Lelo I Ani Ukapanda ku Difuku dya Yehova?
Lelo I Ani Ukapanda ku Difuku dya Yehova?
“Difuku dīyanga ditēma’nka bwa nkelwa.”—MALAKI 4:1.
1. Malaki usāsula namani mfulo ya ino ngikadilo imbi?
MUPOLOFETO Malaki wāpelwe na Leza bukomo bwa kusoneka binkumenkume bilenga moyo bikalongeka kumeso. Bino binkumenkume bikatana muntu ye-yense udi pano panshi. Malaki 4:1 unena’mba: “Talangapo bidi, difuku dīyanga ditēma’nka bwa nkelwa; ino bakwitatula bonsololo balonga bupupakane, bakekala bityakuku; kabidi difuku dīyanga dikebasōkelela; i Yehova wa bibumbo unena; kadi kedikebashīlapo nansha muji nansha musambo mwine.” Lelo bonakani bwa ino ngikadilo imbi bukekala bwa kamfula-nkonko namani? Bukekala pamo bwa mutyi wa miji myoneke, keukashipukapo nansha dimo.
2. Bisonekwa bimo bisāsula namani difuku dya Yehova?
2 Padi ubwanya kwiipangula’mba, ‘Le dino “difuku” dilaya mupolofeto Malaki namino i difuku’ka?’ I difuku dimo dyonka dinenenwe’po mu Isaya 13:9, amba: “Talapo bidi, difuku dya Yehova dikafika, kasusu, ne bukalabale, ne bulobo byamalwa; kusalakanya ntanda ne kukubija balonga bibi badi monka.” Zefenia 1:15 nandi ulombola modikekadila, amba: “Dyodya difuku’dya i difuku dya bukalabale, difuku dya tusuwa ne mutyima kupepa, difuku dya kyonakanya ne musala, difuku dya mfindi ne midima fututu, difuku dya makumbi ne fukutu bwi.”
“Kyamalwa Kibūke”
3. Lelo “difuku dya Yehova” i difuku’ka?
3 Mu kufikidila kukatampe kwa bupolofeto bwa Malaki, “difuku dya Yehova” i kitatyi kimo kyonka kitwa ne bu “kyamalwa kibūke.” Yesu wālaile amba: “Kukēkalanga kyamalwa kibūke kya kubulwa, nansha kingi kikwabo kidingakene nakyo, kushilwila konka kungalwilo kwāpangile mwine Leza, ne kutūla ku dyalelo kuno’ku, nansha kumeso kwine.” (Mateo 24:21) Langa bidi byamalwa ne tusua bimwesha ntanda dyemo, kupityidila tamba mu 1914. (Mateo 24:7-12) Tala’tu bidi Divita II dya Ntanda dyonkadyonka, i dipitule myuya midiyo 50 ne bya pangala! Ino “kyamalwa kibūke” kīya’ko kikekala na bimbidikita bipite kulampe kwine bino byonso. Kino kinkumenkume, pamo’nka bwa difuku dya Yehova, kikafula ku Amakedona, kyo kikavuya mafuku a mfulo a ino ngikadilo imbi ya bintu.—2 Temote 3:1-5, 13; Kusokwelwa 7:14; 16:14, 16.
4. I bika bikalongeka ku mfulo kwa difuku dya Yehova?
4 Ku mfulo kwa dyodya difuku dya Yehova, ntanda ya Satana ikatukila jimejime ne koyaya, pamo ne boba beitabila bene. Mutōtelo wa bubela o ukabadikila konakanibwa. Kupwa butyibi bwa Yehova bukaponena ngikadilo ya kipolitike ne ya busunga ya Satana. (Kusokwelwa 17:12-14; 19:17, 18) Ezekyele unena bupolofeto amba: “Bakēla ndalama yabo mu mikenza, ne nsahabu yabo ikekalanga’nka bwa kintu kya disubi; ndalama yabo ne nsahabu yabo keikakōkejapo kwibanyongolola mu difuku dya bukalabale bwa Yehova, mhm.” (Ezekyele 7:19) Zefenia 1:14 unenena pa dino difuku amba: “Difuku dikatakata dya Yehova didi pabwipi, didi pabwipi ponka, ne kupeja’dyo nakampata.” Pa bino byonso byanena Bible pa difuku dya Yehova, tufwaninwe kusumininwa kulonda bijila ne misoñanya myoloke ya Leza.
