Bipangujo bya Batangi

Mungya musoñanya wa Leza usonekelwe mu Yelemia 7:16, lelo bene Kidishitu kebafwaninwepo kulombela pangala pa muntu upangilwe mu kipwilo kya bwine Kidishitu mwanda’po’tu i nonga-bubi wakubulwa kwalamuka pa mutyima?

Yehova, pa kupwa kutyibila Yuda wakubulwa kikōkeji nsambu, wālombwele Yelemia amba: “Penepa kadi kokilombelela bano bantu bano’ba, nansha kutulula diwi, nansha lulombelo lwa abo, nansha kusengela ko ndi; mwanda nkikevwanapo.”—Yelemia 7:16.

Mwanda waka Yehova wāpeleje Yelemia kulombela pangala pa bene Isalela? Kunena na bubine, mwanda bādi bajilula byamwiko Bijila Byandi. Kadi bādi ‘beba, bepayañana, balonga makoji, batyipa bya bubelabubela ne kusokeja ensense kudi Bala, balonda baleza bangi,’ balonga bino byonso muongo pa ntanda, ne bumvu bwine mpika. O mwanda Yehova wālombwele bano Bayuda bakubulwa lwitabijo amba: “Nkemwela ku meso ami monka mo naelele bāna benu bonso, ke lukunwa lonso lwa Efelaimi kadi.” Bine, shi Yelemia nansha muntu mukwabo wādi amba wālombele amba Yehova aleke kufikidija butyibi bwaātyibile bano bantu, longa wājilwile.—Yelemia 7:9, 15.

Pa kino, mutumibwa Yoano nandi wāsonekele myanda itala milombelo ifwaninwe kulombela kudi Leza. Dibajinji, wāpele bene Kidishitu kikulupiji amba: “Wivwane tulombe kintu, shi kika, shi kika, monka muswidile mutyima wandi, nankyo witwivwana.” (1 Yoano 5:14) Kupwa wāsoneka pa mwanda utala kulombelela’ko bakwetu, amba: “Shi muntu amone mukwabo ulonga bubi kebumuletelapo lufu, nankyo ufwanyinwe alombe Leza, nandi ukapa mwanetu’wa bumi. Kino’ki i kyendele’mo ku bubi kebuletapo lufu. Ino nanshi kudi kadi ne bubi buleta lufu, ino nkinenepo’mba mulombele bubi bwa muswelo uno, enhe.” (1 Yoano 5:16, MB) Ne Yesu nandi wēsambīle pa bubi ‘kebukalekelwapo muntu,’ bubi bwa kulubila mushipiditu sandu.—Mateo 12:31, 32.

 Lelo kino kishintulula amba boba bonso bapangilwe mu kipwilo kya bwine Kidishitu pangala pa bubi bobalongele pakubulwa kwalamuka pa mutyima i balonge bubi “buleta lufu,” kebafwaninwepo kulombelelwa’ko? Mhm, ke amopo, mwanda kyaba kimokimo, bilubo bya uno muswelo kebikalangapo bubi buleta lufu. Kunena na bubine, i bikomo kuyuka bubi buleta lufu i bwepi. Tulete kifwa kya Manase Mulopwe wa Yuda. Wāshimikile madabahu a bilezaleza, wālambula bandi bana ba kwibutwila bu bitapwa, wālonga bya majende, wātūla ne bankishi basongwe mu tempelo ya Yehova. Bible unena amba Manase ne bantu bandi bālongele “kibikibi kutabuka ne byalongele mizo’ya mine, yaonakenye Yehova ku meso a bāna ba Isalela.” Pa kumona bino byonso, Yehova wāpa Manase mfuto, wāmuseleja mu Babiloni bu musungi, kasha bamukuta mu nkano.—2 Balopwe 21:1-9; 2 Bilongwa 33:1-11.

Lelo bubi bwa Manase, nansha byobwādi bukatampe nabya, bwādi bubi buleta lufu? Mobimwekela kebwādipo buleta lufu, mwanda nsekununi isambila monka padi aye amba: “Byobiya pa kwikala mu byamalwa washilula kukimba Yehova Leza wandi, ne kwityepeja pakatampe pene ku meso a Leza wa bashandi. Ino walombela kwadi, nandi waitabija kwadi, waivwana kwisasa kwandi, penepo wamujokeja monka ku Yelusalema, mu bulopwe bwandi. Ponkapo Manase po pāyukile’mba Yehova i Leza.”—2 Bilongwa 33:12, 13.

Nanshi ketufwaninwepo kwiyumba kunena amba kampanda i mulonge bubi buleta lufu mwanda’po’tu wapangwa mu kipwilo. Eyo, pa kusaka amba muntu asokwele patōka ngikadilo minemine idi mu mutyima wandi, palombanga shapo kitatyi. Ino ketwakilwai amba kimo kya mu bitungo bipangilwanga muntu i ne kulengeja nonga-bubi’wa ealakanye, ebiya esāse na lukulupilo lonso ne kuvundamina’bo.

Uno muntu byadi panja pa kipwilo, kwalamuka kwandi konso kwa mu mutyima ne mu ngikadilo kukamonwa dibajinji na boba badi nandi kubwipi, kifwa mwine pandi nansha bantu ba mu kisaka kyabo. Boba bamona kuno kwalamuka bakokeja kala kunañuna amba uno kipya-mambo kalongelepo bubi buleta lufu. Bakokeja kwikala na mutyima wa kumulombelela’ko amba amone kukomejibwa na Kinenwa kya Leza kisonekelwe ku bukomo bwa mushipiditu ne amba Yehova alongele uno kipya-mambo mungya kiswa-mutyima Kyandi.—Mitōto 44:21; Musapudi 12:14.

Eyo, bantu bamobamo bakokeja shabo kwikala na muswelo wa kumona bintu bivule bilombola amba kipya-mambo’wa waalamuka pa mutyima, ino padi ke kipwilopo kyonso kituntulu kikokeja kumona’byo. Kino kikokeja kwibatulumuja, kwibavutakanya ñeni, pakwabo ne kwibakukaja shi abaivwana mwanetu kampanda ulombela mu kitango kya bantu pangala pa upangilwe. Pa mwanda wa buno buluji, boba batononwa na mutyima wa kusaka kulombela pangala pa kipya-mambo bafwaninwe kulombela pa bunka bwabo kete, ne kuleka bintu bikwabo bitala pa uno mwanda mu makasa a bakulumpe bapelwe kiselwa mu kipwilo.

[Kifwatulo pa paje 30]

Bubi bukatampe bwālongele Manase bwāmulekelwe kitatyi kyaētyepeje ku meso a Yehova

[Kutambile Kifwatulo pa paje 29]

Kiselwe mu dibuku Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung dya Martin Luther