Lelo Utambwile ‘Mushipiditu wa Bubinebine’?
Lelo Utambwile ‘Mushipiditu wa Bubinebine’?
“Tata . . . ukemupa [m]ukwashi mukwabo wakwikala nandi mafuku onso nyeke. Ke [m]ushipiditu wa [bu]binebine kadi.”—YOANO 14:16, 17.
1. I mwanda’ka wa mvubu wālombwele Yesu bandi bana-babwanga mu kitatyi kya mfulo kyaādi nabo mu kyumba kya peulu?
“MFUMWAMI, le usaka kwenda pi?” Kino i kimo kya mu bipangujo byobāipangwile Yesu kudi batumibwa bandi mu kitatyi kya mfulo kyaādi nabo mu kyumba kya peulu mu Yelusalema. (Yoano 13:36) Kupwila byokwādi kukyendelela, Yesu wēbalombwele amba pano usa kwibashiya alukile kudi Shandi. (Yoano 14:28; 16:28) Kakikalapo kadi nabo mu ngitu bamumwene wibafundija ne kulondolola bipangujo byabo. Inoko wēbakulupija na bino binenwa’mba: “Nkalomba kudi Tata ino aye ukemupa [m]ukwashi mukwabo [nansha musengi, NW kunshi kwa dyani] wakwikala nandi mafuku onso nyeke.”—Yoano 14:16.
2. I bika byālaile Yesu kutumina bandi bana-babwanga shi waenda?
2 Yesu wātelele uno mukwashi, wāshintulula ne mwaādi wa kukwashisha bandi bana-babwanga. Wēbanena’mba: ‘Po nashilwidile nenu’pa nkyadipo nemusapwila’byo bino’bi, ke-pantu nadi ngikele nenu. Ino pano keñenda konka kudi wantumine . . . I biyampe komudi shi ami nemufunduke, wivwane ne kwimufundukapo mpika, nankyo aye mukwashi kakāyapo ko mudi, mhm, shi ami mfunduke nabya nakemutumina’ye. . . . Pa kwiya ao mushipiditu wa bubinebine, o ukemulombola ku bya binebine byonsololo.’—Yoano 16:4, 5, 7, 13.
3. (a) I kitatyi’ka kyātuminwe ‘mushipiditu wa bubinebine’ ku bene Kidishitu babajinji? (b) I mu muswelo’ka umo wa kamweno mwāikele mushipiditu bu ‘mukwashi’ kobadi?
3 Uno mulao wāfikidile mu dya Pentekosa 33 K.K., mo mwēkinenene mutumibwa Petelo amba: “Uno Yesu aye, Leza wamusangula ne bātwe bonsololo bano twi tumoni. Penepo kadi pa kutentekwa ku lundyo lwa Leza, ne pa kutambula kudi Shandi kyokya kyalaīlwe kya [m]ushipiditu [s]andu, ino aye wa pungulula kino’ki kyo mwamona, ne kyo mwaivwana bānwe bene.” (Bilongwa 2:32, 33) Monka motusa kwikimwena, mushipiditu sandu wāpungulwilwe pa Pentekosa wālongēle bene Kidishitu babajinji bintu bivule. Ino Yesu wālaile amba ‘mushipiditu wa bubinebine’ ‘ukebavuluja byonso byaēbasapwidile.’ (Yoano 14:26) Wādi wa kwibavuluja mingilo ne bufundiji bwa Yesu, ne bishima bine byaānene, ne kwibisoneka. Kino kyo kyākweshe nakampata Yoano mutumibwa mununu ku mfulo kwa myaka katwa imbajinji K.K., paāshilwile kusoneka Evanjile yandi. Nsekununi itanwa’mo ne madingi abinebine apēne Yesu pa kushilula Kivulukilo kya lufu lwandi.—Yoano, shapita 13-17.
4. ‘Mushipiditu wa bubinebine’ wākweshe namani bene Kidishitu babajinji bashingwe-māni?
