Lama Nsangaji Yobe mu Mwingilo wa Yehova

“Sepelelai nyeke mudi Mfumwetu; kadi nkemunenanga dikwabo na’mba, sepelelai.”​—FIDIPAI 4:4.

1, 2. I muswelo’ka wabwenye tutu umo ne ba mu kisaka kyandi kulama nsangaji yabo nansha byobajimije byonso byobadi nabyo?

 YAKOBA, mwine Kidishitu wa myaka 70 wa mu Sierra Leone, waingile na kininga mu būmi bwandi bonso. Langa’po bidi nsangaji yaadi nayo pa kubwanya lupeto lupota njibo myenzankane ya byumba biná! Yakoba ne kisaka kyandi pa kupwa kuvilukila’mo kitatyi kityetye, divita dyatwela mu yabo ntanda, njibo yabo yaonakanibwa fututu. Bajimije njibo, ino kebajimijepo nsangaji yabo. Mwanda waka tunena namino?

² Mwanda Yakoba ne ba mu kisaka kyandi badi batele mutyima ku bintu byashele, ke ku bintupo byajimine. Yakoba ushintulula’mba: “Nansha ke mu bitatyi bya nzuba, twadi tupwila, tutanga Bible, tulombela pamo, ne kwiabila na bakwetu tutyetye totwadi nato. Twabwenye kulama nsangaji yetu mwanda twadi tutele mutyima ku kipwano kya kutendelwa kyotupwene na Yehova.” Bano bene Kidishitu bakikōkeji baendelele na ‘kusangala’ mwanda mityima yabo badi  batele’yo nakampata ku dyese dine dikatampe mu madyese obeselwe, dya kuloeja kipwano kyabo kya kasuku na Yehova. (2 Kodinda 13:11) Bine, ngikadilo yabo ya bulanda keyadipo ipēla kūminina. Ino kebalekelepo kusangala mudi Yehova.

3. Bene Kidishitu babajinji bamo bālamine nsangaji yabo namani?

³ Bene Kidishitu babajinji bātenwe na matompo pamo na ano atene ba Yakoba ne kisaka kyandi. Ino mutumibwa Polo wāsonekele bino binenwa ku bene Kidishitu Bahebelu amba: “Ne po bayete bintu byenu, mwadi’nka ne nsangaji pa kwibijimija.” Kupwa Polo wāshintulula nsulo kwādi kutamba nsangaji yabo amba: “Muyukile’mba mudi kala ne bupeta bwa nyeke butabukile kunengela.” (Bahebelu 10:34, MB) I bine, bano bene Kidishitu ba mu myaka katwa imbajinji bādi na lukulupilo lukomo. Bādi batengele na kikulupiji kutambula kintu kyokebakayatwapo​—“kilukwa kya būmi” kekifumbapo, mu Bulopwe bwa mūlu bwa Leza. (Kusokwelwa 2:10) Dyalelo, lukulupilo lwetu lwa bwine Kidishitu​—lwikale lwa kwenda mūlu nansha lwa kwikala pano panshi​—lukokeja kwitukwasha tulame nsangaji yetu nansha ke mu byamalwa.

“Byo Mudi ne Lukulupilo, Sangalai”

4, 5. (a) I kika kinenenwa amba madingi obādingile bene Loma kudi Polo amba “byo mudi ne lukulupilo, sangalai” ādi madingi mafike’po kobadi? (b) I bintu’ka bikokeja kufikija mwine Kidishitu ku kujimija luno lukulupilo?

⁴ Mutumibwa Polo wākankamikile banababo betabije ba mu Loma ‘kusangala mu lukulupilo’ lwa kukekala na būmi bwa nyeke. (Loma 12:12, MB) Ano ādi madingi mafike’po ku bene Loma. Kepāpityilepo ne myaka dikumi mine na pēbatumine Polo mukanda, bātanwa na kupangwapangwa kusansa mutyima, bamo bāfwa lufu lwa kumweshibwa malwa mungya lubila lwa Mbikavu Néron. Lwitabijo lwabo mudi Leza wa kwibapa kilukwa kya būmi kyaēbalaile lo lwādi lwibapa bukomo bwa kutyumwina mu manwi masusu abo. Lelo batwe netu ba dyalelo?

