Ingidilai Nyeke Yehova na Mutyima Mushimatyije
Ingidilai Nyeke Yehova na Mutyima Mushimatyije
‘Mutyima wami i mushimatyije, abe Leza, mutyima wami i mushimatyije.’—MITŌTO 57:7.
1. I kika kinenenwa amba netu tubwanya kwikala na kikulupiji pamo na kyādi na Davida?
YEHOVA ukokeja kwitushimatyija mu lwitabijo lwetu lwa bwine Kidishitu amba tumone kulamata ku bwine Kidishitu bwabine mwanda twi bengidi bandi bepāne. (Loma 14:4) Nanshi netu tukokeja kwikala na kikulupiji pamo bwa kya Davida mulembi wa mitōto, wāimbile amba: ‘Mutyima wami i mushimatyije, abe Leza.’ (Mitōto 108:1) Shi mutyima wetu wikale mushimatyije, keukabulwepo kwitukunka tufikidije kwipāna kotwipēne kudi Leza. Kadi shi tukimba buludiki ne bukomo bwandi, tukekala bantu bakubulwa kujina, ba kusumininwa ne badi na kikulupiji kyumu pototo, bantu balama bululame, “[ba]vudilwe pakatampe pene, mafuku onso nyeke, monka mu mīngilo ya Mfumwetu.”—1 Kodinda 15:58.
2, 3. I bika bisaka kunena misoñanya ya Polo isonekelwe mu 1 Kodinda 16:13?
2 Mutumibwa Polo wāsoñenye balondi ba Yesu ba mu Kodinda wa kala misoñanya itala ne bene Kidishitu ba mu ano mafuku, amba: “Dyumukaipo, umininai monka mu lwitabijo, [endelelai biyampe bwa b]ana-bulume, kankamanai.” (1 Kodinda 16:13) Mu Kingidiki, musoñanya umo ne umo udi pano i munenwe mu kitatyi kilombola myanda ikilongeka, o mwanda ulombola kilongwa kyendelela na kulongeka nyeke. Lelo i bika bisaka kunena bino bidyumu?
3 Tukashala ‘badyumuke’ ku mushipiditu shi tulwa na Dyabola koku tulamete nyeke kudi Leza. (Yakoba 4:7, 8) Kwiubija mudi Yehova nako kuketukutyila nyeke umbumo, ‘bōminine monka mu lwitabijo lwa bwine Kidishitu.’ Batwe bonso—ne bana-bakaji bavule badi umbukata mwetu kumo—‘tukendelela biyampe bwa bana-bulume’ pa kwingidila Leza na kininga bu basapudi ba Bulopwe. (Mitōto 68:11) ‘Tukankamananga’ ponso potwendelela na kwabija Tata wetu wa mūlu wa kwitupa bukomo bwa kulonga kiswa-mutyima kyandi.—Fidipai 4:13.
4. I bika byetufikije ku kubatyijibwa bu bene Kidishitu?
4 Twelombwele kala amba tudi ku mutamba wa lwitabijo lwabine kitatyi kyotwepēne kudi Yehova na mutyima umo, ne kwelekeja kwipāna kwetu na kutokenibwa mu mema. Ino le i bika byetufikije ku lubatyijo? Kibajinji twatambwile buyuki bwabinebine bwa Kinenwa kya Leza. (Yoano 17:3) Bo abo bwabutwile lwitabijo lwetutonwenine ku kwisāsa, kwialakanya kwabinebine pa bilongwa byetu bibi bya pa kala. (Bilongwa 3:19; Bahebelu 11:6) Kupwa twaalamuka pa mutyima, na kuvundamina bilongwa bibi mwanda wa kwikala nyeke na būmi bukwatañene na kiswa-mutyima kya Leza. (Loma 12:2; Efisesa 4:23, 24) Ebiya palonda kwipāna kotwepēne na mutyima umo kudi Yehova mu milombelo. (Mateo 16:24; 1 Petelo 2:21) Ku mfulo twalomba Leza etupe mutyima wa mundamunda muyampe, ne kubatyijibwa twabatyijibwa, kino kyo kilomboji kya kulombola kwipāna kwotwipēne kudi aye. (1 Petelo 3:21) Kulanguluka pa ano matabula kuketukwasha twikale bate mityima ku kulonga nyeke bukomo bwa kwikala na būmi bukwatañene na kwipāna kwetu ne kwendelela na kwingidila Yehova na mutyima mushimatyije.
