Lelo Uketukalañanya ne Buswe bwa Leza I Ani?
Lelo Uketukalañanya ne Buswe bwa Leza I Ani?
“Bātwe tumuswele mwanda aye ye umbajinji kwituswa.”—1 YOANO 4:19.
1, 2. (a) Mwanda waka i kya mvubu kuyuka amba betuswele? (b) I buswe bwa ani botusakilwa nakampata?
MWENE kwiyuka amba bakuswele i kintu kya nsangaji mikatampe mpata? Tamba ku bwanuke kutūla ne ku bukulu, bantu basakanga nyeke kuswibwa. Mwene kodi mumone pobanyunya mwana wa lukeke kudi inandi? Divule, nansha shi kudi kintu kampanda kimulongelwe, pabandila’tu inandi mu meso umumungijamungija, wiivwananga biyampe, walāla talala nyā mu maboko a inandi umuswele. Pakwabo ubulwe’po kuvuluka powādi ukidi na bukodi mu myaka ya bunkasampe? (1 Tesalonika 2:7) Padi kodi mwilwe ne byowādi ukolela bine nansha mowādi wiivwanina, ino kikatampe kyofwaninwe kuyuka i kino, ba shobe ne inobe bādi bakuswele byabinebine! Mwene kyādi kikukwasha mpata pa kuyuka amba ubwanya kwibafwena na kamwanda ko-konso nansha na kipangujo kyo-kyonso? Bine, mu būmi bwetu bonso, kimo kya mu bintu byotukimbanga nakampata i kuswibwa, mwanda ko kwitukulupijanga amba tudi na mvubu.
2 Buswe bwa endaenda bwa bambutwile butamijanga mwana biyampe, na mutyima mufukate. Ino kuyuka amba Yehova, Tata wa mūlu, wituswele i kintu kya mvubu mikatampe mpata mu būmi bwetu bwa ku mushipiditu ne mu malango etu. Mu bavule batanga dino dipepala, bamo kebālelelwepo biyampe na bambutwile babo. Shi nobe kwālelelwepo biyampe, nankyo tūkija mutyima. Nansha shi wābudilwe buswe bwa bambutwile, nansha shi kebwākutondelepo, ino buswe bwakubulwa mfulo bukuswele Leza bukakukwasha.
3. Yehova wākulupije bantu bandi muswelo’ka amba wibaswele?
3 Yehova wāsabile mwanda kupityila kudi mupolofeto wandi Isaya amba inamwana ubwanya ‘kuvulaminwa’ wandi mwana waamusha, ino Yehova aye kadipo mwa kwidilwa bantu bandi. (Isaya 49:15) Davida nandi monka na monka, wānene na kikulupiji amba: “Batata ne lolo abandekelela, nanshi Yehova ukamboyanga.” (Mitōto 27:10) Bine, kino kitukulupija mpata! Nansha shi udi mu bikoleja kampanda, ke mwandapo mukatampe, shi kodi kala musambe bulunda na Yehova Leza na kwipāna, yuka amba buswe bwakuswele bupityile kulampe kwine buswe bo-bonso bubwanya kukuswa bantu!
Mwilamei mu Buswe bwa Leza
4. Bene Kidishitu ba mu myaka katwa imbajinji bākulupijibwe namani amba Leza udi na buswe?
4 Lelo i kitatyi’ka kyowayukile dibajinji buswe bwa Yehova? Dimodimo nobe wayukile’bo enka mwāyukile’bo bene Kidishitu ba mu myaka katwa imbajinji. Shapita wa 5 mu mukanda wa Polo kudi bene Loma ulombola senene mwāyukile babipya-mambo buswe bwa Yehova, abo bantu bādi babomboke kudi Leza. Tutanga mu vese 5 namino amba: ‘Mwanda buswe bwa Leza bupungulwilwanga mu mityima yetu, kupityila ku mushipiditu sandu waetupele.’ Mu vese 8, Polo ubweja’ko amba: “Leza aye wetwanina [buswe bwa] aye mwine, pa kunena’mba, po twakidi bipya-mambo, Kidishitu wetufwila.”
