Dyese dya Yehova Ditupetejanga Bupeta

“Dyese dya Yehova dipeteja bupeta, kadi kalundilekopo kanjia nansha kamo kene.”​—NKINDI 10:22.

1, 2. I kika kinenenwa amba nsangaji keitambangapo ku byabupeta bya ku ngitu?

 BŪMI bwa bantu bavule dyalelo i bubikalwe na mushipiditu wa kulondalonda byabupeta. Lelo byabupeta bibapanga nsangaji? Dipepala dimo (The Australian Women’s Weekly) dinena’mba: “Nkilangapo amba kudi myaka yāumije bantu umeso pamo bwa ino.” Kupwa dibweja’ko amba: “I kintu kipwe bunwa. Mwanda twadi tulombolwa amba Ostrali yo ntanda ya misokwe miyampe, amba momwa mo mudi būmi bulumbuluke kashā. . . . Ino mumweno umbi wa bintu koku kasha usambakana mu muzo onso. Bana-balume ne bana-bakaji batompola’nka kutompola amba kudi kintu kampanda kyobabudilwe mu būmi bwabo, ino kwikipotolola amba i kintu kansangwa mpika.” Bine, Bisonekwa bidi na bubinga pobinena amba nsangaji ne būmi kebilupukangapo ku bintu byotudi nabyo!​—Musapudi 5:10; Luka 12:15.

² Bible ufundija amba nsangaji mikatampe mine itambanga ku kweselwa na Leza. Pa kino, Nkindi 10:22 unena’mba: “Dyese dya Yehova dipeteja bupeta, kadi kalundilekopo kanjia nansha kamo kene.” Divule, njia itambanga ku kwipapamwina byabupeta na makomwa-meso. O mwanda mutumibwa Polo wādyumwine amba: “Boba batele mityima’mba, tusakwikala bampeta, nabya abaponena mu kutompibwa, abapi mu dikinga, ne mu bya kilokoloko kya bulembakane,  ne kya byakwiletelela, bino bidi namino bitūkija bantu [ku] koneka, ne umbufudile. Ke-kuntu kusanswa kwa lupeto kyo kitako kya bubi bonso miswelo ne miswelo; mo mudi kongwelwa bamobamo ku lwitabijo pa kupyasakena monka, abapu kwitapatapa ku misongo ya ntanda ne ntanda.”​—1 Temote 6:9, 10.

3. Mwanda waka bengidi ba Leza batanwanga na byamalwa?

³ Ku mutamba mukwabo, dyese dyampikwa njia dipetanga boba ‘bendelela na kuteja diwi dya Yehova.’ (Kupituluka 28:2) Eyo, bamo bakokeja kwiipangula’mba, ‘Shi dyese dya Yehova kedilundilanga’kopo njia, mwanda waka bengidi bavule ba Leza basusukanga?’ Bible witusokwela patōka amba Leza ulekele bidi tutanwe na byamalwa, inoko mwine uleta’byo i Satana, yandi ngikadilo imbi, ne kubulwa kubwaninina kwetu. (Ngalwilo 6:5; Kupituluka 32:4, 5; Yoano 15:19; Yakoba 1:14, 15) Yehova aye i nsulo ya “byonso byakupanwa bilumbuluke, ne byabuntu bibwa[nini]ne.” (Yakoba 1:17) Nanshi madyese andi keadipo na kanjia nansha kamo. Tubandaulei pano byabuntu bibwaninine bimobimo bya Leza.

