Tendelai Yehova pa Mwanda wa Bilongwa Byandi Bikatampe!

“Wami mutyima utōtanga Yehova . . . mwanda Mwine Mukomo wami wanongela bintu bikata.”​—LUKA 1:46-49.

1. Lelo i bilongwa’ka bikatampe byotufwaninwe kutumbijija Yehova?

 YEHOVA ufwaninwe kutumbijibwa pangala pa bilongwa byandi bikatampe. Mupolofeto Mosesa pa kusekununa kunyongololwa kwa Isalela mu Edipito, wānene amba: “Meso enu abamone mingilo mikatampe yonso ya Yehova yālongele.” (Kupituluka 11:1-7) Madia nsongwakaji mujike nandi monka na monka, pa kusapwilwa na mwikeulu Ngabudyele amba usa kubutula Yesu, wānene amba: “Wami mutyima utōtanga Yehova . . . mwanda Mwine Mukomo wami wanongela bintu bikata.” (Luka 1:46-49) Batwe Batumoni ba Yehova netu tumutumbijanga pangala pa bilongwa bikatampe bya uno muswelo, kifwa kunyongololwa kwa Isalela mu bupika bwa Edipito ne kwimitwa kwa mu kingelengele kwa wandi Mwana muswedibwe.

2. (a) Le “mpango ya nyeke” ya Leza ku bantu bakikōkeji i mpango’ka? (b) I bika byāmwene Yoano pa kisanga kya Patamosa?

² Bilongwa bikatampe bivule bya Yehova bikwatañene na yandi “mpango ya nyeke” ya kwesela bantu bakikōkeji kupityila kudi Meshiasa ne ku buludiki bwa Bulopwe bwandi. (Efisesa 3:8-13, BB) Ino mpango yādi ke myendelele kumeso bininge kitatyi kyāpelwe Yoano, mutumibwa mununu, kimonwa kya kibelo kishitulwe mūlu. Wāivwana diwi didi pamo bwa kimpungidi dimunena’mba: “Kanda kuno; nkulombole bintu bikāyanga kumeso.” (Kusokwelwa 4:1) Yoano wāpelwe kuno “kusokwelwa kwa Yesu Kidishitu” kitatyi kyāmutolwedile umbikalo wa Loma pa kisanga kya Patamosa, “pa mwanda wa Leza ne pa busapudi bwa Yesu.” Bintu byāmwene uno mutumibwa ne byaāivwene byāsokwele myanda mivule itala pa mpango ya nyeke ya Leza, enka namino, byāleta mwinya wa ku mushipiditu ne kukankamika bene Kidishitu bonso babine pa kitatyi kifwaninwe.​—Kusokwelwa 1:1, 9, 10.

3. Mu kimonwa kyāmwene Yoano, bakulumpe 24 belekeja bāni?

³ Yoano wāmwene pa kyokya kibelo kishitule bakulumpe 24 bashikete pa mpona yabo, bavwele bilukwa pamo bwa balopwe. Bāpona panshi ku meso a Leza kebanena’mba: “Yō! abe ufwaninwe, Yehova wetu, Leza wetu, kupebwa ntumbo, ne buleme ne bukomo; mwanda wapangile bintu byonsololo, kadi i pa mwanda wa kiswa-mutyima kyobe o[bikadile’ko], ne kupangibwa’byo.” (Kusokwelwa 4:11) Bano bakulumpe bafunkila pa bene Kidishitu bashingwe-māni bonso basangulwe na kitenta kizunzulwe kyēbalaile Leza. Mutyima wabo wibatonona kutumbija Yehova mwanda wa bilongwa byandi bikatampe byalonga mu bipangwa byandi. Ne batwe  netu mo monka, tutendelanga potumonanga bintu bilombola ‘bukomo bwa nyeke bwa Yehova ne Buleza bwandi.’ (Loma 1:20) Mu kwenda kufunda kuyuka Yehova, mo motwenda tusokola buluji buvulevule bwa kumutumbijija pa mwanda wa bilongwa byandi bikatampe.

Sapulai Bilongwa Bikatampe bya Yehova!