5. Wāyukile namani amba buswe bwa Leza i bukatampe?
5 Ne abe nobe mo monka, pobākulombwele bubinebine bwa mu Kinenwa kya Leza, wāshilula kwikala na lwitabijo, mushipiditu sandu wa Yehova wāshilwile kwingila mu mutyima obe. Penepa wāanza kwivwanija bukatampe bwa byobya bikulongēle Yehova pa kutuma wandi Mwana muswedibwe afwe pa mwanda obe. Enka namino, Yehova wākukwasha, nobe wāyuka mwaswidile bantu. Powāyukile amba Yehova i mushitwile bantu dishinda dya kubingijibwa bu boloke ne kwibapa kyepelo kya kukekala na būmi bwampikwa mfulo, nansha byobākubutwidile mu bubi bu muntu mubomboke kwadi, mwene wātengelwe ku mutyima? Mwene wāivwene buswe bwa Yehova bukukunka ku mutyima?—Loma 5:10.
6. Mwanda waka kyaba kimo twiivwananga bu tudi kulampe na Yehova?
6 Wāikele kupāna būmi bobe kudi Leza, mwanda wākokelwe na buswe bwa Tata wa mūlu, wāsendulula būmi bobe mwasakila. Pano wi mupwane nandi. Ino, le kudi bitatyi byowiivwananga bu kodi kulampe na Yehova? Eyo, byabyo bitufikilanga batwe bonso. Ino vuluka amba Leza kashintangapo. Buswe bwandi budi’ko nyeke, butuntulu pamo’nka bwa dyuba, kedikokangapo kutuma mwinya wadyo wa kyanga pano panshi. (Malaki 3:6; Yakoba 1:17) Batwe’ko bo bashintanga—mu kyaba mu kyaba. Ntanda poijokolokanga, kipindi kimo kya umbuo kipūtwanga na fukutu. Ne batwe netu mo monka, shi tuvundamine kudi Leza, nansha bityetye’tu, ne kipwano kyotupwene nandi nakyo kitalala. Lelo kulemununa uno mwikadilo kwitulomba kulonga’po kika?
7. Lelo kwibandaula batwe bene kubwanya namani kwitukwasha twikale nyeke mu buswe bwa Leza?
7 Shi tubaivwana mutyima witulombola amba tubasansana na buswe bwa Leza, tufwaninwe kwiipangula’mba: ‘Lelo ke kukwatapo konkwatyile buswe bwa Leza ku mukose? Le kendi mushilule kuvundamina bityebitye kudi Leza mūmi, wa buswe, na kwikala na bukōkekōke kampanda mu lwitabijo lwami? Lelo mutyima wami ulañanga’nka ‘bintu bya ku ngitu,’ pa kyaba kya ‘bintu bya ku mushipiditu?’ (Loma 8:5-8; Bahebelu 3:12) Shi ketudi basonsoloke kudi Yehova, twalwilei’ko kutabula matabula a kwisendulula, mwa kujokejeja kipwano kiloe, kya kyanga, kyotupwene nandi. Yakoba witusoñanya’mba: “Fwenai kudi Leza, nandi ukemufwena.” (Yakoba 4:8) Vuluka byānene Yude, amba: ‘Banwe baswe, mwilamei monka mu buswe bwa Leza na kwishimatyija banwe bene pa lwitabijo lwenu lukola byamwiko, ne na kulombela na mushipiditu sandu.’—Yude 20, 21.
