima pangala pa bubi bobālubile Leza, bājilula Bijila bya kipwano.

Mu kitatyi’kya, Bayuda bavule bādi batengele kwiya kwa Meshiasa, Kidishitu, wālailwe, o mwanda bamo bādi beipangula pangala pa Yoano amba: “Shi i Kidishitu, shi ani?” Ino Yoano mwine wāpela amba ke ayepo, wēbaludikila kudi muntu mukwabo waātelele amba: “Monji wa bikwabilo byandi nkifwaninwe kukutulula’[o].” (Luka 3:15, 16) Yoano pa kulombola Yesu ku bandi bana-babwanga wānene amba: “A! talaipo bidi ku Mwana-mukōko wa Leza wakushikuna bubi bwa [n]tanda.”​—Yoano 1:29.

Bine ino yādi myanda miyampe, mwanda Yoano wādi ulombola bantu bonsololo dishinda ditwala ku būmi ne ku nsangaji​—ke Yesu kadi, “wakushikuna bubi bwa [n]tanda.” Bantu bonso batambile kudi Adama ne Eva i babutwilwe mu būmi bubikalwe kala na bubi ne lufu. Loma 5:19 ushintulula’mba: “Monka mwikadile mifutululo ya muntu umo [Adama] ībalengeja bangibangi bupya-mambo, i yenka nabya ne pa kikōkeji kya muntu umo [Yesu] bavule bene bakalengejibwa boloke.” Yesu ‘wāshikwine bubi’ pamo bwa mwanā mukōko welelwe bu kitapwa, wāshinta ngikadilo ya bulanda yādi ikele’mo bantu. Bible ushintulula’mba: “Mpalo ya bubi i lufu, ino kyabuntu kya Leza i būmi bwa nyeke [kupityila kudi] Kidishitu Yesu Mfumwetu.”​—Loma 6:23.

 Yesu muntu mubwaninine​—muntu mukatakata wa kasha ne kashele—wāshilwile kusapula myanda miyampe. Nsekununi ya Bible idi mu Mako 1:14, 15 (MB) itulombola’mba: “Yoano paadi ke mukutwe kala, Yesu waendele mu Ngadilee, kasapula Myanda Miyampe ya kwa Leza, unena’mba: ‘Kitatyi kitungwe kibafika, Bulopwe bwa Leza bubafwena. Alamukai pa mityima mwitabije Myanda Miyampe.’ ”

Boba bāitabile senene ku musapu wa Yesu, bāitabija myanda miyampe, bāeselwe bininge. Yoano 1:12 unena’mba: “Nanshi ino mo baikadile bonso bavule bakumulubula [Yesu] boba bo bapelwe na aye bu-bāna ba Leza: ke boba bakwitabija mu dijina dyandi.” Bāikala ke bana ba Leza, ba kukapalwa mpalo ya būmi bwa nyeke.​—1 Yoano 2:25.

Inoko, mpalo ya kweselwa madyese a Bulopwe keyādipo ya kukadikila’nka ku ba mu myaka katwa imbajinji. Monka motwanenena’kyo kala, myanda miyampe ya Bulopwe bwa Leza isapulwanga ne kufundijibwa dyalelo ntanda yonso ikelwe na bantu. I byabine, madyese a Bulopwe akikimbilwa ba kweselwa’o. Lelo ufwaninwe kulonga bika nobe umone kweselwa ano madyese? Kishinte kilonda’ko kisa kushintulula.