4, 5. Leta bifwa bilombola muswelo obātendele Yehova kudi Davida.

⁴ Davida mulembi wa mitōto wātendele Leza pangala pa bilongwa byandi bikatampe. Wāimba amba: “Imbai mitendelo ya Yehova wikele mu Ziona; elai mbila ya bilongwa byandi umbukata mwa bantu. Mfwileko lusa, abe Yehova; bantalepo malwa o mona pa boba banshikilwe, abe untekunanga ku bibelo bya lufu; mwanda wa kunena’mba nkalombole mitendelo yobe yonso: Mu bibelo bya mwana, mwana-mukaji, wa Ziona.” (Mitōto 9:11, 13, 14) Kadi Davida wāesele Leza, wāmutendela ne kumutendela mu milombelo yandi yaālombele pa kupa mwanandi Solomone bulombodi bwa mwa kūbakila tempelo ne bipungwa byayo, amba: “A Yehova, bukatampe ne bukomokomo ne buya ne bulumbuluke ne bulēmantu i byobe . . . Bulopwe i bobe, Yō a Yehova, Abe kadi wi mwizunzule bu mutwe peulu pa byonso. . . . Kadi pano, Yō Leza wetu, tubakufwija’ko ne kutendela dijina dyobe dineñene.”​—1 Bilongwa 29:10-13, NW.

⁵ Bisonekwa bitwita kyaba ne kyaba​—eyo, bitusoñanya​—tutendele Leza, pamo bwa Davida. Mukanda wa Mitōto udi na binenwa bivule bya mitendelo kudi Leza, kadi kubwipi kwa kipindi kituntulu kya ñimbo yao kitelelwanga Davida. Wātendele Yehova kyaba kyonso ne kumufwija’ko. (Mitōto 69:30) Ne kadi tamba kalā, binenwa byābundile Davida ne bantu bakwabo ku bukomo bwa mushipiditu wa Leza bingidijibwanga nyeke mwanda wa kutendela Yehova.

6. Lelo Mitōto yāsonekelwe ku bukomo bwa mushipiditu idi na kamweno’ka kotudi?

⁶ Bine, Mitōto idi na kamweno kakatampe mpata ku batōtyi ba Yehova! Potukimbanga kufwija’ko Leza pangala pa bilongwa byonso bikatampe byaitulongelanga, milangwe yetu yendanga pavule ku binenwa bya muneñenya bidi mu Mitōto. Kifwa shi bubaki lubanga, tukokeja kwingidija binenwa biifwene na bino: “I biyampe kufwijako Yehova, ne kwimbila mitendelo ya ku dijina dyobe, abe Mwinemukatakatamwine. Ne kulombola kanye ka lusa lobe lubanga. Kadi ne bu-binebine bobe mafuku onso, mo bwidila, mo bwidila. . . . Ke-wi-muntu, abe Yehova, ubantōkeja ku mutyima ne mīngilo yobe; nkatombokanga mu mīngilo ya makasa obe.” (Mitōto 92:1-4) Shi tubanekenya kijika kampanda mu kwendelela kotwendelela kumeso ku mushipiditu, tufwaninwe kusangala ne kufwija’ko mu milombelo pamo bwa mulembi wa mitōto wāimbile amba: “Banwe iyai, twimbile Yehova; twelei kabobo ka tusepo ku kidibwe kya lupandilo lwetu. Twiye mu kifuko kyandi ne kufwijako, tumwe[le]lei kabobo ka tusepo twa ñimbo ya mitōto.”​—Mitōto 95:1, 2.

7. (a) I kika kineñanine ñimbo mivule imbwanga na bene Kidishitu? (b) Le i buluji’ka bumo bwitusakila kufika kumeso kwa kitatyi ku kupwila ne kutanwa’ko kufika ne ku mfulo?

