Kidishitu Wendejanga Kipwilo Kyandi

“Ami nami kadi, ngidi nenu mafuku onso nyeke, [kufika ne ku kuvuika kwa ngikadilo ya bintu].”—MATEO 28:20.

1, 2. (a) I bika byālaile Yesu musanguke ku balondi bandi paādi wibapa lubila lwa kulonga bana-babwanga? (b) Yesu wādi uludika namani kipwilo kibajinji kya bwine Kidishitu mu muswelo mumweke?

 YESU KIDISHITU, Mwendeji musanguke, wāmwekēle bandi bana-babwanga kumeso kwa kukanda’ye mūlu, wēbasapwila’mba: “Lupusa lonsololo napebwa’lo lwa mūlu ne panopantanda pene. Endai nanshi mukafundijei mizo yonso ya bantu nabo ke bāna-babwanga, kwibabatyija mu dijina dya Tata, ne dya Mwana, ne dya [m]ushipiditu [s]andu. Kadi ne kwibalombola balaminine byonso byonemulaile ami mwine. Kadi talai’po, ngidi nenu mafuku onso nyeke, [kufika ne ku kuvuika kwa ngikadilo ya bintu].”—Mateo 23:10; 28:18-20.

² Yesu kāpelepo bandi bana-babwanga’nka mwingilo upandija būmi wa kulonga bana-babwanga bakwabo kete, mhm, ino wēbalaile ne kwibalaya amba ukekala nabo. Mānga ya bene Kidishitu babajinji, isonekelwe mu mukanda wa mu Bible wa Bilongwa, ilombola bine amba Kidishitu wāingidije lupusa lwāmupelwe mwanda wa kwendeja kipwilo kyādi kikishimikwashimikwa. Wātumine “mukwashi” waālaile—mushipiditu sandu—wa kukankamika balondi bandi ne kwibaludika mu byobalonga. (Yoano 16:7; Bilongwa 2:4, 33; 13:2-4; 16:6-10) Yesu musanguke wāingidije bamwikeulu bobamupele mwanda wa kukwatakanya bandi bana-babwanga. (Bilongwa 5:19; 8:26; 10:3-8, 22; 12:7-11; 27:23, 24; 1 Petelo 3:22) Kadi Mwendeji wetu wāludikile kipwilo na kutūla’ko bana-balume ba bwino ba kubunda kitango kyendeji.—Bilongwa 1:20, 24-26; 6:1-6; 8:5, 14-17.

3. I bipangujo’ka byotusa kwisambila’po mu kino kishinte?

³ Lelo mu ino yetu myaka ya “ku kuvuika kwa ngikadilo ya bintu” namo le? Yesu Kidishitu uludikanga namani kipwilo kya bwine Kidishitu dyalelo? Ne i muswelo’ka otukokeja kulombola amba twitabije bwendeji bwandi?

 Mfumu Udi na Umpika Wabinebine

4. (a) I bāni babundile “umpika wabinebine ne wamanwa”? (b) Mfumu i mupe umpika kiselwa kya kulama bika?

⁴ Yesu wānene mu bupolofeto bulombola kiyukeno kya kwikala’po kwandi amba: “Lelo yewa [umpika wabinebine ne wamanwa] i ani? ukapebwa kipango kudi mfumwandi amba: Undamine, [ūleela’mo ne ba bidibwa pa kitatyi kifwaninwe]. Dyese ne dyese dyandi! yewa umpika ukalonga’nka namino, ne bikamutāna mfumwandi pa kujoka. I binebine byo nemunena’mba, ukamubīkanga ke kalama wa lupeto lwandi lonso.” (Mateo 24:45-47) ‘Mfumu’ uno i Yesu Kidishitu, Mwendeji wetu, kadi udi na “umpika wabinebine ne wamanwa”—kitango kya bene Kidishitu bashingwe-māni kidi pano pa ntanda ponso—watongele kulama tumweno twandi tonso twa pano pa ntanda.

5, 6. (a) Mu kimonwa kyāmwene mutumibwa Yoano, i bika byelekejibwe na “bibīkwa-binanu bya nsahabu bisamba-bibidi” ne na “ñenyenye īsamba-ībidi”? (b) Kukwata kukwete Yesu “ñenyenye īsamba-ībidi” mu kuboko kwandi kwa lundyo kulombola bika?

