Bipangujo bya Batangi

Yehova byadi kala na mutyima wa kufwila bantu lusa pa kitapwa kya kinkūlwa, mwanda waka kadi bene Kidishitu bafwaninwe kukesāsa ku meso a bakulumpe mu kipwilo?

Monka motwikimwena mu mwanda wa ba Davida ne Bafesheba, Yehova wāfwidile Davida lusa pa bubi bwandi, nansha byobwādi bukatampe, mwanda wāalamukile pa mutyima byabinebine. Davida wēsāshile patōkelela, pāile mupolofeto Natana kwadi, amba: “Napi mambo padi Yehova.”​—2 Samwele 12:13.

Inoko Yehova ketabijangapo enka kwisāsa kwa nonga-bibi kwabinebine ne kumufwila lusa kete, mhm, ino utūdile’ko kadi ne mpangiko ya kukwasha ulubile’wa amone monka bukomo bwa ku mushipiditu. Mu mwanda wa Davida, Natana ye wāmukweshe. Dyalelo nadyo mu kipwilo kya bwine Kidishitu mudi bakulumpe, bana-balume batame bapye ku mushipiditu. Mwanā-bwanga Yakoba ushintulula’mba: “Lelo kudi umo ubela [ku mushipiditu] umbukata mwenu’ni? Nabya bēte bakulumpe ba kipwilo; nabo bamulombelele, ne kumushinga mani ponka, mu dijina dya Mfumwetu; kadi ne lulombelo lwa kwitabija lukamupandija ubela, ne Mfumwetu ukamulangula; nansha wapīle mambo akamulekelwa.”​—Yakoba 5:14, 15.

Bakulumpe ba bwino bakokeja kutalaja mutyima wa nonga-bibi umusansa pangala pa byalongele. Baloñanga bukomo bwa kwiula Yehova pobabandaula mwanda wa nonga-bibi. Kebekalangapo na kalobolobo, nansha byobakokeja kumupa madingi masumininwe. Bekalanga kadi na lusa ne kutala byobya bimusakilwa bukidibukidi. Baloñanga bukomo na kitūkijetyima bwa kusendulula ulubile’wa na Kinenwa kya Leza. (Ngalatea 6:1) Nansha shi muntu kadipo usakile kwisāsa bubi bwandi, ubwanya kufikila pa kwalamuka pa mutyima shi abamufwena kudi bakulumpe pamo na mwālongele Davida pobāmufwenene kudi Natana. Bakulumpe bakamukwasha epuke kyaka kya kujokela mu bubi bwandi ne byamalwa bitambanga ku kūmija mutyima mu kwendelela na kulonga bubi.​—Bahebelu 10:26-31.

Na bubine kwisāsa ku meso a bantu bakwabo ne kulomba kulekelwa bubi boivwana bumvu ne abe mwine ke kintupo kipēla. Kilomba kusumininwa kwabinebine. Ino langa’po bidi bityetye shi muntu wapele kwisāsa. Mwana-mulume umo walekele kusaba bubi bwandi bukatampe ku bakulumpe mu kipwilo wanene amba: “Nadi ngivwana mutyima kusansa pampikwa kwishinkija. Koku nonga bukomo bwa kusapula na kininga, ino mutyima munda kasha unyenga.” Walangile amba kwisāsa konkakonka kudi Leza mu milombelo kubwene, ino kunena patōka kekyadipo namino, mwanda wadi wiivwana monka mwādi mwiivwanina Mulopwe Davida. (Mitōto 51:8, 11) O mwanda nanshi i kipite buya kwitabija bukwashi bwa buswe bwitukwasha Yehova kupityila kudi bakulumpe!