4 Yesu wālaile kadi boba bana-babwanga babajinji amba mushipiditu ‘ukebafundija bintu byonsololo’ ne ‘kwibaludika mu bubinebine bonsololo.’ I bine, mushipiditu wādi wa kwibemvwanija bintu bya mushike bya mu Bisonekwa ne kulama bumo bwabo mu milangwe, mu kwivwanija ne mu mpango. (1 Kodinda 2:10; Efisesa 4:3) O mwanda mushipiditu wāpele bano bene Kidishitu babajinji bukomo bwa kwingila kya pamo bu “umpika wabinebine ne wamanwa” upāna “bidibwa pa kitatyi kifwaninwe” ku mwine Kidishitu mushingwe-māni umo ne umo.—Mateo 24:45, NW.
Mushipiditu Witabijanga bwa Kamoni
5. (a) I kyepelo’ka kipya kyāsokwele Yesu ku bandi bana-babwanga mu bufuku bwa Nisane 14, 33 K.K.? (b) I mwingilo’ka wādi wa kwingila mushipiditu mu kufikidila kwa mulao wa Yesu?
5 Yesu wāsapwidile bandi bana-babwanga mu bufuku bwa Nisane 14, 33 K.K., amba mwenda myaka ukebatambwila kwadi ne kushikata nabo aye ne Shandi momwa mūlu. Wēbanena’mba: “Mu kipango kya Tata mudi bikalo bivule bīne, kadi shi mwandi mutupu’byo, longa kadi nemusapwila. Naenda kwimulongolwela kuntu kwenu. Kadi wivwane ñende kukemulongolwela kuntu kwenu, kadi nsa kwiya dikwabo kwimutambwila ko ndi, amba ko ngikele ami ne bānwe mwikale konka.” (Yoano 13:36; 14:2, 3) Bādi ba kubikala nandi mu Bulopwe bwandi. (Luka 22:28-30) Nanshi pa kwikala’bo na luno lukulupilo, kyādi kilomba ‘babutulwe ku mushipiditu’ bu bana ba ku mushipiditu ba Leza ne kushingwa māni mwanda wa kukekala balopwe ne babitobo na Kidishitu mūlu.—Yoano 3:5-8; 2 Kodinda 1:21, 22; Tetusa 3:5-7; 1 Petelo 1:3, 4; Kusokwelwa 20:6.
6. (a) Lwito lwa mūlu lwāshilwile mwaka’ka, ne i bantu banga betyilwe luno lwito? (b) Lelo boba betwa babatyijibwanga mu bika?
6 Luno “lwito lwa mūlu” lwāshilwile pa Pentekosa 33 K.K., ino mobimwekela lwāpwile kala pa bukata bwa myaka ya 1930. (Bahebelu 3:1) Kibalwa kya boba batūdilwe kiyukeno na mushipiditu sandu mwa kwikadila’bo bekadi ba mu Isalela wa ku mushipiditu i bantu 144 000, “bakūdilwe umbukata mwa bantu.” (Kusokwelwa 7:4; 14:1-4) Bano bo bābatyijibwe mu ngitu ya ku mushipiditu ya Kidishitu, mu kipwilo kyandi ne mu lufu lwandi. (Loma 6:3; 1 Kodinda 12:12, 13, 27; Efisesa 1:22, 23) Shi kubatyijibwa mu mema ne kushingwa māni a mushipiditu kubapu, bashilulanga būmi bwa bu kitapwa, būmi bwa kulama bululame kufika ne ku lufu lwabo.—Loma 6:4, 5.
7. Mwanda waka enka bene Kidishitu bashingwe-mani bo badi bunka bwabo na mbila ya kudya ne kutoma ku byelekejo pa Kivulukilo?
7 Bano bene Kidishitu bashingwe-māni, bene Isalela ba ku mushipiditu, bātwejibwe mu kipwano kipya kya kupwanya Yehova na “Isalela wa Leza.” (Ngalatea 6:16, MB; Yelemia 31:31-34) Kino kipwano kipya kyādi kimanine pa mashi āmwangile Kidishitu. Yesu wānenene pa mashi andi paāshilwile Kivulukilo kya lufu lwandi. Luka usekununa’mba: ‘Watekwine mukate, kufwija’po weutyumuna webapa’mba: Uno i mubidi wami wimupaninwa, mukaloñanga enka namino mwa kumvulukila. Kadi abapu kudya ino ne kitomeno nankyo monka’mba: Kino kitomeno i kipwano kipya kya pa mashi ami asa kumwangwa pa mwanda wa banwe.’ (Luka 22:19, 20) Bashele’ko ba mu 144 000 bakidi pano panshi bo badi na mbila ya kudya mukate ne kutoma vinyu bya kyelekejo pa Kivulukilo kya lufu lwa Kidishitu.