Nansha shi Ngikadilo Ibashinta, Buswe bwa Leza Kebushintangapo
8. I kushinta’ka kubwanya kwitufikila mu būmi bwetu pamo na mu kukopa kwa diso?
8 Būmi botudi nabo mu ino ngikadilo ya bintu bushintanga kyaba ne kyaba. Mulopwe Solomone wānene kyabine, amba ‘kitatyi ne myanda yampikwa kulaya bitufikilanga batwe bonso.’ (Musapudi 9:11) Mu difuku dimo dyonka, būmi bwetu bubwanya kushinta lonso. Dyalelo tukokeja kwikala bakenke, kesha twaponena mu misongo mikomo. Tubwanya kumona kaji kayampe dyalelo, ino kesha ketudi balofwa. Lufu nalo monka na monka, kelulayangapo, lubwanya kupitula muswe wetu. Bene Kidishitu mu ntanda kampanda bakokeja kwikala mu ndoe kyaba kimo, ino na mu kukopa kwa diso kupangwapangwa kwa malwa kwashilula. Pakwabo tubwanya kutwikwa myanda ya bubela, ebiya betutyibila ne mambo na maviyo. Bine, būmi kebujalelepo’tu biyampe, o mwanda kebukulupilwapo kubwina mu byonso.—Yakoba 4:13-15.
9. Mwanda waka i biyampe kubandaula kipindi kya Loma shapita 8?
9 Ekale bishoto bya uno muswelo bibetutana, ke biyampepo kwimona bu belwe, nansha kulanga amba buswe bwa Leza kotudi bubatyepa. Byotuyukile kala amba bino bintu bibwanya kwitufikila batwe bonso, tufwaninwe nanshi kubandaula na katentekeji binenwa bisenga pa mutyima byāsonekele mutumibwa Polo mu Loma shapita 8. Bino binenwa byānenwe bene Kidishitu bashingwe māni a mushipiditu. Ino musoñanya udi’mo ubwanya kukwasha ne mikōko mikwabo, itwa na Leza bu boloke, balunda nandi, pamo’nka na mwādi mwityilwa Abalahama mu myaka ya kalā ne bwine Kidishitu bwine kebwashimikilwe.—Loma 4:20-22; Yakoba 2:21-23.
10, 11. (a) I myanda’ka imo yobalambika bantu ba Leza kudi balwana nabo? (b) I kika kinenenwa amba bino byonso bilambikwa bene Kidishitu i bya bitupu?
10 Tanga Loma 8:31-34. Polo wipangula’mba: “Shi Leza i wetu, nankyo uketulonga bubi i ani?” Bine, Satana ne ntanda yandi imbi i bakinkwa netu. Babwanya kwitutwika myanda ya bubela, betutwala’nka ne mu bidye. Bambutwile bamo bene Kidishitu basambilwanga amba bashikilwe babo bana mwanda wa kupela kobapelanga kwibondapija na myundapilo ijilula bijila bya Leza nansha kwibaleka batweja mitwe mu masobo a bujentaila. (Bilongwa 15:28, 29; 2 Kodinda 6:14-16) Bene Kidishitu bakwabo bakikōkeji ke basambilwe amba bongolanga bantu na kupela kobapelanga kwipaya bakwabo bantu mu mavita ne kupela kwikuja mu myanda ya kipolitike. (Yoano 17:16) Bakinkwa bamo bavubilanga Batumoni ba Yehova myanda ya bubela mu majulunale ne ku bisambwa bya luvula amba i katangotango kaleta kyaka.
11 Ino kokivulaminwa amba mu mafuku a batumibwa, bantu bādi banena’mba: “Kino kitango kya bakētutyilemo kibayūkibwa ne kuno ko tudi bātwe, kīsambilwa bibi konso konso.” (Bilongwa 28:22) Lelo kutwikwa myanda ya bubela kudi ne na mwanda’ni? Leza mwine ye ubingija bene Kidishitu babine bu boloke, mungya lwitabijo lwabo mu kitapwa kya Kidishitu. Lelo kudi kilekela Yehova kuswa batōtyi bandi, aye mupwe kala kwibapa wandi Mwana muswedibwe bu kyabuntu kilēme kitabukile byabuntu byonso? (1 Yoano 4:10) Panenwa pano Kidishitu wāsangwilwe kala mu bafwe, ushikete ku lundyo lwa Leza, kwasengela bene Kidishitu. I ani ubwanya kuleta bubinga bwa kuponeja Kidishitu pangala pa kwitabila kwaitabila balondi bandi, i muntu’ka ukokeja kupatanya Leza pa kubingija kwabingija bengidi bandi bakikōkeji? Nansha umo!—Isaya 50:8, 9; Bahebelu 4:15, 16.