Endelelai na Kukimba Buyuki Bwabinebine
5. Mwanda waka tufwaninwe kwendelela na kutambwila’ko buyuki bwa Bisonekwa?
5 Pa kwikala na būmi bukwatañene na kwipāna kotwipēne kudi Leza, tufwaninwe kwendelela na kutambula buyuki bwa Bisonekwa būbaka lwitabijo. Bine, kitatyi kyotwashilwile kuyuka bubinebine bwa Leza, twadi tuloelelwe mpata kudya bidibwa bya ku mushipiditu! (Mateo 24:45-47) Bino i “bidibwa” bya musonso—bitwikutyija senene ku mushipiditu. Nanshi i kipite buya twendelele na kudya bidibwa bya ku mushipiditu bita ngitu amba tulame mutyima mushimatyije bu bengidi ba Yehova bepāne.
6. Lelo i muswelo’ka padi obakukweshe nobe utamije mutyima wa kufwija’ko Leza pangala pa bubinebine bwa Bible?
6 Tufwaninwe kulonga bukomo shi tusaka kutambwila’ko buyuki bwa Bisonekwa. Kidi pamo bwa kukola bupeta bufilwe panshi—kulombanga kuputuma byanga byabinebine. Ino kutana “buyuki bwinebwine bwa Leza” kuletanga mpalo mikatampe mpata! (Nkindi 2:1-6, NW) Kitatyi kyaikele musapudi wa Bulopwe kwifunda nobe Bible musunsa umbajinji, padi wefundile nobe mu dibuku Buyuki Butwala ku Būmi Bwanyeke. Kekubulwe mwadi mwifunda mu bula bwa kitatyi kilampe pa kupwa shapita ne shapita, pakwabo mwifunda shapita umo misunsa mivule. Wamwenene kamweno mu kutanga ne kwisambila pa bisonekwa bitelelwe bitupu. Shi kudi mwanda wadi ukukomena kwivwana, badi bakushintulwila’o. Mwendeji wa kifundwa kyobe kya Bible wadi witeakanya senene, ulomba mushipiditu wa Leza, ne kukukwasha utamije mutyima wa kufwija’ko Leza na mutyima umo pangala pa bubinebine.
7. I bika bikwashanga muntu abwanye bisakibwa bya kufundija bakwabo bubinebine bwa Leza?
7 Buno bukomo bwādi bwendele’mo, ke-pantu Polo wāsonekele amba: “Yewa ufundijibwa mu mwanda apane byakupana byonso biyampe, senene, kudi umufundija.” (Ngalatea 6:6) Pano bilembwa bya Kingidiki bilombola amba bufundiji bwa Kinenwa kya Leza bwadi butwejibwa bityebitye mu ñeni ne mu mutyima wa yewa “ufundijibwa.” Kufundijibwa uno muswelo ko kukulengeje nobe ubwanye bisakibwa bya kufundija bakwenu. (Bilongwa 18:25) Shi usaka kulonga bintu bikwatañene na kwipāna kobe, ufwaninwe kulama būmi bobe bwa ku mushipiditu ne kwikala muntu mushimatyije, wifunda nyeke Kinenwa kya Leza.—1 Temote 4:13; Tetusa 1:13; 2:2.
Vuluka Kwisāsa ne Kwalamuka pa Mutyima Kobe
8. I muswelo’ka obwanya kulama mwiendelejo wa bwine Leza?
8 Lelo uvulukile mowapityilwe luvula pa kupwa kuyuka bubinebine, wesāsa ne kwisāsa, wemona amba Leza wākulekela pangala pa lwitabijo loitabije kitapwa kya kinkūlwa kya Yesu? (Mitōto 32:1-5; Loma 5:8; 1 Petelo 3:18) Bine, kwabilangapo kadi kujokela mu būmi bwa bunonga-bibi. (2 Petelo 2:20-22) Mu bintu bivule bikukwasha mudi ne milombelo ya kyaba ne kyaba kudi Yehova, ikukwasha ulame mwiendelejo obe wa bwine Leza, wikale na būmi bukwatañene na kwipāna kobe, kadi wendelele na kwingidila Yehova na kikōkeji.—2 Petelo 3:11, 12.