⁵ Byotudi bene Kidishitu, netu tutengele amba dyakadilwe kantu dino’di tukapangwapangwa. (2 Temote 3:12) Kadi tuyukile amba “kitatyi ne myanda yampikwa kulaya” bifikilanga batwe bonso. (Musapudi 9:11, NW) Bīka bikokeja kupitula muntu otuswele. Misongo ya lufu ikokeja kupitula mbutwile nansha mulunda netu wa pa mutyima. Wivwane tulame lwetu lukulupilo lwa Bulopwe mu mityima yetu, nabya būmi bwetu bwa ku mushipiditu kebukekalapo mu kyaka potuponenwa na ano matompo. O mwanda tufwaninwe kwiipangula’mba, ‘Lelo ami uno “nsangele mu lukulupilo”? Le i misunsa inga yonangulukanga pa luno lukulupilo? Paladisa ikāya’ko, le neimwene bu ikekala’ko binebine? Lelo nemonanga kala bwa ami udi’mo? Le nakisangedile myanda ya kufika kwa mfulo ya ino ngikadilo ya bintu pamo na monadi nsangedile’yo ponashilwile kwifunda bubinebine?’ Kino kipangujo kya mfulo kifwaninwe kuta’ko milangwe bininge. Mwanda waka? Mwanda shi tudi mu maloa, bafuke ku makasa, tushikete mu ntanda mutyepele bulanda, mavita, bipupo bya nzala ne bimpengele bya ntanda, tubwanya​—mu kino kitatyi​—kulengwa’ko amba tusakilwa ntanda impya ya Leza ilailwe.

6. (a) Ba Polo ne Shilasa pobāsusukile byamalwa, lelo milangwe yabo yādi itele ku bika? (b) I muswelo’ka ubwanya kwitukankamika kifwa kya ba Polo ne Shilasa dyalelo?

⁶ Polo wādingile kadi bene Loma amba: ‘Ūmininai mu byamalwa.’ (Loma 12:12) Polo kādipo widilwe byamalwa. Dibajinji wāmwene bidi kimonwa kya mwana-mulume umwita amba “abukila kuno ku Masedonya” wiye ukwashe bantu, nabo bayuke Yehova. (Bilongwa 16:9) Penepo Polo pamo ne Luka, ne Shilasa ne Temote bāabukila mu Bulaya. Lelo i bika byādi bitengele bano bamishonele bapyasakane? I byamalwa! Pa kupwa kusapula mu Fidipai, kibundi kya mu Masedonya, ba Polo ne Shilasa bākupilwa nsonde ne kwelwa mu kifungo. I kimweke patōka amba bekadi ba mu Fidipai kebādipo’nka bapela musapu wa Bulopwe​—ino bādi kadi balwa nao byamalwa. Lelo kufulamukilwa na myanda uno muswelo kwājimijije bano bamishonele bapyasakane nsangaji yabo? Mhm. Pa kupwa kukupilwa ne kwelwa mu kifungo, kubwipi na “pa bukata bwa bufuku baPolo ne Shilasa balombele, baimba ne ñimbo ya [kutendela] Leza.” (Bilongwa 16:25, 26) Eyo, bikupilwa bisansa nabya kebyāpelepo ba Polo ne Shilasa nsangaji, ino ke abyopo byādi bitele’ko bano bamishonele babidi mutyima.  Milangwe yabo yādi imanine padi Yehova ne mu muswelo waādi wibesela. Ba Polo ne Shilasa ‘bāūminine byamalwa na nsangaji,’ bāshila banababo ba mu Fidipai ne ba kukwabo kifwa kilumbuluke kya kulonda.

7. Mwanda waka mu milombelo yetu tufwaninwe ne kufwija’ko?

⁷ Polo wāsonekele amba: “Mwipanei mu milombelo.” (Loma 12:12, MB) Lelo nobe ulombelanga pofikilwanga na bintu bizumbijazumbija mutyima? Lelo ulombelanga pangala pa bika? Padi utelanga makambakano kampanda ne kulomba Yehova akukwashe. Ino ubwanya ne kutweja’mo binenwa bya kufwija’ko pangala pa madyese oeselwe. Nansha shi tubatanwa na makambakano, tukokeja ‘kusangala mu lukulupilo’ shi tulanguluka pa buyampe bwa Yehova kotudi. Davida, wādi na būmi bwa makambakano onkaonka, wāsonekele amba: “Abe Yehova Leza wami bilongibwa byobe byo walongele bitendelwa i bya ntanda ne ntanda; kadi ne mifwatakanyo yobe nayo īdi padi bātwe: Ke[kudipo muntu nansha umo ubwanya kudingakanibwa na] abe; shi nswele kusapula’byo ne kwisamba’byo, longa, yō! i [bitabuke kuvula byonkibwanyapo kubala].” (Mitōto 40:5) Netu shi tulanguluka kyaba ne kyaba pa madyese mavule obetwesela kudi Yehova, pamo na mwādi mulangulukila Davida, ketukabulwepo kusangala.

