Kisaka kya Ntanda Yonso kya Bana na Bana Bekwatakanya

KONSO koela meso kudi bantu. Bavule ke banunu, bakwabo balemane, ne pa kwenda pene bikole. Koku bana-bakaji badi na memi, koku balume ne bakaji bansongwanzele bongwidile na bana batyetye bobalelele. Abo bonso i bapando (balefije)​—bana-balume, bana-bakaji, ne bana​—banyema mavita alwibwa mwabo, bimpengele bya ntanda, nansha bimbidikita bikwabo bibalengeja bashiye mobo abo kebakakimbe kinyemeno mu ntanda-bene. Bamo bavilulwanga divulevule, badi pano ke popa. Pobakishilulashilula kunyema, shi divita, shi kimpengele, bakumbulanga tubintu pala pala twa mu njibo, baungwija ne bana mwa kunyemena mu kifuko mobakafyama senene. Kupwa, shi bantu abashikata ku matwi talala, bapando bavule bajokelanga mwabo kukobakulula mobo abo mwa kushilwila būmi dipya.

Tamba myaka mivule, ntanda ya Répblique Centrafricaine i mishitule bibelo byayo kasha bishitulwa mwanda wa kutundaila bapando ba matanda mavule. Panopano, bantu tununu ne tununu, kubadila’mo ne Batumoni ba Yehova, banyemene divita mu ntanda ya République Démocratique du Congo, bakapengakana mu République Centrafricaine mwadi’ko bidi talala.

Banabetu Baile Kwibakūkila

Batumoni ba mu République Centrafricaine bamwene kulongolola mwingilo wa kwabanya bya bukwashi bu madyese. Bateakanya bisakibwa bya banabetu bene Kidishitu badi bāya. Dibajinji, bapando badi bafikila ku mobo a banababo, ino kibalwa pa kwenda kuvula, byamweka patōkelela amba kufwaninwe kuteakanibwa mpangiko mikatampe. Mobo a Bulopwe amo aalamunwa ke mwa kulāla. Batumoni ba kibundi bepāna’ko na mingilo ya kutweja mudilo wa nshinga, benda bakwika mapompi a mema ne kwela shima panshi mwa kulādila’mo beni. Bapando nabo bekwata’ko pamo na banababo ba kibundi kwingila mingilo ya kulongolola byumba bya bukidibukidi mwa kulāla. Kwateakanibwa mpangiko ya kupwila konso kwa bwine Kidishitu mu Dingala, amba boba bāya bamone mwa kudila bidibwa bya ku mushipiditu bipāna būmi. Kwingidila pamo kwa Batumoni ba kibundi ne bēni kwalombwele amba bu bana na bana bwabo busambakene kujokoloka ntanda yonso i kintu kyabine.

Bisaka bya bapando kebyadipo divule bifika kya pamo. Kyaba kimo, ba mu kisaka bapalankanibwe badi bakakumankena pamo’nka ke ku kifikilo. Mulongo wa majina a boba badi  bafika babwane wadi ulamibwa ku Njibo ne Njibo ya Bulopwe. Ino kwadi ne mpangiko ya kuyuka kudi boba babudilwe’ko. Bilo bya musambo bitala mwingilo wa Batumoni mu ino ntanda byadi bituma myotoka isatu difuku ne difuku ya kukasambakana Batumoni badi bakidi mwishinda ne kukakimba boba balubile mashinda. Ino myotoka yadi na kiyukeno kikatampe kya kwiiyukila’po, kilembe amba “WATCH TOWER​—Batumoni ba Yehova.”

Langa’po bidi nsangaji yasangele kisumpi kya bana basamba-babidi bapando badi bakalañane na bambutwile babo pa kumona motoka wa Batumoni ba Yehova. Banyemēne ponka na ponka ku motoka lubilo kukeyukanya bu Batumoni. Banabetu bebasela mu motoka, baenda nabo ku Njibo ya Bulopwe kobakebakumankenye dipya na bisaka byabo.

Lelo i bika byakweshe bano bene Kidishitu banekenye ino ngikadilo, kadi ke musunsa umopo, i misunsa mivule? I kikulupiji kyobakulupile na kusumininwa amba tudi mu mafuku a mfulo monka mokyālailwe mu Bisonekwa Bikola.​—2 Temote 3:1-5; Kusokwelwa 6:3-8.

Inoko bayukile amba panopano ponka Yehova Leza ukapwa mavita, mushikwa, bukalabale ne ñuma. Bupando bukashala ke nzovu lwano bitupu. Pano’ko bidi, kukwatañana na madingi a mutumibwa Polo adi mu 1 Kodinda 12:14-26, Batumoni ba Yehova baloñanga buninge bwa kwikwatakanya abo bene na bene. Nansha byobakalañanibwe na minonga, na mikalo ya matanda, na ndimi, nansha na bula bwa kobashikete, inoko i bete mutyima bininge, o mwanda bapelakananga kukakūkila bakwabo shi abatanwa na mwanda.​—Yakoba 1:22-27.

[Kalata pa paje 30]

(Pa kuyukila’ko bikwabo, tala dibuku)

AFRIKA

République centra-fricaine

République démocratique du Congo

[Kutambile Kifwatulo]

Mountain High Maps® Copyright © 1997 Digital Wisdom, Inc.

[Bifwatulo pa paje 30]

Mobo a Bulopwe asatu aingidijibwe bu bitundailo

[Kifwatulo pa paje 31]

Mampishi aubakilwe ponka na ponka

[Kifwatulo pa paje 31]

Badi bāya milwi na milwi

[Bifwatulo pa paje 31]

Ne kubutulwa ne kwikadidila bapando