9. Byokodi muvundamine bilongwa bibi, i dishinda’ka dyofwaninwe kulonda nyeke?
9 Byokodi mwalamuke ne kuvundamina bilongwa bibi, endelela na kukimba bukwashi bwa Leza mwa kulamina mutyima obe mushimatyije. Udi pamo bwa abe wadi wenda mu dishinda dikatampe dya bubela, ino ubaela diso pa kalata kabinebine, ebiya ubashinta koenda mu dishinda dyabine. Shi ke pano, kokasāsuka’mo. Londa nyeke buludiki bwa Leza, ne kusumininwa kushala nyeke mu dishinda ditutwala ku būmi.—Isaya 30:20, 21; Mateo 7:13, 14.
Kokelwa Kwipāna ne Lubatyijo Lobe
10. I myanda’ka yotufwaninwe kulama mu ñeni pa mwanda utala kwipāna kotwipēne kudi Leza?
10 Vuluka kadi amba wēpēne kudi Yehova mu milombelo, na mulangwe wa kumwingidila na kikōkeji nyeke ne nyekeke. (Yude 20, 21) Kwipāna i kwisansanya, kwitūla pa bula mwa kulondela kitungo kijila. (Levi 15:31; 22:2) Kwipāna kobe kekwadipo kwitabija kwa lupito nansha kwitūla mu makasa a bantu kampanda. Ino i kwipāna kwa lonso kudi Mfumu Mulopwe wa diulu ne ntanda, kadi kwikala na būmi bukwatañene na kuno kwipāna kulomba kwikala wa dikōkeji kudi Leza mu būmi bobe bonso. I amo, mwanda ‘twikale bōmi nansha bafwe, twi ba Yehova.’ (Loma 14:7, 8) Nsangaji yetu imanine pa kukōkela ku kiswa-mutyima kyandi ne pa kumwingidila nyeke na mutyima mushimatyije.
11. Mwanda waka ufwaninwe kuvuluka lubatyijo lobe ne nshintulwilo yalo?
11 Vuluka nyeke lubatyijo lobe, kilomboji kya kwipāna kowepēne na mutyima onso kudi Leza. Kelwadipo lubatyijo lwa kukuningila, mwanda i abe mwine watyibile buno butyibi. Lelo pano usumininwe kulondeja kiswa-mutyima kyobe pa kiswa-mutyima kya Leza mu būmi bobe bonso bukushadile’ko? Walombele Leza akupe mutyima wa mundamunda muyampe, wabatyijibwa ne kubatyijibwa mwanda wa kulombola kwipāna kowipēne kwadi. Bine lama uno mutyima wa mundamunda muyampe na kufikidija kwipāna kobe, Yehova kakabulwepo kukwesela madyese mavule.—Nkindi 10:22.
Kiswa-Mutyima Kyobe Kidi na Mvubu
12, 13. Kiswa-mutyima kyetu i kikwatañane namani na kwipāna ne lubatyijo?
12 Kwipāna ne lubatyijo biletanga madyese abinebine ku midiyo ne midiyo ya bantu kujokoloka ntanda yonso. Kitatyi kyotulombolanga kwipāna kwetu kudi Leza na kubatyijibwa mu mema, tufwanga ku mwiendelejo wetu wa kala otwādi nao umbūmi, ino kiswa-mutyima kyetu kekitukilangapo. Shi tubaikala betabije, bafundijibwe mobifwaninwe, kiswa-mutyima kyetu kyo kitutononanga twipāne kudi Leza mu milombelo ne kubatyijibwa. Kwipāna ne kubatyijibwa i bintu bilomba kuyuka kiswa-mutyima kya Leza i kyepi, penepa ke kutonga kulonga’kyo na mutyima tō. (Efisesa 5:17) Mu uno muswelo, tukeula Yesu wāludikile kiswa-mutyima kyandi wāleka mwingilo wandi wa bu sendwe wa mbao, wābatyijibwa ne kwipāna aye yense mu kulonga kiswa-mutyima kya Shandi wa mūlu.—Mitōto 40:7, 8; Yoano 6:38-40.