Kinenwa kya Leza​—Kyabuntu Kilēme

4. I dyese’ka dyeselwe bantu ba Yehova ne i kyabuntu’ka kilēme kyobapelwe mu kino ‘kitatyi kya ku mfulo’?

⁴ Danyele wānene bupolofeto butala pa ‘kitatyi kya ku mfulo’ amba: ‘Buyuki bwabine bukekala ke bungibungi.’ Inoko buno buyuki bwālombwelwe amba: “[Kekudipo] nansha umo mwine wa bapupakane ukevwanija; nanshi boba badi ne ñeni bakevwanija.” (Danyele 12:4, 10) Langa’po bidi! Kinenwa kya Leza—nakampata bupolofeto bwakyo—kidi na tunangu twa Leza tusonekwe mu muswelo keubwanyapo mubi kwivwanija buluji bwakyo bwinebwine, inoko bantu ba Yehova abo bevwanija’kyo. Mwanda Mwanā Leza wālombele amba: “Nakufwijapo abe Tata, Mwine wa mūlu ne panshi, ubafuko byo wafīle byobya ku bakudyumuka, ne ku ba[tunangu], nanshi ku twana-twa-lukeke ubasokola’byo.” (Luka 10:21) Bine, i dyese ne dyese’po kashā pa kupebwa Bible, Kinenwa kya Leza kisonekwe, kyabuntu kilēme, ne pa kubadilwa mu boba bapelwe na Yehova bujinguludi bwa ku mushipiditu!—1 Kodinda 1:21, 27, 28; 2:14, 15.

5. Le tunangu i bika, ne i muswelo’ka otukokeja kwikala nato?

⁵ Shi twadi amba ketupelwepo ‘tunangu tutūke mūlu,’ longa ne bujinguludi bwa ku mushipiditu bwine ketudipo nabo. (Yakoba 3:17) Tunangu i bwino bwa kwingidija buyuki ne kwivwanija kwa kuyuka kupwija myanda, kwepuka nansha kupengulula byaka, kufikila pa bitungo, nansha kupāna madingi malumbuluke. Lelo i muswelo’ka otubwanya kwikala na tunangu twa kwa Leza? Nkindi 2:6 unena’mba: “Yehova upananga [tunangu]; mu kyakanwa kyandi mulupuka kuyukidija ne kwivwanija.” I byabine, shi twipāne mu kulomba tunangu, Yehova uketwesela na kwitupa’to, monka mwaāpedile Mulopwe Solomone “mutyima wa [tunangu] ne wa kwivwanija.” (1 Balopwe 3:11, 12; Yakoba 1:5-8) Kadi pa kwikala na tunangu, tufwaninwe ne kwendelela na kuteja Yehova kupityila ku kwifunda Kinenwa kyandi kitatyi ne kitatyi ne kulongela monka mokilombwela.

6. I kika kinenenwa amba kulongela monka mulombwela bijila ne misoñanya ya Leza mu būmi bwetu i kya tunangu?

⁶ Bifwa bibajinji bya tunangu twa kwa Leza bitanwa mu bijila ne mu misoñanya ya mu Bible. Bino namino i bya kamweno kotudi mu miswelo  yonso—ku ngitu, mu ñeni, mu malango ne ku mushipiditu. O mwanda mulembi wa mitōto wāimbile amba: “Mukanda-wabijila wa Yehova i mubwanini[n]e wa kwal[u]ja muya; busapudi bwa Yehova i busumininwe budyumuna bendalale ke badyumuke. Bijila bya Yehova i byoloke, bitōkejanga mutyima; kusomanya kwa Yehova i kutōke, tō, kutōkeja ne meso. Kwakamwa kwa Yehova kudi tō, kwa kulādilamo nyeke na nyeke: Monso mwātyibila mambo Yehova i mulumbuluke, ne kolokamo, swā! I mwabilwa mutabuke ne nsahabu, ē! nansha ne nsahabu mingimingi ītōka tō.”—Mitōto 19:7-10; 119:72.

7. I bintu’ka bilupukanga ku kufutulula misoñanya myoloke ya Leza?

⁷ Ku mutamba mukwabo, boba bafutulula misoñanya myoloke ya Leza kebatanangapo nsangaji ne bwanapabo byobakimba. Ino dyakadilwe kantu dino’di, bakayuka amba Leza kabengwepo kibengo, mwanda muntu wangulanga enka kyokya kyakunine. (Ngalatea 6:7) Bantu bavule bafutululanga misoñanya ya mu Bible bangulanga byamalwa, kifwa memi akubulwa kusaka, lunkunkwa-mulongo lwa mba, ne kumunwa na bibidiji byona ngitu. Bine, poso bālamuka pa mutyima ne kushinta lwendo lwabo, shi bitupu, mfulo ne mfulo bakafwa, nansha konakanibwa’bo na Leza.—Mateo 7:13, 14.