⁵ Mukanda wa Bible wa Kusokwelwa ulombola amba umpika wabinebine ne wamanwa uludikwanga na Yesu Kidishitu aye mwine. Mutumibwa Yoano, mu kimonwa kya “mu difuku dya Mfumwetu,” wāmwene “bibīkwa-binanu bya nsahabu bisamba-bibidi; kadi umbukata mwa bibīkwa-binanu umo wifwene na mwanā muntu” wādi ‘na ñenyenye isamba-ibidi mu kuboko kwandi kwa lundyo.’ Yesu wāshintulwila Yoano kino kimonwa amba: “Kifībwe kya ñenyenye īsamba-ībidi yo wamona ku kuboko kwami kwa lundyo, ne bibīkwa-binanu bya nsahabu bisamba-bibidi. Ino ñenyenye īsamba-ībidi i bamwikeulu ba bipwilo bisamba-bibidi; kadi bibīkwa-binanu bisamba-bibidi nabyo i bipwilo bisamba-bibidi.”—Kusokwelwa 1:1, 10-20.

⁶ “Bibīkwa-binanu bya nsahabu bisamba-bibidi” byelekeja bipwilo byonso bya bene Kidishitu babine bidi’ko tamba “mu difuku dya Mfumwetu,” dyāanzile mu 1914. Lelo “ñenyenye īsamba-ībidi” nayo? Dibajinji bidi yelekeja batadi bonso bashingwe-māni, babutwilwe ku mushipiditu, bādi mu bipwilo bya mu myaka katwa imbajinji. * Batadi bādi mu kuboko kwa lundyo lwa Yesu—munshi mwa buludiki ne bwendeji bwandi. Eyo, Kidishitu Yesu ye wādi uludika kabumbo ka umpika kabundilwe na bantu bavule. Ino dyalelo, batadi bashingwe-māni i batyetye. Penepo bwendeji bwa Kidishitu bufikanga namani mu bipwilo 93 000 ne kupita bya Batumoni ba Yehova kujokoloka umbuo onso wa ntanda?

7. (a) Yesu wingidijanga namani Kitango Kyendeji mwanda wa kuleta bwendeji mu bipwilo ntanda yonso? (b) I kika kinenenwa amba batadi bene Kidishitu batoñwanga na mushipiditu sandu?

⁷ Pamo’nka na mu myaka katwa imbajinji, dyalelo nadyo kudi kisumpi kityetye kya bana-balume ba bwino, ba mu batadi bashingwe-māni, bengila bu Kitango Kyendeji kimanine umpika wabinebine ne wamanwa ubundilwe na bantu bavule. Mwendeji wetu wingidijanga kino Kitango Kyendeji pa kutonga bana-balume ba bwino—bashingwe-māni ne mikōko mikwabo—bekale bakulumpe mu bipwilo byabo. Pa kino, mushipiditu sandu, obapele Yesu lupusa  lwa kwingidija’o kudi Yehova, wingilanga mwingilo mukatampe mpata. (Bilongwa 2:32, 33) Dibajinji bidi, bano batadi bafwaninwe kubwanya bisakibwa bilombwelwe mu Kinenwa kya Leza, kisonekelwe ku bukomo bwa mushipiditu sandu. (1 Temote 3:1-7; Tetusa 1:5-9; 2 Petelo 1:20, 21) Kuyukanibwa ne kutongwa kwabo kuloñwanga pa kupwa kulombela, na buludiki bwa mushipiditu sandu. Kadi boba batongwa nabo balombolanga bukamoni bwa kutongwa kwabo na kupa kipa kya mushipiditu. (Ngalatea 5:22, 23) O mwanda madingi a Polo akidi na bukomo bumo bonka ku bakulumpe bonso, bashingwe-māni ne mikōko mikwabo mine kumo, amba: “Mwitei mutyima banwe bene ne luombe lonso, lomutūdilwe’mo na mushipiditu sandu bu batadi.” (Bilongwa 20:28, NW) Bano bana-balume batongwe batambulanga bwendeji bwa Kitango Kyendeji, kadi bakumbanga kipwilo pakubulwa nsengwa. Uno o muswelo wikele netu Kidishitu pano, uludika aye mwine kipwilo.