12, 13. (a) I bintu’ka kebibwanyapo kwitukalañanya na buswe bwa Leza? (b) I kika kisaka Dyabola paitukolomwena ano makambakano onso? (c) Mwanda waka bene Kidishitu batambulanga bushindañani ne pa mfulo?
12 Tanga Loma 8:35-37. Ku mutamba wetu, lelo kudi muntu nansha kintu kibwanya kwitukalañanya na buswe bwa Yehova ne Kidishitu Yesu wandi Mwana? Satana ukokeja kwingidija bengidi bandi ba pano panshi mwanda wa kukolomwena bene Kidishitu tuvutakanya tuvulevule. Mu myaka katwa yapityile’i, batutu ne bakaka bene Kidishitu bavule basusukile mu matanda mavule na kupangwapangwa kwa malwa. Mu bifuko bimobimo dyalelo, banabetu basusuka difuku ne difuku na kubulwa kwa lupeto. Bakwabo bafwa nzala, babulwe ne bisandi biluji bya kuvwala. Lelo kisaka Dyabola mu ano makambakano onso aebakolomwena i kika? Kunena na bubine, kimo kya mu bitungo byandi i kusaka kuzozeja batōtyi babine ba Yehova. Satana usaka tumone amba buswe bwa Leza kotudi bubatalala. Le i bine kidi uno muswelo?
13 Bine tufundanga Kinenwa kya Leza kisonekwe, pamo bwa Polo wātelele binenwa bidi mu Mitōto 44:22. Tuyukile amba bino bintu bitufikila, bitufikilanga batwe “mikōko” ya Leza pa mwanda wa dijina dyandi. Kutentekela’po ne kuyukanya kotuyukanyanga buujila bwa dijina dya Leza, tubingija ne bubikadi bwandi bwa diulu ne ntanda. Nanshi kikatampe kine kilekēle Leza ano matompo i ino myanda mikatampe, ke kunenapo amba kakituswelepo. Tukulupilei nyeke amba buswe bwa Leza ku bantu bandi, ne ku umo ne umo wa motudi, kebushintangapo nansha shi tutenwe na bikoleja’ka. Byonso byotumona bu bishoto bibwanya kwalamuka ke bushindañani shi twikale kulama bululame bwetu. Kintu kitupa bukomo ne kwimanija i buswe bwa Leza bwakubulwa mpwilo.
14. Mwanda waka Polo wādi musumininwe amba Leza uswele bene Kidishitu nansha byobekonda na bikoleja?
14 Tanga Loma 8:38, 39. I kika kyānekenye Polo asumininwe amba i kutupu kintu kyādi kya kubwanya kukalañanya bene Kidishitu na buswe bwa Leza? Na bubine i bintu byāikele kwimwena aye mwine mu mwingilo wandi byo byāningishe kikulupiji kyandi kya amba bikoleja kebidipo mwa kwitukalañenya na buswe bwituswele Leza. (2 Kodinda 11:23-27; Fidipai 4:13) Kadi Polo wādi muyuke mpango ya nyeke ya Yehova ne bilongwa byaālongēle bantu bandi pa kala. Lelo lufu lubwanya kunekenya buswe bwa Leza ku boba bamwingidila na dikōkeji? Nansha dimo! Bakikōkeji bafwa bavulukwanga mu lūku lubwaninine lwa Leza, wibamona enka mobādi bekadile bōmi, bine ukebasangula pa kitatyi kifwaninwe.—Luka 20:37, 38; 1 Kodinda 15:22-26.