8. Lelo bashingwe-māni beyukanga namani amba abaitwe lwito lwa mūlu?
8 Lelo bashingwe-mani beyukanga namani amba abaitwe lwito lwa mūlu? Batambulanga kwampikwa kwitupa bukamoni bwa mushipiditu sandu. Mutumibwa Polo wātumīne bano bantu mukanda’mba: “Bonso, mo bavudile, bakukunkujibwa na [m]ushipiditu wa Leza bo bāna ba Leza bēne. . . . A[o mwine m]ushipiditu witabijanga bwa kamoni ku mishipiditu yetu’mba: Mudi bāna ba Leza. Wivwane shi twi bāna, nankyo twi bampyana, bampyana ba Leza, bakupyana pamo na Yesu; shi wivwane tususuke pamo na aye, amba tutumbijibwe ntumbo pamo ponka bwa aye.” (Loma 8:14-17) Buno bukamoni bwa mushipiditu budi na bukomo bukatampe mpata, o mwanda boba balakana nansha’tu bityetye shi i batambule nansha kebatambwilepo lwito lwa mūlu bafwaninwe kuyuka’tu amba kebatambwile’lopo, penepa bakejiba kudya ne kutoma ku biyukeno bya pa Kivulukilo.
Mushipiditu ne Mikōko Mikwabo
9. I bisumpi’ka bibidi bishile bitelelwe mu Maevanjile ne mu mukanda wa Kusokwelwa?
9 Yesu wādi uyukile amba bene Kidishitu betyilwe kubunda Isalela wa ku mushipiditu i batyetye, o mwanda wēbatelele bu “kaluombe katyetye.” I betabijibwe kutwela mu “kipombo” kya kipwano kipya, kadi i beshile na “mikōko mikwabo” keibadika yānene Yesu amba nayo poso eikongele pamo. (Luka 12:32; Yoano 10:16) Boba ba mu mikōko mikwabo bakongakanibwa mu kitatyi kya mfulo babundanga “kibumbo kikatampe” kikapanda pa “oa malwa makatakata,” badi na kyepelo kya kukamona būmi bwa nyeke mu paladisa pano panshi. Kintu kisangaja i kimonwa kya Yoano kyaāmwene ku mfulo kwa myaka katwa imbajinji K.K., kilombola kwishila kudi pa bukata bwa kibumbo kikatampe ne bantu 144 000 ba Isalela wa ku mushipiditu. (Kusokwelwa 7:4, 9, 14) Lelo mikōko mikwabo nayo itambulanga mushipiditu sandu, shi itambulanga’o, le udi na lupusa’ka mu būmi bwabo?
10. I kika kinenenwa amba mikōko mikwabo ibatyijibwanga “mu dijina dya Tata, ne dya Mwana, ne dya [m]ushipiditu [s]andu”?
10 Mushipiditu sandu wingilanga mwingilo mukatampe mu būmi bwa mikōko mikwabo. Ayo ilombolanga kwipāna koipēne kudi Yehova na kubatyijibwa “mu dijina dya Tata, ne dya Mwana, ne dya [m]ushipiditu [s]andu.” (Mateo 28:19) Itabije bubikadi bwa Yehova, ne kukōkela Kidishitu Mulopwe ne Mukūdi wayo, kadi ilondanga mu būmi bwayo bwendeji bwa mushipiditu wa Leza, bukomo bwingila. Mobukila mobukila, itamijanga mu būmi bwayo “kipa kya mushipiditu,” “buswe, nsangaji, ndoe, kitūkijetyima, kanye, buyampe, lwitabijo, kutalala, [ne] kwīfula.”—Ngalatea 5:22, 23, NW.
