Kashā Kununupa ke Kutunyapo Kufunda

Kiseniya wābutwilwe mu 1897. I mubutule bana bana-bakaji 3, mwana-mulume 1, udi na bankana 15, ne tunkanu 25. Mu būmi bwandi bonso wādi ulonga’nka byādi bimufundija bambutwile bandi. Uno lolo wādi mupando wātambile ku Abkhaz, ntanda misadike na divita idi pa bukata bwa Kalunga Kafita ne Kokase, wānyemena mu Mosku, ino wādi uloelelwe būmi bwandi, nakampata kyokya kyaādi utela bu lwitabijo lwandi lwāpyene.

Mu 1993, Meri mwanā Kiseniya mwana-mukaji waikala Kamoni wa Yehova. Meri waanza kusapwila inandi Kiseniya myanda itala padi Yehova Leza ne pa Bible, ino aye upumpunya’yo. Kiseniya wadi ulombola wandi mwana amba, “Nanunupa bibi, nkikibwanyapo kadi kufunda kintu kipya.”

Ino Meri wandi mwana; Londa mukaja wandi munkana; ne ba Nana ne Zaza tunkanu twandi, bonso Batumoni ba Yehova, badi besamba nandi nyeke myanda ya mu Bible. Kyolwa kimo mu mwaka wa 1999, batangila Kiseniya kisonekwa kimo kyamutengele ku mutyima. Kino kisonekwa kiselele bishima bikunka ku mutyima byānene Yesu ku batumibwa bandi bakikōkeji paāshilwile Bidibwa bya Kyolwa bya Mfumwetu. (Luka 22:19, 20) Mu kine kyolwa’kyo, Kiseniya watyiba mbila ya kwifunda Bible, papo kadi na myaka 102.

Unena’mba: “Pano ke myaka 102 yonalāla umbūmi, ye kwanza naivwana buluji bwikadile’ko būmi. Pano nayuka amba kekudipo kintu kipityile kwingidila Yehova, Leza wetu wa kutendelwa, wa buswe. Nakidi’mo bidi, kadi ne mukomo nkē. Mbwanya kutanga pampikwa makalashi ne kwingila na kininga pamo na kisaka kyami.”

Kiseniya wabatyijibwe mu mafuku 5 Kweji 11, 2000. Unena’mba: “Pano napāna būmi bwami kudi Yehova mwa kumwingidila na buswe bonso. Mpānanga mapepala ne matrakte ponshikete mu bishīko bya myotoka nansha kubwipi na yami njibo. Balongo bāyanga divule kunangila, nabo nebasapwilanga na nsangaji bubinebine butala padi Yehova.”

Pano Kiseniya utengele dyodya difuku ‘dikafufuma umbidi wandi kutabuka wa bwanuke, difuku dyaketolela ku mafuku a busongwakaji bwandi.’ (Yoba 33:25) Shi muntu wa myaka katwa wamone amba kanunupilepo bununu bwatunya kufunda mu Bible buluji bwikadile’ko būmi, le abe ke pepi?