13 Yehova Leza wāsakile wandi Mwana ekale kufika “pa bubwaninine, senene, shē, ku byamalwa.” O mwanda Yesu wāludikile kiswa-mutyima kyandi wāuminina bino byamalwa na kikōkeji. Pa kusaka kūminina, wādi ulombela “milombelo, ne kwisasa ponka ne kuyoyokota miyoa, ne impolo ponka, . . . ne kwivwanibwa pa kwakamwa kwandi kwa bu-Leza.” (Bahebelu 2:10, 18; 5:7, 8) Shi netu twikale kwakamwa Leza na kalēmo namino, ketukabulwepo “kwivwanibwa,” ne kukulupila amba Yehova uketushimatyija pototo bu Batumoni bandi bepāne.—Isaya 43:10.
Ubwanya Kulama Mutyima Mushimatyije
14. Mwanda waka tufwaninwe kutanga Bible difuku ne difuku?
14 I bika bikakukwasha ulame mutyima mushimatyije ne kwikala na būmi bukwatañene na kwipāna kowipēne kudi Leza? I kutanga Bible difuku ne difuku na kitungo kya kuvudijija’ko nyeke buyuki bwa Kinenwa kya Leza. “Umpika wabinebine ne wamanwa” witukankamikanga nyeke kulonga kino kintu. Tupebwanga ano madingi mwanda kwikala na būmi bukwatañene na kwipāna kwetu kulomba tunangile nyeke mu bubinebine bwa Leza. Shi bulongolodi bwa Yehova bwadi amba bufundijanga bufundiji bwa bubela, longa kebupangapo Batumoni ba Yehova ne boba bobasapwila madingi a kutanga Bible.
15. (a) I kintu’ka kyotufwaninwe kubandaula kitatyi kyotutyiba butyibi kampanda? (b) I kika kinenenwa amba kaji ka ku ngitu ke kintupo kibajinji ku mwine Kidishitu?
15 Shi kotyibe butyibi kampanda, vuluka nyeke muswelo obukokeja kwikala na lupusa pa kufikidija kofikidija kwipāna kobe kudi Yehova. Pamo i butyibi butala pa kaji kobe ka ku ngitu. Lelo uloñanga bukomo bwa kwendeleja mutōtelo wabine kumeso na kano kaji? Eyo, bakulumpe ba twaji bavule banenanga amba bene Kidishitu bepāne i bengidi bakulupilwa, babwino, ino bafulanga ku kujingulula amba Batumoni ba Yehova kebeelangapo mu mushipiditu wa kusaka kupita bakwabo kumeso mu ino ntanda, nansha kwitāka mu kufwila bitenta bya lupeto. Bino i byabine mwanda kitungo kya Batumoni ke kwikalapo na bupeta, na ntumbo, na kitenta nansha na lupusa kampanda. Kintu kya mvubu ku boba badi na būmi bukwatañene na kwipāna kobepēne kudi Leza i kulonga kiswa-mutyima kyandi. Kaji ka ku ngitu kebakwashanga’tu mwa kumwena kamusokwe ka mwa kushikatyila umbūmi, o mwanda kobadi abo kaji ke kintupo kibajinji, ino i kintu kidi pa mulongo wa bubidi. Kintu kyobepēne’mo, pamo bwa mutumibwa Polo, i mwingilo wabo wa bwine Kidishitu, o mwingilo mukatampe kobadi. (Bilongwa 18:3, 4; 2 Tesalonika 3:7, 8; 1 Temote 5:8) Lelo utūdile tumweno twa Bulopwe pa kifuko kibajinji mu būmi bobe?—Mateo 6:25-33.
16. Tukalonga namani shi kuzumbijazumbija mutyima kwakubulwa kwendela’mo kwitukoleja pa kwikala na būmi bukwatañene na kwipāna kwetu kudi Leza?
16 Bamo padi badi batyintyidilwe na bintu bishileshile bizumbijazumbija mutyima kumeso kwa kuyuka bubinebine. Ino mityima yabo yayudile nsangaji, kufwija’ko ne buswe bwa kuswa Leza kitatyi kyobaikele na lukulupilo lwa Bulopwe! Kulanguluka pa madyese obeselwe tamba mu kine kitatyi’kya kwibakwashanga bekale nyeke na būmi bukwatañene na kwipāna kobepēne kudi Yehova. Ino kikekala namani shi kuzumbijazumbija mutyima kwakubulwa kwendela’mo pangala pa makambakano a ino ngikadilo kukimba kusupaija “mwanda wa Leza,” pamo bwa miba isupaija bikunanwa enka ne byobitunya kukoma? (Luka 8:7, 11, 14; Mateo 13:22; Mako 4:18, 19) Shi ubamone amba kuno kuzumbijazumbija mutyima kubashilula kukutādila, abe nansha kisaka kyobe, nabya ela’ko padi Yehova, mulombe akukwashe utamije buswe ne mutyima wa kufwija’ko. Shi wele kiselwa kyobe padi aye, ukakukwatakanya ne kukupa bukomo bwa kumwingidila nyeke na nsangaji ne na mutyima mushimatyije.—Mitōto 55:22; Fidipai 4:6, 7; Kusokwelwa 2:4.