11, 12. (a) Bashingwe-māni i bapandulwe mu muswelo wa pa bula namani? (b) I kika kinenenwa amba mikōko mikwabo nayo i mipandulwe ne kwalamunwa ke ijila?
11 Kadi mikōko mikwabo ifwaninwe kushila Kinenwa kya Leza ne mushipiditu sandu wandi kyaba kya kwiitōkeja ne kwiipandula. Bashingwe-māni i bapandulwe’mo kala mu muswelo wa pa bula pa kutelwa’bo bu boloke ne bu bajila mwanda i mutundaile wa Kidishitu. (Yoano 17:17; 1 Kodinda 6:11; Efisesa 5:23-27) Mupolofeto Danyele wibatela amba i “bapandulwemo ba Mwine Mukatakata Mwine” bapebwe Bulopwe buludikwa na ‘mwanā muntu,’ Kidishitu Yesu. (Danyele 7:13, 14, 18, 27) Pa kala Yehova wālombwele muzo wa Isalela, kupityila kudi ba Mosesa ne Alone, amba: “Amiwa ne Yehova Leza wenu; ponkapo mwipanduleimo banwe bene mwikale bajila, mwanda amiwa ne ujila.”—Levi 11:44.
12 Kishima “bupandulwe’mo” kishintulula nakampata “kilongwa kya kwalamuna kintu ke kijila, kusansanya, nansha kutūlwa pafula mwanda wa mingilo nansha kwingidijibwa na Yehova Leza; ngikadilo ya kwikala ukola, mupandulwe, nansha mutōkejibwe.” Kiteba kya Mulami kya ku ngalwilo kwa mwaka wa 1938, kyānene amba Bayonadaba, mikōko mikwabo, “bafwaninwe kuyuka amba kwipāna ne kwipandula i bisakibwa ku umo ne umo usaka kwilunga ku mulwi mukatampe ne kwikala pano panshi.” Mu kimonwa mwāmwenwe kibumbo kikatampe, kisonekelwe mu mukanda wa Kusokwelwa, bano bantu i banenenwe’po amba “abakendeja bivwalwa byabo ne kwibitōkeja, tō, mu mashi a Kāna-ka-mukōko,” ne kadi amba bengidilanga Yehova ‘mingilo ikola dyuba ne bufuku mu tempelo yandi.’ (Kusokwelwa 7:9, 14, 15) Mikōko mikwabo ikwashibwanga na mushipiditu sandu, o mwanda iloñanga bukomo bwayo bonso bwa kufikila pa bisakibwa bya buujila bwa Yehova.—2 Kodinda 7:1.
Kulongela Banababo na Kidishitu Biyampe
13, 14. (a) Kukwatañana na kyelekejo kya Yesu kya mikōko ne bambuji, lupandilo lwa mikōko lwimanine paka? (b) Mu kino kitatyi kya ku mfulo, mikōko mikwabo ilongelanga banababo na Kidishitu biyampe muswelo’ka?
13 Yesu wālombwele patōkelela kijimba kininge kikutyilwe’mo mikōko mikwabo ne kaluombe katyetye mu kyelekejo kyandi kya bambuji ne mikōko, kibadilwa mu bupolofeto bwandi butala pa “kuvuika kwa ngikadilo ya bintu.” Mu kino kyelekejo, Kidishitu wālombwele patōkelela amba lupandilo lwa mikōko mikwabo lwimanine pa byobakalongela bashingwe-māni, baātelele bu ‘banabetu.’ Amba: “Mulopwe mwine ukanena boba ba ku lundyo amba: Iyai kuno bānwe bakweselwa dyese kudi Tata, mupyanei bulopwe bwimulongolwele kala pa ngalwilo ya pano pantanda. . . . I binebine byo nemunena’mba: Byo mwaubilepo nabya ku kamo katyutyu ka boba bāna betu, nanshi mwaubile kudi amiwa.”—Mateo 24:3, NW; 25:31-34, 40.