Tūkija Mutyima

8. I kika kikwashanga mwine Kidishitu ekale nyeke na nsangaji patanwa na kupangwapangwa?

⁸ Yesu wākankamikile balondi bandi kutūkija mutyima ponso pobafikilwa na matompo meshileshile. Amba: “Dyese dyenu bānwe nenu shi bantu bakemunene, ne kwimupangapanga, kadi ne kwimubepela bya bubela pa mwanda wa amiwa uno.” (Mateo 5:11) Le i buluji’ka bwa kusangela mu ngikadilo ya uno muswelo botudi nabo? Bukomo bwetu bwa kukomena matompo i bukamoni bulombola amba mushipiditu wa Yehova udi netu. Mutumibwa Petelo wālombwele banababo bene Kidishitu ba mu oa mafuku amba: “Wivwane munenenwe bibi pa mwanda wa dijina dya Kidishitu, nankyo mwi bakatōkwe; ke-muntu [m]ushipiditu wa ntumbo ne wa Leza ushikete padi bānwe.” (1 Petelo 4:13, 14) Yehova, kupityila ku mushipiditu wandi, uketukwasha tūminine, kadi mu uno muswelo, tukalama nsangaji yetu.

9. Lelo i bika byakweshe banabetu bekale na buluji bwa kusangela pobakutyilwe mu buloko pangala pa lwitabijo lwabo?

⁹ Nansha shi tudi mu ngikadilo ya malwa, tudi nyeke na buluji bwa kusangela. Mwine Kidishitu utelwa bu Andolofu wemwenine kino kintu. Ushikatanga mu ntanda mwadi mukankajibwe mwingilo wa Batumoni ba Yehova mu bula bwa myaka mivule. Andolofu ne bapwani nandi babala-banga bakwetwe, batyibilwa nsambu ya kukutwa  mafuku mavule mu buloko mwanda bapelele kutuna nkulupilo yabo imanine pa Bible. Būmi bwa mu buloko ke būmipo bupēla, ino ba Andolofu ne bakwabo badi na buluji bwa kufwijija’ko Leza pamo’nka bwa ba Polo ne Shilasa. Buloko bwabo, monka mobanene’kyo abo bene, bwebakweshe mpata baikala na lwitabijo lukomo, batamija ne ngikadilo ya mvubu ya bwine Kidishitu, kifwa mutyima wa kupāna, kanye, ne kisanso kya bu bana na bana. Badi balonga shi mukutwa umo watambula kivwe kyobamutumīne kwabo, nandi wapa’ko banababo betabije bintu byadi mu kivwe’mwa, bine, badi bamona bino bintu bu kyabuntu kitambile kudi Yehova, Umpāni mukatakata wa “byonso byakupanwa bilumbuluke, ne byabuntu bibwane.” Bilongwa bya kanye bidi namino byadi bileta nsangaji kudi yewa upāna ne ku boba bene bapebwa. Kukutwa mu buloko kwadi kulangilwa bu ko kutyumuna lwitabijo lwabo ko kwaalamukile ke kwa kwibakomeja ku mushipiditu!​—Yakoba 1:17; Bilongwa 20:35.

10, 11. I muswelo’ka wanekenye kaka umo bisambo kebidi mpwilo byamufikije ne ku kukutwa kitatyi kilampe?

¹⁰ Ella, wikalanga mu ntanda mwadi mukankajibwe mwingilo wa Bulopwe pano kepadi myaka mivule, wakutyilwe pangala pa kusapwila bakwabo lukulupilo lwa bwine Kidishitu. Myeji mwanda mituntulu, wipangulwa’nka kwipangulwa ku kisambo kekidi mpwilo. Ku mfulo waletwa mu kīmu, bamutyibila nsambu ya kwelwa mu buloko mwakubulwa batōtyi bakwabo ba Yehova. Papo Ella wadi ukidi na myaka 24 kete.