8. I kika kinenenwa amba boba baswele Kinenwa kya Leza i bakatōkwe?

⁸ Ino boba baswele Kinenwa kya Leza, balonda byokinena, bakapetwa na madyese a ntanda ne miseke mu ino myaka ne mu īya’ko. Bine badi na bubinga bwa kwitēlekela bu banyongololwe na bijila bya Leza, badi na nsangaji yabinebine, koku batengele kitatyi kyobakakūlwa ku bupika bwa bubi ne ku byamalwa bya bubi bileta lufu. (Loma 8:20, 21; Yakoba 1:25) Luno lukulupilo i lwabinebine mwanda lwimanine pa kyabuntu kikatampe kya buswe bwa Leza pa bantu—kitapwa kya kinkūlwa kya Yesu Kidishitu, Mwana wandi wa bunka. (Mateo 20:28; Yoano 3:16; Loma 6:23) Kino kyabuntu kya bulēme bukatampe namino kilombolanga mushike wa buswe bwa Leza pa bantu, kadi i kyeya kya madyese a endaenda ku boba bonso bendelela na kuteja Yehova.—Loma 8:32.

Tufwijei’ko pa Kyabuntu kya Mushipiditu Sandu

9, 10. I muswelo’ka otumwenanga mu kyabuntu kya mushipiditu sandu wa Yehova? Leta kifwa.

⁹ Kyabuntu kikwabo kya buswe kitamba kudi Leza kyotufwaninwe kumufwijija’ko i mushipiditu sandu wandi. Mu difuku dya Pentekosa 33 K.K., mutumibwa Petelo wāsoñenye kibumbo kya bantu bādi mu Yelusalema amba: “Alamukai pa mutyima mubatyijibwe bonso mu dijina dya Yesu Kidishitu, nankyo ko kulekelwa kwa myanda, ebiya mukatambula kyabuntu kya [m]ushipiditu [s]andu.” (Bilongwa 2:38) Dyalelo, Yehova upānanga mushipiditu sandu wandi ku bengidi bandi bepāne bamulomba’o, basaka kulonga kiswa-mutyima kyandi. (Luka 11:9-13) Mu myaka ya kala, buno bukomo bukatakata budi mu umbuo wa diulu ne ntanda—mushipiditu sandu wa Leza, bukomo bwandi bwingila—bwākomeje bana-balume ne bana-bakaji ba lwitabijo, kubadila’mo ne bene Kidishitu babajinji. (Zekadia 4:6; Bilongwa 4:31) Byotudi bantu ba Yehova, netu bukokeja kwitukomeja mu bijika ne bikoleja byotukamba nabyo.—Yoela 2:28, 29.

¹⁰ Ivwana kifwa kya Laurel, watyumwininwe panshi na bulebe mukaji nobe, wesela ku mayumba a byuma myaka 37 mituntulu. * Nansha byaadi umona dyemo, ino waingidile Leza na bupyasakane kufika ne ku lufu lwandi. Madyese a Yehova apetele Laurel mu myaka mivule. Kifwa, wakweshe bantu 17 batuntulu baikala na buyuki bwabinebine bwa bubinebine bwa mu Bible, nansha byaadi mutwejibwe mu byuma bufuku ne mwinya! Ngikadilo yandi ituvuluja byānene  mutumibwa Polo amba: “Popa po ndi mukōkekōke popo nkomene.” (2 Kodinda 12:10) Eyo, nansha tulupule bipa bya muswelo’ka mu busapudi bwa myanda miyampe, ke ku bukomo bwa batwe benepo, mhm, i ku bukwashi bwa mushipiditu sandu wa Leza, upebwa boba bendelela na kuteja diwi dyandi.—Isaya 40:29-31.

11. Lelo i ngikadilo’ka ilupulwanga na mushipiditu wa Leza mu boba bavwala “bumuntu bupya”?

¹¹ Ekale twendelele na kuteja Leza na kikōkeji, mushipiditu wandi uketulupwila ngikadilo milumbuluke, kifwa buswe, nsangaji, ndoe, kitūkijetyima, kanye, buyampe, lwitabijo, kutalala ne kwīfula. (Ngalatea 5:22, 23, NW) Kino “kipa kya mushipiditu” kibadilwa mu “bumuntu bupya” bufwaninwe kuvwala bene Kidishitu kupita’ko kuvwala ngikadilo ya bunyema, ya kwionakanya yobādi nayo pa kala. (Efisesa 4:20-24, NW; Isaya 11:6-9) Kya mvubu kutabuka mu kino kipa i buswe, ‘kijimba kibwaninine kya bumo.’—Kolose 3:14.