14 Bishima “byo mwaubilepo nabya” bifunkila pa bilongwa bya kukwasha na buswe banababo na Kidishitu babutulwe ku mushipiditu, bamwenwe na ntanda ya Satana bu beni, yela ne bamobamo mu bifungo. Basakilwanga bidibwa, bivwalwa bifwaninwe, ne kupempulwa pobabela. (Mateo 25:35, 36, kunshi kwa dyani mu NW) Mu kino kitatyi kya ku mfulo, tamba mu 1914, bavule mu bano bashingwe-mani batanwanga mu mine ngikadilo’i. Mānga ya ino myaka ya Batumoni ba Yehova ilombola na bubine amba bapwani nabo badikōkeji, mikōko mikwabo, bakunkwanga na mushipiditu bebakwatakanya.
15, 16. (a) Mikōko mikwabo ikwashanga banababo na Kidishitu bashingwe-māni badi pano panshi nakampata mu mwingilo’ka? (b) Bashingwe-mani i balombole namani kufwija kobafwija’ko mikōko mikwabo?
15 Banababo na Kidishitu bashingwe-māni badi pano panshi mu ino myaka ya mfulo batambulanga bukwashi bwabinebine bwa mikōko mikwabo pobengila mwingilo wibapele Leza wa ‘kusapula ino myanda miyampe ya bulopwe pa ntanda yonsololo ikelwe mwanda wa bukamoni ku mizo yonso.’ (Mateo 24:14; Yoano 14:12) Kibalwa kya bashingwe-mani pano pa ntanda kyendanga kityepa mu bula bwa myaka, ino kya mikōko mikwabo akyo kyenda kivula, pano ke midiyo ne midiyo ya bantu. Bavule bene umbukata mwabo bengilanga bu bengidi ba kitatyi kyonso—bapania ne bamishonele—basambakanya myanda miyampe ya Bulopwe “ne kulampe kwine kumfulo kwa ntanda.” (Bilongwa 1:8) Bakwabo nabo bengilanga mwingilo wa kupāna bukamoni mungya bukomo bwabo, bakwatakanya na nsangaji uno mwingilo mukatampe na lupeto lwabo.
16 Bine, banababo na Kidishitu bashingwe-mani bafwijanga’ko mpata bapwani nabo mikōko mikwabo bebakwatakanya uno muswelo! Kufwija’ko kwabo kwalombwelwe biyampe mu dibuku Sécurité universelle sous le Règne du “Prince de paix” dyalupwilwe na kabumbo ka umpika mu 1986. Dinena’mba: “Tamba pa Divita II dya Ntanda, kufikidila kwa bupolofeto bwa Yesu butala pa ‘kuvuika kwa ngikadilo ya bintu’ kwimanine mpata pa mwingilo mukatampe wingila ‘kibumbo kikatampe’ kya ‘mikōko mikwabo.’ . . . Shi ke pano, tubafwija’ko bikatampe ‘kibumbo kikatampe’ kya mizo ne mizo, ndimi ne ndimi, pangala pa mwingilo ulēma okingila mu kufikidija bupolofeto [bwa Yesu] budi mu Mateo 24:14!”
“Kwakubulwa Bātwe Abo Kebafikijibwapo pa Bubwaninine”
17. I kika kinenenwa amba bantu bakikōkeji ba pa kala bakasangulwa pano panshi ‘kebakafikijibwapo pa bubwaninine’ pakubulwa bashingwe-māni?
17 Mutumibwa Polo wādi mushingwe-māni, o mwanda wēsambīle pangala pa bana-balume ne bana-bakaji bakikōkeji bāikele’ko kumeso kwa Kidishitu amba: “Bano bonsololo bano’ba pa kusapwilwa bu-kamoni buyampe ponka pa kwitabija ponka, kebamwenepo [kufikidila kwa] owa mwanda-wamulao, mhm. Mwanda aye Leza, wetulongolwedile kala kitabukilemo buya, amba kwakubulwa bātwe [bashingwe-māni] abo kebafikijibwapo pa bubwaninine, mhm.” (Bahebelu 11:35, 39, 40) Mu Myaka Kanunu, Kidishitu ne banababo bashingwe-māni 144 000 momwa mūlu bakekala balopwe ne babitobo mwanda wa kupungulwila byabuyabuya bya kitapwa kya kinkūlwa kya Kidishitu pano panshi. Papo mikōko mikwabo nayo ‘ikekala ke mibwaninine’ mu imbidi ne mu ñeni mwine.—Kusokwelwa 22:1, 2.