15, 16. Tela bintu bimobimo kebibwanyapo nansha dimo kulekeja Leza kuswa bengidi bandi.
15 Buno būmi bwa tusua botudi nabo dyalelo kebudipo na kintu nansha kimo—shi kīka kitushila bulema, shi misongo ya lufu, shi bufudile—kibwanya kupwija buswe bwa Leza ku bantu bandi. Nansha ke bamwikeulu bakomo, kifwa yewa mwikeulu ntomboki wāikele ke Satana, kebabwanyapo kulekeja Leza kuswa bengidi bandi bamwingila. (Yoba 2:3) Imbikalo shayo ibwanya kukankaja bengidi ba Leza, kwibakuta, kwibamwesha malwa, nansha kwibatela bu “bisumbule.” (1 Kodinda 4:13) Mushikwa wakubulwa mwanda witushikilwe mizo uno muswelo ubwanya kufikija bantu ku kwitwalamukila, inoko Mfumu Mulopwe wa diulu ne ntanda kaketwelapo.
16 Batwe bene Kidishitu ketudipo ne kyotukwatyilwa moyo wa byobya byātelele Polo bu “bintu bidipo panopano”—bimbidikita, binzengele, binkumbulu byo-byonso bya ino ngikadilo ya bintu—nansha ke byobya “bikāyako kumeso” bine kebikalamunapo Leza ku bantu bandi. Nansha byobetulwa bulwi kudi bibumbo bya mūlu ne bya pano panshi, buswe bwa Leza bwa nyeke budi’ko bwa kwituningisha. Polo wānene ukoma, amba: “Nansha bula bwa mūlu, nansha bula bwa panshi” kebubwanyapo kutyepeja buswe bwa Leza. I amo, kekudipo kintu nansha kimo, shi kika shi kika, kya kwitōnya, nansha shi kidi na lupusa lukatampe namani, kibwanya kwitukalañanya na buswe bwa Leza; nansha kipangwa, shi kipangwa’ka shi kipangwa’ka, kibwanya kutyiba kipwano kya Umpangi na bengidi bandi bakikōkeji. Buswe bwa Leza kebukankalwangapo; i bwa nyeke.—1 Kodinda 13:8.
Kwata Kanye ka Buswe bwa Leza Makasa Abidi Nyeke ne Nyekeke
17. (a) I kika kinenenwa amba kwikala mu buswe bwa Leza ‘kutabukile kwikala na būmi’? (b) I bintu’ka byotufwaninwe kulonga bilombola amba tukwete makasa abidi kanye ka buswe bwa Leza?
17 I mvubu’ka idi na buswe bwa Leza kodi? Lelo nobe wiumvwananga na mwādi mwiumvwanina Davida wāsonekele amba: “Ke-kantu kanye ka [buswe b]obe katabukile būmi kulumbuluka: Milomo yami īkakutendelanga. E mo nkakutōtelanga ponso po ngikele ne būmi: Nkatululanga maboko ami mu dijina dyobe”? (Mitōto 63:3, 4) Le binebine kudi kintu kampanda kibwanya kwitupa buno būmi botudi nabo mu ino ntanda kipityile buswe bwa Leza ne bulunda botupwene nandi na dikōkeji? Tulete kifwa, lelo kwipeneneka na kaji ka ku ngitu kakubulwa mpwilo kutabukile ndoe ya mutyima ne nsangaji ilupukanga ku kuloeja kipwano na Leza? (Luka 12:15) Bene Kidishitu bamo ke batanwe na myanda ibalomba kutonga’ko kimo, shi kutuna Yehova, shi kufwa. Kino kyo kyāfikile banabetu bavule Batumoni ba Yehova bādi mu makomponi a malwa a Nazi pa Divita II dya Ntanda. Bano banabetu bene Kidishitu bātongele kwikala nyeke mu buswe bwa Leza, bāitabija nansha kufwa. Boba bekalanga nyeke mu buswe bwa Leza bakulupile kukapebwa būmi bwa nyeke, kino i kintu kimo kekibwanyapo kwibapa ino ntanda nansha dimo. (Mako 8:34-36) Ino kudi bintu bivule byobakapebwa, ke enkapo būmi bwa nyeke.