Buswe bwa Bwine Kidishitu—Kyabuntu Kyotufwaninwe Kuswa

12. Lelo Tabita ne bene Kidishitu bakwabo ba mu myaka katwa imbajinji bālombwele buswe bwabo namani?

¹² Buswe bwa bwine Kidishitu i kyabuntu kikwabo kyeselwe kitamba kudi Yehova—kyotunenwe kuswa. Buludikwanga na misoñanya, ino budi ne na kisanso kikatampe kilunga betabije pamo kutabuka ne musuku o-onso wa ku ngitu. (Yoano 15:12, 13; 1 Petelo 1:22) Kifwa, tala Tabita, mwana-mukaji muyampe wa mu myaka katwa imbajinji. “Wadi muyūlwe munda mwandi mīngilo miyampe, ne byabuntu” bya kanye, byaādi ulongela nakampata bakaji ba bishala ba mu kipwilo. (Bilongwa 9:36) Bano bana-bakaji dimodimo bādi na balongo babo ba ku ngitu, ino Tabita wādi ulonga buninge bwandi bonso mwanda wa kwibakwasha ne kwibakankamika. (1 Yoano 3:18) Bine, Tabita wāshile kifwa kilumbuluke mpata! Buswe bwa bu bana na bana bwātonwene ba Pishila ne Akwila, ‘bātūla mashingo abo’ pa mwanda wa Polo. Buswe bo bonka bwātonwene ne ba Epafalasa, Luka, Oneshifolusa ne bene Kidishitu bakwabo bākakwasha mutumibwa paādi mukutwe mu Loma. (Loma 16:3, 4; 2 Temote 1:16; 4:11; Filemone 23, 24) Ne dyalelo nadyo mo monka, bene Kidishitu ba uno muswelo ‘badi na buswe umbukata mwabo,’ kyabuntu kyeselwe kitamba kudi Leza, kibayukanya bu bana-babwanga babine ba Yesu.—Yoano 13:34, 35.

13. I muswelo’ka otubwanya kulombola amba tukwete na mutyika bu bana na bana bwetu bwa bwine Kidishitu?

 ¹³ Lelo nobe uswele buswe budi mu kipwilo kya bwine Kidishitu? Le ufwijanga’ko Leza pangala pa bu bana na bana botudi nabo ntanda yonsololo? Bino nabyo i byabuntu byeselwe, bitupeteja bupeta bitamba kokwa kūlu. Lelo tubwanya namani kulombola amba twibikwete makasa abidi? I na kwingidila Leza mingilo ikola, na kutanwa ku kupwila kwa bwine Kidishitu, na kwikala na buswe ne na bipa bikwabo bya mushipiditu wa Leza.—Fidipai 1:9; Bahebelu 10:24, 25.

“Bantu bu Byabuntu”

14. I bika bisakibwa ku mwine Kidishitu usaka kwikala mukulumpe nansha mwingidi wa mingilo?

¹⁴ Bana-balume bene Kidishitu babila kwingidila bakwabo batōtyi bu bakulumpe ne bu bengidi ba mingilo bine badi na kitungo kilumbuluke. (1 Temote 3:1, 8) Tutu yense usaka kufikila pa ano madyese ufwaninwe kwikala mwana-mulume mupye ku mushipiditu, mwipāne mu Bisonekwa, kadi mupyasakane mu mwingilo wa budimi. (Bilongwa 18:24; 1 Temote 4:15; 2 Temote 4:5) Ufwaninwe kwikala mwityepeje, wa bumvubumvu, kadi wa mutyima mutūke, mwanda madyese a Leza keapetangapo bantu betatula, beanya, nansha besakila bikatakata. (Nkindi 11:2; Bahebelu 6:15; 3 Yoano 9, 10) Shi udi na mukaji, ufwaninwe kwikala mutwe wa kisaka wa buswe, ulelele kipango kyandi kyonso biyampe byonka. (1 Temote 3:4, 5, 12) Mwana-mulume utele mutyima ku byabupeta bya ku mushipiditu uno muswelo i kwita kwaitanga madyese a Yehova.—Mateo 6:19-21.