18. (a) Myanda ya mu Bible ifwaninwe kukwasha mikōko mikwabo ivwanije bika? (b) I kintu’ka kikulupile kukamona mikōko mikwabo pa ‘kukasokolwa kwa bana ba Leza’?
18 Byonso bino bifwaninwe kwivwanija mikōko mikwabo iyuke mwanda waka Bisonekwa bya Kingidiki bya Bwine Kidishitu bisambilanga mpata padi Kidishitu ne pa banababo bashingwe-māni ne pa mwingilo wabo wa pa kitako obengila mu kufikidila kwa mpango ya Yehova. Inoko mikōko mikwabo imwene kukwatakanya koikwatakanya mu miswelo yonso kabumbo ka umpika ka bashingwe-māni bu dyese, nayo itengele ‘kukasokolwa kwa bana ba Leza’ ku Amakedona ne mu bula bwa Myaka Kanunu. Ibambile meso sō ku ‘kukūlwa koikakūlwa ku bupika bwa kubola, nayo ke bana ba bene ba ntumbo bwa bana ba Leza.’—Loma 8:19-21.
Balungwe Umbumo mu Mushipiditu pa Kivulukilo
19. I bika bilongele ‘mushipiditu wa bubinebine’ ku bashingwe-māni ne ku bapwani nabo, ne i muswelo’ka obakelunga umbumo mu kyolwa kya mafuku 28 Kweji 3?
19 Yesu wānene mu milombelo ya mvuyo yaālombele mu bufuku bwa Nisane 14, 33 K.K., amba: ‘Nombelela amba bonsololo bēkale bamo bonka, monka mwikadile abe Tata mu bumo nami, ami nami mu bumo nobe, ino abo nabo bekale mu bumo netu, mwanda wa kunena’mba, ba ntanda bētabije byo ntuminwe na abe.’ (Yoano 17:20, 21) Leza mu buswe bwandi wātumine wandi Mwana āye apāne būmi bwandi mwanda wa kupandija bashingwe-māni ne ntanda ya bantu bakikōkeji. (1 Yoano 2:2) ‘Mushipiditu wa bubinebine’ ulungile umbumo banababo na Kidishitu ne bapwani nabo. Mu kyolwa kya mafuku 28 Kweji 3, pa kupwa kupona kwa dyuba, bino bisumpi byonso bibidi biketana pamo mwanda wa kuvuluka lufu lwa Kidishitu ne byonso bibalongēle Yehova kupityila ku kitapwa kya wandi Mwana muswedibwe, Yesu Kidishitu. Tusaka kutanwa kobakatanwa pa kino kitatyi kya mvubu mikatampe kuningije bumo bwabo ne kwibapa munyama mupya wa kwendelela na kulonga kiswa-mutyima kya Leza, nabya ye kulombola abalombola amba baloelelwe kubadilwa mu boba bobaswele kudi Yehova.
Tupitulukei’mo
• I kitatyi’ka kyātuminwe ‘mushipiditu wa bubinebine’ kudi bene Kidishitu babajinji, ne wēlombwele namani bu ‘mukwashi’?
• Bashingwe-māni beyukanga namani amba i betwe lwito lwa mūlu?
• Mushipiditu wa Leza wingilanga namani mu mikōko mikwabo?
• Mikōko mikwabo ilongelanga banababo na Kidishitu bintu’ka biyampe, ne i kika kinenenwa amba ‘keikafikijibwapo pa bubwaninine’ pakubulwa bashingwe-māni?
[Bipangujo bya Kifundwa]
[Kifwatulo pa paje 29]
‘Mushipiditu wa bubinebine’ wāpungulwilwe pa bana-babwanga mu dya Pentekosa 33 K.K.
[Bifwatulo pa paje 31]
Mikōko mikwabo ilongelanga banababo na Kidishitu biyampe na kwibakwasha bavuije mwingilo wa kusapula wibapele Leza