Lelo ‘Ukūlanga Kitatyi Kifwaninwe’?

MU MYAKA katwa imbajinji, mutumibwa Polo wādingile bene Kidishitu ba mu Efisesa amba: “Tūkanyai biyampe pa kunanga, kepamopo bwa bampikwa ñeni, mhm, poso bwa bañeni; ne [kukūla kitatyi kifwaninwe komudi banwe bene], ke-mantu mafuku i mabimabi.” (Efisesa 5:15, 16) Mwanda waka ano madingi ādi mendele’mo? Kilondololwa kya kino kipangujo kilomba tuyuke bidi ngikadilo yādi’mo bene Kidishitu ba mu kino kibundi kya kala.

Efisesa kyādi kibundi kitumbe ku bupeta, ku busekese bwenda muongo pa ntanda, ku bupolapola bwa mu meso fututu, ne ku byamajende bishileshile. Kubweja pa bino, bene Kidishitu bādi balwa na nkulupilo ya mafilozofi ya kusaka kuyuka bitatyi. Bangidiki bampikwa kwikala bene Kidishitu ba mu Efisesa kebādipo betabija amba kitatyi kyendanga nyeke kumeso. Filozofi ya Bangidiki yādi ibafundija amba būmi i bumo bonka bupitulukwa’mo pampikwa mfulo. Amba muntu nansha shi wajimija kyandi kitatyi mu buno būmi, ubwanya kukekimona mu lwendo lukwabo. Mulangilo wa uno muswelo wādi ubwanya kukokela bene Kidishitu ba mu Efisesa ku kwikala na ngikadilo ya kupēlula mwilondelo wa bitatyi bya kufikidila binkumenkume wa Yehova, kubadila’mo ne kitatyi kya butyibi bwandi. O mwanda madingi a Polo a ‘kukūla kitatyi kifwaninwe’ ādi mendele’mo.

Polo kādipo wisambila pa kitatyi mu buluji bwa kitatyi bitupu kya kulāla kulanguka. Kishima kya Kingidiki kyaāingidije kishintulula kitatyi kitungwe, kitatyi kya mwaka kipotoloke kya kulonga kintu kampanda. Polo wādi upa bene Kidishitu ba mu myaka katwa imbajinji madingi a kwingidija na tunangu kyaba kifwaninwe, kitatyi kya kwitabijibwa kyobādi bakidi’mo, kumeso kwa kufika’kyo ku mfulo kwakyo, pādi kepafundwilwe lusa lwa Leza lwa kwibapandija.​—Loma 13:11-13; 1 Tesalonika 5:6-11.

Netu tudi mu kitatyi kifwaninwe kya muswelo umo onka. I kitatyi kya kwitabijibwa kekikajokelwa’mopo dikwabo; nanshi, kupita’ko kwikijimija bitupu, shi na kulondalonda nsangaji ya lupito ya ino ntanda, shi na bika, bene Kidishitu bafwaninwe kwingidija na tunangu kino kyaba kibapelwe kya kwingila ‘mingilo ya lulamato lwa bwine Leza.’ Wivwane balonge namino, i bine abaningisha kipwano kyabo na Yehova Leza, Umpangi wabo.​—2 Petelo 3:11; Mitōto 73:28; Fidipai 1:10.