15, 16. I bāni betabije kwikala bu “bantu bu byabuntu”? Leta’po bifwa.

¹⁵ Boba bengila mu kipwilo bu bakulumpe pobeelelanga’ko kwikala basapudi, bakumbi, ne bafundiji, betupanga buluji bumwekelele bwa kukwatyila bano “bantu bu byabuntu” na mutyika. (Efisesa 4:8, 11, NW) Kyaba kimo, boba bamwenanga bukwashi mu mingilo ingila bakulumpe na buswe ke ponsopo pobebafwijanga’ko, ino Yehova aye umwene byonso bilonga bano bakulumpe bakikōkeji. Bine, kakavulaminwapo buswe bobalombola pangala pa dijina dyandi na kwingila kobengidila bantu bandi.—1 Temote 5:17; Bahebelu 6:10.

¹⁶ Ivwana kifwa kya mukulumpe umo muvudilwe mingilo wakapempwile nsongwakaji mwine Kidishitu wadi kubwipi na kupasulwa bongolo. “Wadi na kanye, mukwatakani wabinebine, uyukile kuta bakwabo mutyima,” mo mwasonekele mulunda na kino kisaka. “Walombele lupusa lwa kulombela kudi Yehova pamo netu. Paadi ulombela, shandya mwana [ke Kamonipo] washilula kutyikuka, impolo ya bonso badi mu kyumba kya lupitalo yasūma. Bine, ino milombelo ya mukulumpe yadi ya kanye, kadi bwadi buswe bukatampe mpata bwa Yehova pa kumutuma enka pa kine kitatyi’kya!” Kamoni mukwabo wadi ubela wisambila pa bakulumpe bakamupempwile amba: “Pobafwenene ku butanda bwami mu kyumba kya bundapi bwa kupēlakana na boba babela misongo mikomo, neivwene ne mutyima munda wauntūka, na’mba pano kubapu, kintu kyo-kyonso kyadi kya kumfikila tamba penepa,  nadi mbwanya kutyumwina’kyo mu manwi. Neivwene bukomo ne ndoe ponka.” Lelo kudi muntu ubwanya kupota mutyima wa buswe budi namino? Mhm! I kyabuntu kitamba kudi Leza, kyotupelwe mu kipwilo kya bwine Kidishitu.—Isaya 32:1, 2.

Kyabuntu kya Mwingilo wa Budimi

17, 18. (a) I kyabuntu’ka kya mingilo kipēne Yehova ku bantu bandi bonsololo? (b) I bukwashi’ka bwitukwashanga Leza bwitupa muswelo wa kwingila senene mwingilo wetu?

¹⁷ Kekudipo bulēme bupebwa muntu butabukile buno bwa kwingidila Yehova, Mwine Mukatakata Mwine. (Isaya 43:10; 2 Kodinda 4:7; 1 Petelo 2:9) Inoko, ano madyese a kusapwila bantu i mapebwe bonso—bankasampe ne batame, bana-balume ne bana-bakaji—baswele binebine kwingidila Leza. Lelo nobe wingidijanga kino kyabuntu kilēme? Bamo bekakanga, bemona bu bantu kebafwaninwepo, ino vuluka amba Yehova upānanga mushipiditu sandu wandi ku boba bamwingidila, kadi witupanga’o ponso potusakilwa’o.—Yelemia 1:6-8; 20:11.

¹⁸ Yehova i mupe bengidi bandi betyepeje mwingilo wa kusapula Bulopwe, kapele’opo bantu betatula, bekulupile ñeni ya abo bene. (1 Kodinda 1:20, 26-29) Bantu betyepeje, batūkanye bayukile mikalo yabo, bakulupile bukwashi bwa Leza pobatambila mu mwingilo wa budimi. Kadi basangelanga bukwashi bwa ku mushipiditu bwaibakwashanga kupityila kudi “kalama wa[bine]bine.”—Luka 12:42-44; Nkindi 22:4.