17. Tubwanya namani kunekenya matompo makomo?
17 Endelela na kulomba Yehova Leza kyaba kyonso, pamo na mowālombedile kitatyi kyowepēne kwadi. (Mitōto 65:2) Kimba buludiki bwa Leza ne kwibulonda ponso pakutonwena mutyima ku bibi, nansha polwa na matompo makomo. Vuluka amba kikulomba kwikala na lwitabijo, o mwanda mwanā-bwanga Yakoba wāsonekele amba: “Shi kudi umo wa mwenu wakubulwa ñeni [pafikilwa na matompo], nankyo alombe kudi Leza, kyaba bulale, wakubulwa ne mitoto mīne; nabya kikamupebwanga; nanshi alombe ne kwitabija ponka, kulangalanga mpika; mwanda aye ulangalanga i pamo ponka bwa dintanki dya pa dijiba ditwalwa na luvula ne kusunkanibwa. Ino yao muntu kakifwatakanya’mba: Nkatambula kintu kudi Mfumwami; mhm; ke-muntu udi bibi na mityima ībidi ya kulangalanga [mu mashinda andi onso].” (Yakoba 1:5-8) Ekale matompo amweka amba abetutyintyidila, tuyukei biyampe amba: “Kek[u]dipo kyakutompa kyemutompele, nansha kimo, poso byonka bifikile pa bukomo bwa pa muntu, nanshi Leza i wabinebine, wampikwa kwimulekelela’mba: Batompibwe na bitabuke bukomo bwabo; ino nanshi, ponka pa kyakutompa, nandi ukasaula dishinda dya kupandilamo, amba mumone mwa [kūminina’kyo].”—1 Kodinda 10:13.
18. I bika byotufwaninwe kulonga shi bubi bukatampe botufile buzozeja kusumininwa kotusumininwe kwikala na būmi bukwatañene na kwipāna kotwipēne kudi Yehova?
18 Lelo ukalonga namani shi bubi bukatampe bofile bo bukuvutakanya mutyima wa mundamunda ne kuzozeja kusumininwa kosumininwe kwikala na būmi bukwatañene na kwipāna kowipēne kudi Leza? Shi udi na mutyima wa kwisāsa, ukasengwa pa kuyuka amba Yehova ‘kafutululangapo mutyima mutyumuke ne munekenibwe.’ (Mitōto 51:17) Kimba bukwashi bwa bakulumpe bene Kidishitu ba buswe, mwanda abo—byobeula Yehova—kebakafutululapo mutyima obe wa kusaka kujokeja kipwano kyopwene na Shobe wa mūlu. (Mitōto 103:10-14; Yakoba 5:13-15) Nabya ukekala na bukomo bupya bwa ku mushipiditu ne mutyima mushimatyije, ne kubwanya ukabwanya kolola tushinda twa maulu obe ne kwikala na būmi bukwatañene na kwipāna kowipēne kudi Leza.—Bahebelu 12:12, 13.
Ingila Nyeke na Mutyima Mushimatyije
19, 20. Mwanda waka i kipite buya kwendelela na kwikala na būmi bukwatañene na kwipāna kwetu?
19 Mu ino myaka ya malwa, tufwaninwe kwikankila’ko twikale na būmi bukwatañene na kwipāna kwetu ne kwendelela na kwingidila Leza na mutyima mushimatyije. Yesu wānene amba: “Yewa ukominyina tu ne kumfulo, ye ukapanda.” (Mateo 24:13, MB) Byotudi mu “mafuku a mfulo,” mfulo ibwanya kufika pa kitatyi kyo-kyonso. (2 Temote 3:1, NW) Kadi i kutupu muntu uyukile shi kesha tusa kwikala’ko bōmi. (Yakoba 4:13, 14) O mwanda i kipite buya kwikala dyalelo dino na būmi bukwatañene na kwipāna kwetu!