8. Kidishitu wingidijanga bamwikeulu namani baludike balondi bandi?

⁸ Yesu wingidijanga ne bamwikeulu mwanda wa kuludika balondi bandi dyalelo. Mu lukindi lwa ñano ne biyombo bityani, wānene’mo amba kitatyi kya kwangula kikāya’ko ku ‘kuvuika kwa ngikadilo ya bintu.’ Lelo i bāni bakatumwa na Mfumu mu mwangulo? Kidishitu wānene amba: “Banoi . . . i bamwikeulu.” Kupwa wābweja’ko amba: “Mwana wa muntu ukatalula bamwikeulu bandi nabo bakakongakanyamo byonso bidimo byakukoleja ne bakujilula bijila.” (Mateo 13:37-41) I amo, mwikeulu ye wāludikile Fidipa wētana na ntungu mwine Efiopya, ne dyalelo nadyo mo monka, tudi na bukamoni buvule bulombola amba Kidishitu wingidijanga bamwikeulu bandi baludike mwingilo wa bene Kidishitu babine mwa kutanina bantu ba mityima miyampe.—Bilongwa 8:26, 27; Kusokwelwa 14:6.

9. (a) Dyalelo Kidishitu uludikanga kipwilo kya bwine Kidishitu kupityila ku bika? (b) I kipangujo’ka kyotufwaninwe kubandaula shi tusaka kumwena mu bwendeji bwa Kidishitu?

⁹ Bine, kuyuka amba dyalelo Yesu Kidishitu  wendejanga bandi bana-babwanga kupityila kudi Kitango Kyendeji, kudi mushipiditu sandu ne kudi bamwikeulu i kintu kitukankamika mpata! Nansha shi kupangwapangwa ne bintu bikwabo bya uno muswelo bibasonsolwela batōtyi bamo ba Yehova kulampe na Kitango Kyendeji, Kidishitu kabulwangapo kwibapa nyeke bwendeji kupityila ku mushipiditu sandu ne bukwashi bwa bamwikeulu. Inoko, pa kusaka tumwene mu bwendeji bwandi, tufwaninwe bidi kwibwitabija. I muswelo’ka otukokeja kulombola amba twitabije bwendeji bwa Kidishitu?

“Kōkelai . . . ne Kwibakōkelelela”

10. Tukalombola namani amba tukwete na kabango bakulumpe batongelwe mu kipwilo?

¹⁰ Mwendeji wetu i mupe bipwilo ‘bantu bu byabuntu’—‘bamo bu basapudi ba myanda miyampe, bakwabo bu bakumbi ne bafundiji.’ (Efisesa 4:8, 11, 12) Mumweno ne bilongwa byotwibalongela byo bilombola patōka shi twitabije bwendeji bwa Kidishitu. I biyampe nanshi ‘twikale na mutyima wa kufwija’ko’ pangala pa bano bana-balume ba bwino bwa ku mushipiditu bobetupele kudi Kidishitu. (Kolose 3:15) Tufwaninwe ne kwibapa bulēme. “Bakulumpe balela kipwilo biyampe nabo bafwanyinwe kulemekibwa bikatampe,” mo mwāsonekele mutumibwa Polo. (1 Temote 5:17, MB) Ino i muswelo’ka otukokeja kufwija’ko bano bana-balume batame—bakulumpe, batadi—mu kipwilo ne kwibapa bulēme? Polo ulondolola’mba: “Kōkelai boba bemulelele, ne kwibakōkelelela.” (Bahebelu 13:17) I amo, tunenwe kwibakōkela ne kwibakōkelelela, kwibanekenenya mutyima.