Kisaka kya Nsangaji—Kyabuntu Kilumbuluke

19. I bintu’ka bikwasha pa kusaka kulela bana biyampe?

¹⁹ Busongi ne kisaka kya nsangaji nabyo i byabuntu bitamba kudi Leza. (Luta 1:9; Efisesa 3:14, 15) Bana nabo i ‘bipyanwa bilēme bitamba kudi Yehova,’ biletela bambutwile nsangaji shi bakuna mobadi ngikadilo ya bwine Leza. (Mitōto 127:3) Shi wi mbutwile, endelela na kuteja diwi dya Yehova dikusoñanya kufundija bobe bana mungya Kinenwa kyandi. Boba bonso balonga namino bakakwatakanibwa na Yehova ne kweselwa madyese a ntanda ne ntanda.—Nkindi 3:5, 6; 22:6; Efisesa 6:1-4.

20. I bika bibwanya kukwasha bambutwile badi na bana balupukile mu mutōtelo wabine?

²⁰ Nansha shi bambutwile bakaminwe Leza abalonga bukomo bwa namani, bana bamo pa kutama bakokeja kulupuka mu mutōtelo wabine. (Ngalwilo 26:34, 35) Kino kibwanya kususula bambutwile mu milangwe. (Nkindi 17:21, 25) Inoko, pa kyaba kya kukunguka, i biyampe bavuluke kifwa kya mwana wa kisūpa kyāletele Yesu. Uno mwana, nansha byaāshile njibo yabo, wākalonga bya bulongelonge, ku mfulo wājokēle ku njibo ya shandi; nandi wāmutambula na nsangaji biyampe shē. (Luka 15:11-32) Nansha shi bambutwile bakikōkeji abafikilwa na mwanda’ka, bafwaninwe kukulupila amba Yehova ukebevwana, ukebata mutyima na buswe ne kutenga’po kuboko.—Mitōto 145:14.

21. Lelo i ani otufwaninwe kuteja, ne mwanda waka?

²¹ Shi ke pano, umo ne umo ajingulule kintu kya mvubu yabinebine mu būmi bwetu. Lelo tulondalondanga na lwiso byabupeta bibwanya kwituletela njia batwe ne bisaka byetu’ni, nansha tulondalondanga “byakupanwa bilumbuluke, ne byabuntu bibwa[nini]ne” bitamba kudi “Shandya bitōkeji”? (Yakoba 1:17) Satana, ‘shandya bubela,’ usaka twipāne mu kusakasaka bupeta bwa ku ngitu ino tujimije nsangaji ne būmi bwetu bwine. (Yoano 8:44; Luka 12:15) Yehova aye witusakilanga biyampe kadi utele’ko mutyima. (Isaya 48:17, 18) Shi ke pano nanshi, twendelelei na kwivwana Tata wetu wa mūlu ne ‘kuloelelwa nyeke’ mwadi. (Mitōto 37:4) Shi tulondelonde būmi budi namino, madyese ne byabuntu bya Yehova byampikwa mfulo biketupeteja—kadi pampikwa kanjia nansha katye.

[Kunshi kwa dyani]

Lelo Ukivulukile?

• I kwepi kubwanya kutanwa nsangaji mikatampe kutabuka?

• I byabuntu’ka bimobimo Leza byapele bantu bandi?

• I kika kinenenwa amba mwingilo wa budimi i kyabuntu?

• Bambutwile bakokeja kulonga bika shi basaka kweselwa dyese na Leza pobatamija babo bana?

[Bipangujo bya Kifundwa]

[Kifwatulo pa paje 14]

Lelo ufwijanga’ko Leza pangala pa kyabuntu kya Kinenwa kyandi kisonekwe kyaitupele?

[Kifwatulo pa paje 15]

Laurel Nisbet waingidile Leza na bupyasakane nansha byaadi mu makambakano

[Bifwatulo pa paje 16]

Bene Kidishitu ba mu ano mafuku i bayukane pangala pa bilongwa byabo bya buswe pamo’nka bwa Tabita

[Kifwatulo pa paje 17]

Bakulumpe bene Kidishitu batele banababo betabije mutyima na buswe