Lelo Lwitabijo Lulomba ne Kulanga’po?

“Kudi ‘bene Leza’ bavule bininge bekala bene Leza mwanda’tu wa kulanga kokebasakepo kulanga,” mo musonekele mwimaniji wa seminele ya teoloji wa mu Etats-Unis. Ubweja’ko amba: “Basakanga kwitabija kitabije vidingi na ‘lwitabijo’ bitupu.”

MWANDA mwine i uno, bantu bavule betela bu bene Leza kebakimbangapo kuyuka byobetabije ne kine kyobetabijije’byo, nansha kujingulula shi lwitabijo lwabo ludi na kyalwilo kishilakane. Nanshi, ke kya kutulumukapo shi mutōtelo ubaikala ke mwanda wikaka kwisambila’po bavule.

Bine i kya bulanda, mwanda bibidiji bya bipwilo, kifwa kutōta ku meso a bankishi ne kupituluka mu milombelo imo pa mutwe nabyo kebipangapo bantu muswelo wa kulanga. Bino bibidiji, pamo ne mubakilo-mpata wa mobo obapwidila’mo, madidisha a makalashi a misombelo kapwila, ne bityabutyabu bya minjiki, byo ke bintu bimanine’po butōtyi bwa bavule bene. Eyo, bipwilo bimo binenanga amba lwitabijo lwabo lwimanine pa Bible, inoko musapu obisapula amba ‘itabija mudi Yesu ne kupanda upande’ uzozeja bavule baleka’byo kwifunda Bible na kusumininwa. Bakwabo nabo bekwete’ko na masapudi a kusaka kulumbulula mushikatyilo wa bantu nansha a myanda ya kipolitike. Le bino byonso i bilupule bipa’ka?

Mulembi umo wa myanda ya Leza wānene mwikadile ino myanda mu Amerika wa Kungala, amba: “Bwine Kidishitu . . . ke kajilwilo bitupu, [kadi] bantu balonda’bo kebadipo ne kyobayukile kine mu myanda ya lwitabijo.” Mwipangudi umo wafudile ne ku kunena amba Etats-Unis i “muzo wa bantu bampikwa kufunda Bible.” Kunena na bubine, mo mobikadile ne mu matanda atumbīle bwine Kidishitu bwa ku kanwa bitupu. Ne mitōtelo mivule yampikwa kwikala ya bwine Kidishitu nayo mo monka, keipangapo bantu muswelo wa kulanga, ino ikwete’ko enka na kwimba ñimbo, kulombela milombelo ya bisela mulwi, ne miswelo pala pala ya kulanguluka imanine pa majende pa kyaba kya kulanga mulangilo muluji, ūbaka.

Inoko enka bantu bamo bonka bapela kulanga byabinebine mwa kuyukila shi nkulupilo yabo ya mutōtelo i myendele’mo, yabinebine, balanga’ko na mushike mpata pa myanda mikwabo ya mu būmi. Mwene ubamone’tu amba i milangwe mifwe pa kumona muntu ulonga buninge bwa kujingulula kamo ne kamo ku motoka wasaka kupota—wa kulāla mafuku abidi, asatu washala kiboyo kyonka—inoko ke pa myanda ya mutōtelo wandi kanena’mba: ‘Shi wadi muyampe ku bambutwile bami, ne kudi ami mwine i muyampe’?

Shi tukimba binebine kusangaja Leza, mwene tufwaninwe kubandaula na kusumininwa bubinebine bwa myanda imutala yotukulupile? Mutumibwa Polo wānene amba mu myaka yabo’ya bene Leza bamo bādi “bakankamene mpata kusaka Leza ino bukankamane bwabo [kebwādipo bwendele] mu kuyukidija [kwa]binebine.” (Loma 10:2, MB) Bano bantu bādi pamo bwa muntu  upulwilwe kwiya kupenta njibo; ino, pa mwanda wa kubulwa kwivwanija musakila mwinē njibo, wepeneneka na kupenta misombelo ingi. Shako mwine wapenta’wa ukokeja kusangela mwingilo wandi, ino lelo mwinē njibo nandi uketabija’o?

Lelo i kintu’ka kitabije Leza kikwatañene na butōtyi bwabine? Bible ulondolola’mba: ‘Kino kyo kiyampe kisangaja ne ku mutyima wa Leza Mupandiji wetu, usakila bantu bonso kupanda, bafike ne pa buyuki bwabinebine bwa bubinebine.’ (1 Temote 2:3, 4) Bamo bakokeja kulanga amba kusokola buno buyuki mu mitōtelo mivulevule idi’ko dyalelo kekubwanikapo. Ino langa’po bidi—shi Leza mwine ye usakile amba bantu bafike pa buyuki bwabinebine bwa bubinebine, lelo aye umo ubwanya namani kwibafya’bo mwanda ke mwanda? Mhm, Bible kanenepo nankyo, ino unena’mba: “Shi umukimba [Leza], ukatanwa kōdi.”—1 Bilongwa 28:9.

Lelo Leza mwine wiyukanyanga namani ku boba bamukimba byabinebine? Kishinte kilonda’ko kikaleta malondololo.