⁷ Divule tutendelanga Yehova na kwimba ñimbo ya mitendelo kya pamo ku kupwila kwa pa kipwilo, ku kubungakana ne ku bitango. I bya dyese, mwanda ñimbo mivule yotwimbanga imanine pa myanda ilembelwe ku bukomo bwa mushipiditu mu Mitōto. Bine twi ba dyese pa kwikala na dibuku dya ñimbo ya mitendelo ileta kyanga ku mutyima pa kwimba’yo kudi Yehova! Kwimba mitendelo kudi Leza i buluji bukatampe bwitusakila kufika kumeso kwa kitatyi ku  kupwila, kutanwa’ko kufika ne ku mfulo, mwanda wa kwimba na batōtyi netu mitendelo kudi Yehova ne kulombela kya pamo.

“Tendelai Yehova”!

8. Kishima “Aleluya” kishintulula namani?

⁸ Kutendela Yehova i kumweke patōka mu kishima “Aleluya” kya Kihebelu kyalamwinwe pavule amba “Tendelai Yehova.” Kifwa mu Mitōto 135:1-3, mudi lwito lukabe lwitukoma, amba: “Tendelai Yehova, tendelai dijina dya Yehova; mutendelei banwe bapika ba Yehova. Banwe bēmene mu njibo ya Yehova, mu bipango bya njibo ya Leza wetu. Tendelai Yehova; mwanda Yehova i mulumbuluke; imbilai mitendelo ku dijina dyandi; ke-kintu i kiyampe.”

9. Lelo i bika bitutononanga tutendele Yehova?

⁹ Potubandilanga bipangwa bya Leza bya kutendelwa ne bintu byonso byaetulongela, mutyima wetu wa kumufwija’ko witutononanga tumutendele. Kitatyi kyotulangulukanga pa bingelengele byaādi ulongela bantu bandi mu myaka ya kala, mityima yetu itukunkanga tumutumbije. Kadi shi tulange ku milao ya bintu bikatampe bisa kwitulongela Yehova, tukakimba miswelo ya kumutendela ne kumufwija’ko.

10, 11. Kwikala’ko kwetu kwitupa namani buluji bwa kutendela Leza?

¹⁰ Kwikala’ko kwetu nako i buluji bukwabo botufwaninwe kutendelela Yehova. Davida wāimbile amba: “Nkakufwijangako [Yehova]; mwanda ami ne kipangwa kya malwa, kya kutendelwa, mīngilo yobe i mitendelwe; kadi kino namino muya wami uyūkile’kyo, senene, shē.” (Mitōto 139:14) I byabine, twi ‘bapangwe bya kutendelwa’ kadi tupelwe byabuntu bya bulēme kifwa meso a kumona nao, matwi a kwivwana nao, ne ñeni ya kulanga. Mwene tufwaninwe kwiendeja umbūmi mu muswelo uletela Mulongi wetu mitendelo? Polo wānene uno mulangwe kitatyi kyaāsonekele amba: “Byonso byo mulonga, shi kudya, shi kutoma, shi bika, shi bika, byonsololo, longelai’byo monka mu ntumbo ya Leza.”​—1 Kodinda 10:31.

¹¹ Wivwane tuswele Yehova, tukalonga bintu byonso mwanda wa ntumbo yandi. Yesu wānene amba lubila lubajinji i luno: “Ukasanswa Yehova Leza obe ne mutyima obe onso, ne muya obe onso, ne ñeni yobe yonso, ne bukomo bobe bonso.” (Mako 12:30; Kupituluka 6:5) Na bubine tufwaninwe kuswa Yehova ne kumutendela, mwanda ye Mulongi wetu, Mwine upānanga “byonso byakupanwa bilumbuluke, ne byabuntu bibwane.” (Yakoba 1:17; Isaya 51:13; Bilongwa 17:28) Kunena na bubine, tunenwe’nka kumutendela, mwanda lūku lwetu, bukomo bwetu bwa ku mushipiditu, ne buninge bwetu bwa ngitu​—ngikadilo yetu, ne manwa onsololo otudi nao​—bitambile kwadi. Byadi Umpangi wetu, tufwaninwe nanshi kumuswa ne kumutendela.