¹¹ Bine, Ella kadipo utengele kujimija myaka yandi yonso ya busongwakaji mu kaso. Ino kadipo na muswelo wa kushinta ngikadilo yamutene, penepa watonga kushinta’ko mumweno  wandi. Washilula kumona kaso bu mwaba wandi wa kupāna’mo bukamoni. “Mwingilo wa busapudi wadi’mo mukatampe,” ye aye unena, “o mwanda myaka yapityile lubilo bininge.” Myaka itano pa kupita’po, Ella wajokejibwa mu kisambo monka. Pa kumona amba kaso kekatyumwinepo lwitabijo lwandi, badi bamusambija bamunena’mba: “Ketukukutululapo; mwanda kwashintyile.” “Ami kendi mushinte!” ye Ella ulondolola na kusumininwa. “Pano kendi na mutyima mufukate kutabuka ponatwelele dibajinji mu buloko, lwitabijo lwami pano ke lukomo mpata kutabuka pabajinji!” Kupwa wabweja’ko amba: “Shi mubapele kunkutulula, nkashala monka kufika ne pakamona Yehova amba i biyampe anyongolole.” Bine, myaka itano ne kipindi yalēle Ella mu buloko keyamujimijijepo nsangaji yandi! Wafundile kuloelelwa mu ngikadilo yo-yonso yaadi’mo. Lelo nobe wabulwa’po kuboila ñeni kampanda ku kifwa kyandi?​—Bahebelu 13:5.

12. Le i bika bikokeja kupa mwine Kidishitu ndoe ya mutyima mu ngikadilo mikomo?

¹² Kokilanga amba Ella wadi na kyabuntu kya pa bula kyadi kimupa bukomo bwa kunekenya bikambija byamutene. Ella unena pangala pa kitatyi kya bisambo byaasambile myeji mivule kumeso kwa kutyibilwa nsambu amba: “Nadi nesuma meno, nzakala moyo pamo bwa musolwe obazakaja.” Inoko Ella wadi na lwitabijo lukomo mudi Yehova. Wadi uyukile kukulupila mwadi. (Nkindi 3:5-7) O mwanda pano umona Leza bu muntu udi’ko binebine kupita’ko mwaadi umumwena mu myaka ya kunyuma. Ushintulula’mba: “Kyaba kyonso kyonadi ntwela mu kyumba kya bisambo, nandi ngivwana ndoe īngiya pondi. . . . Myanda poyadi ikoma, ndoe nayo po pene yavudila’ko.” Yehova ye wadi nsulo ya ino ndoe. Mutumibwa Polo ushintulula’mba: “Kemukizumbazumba, nansha pamo pene; ino mu byonso byo musaka muyūkije’byo kudi Leza monka mu kulombela, ne mu kumwisashilapo, ne kumufwija ponka. Ino ndoe ya Leza, ya kutabuka ñeni yonso, īkalama mityima yenu, ne kufwatakanya kwenu kwine kumo mudi Kidishitu Yesu.”​—Fidipai 4:6, 7.

13. I bika bitukankamika amba shi nansha tubatanwa na mitabakano ketukabulwepo kumona bukomo bwa kūminina’yo?

¹³ Ella wakutulwilwe, ino aye kasha ulama nsangaji yandi nansha byaatenwe na masusu. Walamine’yo na bukomo bwa Yehova, ke na bukomo bwa aye mwinepo, ehe. Ne mutumibwa Polo nandi monka na monka, wāsonekele amba: “Penepo nanshi, nkētumbika ne mutyima tō mu bukōkekōke bwami, e nabyako, amba bukomo bwa Kidishitu bungikale po ndi. . . . Ke-ne-muntu popa po ndi mukōkekōke popo nkomene.”​—2 Kodinda 12:9, 10.

14. Leta kifwa kilombola muswelo ukokeja mwine Kidishitu kwikala na mumweno muyampe pa ngikadilo mikomo, ne bipa bikokeja kulupuka’ko.