18. Mwanda waka būmi bwa nyeke bwabilwa bininge?
18 Eyo, tuyukile shetu amba būmi bwa nyeke kebubwanikapo pambulwa Yehova kwikala’ko, ino langa’po bidi, būmi bwa muntu bwadi bwa kwija mafuku anga shi Umpangi wetu wadi amba i kutupu’ye. Bwadi bwa kwikala būmi bwa bitupu, bwampikwa kitungo. Yehova i mupe bantu bandi mwingilo muyampe wa kwingila mu ano mafuku a mfulo. Nanshi tukulupilei amba Yehova Mufikidiji Mukatampe wa Mpango ukaleta būmi bwa nyeke, bukekala būmi buyule bintu bivule bisangaja, bya kwifunda ne bya kulonga. (Musapudi 3:11) Nansha ketupwile tununu ne tununu twa myaka, ketukapupo kusāta ne pa mfulo ‘munshi mu nkulwe ya bupeta ne tunangu ne buyuki bwa Leza.’—Loma 11:33.
Tata Wimusenswe
19. I kikulupiji’ka kya pa kwishadika kyāpēne Yesu Kidishitu kudi bandi bana-babwanga?
19 Yesu wānene bintu bivule bya kukankamika batumibwa bandi 11 bakikōkeji pa byādi bibatengele kumeso, mu difuku dya 14 Nisane, 33 K.K., kyolwa kya mfulo kwikala nabo. Bāikele kushikilwa na Yesu mu matompo andi onso, bāmona ne muswelo waādi wibaswele. (Luka 22:28, 30; Yoano 1:16; 13:1) Ebiya Yesu wēbakulupija’mba: “Tata wimusenswe kala nakampata.” (Yoano 16:27) Bine, bino bishima byākweshe bana-babwanga bininge, bāyuka buswe bukatampe bwādi bwibaswele Shabo wa mūlu!
20. Lelo usumininwe kulonga bika, ne i bika byofwaninwe kukulupila?
20 Bavule badi na būmi dyalelo ke bengidile Yehova na kikōkeji myaka makumi ne makumi. I bine, kumeso kwa mfulo ya ino ngikadilo ya bintu kufika, tusa kutompibwa matompo mavule. Ketwakilekai matompo nansha bishoto bitufikije ku kwalakana buswe bwituswele Leza. Kekudipo ne kyotukambakena na kunena tukoma’mba: Yehova ukuswele. (Yakoba 5:11) Umo ne umo endelele nyeke na kulonga buninge bwa kulonda nyeke mbila ya Leza. (Yoano 15:8-10) Tukwatakanyei mikenga yo-yonso yotumona ya kutendela dijina dyandi. Tusumininwei nyeke kuloeja kipwano kyetu na Yehova na milombelo, ne na kwifunda Kinenwa kyandi. Nansha shi kubaikala biketufikila kesha, shi bika shi bika, tulongei bukomo bwa kusangaja Yehova, tukekala nyeke mu ndoe, koku tukulupile ne mutyima onso amba buswe bwandi kebukankalwangapo.—2 Petelo 3:14.
Usa Kulondolola Namani?
• Shi tusaka kwikala na mutyima mufukate ku mushipiditu ne mu malango, i buswe bwa ani botusakilwa?
• I bintu’ka kebibwanyapo kukalakanya buswe bwa Leza ku bengidi bandi?
• I kika kinenenwa amba kwikala mu buswe bwa Yehova ‘kutabukile kwikala na būmi’?
[Bipangujo bya Kifundwa]
[Bifwatulo pa paje 8]
Shi twimona bu ketudi kulampe na buswe bwa Leza, twalwilei’ko kwisendulula
[Kifwatulo pa paje 9]
Polo wādi uyukile kyaādi upangilwapangilwa