Mumwenine Bana-Bakaji Babidi bu wa Kishala

SANDRA i mwana-mukaji wa kishala ushikatanga mu Ostrali. Pafwile mulumyandi myaka ibala-inga kunyuma, mukaji nobe mutyima munda wamutumbukile. “Kuyuka’tu amba najimija mulumyami, mulunda nami wa pa mutyima, kyadi kitundu kilēma kondi. Bine, nkiyukilepo ne monafikile ku njibo pa kutamba ku lupitalo, ne byonalongele mu dine difuku’dya bine nkikibivulukilepo. Mayenga alondele’po, moyo onadi nao waikala ke bululu busansa ku mutyima kitatyi kyonso.”

Sandra wadi na mulunda nandi mutame, Elena, wafwidilwe mulume kintu kya myaka isamba kunyuma. Elena walamine Davida mulumyandi makweji asamba kumeso kwa kufwa’ye na luba lwa dyaya. Njia yandi yadi mikatampe bininge, yamufikija ne ku kwikala na kafi kinondanonda na lufu lwa wandi mulume. Myaka ibidi pa kupita’po, wapona kinya buku mu kibumbo kya bantu. Dokitele umundapanga kakimona luba lwaadi ubela. Inoko wasokola amba Elena wadi na kyaso kya njia yadi ibidila munda mwandi, penepa wamwaluja ku njibo yandi amba enda ukadile muyoa. “Nkyaunombele kyaba kilampe pa kusaka kufundula njia yami,” ye Elena unena, kupwa wabweja’ko amba ponadi nshala pa bunka, “nadi neela pa butanda, nakuja mutwe wami onso mu mbwija ya Davida.”

Bine, kufwilwa mwine pandi muswedibwe kuletanga makambakano a miswelo ne miswelo, mwanda bu wa kishala kebubipīlepo’nka kubulwa mulume. Kifwa, Sandra wadi wiivwana kyaba kimo bu kakidipo muntu. Monka mwimwenanga bakaji ba bishala bakifwilwafwilwa balume, nandi wadi wimona amba udi mu kyaka, kakidipo na mutyima-ntenke. Sandra uvuluka’mba: “Nadi na mulume wami wa kutyiba kya mfulo pa mwanda kampanda, na mu kukopa kwa diso kenetyibila buno butyibi kasuku kami. Tulo mu meso kutupu. Nadi nkoka ne kupungila pa mulongo. Nkomenwa’nka ne kya kulonga.”

Nsekununi idingakene na ya ba Sandra ne Elena i ya bukile bukya kujokoloka ntanda yonso. Misongo, bīka, mavita, malwi a kukolopa tubila, ne bukalabale byo bintu bilengeja kibalwa kya bakaji ba bishala kikale kwibweja’ko. * Mu bano bana-bakaji, bavule bajondwanga mutyima bumama, kuyuka kya kulonga mpika. Lelo balunda ne balongo bakokeja kulonga bika mwanda wa kukwasha bakaji ba bishala? Kishinte kilonda’ko kileta madingi amoamo akokeja kukwasha.

[Kunshi kwa dyani]