¹⁴ Mitabakano yolwa nayo dyalelo padi i mishile na ino yotwapwa kutela. Inoko yuka kino, mitabakano yo-yonso ikalanga mikomo kulwa nayo. Kifwa, mwinē kaji padi udi na kibidiji kya kufutulula kaji koingila​—wanya’ko ka bengidi ba bipwilo bikwabo. Nobe padi kudipo na muswelo wa kukimba kaji kangi. Lelo ukalama nsangaji yobe namani? Vuluka Andolofu ne bapwani nandi, bafundile kutamija ngikadilo ya mvubu pobadi mu buloko. Shi nobe ulonge bukomo bwabinebine bwa kutōkeja mutyima wa mwinē kaji​—nansha shi i muntu ‘ukola’ kusangaja​—kukabulwepo kutamija ngikadilo ya bwine Kidishitu, kifwa kūminina ne kitūkijetyima. (1 Petelo 2:18) Pakwabo kadi ukekala mwingidi muyampe, kwikala namino nako ko kupanga bantu dyese dya kumona kaji kayampe. Shi ke pano, tubandaulei miswelo imoimo yotukokeja kulama nsangaji yetu mu mwingilo wa Yehova.

Kupēleja Būmi Kutwalanga ku Nsangaji

15-17. I ñeni’ka yaboile ba mulume ne mukaji bamo yebatūkije mutyima mu mitabakano, nansha byokebadipo babwanya kushinta nsulo yayo?

¹⁵ Padi kudipo na muswelo wa kutonga kaji ka ku ngitu kobwanya kwingila, nansha kifuko kwa kwingidila’ko kwine, ino kudi bintu bikwabo byobwanya kulonga mu būmi bobe. Ivwana myanda ilonda’ko ino.

¹⁶ Ba mulume ne mukaji bamo bene Kidishitu baityile mukulumpe amba bāye badye nandi ku yabo njibo. Mu kyolwa’kyo, uno tutu ne wandi mukaji bamutūdila mwanda amba badi balēmenenwe na mitabakano ya umbūmi. Nansha abo bonso byobadi bengila twaji twa nshikije dyuba, kebadipo na muswelo wa kukimba twaji tukwabo.  Beipangula ano makambakano akebapwa kitatyi’ka.

¹⁷ Uno mukulumpe walombelwe madingi walondolola’mba, “Pēlejai būmi bwenu.” Kupēleja’bo namani? Ba mulume ne mukaji badi bajimija nsaa isatu mituntulu difuku ne difuku pa kwenda ne pa kujoka ku kaji. Mukulumpe wadi wibayukile biyampe webapa mulangwe wa kubandaula shi bakokeja kuvilukila kubwipi na kobengidila, mwa kutyepejeja’ko buvule bwa kitatyi kyobajimijanga pa kwenda ne kujoka difuku ne difuku. Kino kitatyi kyobakakūla kikebakwasha ku kulonga bintu bikwabo bya mvubu​—nansha’tu kukōkolokwa. Ekale kudi mitabakano ya umbūmi ikujimijijanga nsangaji yobe, lelo wabulwa’po kutala shi ubwanya kwitūkija na kujadika bintu kampanda mu būmi bobe?

18. Mwanda waka i kya kamweno kulanga na katentekeji kumeso kwa kutyiba mbila?

¹⁸ Muswelo mukwabo wa kutyepeja mitabakano i kulanga na katentekeji kumeso kwa kutyiba mbila. Kifwa, mwine Kidishitu umo watyibile mbila ya kūbaka njibo. Watonga mondele mukutakane, aye papo kashā wadi kaubakile nansha njibo imo mu būmi bwandi. Ku mfulo wayuka amba shi wadi amba ‘watadije biyampe matabula andi’ kumeso kwa kutonga mondele wa kūbaka, longa waepukile kufwa kaji bitupu. (Nkindi 14:15) Mwine Kidishitu mukwabo nandi waitabije kwimanina mwanabo waapwile mukōlo. Mungya kumvwañana kwabo, shi mwapudi wakomenwa kwaluja mukōlo, yewa umwimanine ye ukaluja’o. Ku ngalwilo myanda yonso yadi ikipita’nka biyampe, ino mwenda mafuku, mwapudi waanza kukomenwa. Mwapulwa wekatapa panshi, amba nanshi yewa waimanine mwapudi aluje mukōlo onsololo. Kino kyatwejeje mwine Kidishitu waimanine mwanabo mu mitabakano mikatampe. Mwene wadi wa kwepuka kino shi wadi amba wabandawile na katentekeji bintu byonso kumeso kwa kwitabija kiselwa kya kwaluja mapu?​—Nkindi 17:18.

