“Mu Mwinya Obe Tukamonanga Mwinya”

MWINYA i kintu kyotupēlekanga mpata, ino shi mudilo wa nshinga ubaenda, mukenza onso washala mu fukutu bwī, ye kwanza twayuka amba nanshi mwinya udi na mvubu. Ino bibanengela, mwanda “kité kya mwinya” wa mūlu—dyuba—kidi na mwinya keudi mpwilo. Bine mwinya wa dyuba o witupa muswelo wa kumona, kudya, kwesa, ne kwikala bomi.

Mwinya udi na mvubu mpata umbūmi, o mwanda ketutulumukapo pa kutanga mu Ngalwilo amba mwinya wāmwekele mu difuku dibajinji dya bupangi. “Leza wānena amba: ‘Mwinya wikale’ko.’ Penepa mwinya wāikala’ko.” (Ngalwilo 1:3, NW) Bene Leza binebine, kifwa Mulopwe Davida, bayukanga nyeke amba Yehova ye nsulo ya būmi ne mwinya. Davida wāsonekele amba: “Nsulo ya būmi īdi kōdi; mu mwinya obe tukamonanga mwinya.”—Mitōto 36:9.

Bino binenwa bya Davida i bya kulonda pa bute pa bute ne mu bu kyelekejo. Dibuku dimo (Encyclopædia Britannica) dinena’mba: “Kunena na bubine mwinya o ulengeja kumona na meso kwikale’ko.” Kupwa dibweja’ko amba: “Myanda mivule ifikanga ku bongolo bwa muntu itwelelanga nakampata mu meso kupita itwelela ku kyumvwanino kyo-kyonso.” I kyabine, bintu bivule byotuyuka tuyukilanga’byo ku kyabuntu kya kumona—kilomba mwinya umunika biyampe—o mwanda kishima mwinya mu Bisonekwa kidi ne na buluji bwa kyelekejo.

Pa kino, Yesu wālombwele bandi bana-babwanga’mba: “Ami uno ne mwinya wa [ino ntanda]. Yewa wakunonda nankyo kakendapo mu fukutu, aye ukamona mwinya wa būmi.” (Yoano 8:12) Mwinya wa kyelekejo wisambila’po Yesu pano i musapu wa bubinebine waādi usapula, wa kupa ñeni ne mityima ya bemvwaniki bandi kitōkeji. Bana-babwanga ba Yesu i bantu bālēle myaka mivule mu fukutu wa ku mushipiditu, ino ku mfulo bāivwanija mpango ya Leza itala pa bantu ne pa lukulupilo lwa Bulopwe. Bine uno o “mwinya wa būmi,” mwanda buno buyuki bo bwādi bwa kutwala bantu ku būmi bwa nyeke. O mwanda Yesu wānene Shandi wa mūlu mu lulombelo amba: “Bakuyūke, abe Leza [umo kete wabine], ne Yesu Kidishitu o watumine nankyo bo būmi ne būmi bwine bwa kulādila nyeke na nyeke.” (Yoano 17:3) Bine ketukolwai nansha dino kupēleka uno mwinya wa ku mushipiditu!