12. Lelo wiumvwananga namani pangala pa bilongwa bikatampe bya Yehova ne pa binenwa bya Mitōto 40:5?

¹² Bilongwa bikatampe bya Yehova bitupanga buluji kebubadika botufwaninwe kumuswila ne kumutendelela! “Abe Yehova Leza wami bilongibwa byobe byo walongele bitendelwa i bya ntanda ne ntanda; kadi ne mifwatakanyo yobe nayo īdi padi bātwe,” mo mwāimbile Davida. “Ke[kudipo muntu nansha umo ubwanya kudingakanibwa na] abe; shi nswele kusapula’byo ne kwisamba’byo, longa, yo! i [bitabuke kuvula byonkibwanyapo kubala].” (Mitōto 40:5) Eyo, Davida kādipo wa kubwanya kubala bilongwa byonso bya kutendelwa bya Yehova; ne batwe netu mo monka. Inoko tutendelei nyeke Leza kitatyi kyonso kyobetuvuluja bintu byo-byonso bikatampe byalongele.

Bilongwa Bikwatañene na Mpango ya Nyeke ya Leza

13. I kika kinenenwa amba lukulupilo lwetu i lwimanine pa bilongwa bikatampe bya Leza?

¹³ Lukulupilo lwetu lwa kumeso lwimanine pa bilongwa bikatampe, bya kutendelwa, bikwatañene na mpango ya nyeke ya Leza. Kinondanonda na butomboki bwa mu Edena, Yehova wāletele lukulupilo mu bupolofeto bubajinji. Pa kutyibila nyoka nsambu, Leza wānene amba: “Nkatūla mushikwa pa bukata bwa abe ne mwana-mukaji ne pa bukata bwa lukunwa lobe ne lukunwa lwandi. Ukakusonsakanya mu mutwe, nobe ukamusonsakanya mu kapondo.” (Ngalwilo 3:15, NW) Lukulupilo mu Lukunwa lwālailwe lwa mwana-mukaji lwādi nyeke lūmi  mu mityima ya bantu bakikōkeji kitatyi kyāpwile Yehova kulonga kilongwa kikatampe pa kulama Noa ne kisaka kyandi pa Dilobe dya ntanda yonso dyākombele ntanda ya bubi. (2 Petelo 2:5) Milao ya bupolofeto yālailwe bantu ba lwitabijo, kifwa ba Abalahama ne Davida, nayo yāletele ñeni ya kujingulula bintu bikalonga Yehova kupityila ku Lukunwa.​—Ngalwilo 22:15-18; 2 Samwele 7:12.

14. Le i kilongwa’ka kitabukile bilongwa byonso bya kutendelwa bya Yehova ku muzo wa muntu?

¹⁴ Kilongwa kya Yehova kitabukile bukata kilombola amba i mulongi wa bilongwa bikatampe bya kamweno ku muzo wa muntu i kilongwa kya kupāna wandi Mwana wa bunka​—Yesu Kidishitu, Lukunwa lwālailwe​—bu kitapwa kya kinkūlwa. (Yoano 3:16; Bilongwa 2:29-36) Kinkūlwa ko kajilwilo kāletelwe mwanda wa kupwanya bantu na Leza. (Mateo 20:28; Loma 5:11) Yehova wākongakenye pamo bantu bābadikile kupwana nandi, wēbatweja mu kipwilo kya bwine Kidishitu kyāshimikilwe mu Pentekosa 33 K.K. Na bukwashi bwa mushipiditu sandu, bāsapula myanda miyampe pi na pi, bālombola amba lufu lwa Yesu ne kusanguka kwandi i bishitwile bantu bakikōkeji dishinda dya kukeselwa madyese a nyeke ne nyeke mu buludiki bwa Bulopwe bwa Leza bwa mūlu.