19. I miswelo’ka imoimo yotukokeja kutyepeja’ko bimyanda bituseleja mityima kūlu mu būmi bwetu?

¹⁹ Nansha shi tubakoka, ketwakilangai amba kutyepeja kitatyi kyotwifundanga Bible pa kasuku, kyotutambilanga mu mwingilo wa budimi, nansha kyotwendanga ku kupwila ko kutyepeja mitabakano ne kumona nsangaji. Ke-pantu ano o mashinda a mvubu otutambwilanga’mo mushipiditu sandu wa Yehova, witupanga nsangaji. (Ngalatea 5:22) Mingilo ya bene Kidishitu itūkijanga nyeke mutyima, keiletangapo mpungiji. (Mateo 11:28-30) I mishile kulampe bininge na kaji ka ku ngitu nansha na mazua a kwipwija mukose, ke a ku mushipiditupo, aletanga bukōke. Kulāla pa nsaa mifwaninwe kwitukwashanga twikale kwaluja bukomo. Kwitūkija nako kudi na kamweno. Nathan H. Knorr, waingile mu Kitango Kyendeji kya Batumoni ba Yehova kufika ne ku lufu lwandi, wadi unenanga nyeke bamishonele amba: “Shi ubaimvwana mpungiji, kintu kibajinji kyofwaninwe kulonga i kwitūkija’ko. Ukatulumuka mpata, mwanda pa kupwa kulāla tulo tuyampe bufuku, usa kumona makambakano mavule owadi wakaminwe atyepa!”

20. (a) Tela mu kīpi miswelo imoimo yotukokeja kulama nsangaji yetu. (b) Molangila i buluji’ka botufwaninwe kwikadila na nsangaji? (Tala mu kapango pa paje 27.)

²⁰ Bene Kidishitu badi na dyese mwanda bengidilanga ‘Leza wa nsangaji.’ (1 Temote 1:11) Monka motwadi tubanenena kala, tukokeja kulama nsangaji yetu nansha mu makambakano makomo. Tulamei nyeke lukulupilo lwa Bulopwe mu ñeni, tujadikei mumweno wetu ponso pokifwaninwe ne kupēleja būmi bwetu. Kupwa, twitabei ku bino binenwa bya mutumibwa Polo mu ngikadilo yo-yonso yotudi’mo: “Sepelelai nyeke mudi Mfumwetu; kadi nkemunenanga dikwabo na’mba, sepelelai.”​—Fidipai 4:4.

Ta Mutyima ku Kubandaula Bino Bipangujo:

• Mwanda waka bene Kidishitu batele bininge mutyima ku lukulupilo lwa Bulopwe?

• I bika bibwanya kwitukwasha tulame nsangaji mu ngikadilo mikomo?

• Mwanda waka tufwaninwe kupēleja būmi bwetu?

• Lelo i mu bintu’ka motukokeja kupēleja būmi bwetu?

[Bipangujo bya Kifundwa]

[Kapango/Bifwatulo pa paje 27]

Buluji Bukwabo bwa Kwikadila na Nsangaji

Byotudi bene Kidishitu, tudi na buluji buvule bwa kusangela. Tala bidi bulonda’ko buno’bu:

1. Tuyukile Yehova.

2. Tubayuka bubinebine bwa mu Kinenwa kya Leza.

3. Tukokeja kulekelwa bubi bwetu kupityila ku lwitabijo lotwitabije mu kitapwa kya Yesu.

4. Bulopwe bwa Leza ke bubikale​—ntanda impya keidi pabwipi!

5. Yehova wetutweja mu paladisa ya ku mushipiditu.

6. Tudi na balunda bene Kidishitu bayampe.

7. Tudi na madyese a kwingila mwingilo wa busapudi.

8. Tudi na būmi, ne twi bakomo mu ludingo kampanda.

Lelo i buluji’ka bukwabo nobe bokokeja kutela?

[Kifwatulo pa paje 24]

Ba Polo ne Shilasa bādi na nsangaji mu kifungo

[Bifwatulo pa paje 26]

Lelo mumweno obe wimanine pa nsangaji itutengele mu ntanda impya ya Leza?