11. I kika kinenenwa amba kulēmeka mpangiko ya kine kitūdilwe’ko bakulumpe i kukwatañana na lubatyijo lwetu?

¹¹ Mwendeji wetu i mubwaninine. Ino bano bana-balume baikele kupāna bu byabuntu kebabwanininepo. Kyaba kimo bakokeja kuluba. Inoko i kipite buya kushala nyeke badikōkeji ku mpangiko ya Kidishitu. I amo, kulonga bintu mungya kwipāna ne lubatyijo lwetu i ne kwitabija mbila ya boba badi na lupusa, batongelwe na mushipiditu mu kipwilo ne kwibakōkela na mutyima onso. Lubatyijo lwetu ‘mu dijina dya mushipiditu sandu’ i kulombola kotulombwele ku meso a bantu bonso amba twitabije mushipiditu sandu ne mwingilo owingila mu mpango ya Yehova. (Mateo 28:19) Luno lubatyijo lulomba ne kwingidila umbumo na mushipiditu pampikwa kwiujikila mashinda powingila mu balondi ba Kidishitu. Mushipiditu sandu byowingila mwingilo mukatampe mu kuyukanibwa ne kutongwa kwa bakulumpe, lelo tubwanya namani kwikala bakikōkeji ku kwipāna kwetu shi ketukwatakanyapo mpangiko ikwatwa na bakulumpe pa kipwilo?

12. I bifwa bya bantu’ka bābudilwe bulēme ku lupusa bitelele Yude, ne bitufundija bika?

¹² Bisonekwa bitupa bifwa bivule bitufundija mvubu ya kukōkela ne kukōkelelela. Mwanā-bwanga Yude wāpele boba bādi babenga bana-balume batongwe mu kipwilo bifwa bisatu bya kudyumukila’po amba: “Yō! Yō! i malwa abo, ke-bantu baendele mu dishinda dya Kena; ne kuvulumukila lubilo mu kutūpatūpa kwa Balame’mba: Tukamwenemo mpalo; ne konakanibwa mu bupondo bwa Kola.” (Yude 11) Kena wāfutulwile madingi āmudingile Yehova na buswe, wālonda ku kusaka kwandi dishinda dya kwipayañana ku nshikani. (Ngalwilo 4:4-8) Balame nandi, nansha byaādyumwinwe divule dine na Leza, kālekelepo kufinga bantu ba Leza mwanda wa mpalo yaādi ufwila. (Umbadilo 22:5-28, 32-34; Kupituluka 23:5) Kola nandi wādi na madyese malēme mu Isalela, ino kātondelwe’opo. Penepo wākuta nkuku ya kutombokela Mosesa mwingidi wa Leza, muntu mwityepeje kupita bantu bonso ba pano panshi. (Umbadilo 12:3; 16:1-3, 32, 33) Byamalwa byāponena ba Kena, Balame ne Kola. Bine, bino i bifwa bimweke patōka, bitufundija kuteja madingi a boba batwikilwe biselwa na Yehova ne kwibalēmeka!

13. I byabuyabuya’ka byālaile mupolofeto Isaya ku boba bakōkela ku mpangiko ya kine kitūdilwe’ko bakulumpe?

¹³ Lelo i ani kasakangapo kumwena mu mpangiko mikatampe ya butadi itūdile’ko Mwendeji wetu mu kipwilo kya bwine Kidishitu? Mupolofeto Isaya wālaile byabuyabuya bimwenwa mu buno butadi amba: “Talapo bidi, mulopwe ukabikalanga mu boloke, ne bamfumu bakalelanga ne buluji ponka. [Ebiya umo  ne umo ukekalanga] bwa kinyemeno kya luvula, ne mpakala ku kintenshi; pamo’nka bwa minonga ya mema muntu mūmu, bwa mwemba wa dibwe dikatakata muntanda myumu.” (Isaya 32:1, 2) Mukulumpe umo ne umo ufwaninwe kwikala “kinyemeno” kitukinga ne kwitulama. Nansha shi tukomenwanga kukōkela ku lupusa kampanda, ino twikankilei’ko ne kulombela ponka amba twikale kukōkela ne kukōkelelela balupusa batongelwe na Leza mu kipwilo.

Bakulumpe Mobakōkelela ku Bwendeji bwa Kidishitu

14, 15. Boba batangidile kipwilo balombolanga namani amba bakōkele ku bwendeji bwa Kidishitu?