15. I muswelo’ka ulongele Yehova bintu mu muswelo wa kutendelwa mu ino myaka?

¹⁵ Mu ino yetu myaka, Yehova i mulonge bintu mu muswelo wa kutendelwa pa kukongakanya bene Kidishitu bashingwe-māni. Mvula ya bonakani i mikwatwe mwanda wa kutūla bidi biyukeno pa bashele’ko ku ba 144 000 bakabikala na Kidishitu mūlu. (Kusokwelwa 7:1-4; 20:6) Leza waikele kunyongolola bene Kidishitu bashingwe-māni mu nkano ya ku mushipiditu ya “Babiloni Mukatakata,” umbikalo wa ntanda wa mutōtelo wa bubela. (Kusokwelwa 17:1-5) Lelo kunyongololwa kwanyongolwelwe bashele’ko bashingwe-māni mu 1919 ne kukingwa kobakingilwe na Leza kwebakweshe balonge bika? Kwebakweshe beñenye na kupāna bukamoni bwa mfulo kepafudije Yehova ngikadilo imbi ya bintu ya Satana ku “kyamalwa kibūke” kyenda kifwena lubilo’ki.​—Mateo 24:21; Danyele 12:3; Kusokwelwa 7:14.

16. I bipa’ka bilupuka dyalelo ku mwingilo wa kusapula Bulopwe otwingila kujokoloka ntanda yonso?

¹⁶ Batumoni ba Yehova bashingwe-māni i batangidile mwingilo wa kusapula na bupyasakane Bulopwe ntanda yonso. Bipa bilupuka’ko i kuvula kwa kibalwa kya “mikōko mikwabo” yaikala pano bu batōtyi ba Yehova. (Yoano 10:16) Tudi na nsangaji pa kumona uno mukenga ukipelwe batūkanye ba pano panshi wa kwiya kwilunga netu mu kutendela Yehova. Boba betaba ku luno lwito lotwita bantu amba “iyai,” badi mu mulongo wa kukafibwa pa kyamalwa kibūke na kyepelo kya kukatendela Yehova nyeke ne nyekeke.​—Kusokwelwa 22:17.

Tununu ne Tununu Tutūtyikilanga mu Mutōtelo Wabine

17. (a) Le Yehova uloñanga bilongwa’ka bikatampe kukwatañana na mwingilo wetu wa busapudi? (b) Zekadia 8:23 ufikidilanga namani?

¹⁷ Yehova pano ulonga bilongwa bya kutendelwa kadi bikatampe mu mwingilo wetu wa busapudi. (Mako 13:10) Mu ino myaka, i ‘mushitule bibelo bikatampe bya mingilo.’ (1 Kodinda 16:9) Kino kibapanga muswelo wa kusapula myanda miyampe mu myaba yonso mikatampe mwadi mwimene balwana na bubinebine midindi ibidi. Bavule badi mu fukutu ya ku mushipiditu pano betabanga ku lwito lwa kwiya kutōta Yehova. Bafikidijanga bino binenwa bya bupolofeto: “E mwanenena Yehova wa bibumbo namino amba: Kikafika enka nenki, mu oa mafuku’a bantu dikumi ba mu ndimi yonsololo ya mizo’ya, bakakwata, eyo, bakashipila  ku kisandi kya yewa [Muyuda] amba: Batwe tukenda nenu, mwanda tubaivwana’mba Leza udi nenu pamo.” (Zekadia 8:23) Bano bantu bobanena amba “nenu” i Bayuda ba ku mushipiditu, bene Kidishitu bashingwe-māni bashele’ko botudi nabo dyalelo. Kibalwa dikumi byokyelekejanga kubwana kwa bintu bya miswelo yonso idi pano panshi, nanshi bano “bantu dikumi” i “kibumbo kikatampe” kilungilwe pamo na “Isalela wa Leza,” amba bekale ke “luombe lumo.” (Kusokwelwa 7:9, 10; Ngalatea 6:16, MB) Bine, tudi na nsangaji mpata pa kumona dyalelo bantu bavulevule bengila mingilo ikola pamo bu batōtyi ba Yehova Leza!

18, 19. I bika bilombola amba Yehova i mwesele mwingilo wa busapudi?

