“Byaso bya Mulunda”

MU MYAKA katwa imbajinji, mutumibwa Polo wāmwene amba i biyampe kulemununa bene Kidishitu ba mu Ngalatea mu myanda imoimo. Pa kutyina amba bakamushikwa, wāipangwile amba: “Lelo pa kwimusapwila b[u]binebine ke ndi walwana nenu?”​—Ngalatea 4:16, MB.

Polo kāikelepo walwana nabo mwanda’tu ‘wēbasapwidile bubinebine.’ Wālondele musoñanya wa mu Bible unena’mba: “Byaso bya mulunda i bya binebine.” (Nkindi 27:6) Wādi uyukile amba kudingila bantu balumbakana kubwanya kwibashila byaso ku mityima. Ne amba kuleka kupa nonga-bibi madingi amufwaninwe i kubulwa kumulombola mwikadile buswe bwa Yehova Leza. (Bahebelu 12:5-7) Polo wādi mulunda wabinebine na kino kipwilo, mwikite nyeke mutyima, o mwanda kāikelepo kwikaka kwikipa madingi a kwikilemununa.

Dyalelo, Batumoni ba Yehova bengilanga mwingilo wa kulonga “mizo yonso ya bantu nabo ke bāna-babwanga, . . . kwibalombola balaminine byonso [byālaile Yesu Kidishitu].” Mu bino byonso, bano bene Kidishitu bengila na mutyima umo kebakongolokangapo bubinebine bwa mu Bible busokwela patōka ne kutopeka bubela bwa mfundijo ne mwiendelejo wakubulwa kukwatañana na bwine Kidishitu. (Mateo 15:9; 23:9; 28:19, 20; 1 Kodinda 6:9, 10) Na bubine, ke balwanapo bafwaninwe kupelwa, i balunda babinebine.

Mulembi wa mitōto wāsonekele na bujinguludi bwa bukomo bwa mushipiditu amba: “Moloke ankupile e lusa; kadi andingile madingi e māni a pa mutwe wami; kokandeka mutwe wami kupela’o.”​—Mitōto 141:5.