20 Mutumibwa Petelo wānene ukoma uno mwanda mu mukanda wandi wa bubidi. Wālombola amba monka mwākubile bantu bakubulwa bwine Leza pa Dilobe, ne ntanda ya kyelekejo, muzo wa bantu babi, nayo ikonakanibwa mu “difuku dya Yehova.” Kupwa Petelo ulanguluka’mba: ‘Mufwaninwe kwikala bantu ba muswelo’ka mu bilongwa bikola bya mwiendelejo ne mingilo ya lulamato lwa kudi Leza’! Ebiya wēbasoñanya’mba: “Bānwe baswedibwe, byo umbapu kuyūka kala bīne bino’bi, dyumukai mwanda wa kutyina’mba, pa kuselwa [na bafundiji ba bubela ne bantu bakubulwa bwine Leza], mwakapona ku bukankamane [“bushimatyije,” NW] bwenu.” (2 Petelo 3:5-17) Bine i kya bulanda mpata pa kumona muntu mubatyijibwe usāsukila pafula ne kufudija būmi bwandi mukomenwe kwikala na mutyima mushimatyije!
21, 22. Binenwa bya Mitōto 57:7 byāfikidile namani padi Davida, ne bifikidila namani pa bene Kidishitu babine?
21 Ubwanya kukomeja kusumininwa kosumininwe kwikala na būmi bukwatañene na kwipāna kowipēne kudi Leza shi uvuluka nyeke difuku dya nsangaji dyowabatyijibwe ne shi ukimba bukwashi bwa Leza mwanda wa binenwa ne bilongwa byobe bikale kusangaja mutyima wandi. (Nkindi 27:11) Yehova kelangapo bantu bandi nansha dimo, o mwanda netu tufwaninwe’nka kumukōkela. (Mitōto 94:14) Wākwatyilwe Davida lusa na kukalakanya nkuku ya balwana nandi, wāmunyongolola ne kumunyongolola. Davida wāmufwija’ko pa kino, wālombola ne mutyima wa kusumininwa, wakubulwa kutalaja buswe bwaswele Munyongolodi wandi. Wāimba na kyanga’mba: ‘Mutyima wami i mushimatyije, abe Leza, mutyima wami i mushimatyije. Nkembanga ne kutemba ñimbo.’—Mitōto 57:7.
22 Ne bene Kidishitu babine nabo mo monka, pamo bwa Davida, balamatanga kudi Leza pampikwa kujina nansha dimo. Byobadi na mityima mishimatyije, bunyongolodi ne kulamibwa kwabo batelelanga’byo Yehova, mwine obembila mitendelo na nsangaji. Shi mutyima obe nao ushimatyije, nabya ukakulupila mudi Leza, kadi na bukwashi bwandi, kukabulwepo kufikidija kwipāna kobe. Bine, ukekala pamo bwa “moloke” wāimbilwe na mulembi wa mitōto amba: ‘Kakakwatyibwangapo moyo wa myanda mibi; mutyima ushimatyije; ukulupile Yehova.’ (Mitōto 112:6, 7) I amo, shi bine udi na lwitabijo mudi Leza, umukulupile byabinebine, kukatunyapo kwikala na būmi bukwatañene na kwipāna kobe, bine ukengidila Yehova na mutyima mushimatyije.
Lelo Ukivulukile?
• Mwanda waka tufwaninwe kwendelela na kutambula buyuki bwabinebine bwa Bible?
• Mwanda waka tufwaninwe kuvuluka nyeke kwisāsa ne kwalamuka pa mutyima kwetu?
• I muswelo’ka otumwena kamweno mu kuvuluka kwipāna kwetu ne lubatyijo?
• I bika biketukwasha twingidile nyeke Yehova na mutyima mushimatyije?
[Bipangujo bya Kifundwa]
[Bifwatulo pa paje 28]
Kumona mwingilo wa bwine Kidishitu bu mwingilo mukatampe mu būmi bwetu kuketukwasha twingidile nyeke Yehova na mutyima mushimatyije
[Kifwatulo pa paje 28]
Lelo ulamine būmi bobe bwa ku mushipiditu na kutanga difuku ne difuku Kinenwa kya Leza?