¹⁸ Tudi na nsangaji pa kumona makumi a tununu​—eyo, tutwa na tutwa twa tununu​—tutūtyikila mu mutōtelo wabine mu matanda mwadi mutādile mutōtelo wa bubela, mumweka bu mukomo bantu kwitabija myanda miyampe. Bandaula dibuku Annuaire des Témoins de Jéhovah dya panopano wimwene matanda adi na basapudi ba Bulopwe tamba ku 100 000 kufika ne ku kintu kya 1 000 000. Kino i kilomboji kikatampe kilombola amba mwingilo wa kusapula Bulopwe i mweselwe na Yehova.​—Nkindi 10:22.

¹⁹ Byotudi bantu ba Yehova, tutendelei ne kufwija’ko Tata wetu wa mūlu witupele kitungo kiluji mu būmi bwetu, lukulupilo lwa nsangaji lwa būmi bwa kumeso, witupala ne mpalo mu mwingilo wandi. Tutengele na kyaka kufikidila kwa milao yonso ya Leza, kadi tusumininwe ‘kwilama mu buswe bwa Leza, koku tukungila būmi bwa nyeke.’ (Yude 20, 21) Bine, tuloelelwanga mpata pa kumona kibumbo kikatampe, kyafikila pano pa bantu kintu kya 6 000 000, kitendela Leza! Na madyese a Yehova, bashingwe-māni ne bapwani nabo mikōko mikwabo badi mu bipwilo kubwipi kwa 91 000 bilongololwe biyampe shē mu matanda 235. Batwe bonso pamo tudishibwanga biyampe ku mushipiditu na “umpika wabinebine ne wamanwa” ulonga bukomo kukoka mpika. (Mateo 24:45, NW) Bulongolodi bwa kiteokratike bwendelela kumeso na kuleta’ko butadi bwa buswe buludikanga mwingilo wa Bulopwe mu mabilo a misambo 110 ya Batumoni ba Yehova. Tubafwija’ko Yehova pa kutonona bantu bandi ‘bamulēmeke na bintu byabo bya mvubu.’ (Nkindi 3:9, 10) O mwanda mwingilo wa busapudi otwingila kujokoloka ntanda yonso wendelela nyeke kumeso, na lūbako lwa mobo a bitampilo, Mabetele, mobo a bamishonele, Mobo a Bulopwe, ne Mobo a Kubungakena’mo.

20. Lelo kulanguluka kwetu pa bilongwa bikatampe kadi bya kutendelwa bya Yehova kufwaninwe kwitutonona tulonge’po bika?

²⁰ I kikomo kotudi kubala bilongwa bikatampe byonso bya kutendelwa, bilongele Tata wetu wa mūlu. Lelo kudi kikankelwa muntu wa mutyima moloke kwilunga ku kibumbo kya batendedi ba Yehova? I kutupu’kyo! Nanshi shi ke pano, boba bonso baswele Leza bele nsadi ya tusepo amba: “Tendelai Yehova; tendelai Yehova banwe badi mūlu; mutendelei papo palampe. Mutendelei, banwe bamwikeulu bandi bonso; . . . ne balumyana ne bakajana bene kumo; ne bana-balume banunu ne bankasampe. Batendele dijina dya Yehova; ke-dintu dijina dyandi dyo dyonka ditumbijibwa; ntumbo yandi īdi peulu pa ntanda ne diulu dīne kumo.” (Mitōto 148:1, 2, 12, 13) Bine, tutendelei Yehova dyalelo ne nyeke ne nyeke pangala pa bilongwa byandi bikatampe!

Usa Kulondolola Namani?

• Lelo i bilongwa’ka bimobimo bya kutendelwa bya Yehova?

• Mwanda waka mutyima ukutonona utendele Yehova?

• Lukulupilo lwetu lukwatañene namani na bilongwa bikatampe bya Leza?

• I muswelo’ka uloñanga Yehova bilongwa bikatampe kukwatañana na mwingilo wa kusapula Bulopwe?

[Bipangujo bya Kifundwa]

[Kifwatulo pa paje 8]

Lelo wimbanga na mutyima umo pamo na bemba ñimbo ya kutendela Yehova?

[Bifwatulo pa paje 11]

Tudi na nsangaji, mwanda mukenga ukidi mushitwilwe batūkanye bāye belunge netu mu kutendela Yehova