¹⁴ Bene Kidishitu bonso—nakampata bakulumpe—bafwaninwe kulonda bwendeji bwa Kidishitu. Batadi, ke bakulumpe kadi, badi na lupusa kampanda mu kipwilo. Ino kebafwaninwepo kukimba kwikala ‘bamfumwandya lwitabijo lwa banababo betabije’ na kusaka kukonkotola būmi bwabo. (2 Kodinda 1:24) Bakulumpe bakalama binenwa byānene Yesu amba: “Muyūkile kala bambikavu ba baJentaila bebakōkeja ponka pa bumfumwabo, nanshi kudi bakatampe bene bebatumine nabo, ne lupusa ponka, ino kudi bānwe kemukalonga nabya, mhm.” (Mateo 20:25-27) Bakulumpe batele mutyima ku kwingidila bakwabo ponso pobavuija kiselwa kyabo.

¹⁵ Bene Kidishitu i basoñanibwe amba: “Vulukai kadi batangidiji benu . . . Langai bidi mo[be]kadile, iulai lwitabijo lwabo.” (Bahebelu 13:7, MB) Ino basapudi kebanenwepo kwiula bakulumpe amba mwanda’po’tu i bendeji. Yesu wānene amba: “Mwanda Mwendeji wenu i umo, Kidishitu.” (Mateo 23:10, NW) Lwitabijo lwa bakulumpe lo lunenwe kwiulwa mwanda nabo beulanga Kidishitu, Mwendeji wetu mwinemwine. (1 Kodinda 11:1) Tala miswelo imoimo īkankila’ko bakulumpe kwiula Kidishitu mu kipwano kyabo na banabetu ba pa kipwilo.

16. Yesu, nansha byaādi na lupusa lukatampe, wādi wikele na balondi bandi namani?

¹⁶ Yesu wādi utabukile mu miswelo yonso bantu bakubulwa kubwaninina, kadi wādi na lupusa lukata lwāmupele Shandi, inoko wādi mutūkanye mu bilongwa byaādi ulongela bandi bana-babwanga. Kādipo ukoleja bemvwaniki bandi na kwilombola amba aye udi na buyuki buvulevule. Yesu wādi muntu utengwa pa mutyima, ukwatyilwa balondi bandi lusa, ne kuta mutyima ku bisakibwa byabo bya bu muntu. (Mateo 15:32; 26:40, 41; Mako 6:31) Kādipo ulomba bandi bana-babwanga bintu bibapityile kipimo, nansha kwibatwika bintu byobakomenwa kusela. (Yoano 16:12) Yesu wādi ‘mutūkanye kadi wa mutyima wa kwityepeja.’ O mwanda ke kya kutulumukapo shi wādi utūkija bantu bavule mityima.—Mateo 11:28-30, MB.

17. Bakulumpe bakeulanga namani butūkanye bwa Kidishitu mu kipwano kyabo na banababo ba pa kipwilo?

¹⁷ Bine, shi Kidishitu Mwendeji wādi mutūkanye, lelo boba batangidile bakwabo mu kipwilo ke pepi! Bo bene bafwaninwe kuta mutyima ku kuleka kwingidija bibi lupusa lo-lonso lobapelwe. Kadi kebafwaninwepo kwikala na “mīsambo ya lushiñanya,” ya kusaka kutulumuja bakwabo. (1 Kodinda 2:1, 2) Ino bafwaninwe kulonga buninge bwa kunena binenwa bya bubinebine bwa mu Bisonekwa mu muswelo upēla, pampikwa budimbidimbi. Bakulumpe bafwaninwe kwielela’ko kwikala na mutyima unekena mu byobasaka bakwabo balonge ne kuta mutyima ku bisakibwa byabo. (Fidipai 4:5) Byobayukile amba muntu ne muntu udi na mikalo mu bintu kampanda, bafwaninwe kuta’ko mutyima shi kebalombe banababo bintu bya kulonga. (1 Petelo 4:8) Mwene bakulumpe ba kwityepeja ne ba bumvubumvu batūkijanga bakwabo mityima mpata? I amo, bebatukijanga’yo.

18. Bakulumpe bafwaninwe kuboila ñeni’ka ku muswelo wādi wikele Yesu na bana?

 ¹⁸ Yesu wādi muntu ulumbwa, ufwenwa na bakwabo, nansha ke banuke bene. Teja bidi mwaālondolwedile bandi bana-babwanga bādi bafunina bantu bādi “bamuletela twana.” “Mwitulekei bidi twana twiye kwami kemukitukandai.” Penepa ‘wētutekuna mu maboko andi kaētulelele, kadi wētutenteka maboko andi kaētwesela dyese.’ (Mako 10:13-16) Yesu wādi muntu wa kizaji, wa kanye, bantu bavule bādi bāya kwadi. Bantu kebādipo bamutyina. Nansha ke bana batyetye bene bādi beivwana biyampe shi udi nabo. Bakulumpe nabo i bantu balumbwa, kadi ponso pobalombola kisanso na kizaji ne kanye, bakwabo—ne bana bene kumo—beivwananga biyampe pobadi.

19. Kwikala “ne mutyima wa Kidishitu” i kulonga bika ne bika, ne kino kilomba kulonga bukomo’ka?

¹⁹ Bakulumpe bakokeja kwiula Kidishitu Yesu biyampe enka shi bamuyukile senene. “Lelo i ani wayūkile mutyima wa Yehova’mba, amudingile madingi?” ye Polo wipangula. Kupwa ubweja’ko amba: “Nanshi bātwe tudi ne mutyima wa Kidishitu.” (1 Kodinda 2:16) Kwikala na mutyima wa Kidishitu kulomba ne kuyuka mulangilo wandi ne bumuntu bwandi bonso mwa kuyukila byobya byotufwaninwe kulonga mu ngikadilo kampanda. Langa’po bidi, kuyuka Mwendeji wetu byabinebine! Eyo, kino kilomba kuta mutyima byabinebine ku nsekununi ya Maevanjile ne kuyuja kitatyi ne kitatyi mu ñeni yetu kwivwanija būmi ne kifwa kya Yesu. Shi bakulumpe balonga bukomo bwa kulonda byabinebine bwendeji bwa Kidishitu, boba bobadi nabo mu kipwilo bakekala na mutyima wa kwiula lwitabijo lwabo. Ku mfulo bakulumpe nabo bakaloelelwa pa kumona bakwabo balonda na nsangaji matabula a Mwendeji.

Twendelelei na Kulonda Bwendeji bwa Kidishitu

20, 21. Pano potutengele ntanda impya itulailwe, tufwaninwe kusumininwa kulonga bika?

²⁰ I kipite buya batwe bonso twikale nyeke munshi mwa bwendeji bwa Kidishitu. Byenda bifwena mfulo ya ino ngikadilo ya bintu, ngikadilo yotudi’mo idi pamo bwa yoya yādi’mo bene Isalela mu Misanza ya Moabu mu 1473 K.K.K. Ntanda ya Mulao yādi keidi pabwipi enka nenki, penepa Leza wānena kupityila kudi mupolofeto Mosesa amba: “Abewa [Yoshua] ukenda ne bano bantu bano’ba, mu ntanda yātyipile Yehova kudi bashabo kwibapa’yo.” (Kupituluka 31:7, 8) Ponka’po Yoshua wāikala mwendeji utongelwe. Bene Isalela pa kutwela mu Ntanda ya Mulao, bādi banenwe kukōkela ku bwendeji bwa Yoshua.

²¹ Ne batwe netu mo monka, Bible witunena’mba: “Mwendeji wenu i umo, Kidishitu.” Kidishitu bunka bwandi ye uketutwala mu ntanda impya itulailwe, mukekalanga boloke. (2 Petelo 3:13) Shi ke pano, tusumininwei kukōkela ku bwendeji bwandi mu būmi bwetu bonsololo.

[Kunshi kwa dyani]

Lelo Ubavuluka?

• Kidishitu wādi uludika kipwilo kibajinji muswelo’ka?

• Kidishitu uludikanga kipwilo kyandi namani dyalelo?

• Mwanda waka tufwaninwe kukōkelelela boba batangidile kipwilo kumeso?

• Bakulumpe bakokeja kulombola namani amba Kidishitu i Mwendeji wabo?

[Bipangujo bya Kifundwa]

[Kifwatulo pa paje 15]

Kidishitu uludikanga kipwilo kyandi, ukwete batadi mu kuboko kwandi kwa lundyo

[Bifwatulo pa paje 16]

“Kōkelai boba bemulelele, ne kwibakōkelelela”

[Kifwatulo pa paje 19]

Yesu wādi muntu wa kizaji, ulumbwa na bantu. Bakulumpe bene Kidishitu nabo baloñanga bukomo bwa kumwiula