5. I bika bikemwena boba bakaminwe dijina dya Yehova?
5 Malaki 4:2 i mupwe’tu kulaya bikalonga difuku dya Yehova pa ntanda ya Satana, ebiya walombola binenwa bya Yehova amba: “Ino’nka ku banwe bākamwa dijina dyami, dyuba dya boloke dikatamba ne lūndapo mu māpa adyo; penepo mukatamba ne kukāya’nka bwa bāna ba bañombe balupuka mu kipombo.” “Dyuba dya boloke” i Yesu Kidishitu. Ye aye ‘mwinya wa ku mushipiditu wa ino ntanda.’ (Yoano 8:12) Yesu weñenyanga mwinya wa lundapo—dibajinji lundapo lwa ku mushipiditu lotundapwa dyalelo, kupwa ke lundapo lwa ku ngitu lwa mu ntanda impya. Monka mwanenena Yehova, bondapwe bakatamba “ne kukāya’nka bwa bāna ba bañombe balupuka mu kipombo” basangale ne kuloelelwa pa kunyongololwa kwabo.
6. Lelo i nsangaji’ka ya bushindañani ikekala na bengidi ba Yehova?
6 Lelo boba bapumpunya misoñanya ya Yehova nabo? Malaki 4:3 unena’mba: “[Banwe bengidi ba Leza] mukanyantyila bapupakane panshi; mwanda bakekala’nka bwa buto panshi pa binyantyilo bya maulu enu mu difuku dyo nkalonga ami kine kino’ki; i Yehova wa bibumbo unena.” Eyo, bantu batōta Leza kebakonakanyapo ntanda ya Satana. Ino ‘bakanyantyila bapupakane panshi’ mu muswelo wa kyelekejo, mwanda nabo bakasangela bushindañani kinondanonda na difuku dya Yehova. Kifwa, kinondanonda na konakanibwa kwa Felo ne bibumbo byandi pa Kalunga Katyila, kwādi byungwe na bintyila. (Divilu 15:1-21) Ne pa kufundulwa kwa Satana ne ntanda yandi pa kyamalwa kibūke napo monka na monka, pakalonda nsangaji ya kuvuluka bushindañani. Bakikōkeji bakapanda ku difuku dya Yehova bakela nsadi ya tusepo amba: ‘Tusangalei ne kusepelela mu lupandilo lwandi.’ (Isaya 25:9) Bine, kukekala tusepo tukatampe pakabingijibwa bubikadi bwa Yehova ne ntanda nayo kusubulwa ke kīkalo kya ndoe!
Bipwilo bya Kine Kidishitu Bibaiula Isalela
7, 8. Lombola ngikadilo ya ku mushipiditu yādi’ko mu Isalela mu mafuku a Malaki.
7 Boba betabijibwa na Yehova i boba bamwingidila, ke bobapo bapela kumwingidila. Mo mobyādi bikadile ne mu kitatyi kyāsonekele Malaki mukanda wandi. Mu mwaka wa 537 K.K.K., basheleshele’ko ba Isalela bājokēle kwabo pa kupwa kwa myaka 70 ya bupika mu Babiloni. Inoko, mu myaka katwa yālondele’po, Isalela wāanza kadi kushetemukila mu bupondo ne mu bunonga-bibi. Bavule bādi bafutulula dijina dya Yehova; baleka kulonda bijila byandi byoloke; basubija’ko tempelo yandi na kuleta banyema basabike meso, balemane, ne babela ba kwela bitapwa; ne kulubula bakaji ba mu busongwalume bwabo.
8 O mwanda Yehova wēbanene amba: “Nkafwena pabwipi na po mudi kwimuka; kabidi nkekalanga kamoni kapēla pa bamfwityi, ne pa bamakoji, ne pa batyipa bubelabubela, ne pa boba ba kusakanya mwingidi mu mfut[wa] yandi, ne wakishala ne bāna banshie, ne kwalamuna mweni ku buluji bwandi, ne kwakamwa ami mpika . . . Mwanda amiwa Yehova nkyalamukangapo.” (Malaki 3:5, 6) I kyabine, Yehova wāityile boba bonso basaka kuvundamina ku mashinda abo mabi, amba: “Jokelai ko ndi, nami nkajokela ko mudi.”—Malaki 3:7.
9. Bupolofeto bwa Malaki bwāfikidile namani dibajinji?
9 Bino binenwa byāfikidile ne mu myaka katwa kabajinji K.K. Bayuda bāshele’ko bāingidile Yehova, bāikala ke “muzo” mupya wa bene Kidishitu bashingwe-māni, kupwa Bajentaila nabo bēbweja’ko mwenda mafuku. Ino bene Isalela bavule ba ku ngitu bāpelele Yesu. Penepa Yesu wānena muzo wa Isalela amba: “Monaipo bidi, njibo yenu byo yemushīlwa masala.” (Mateo 23:38; 1 Kodinda 16:22) Mu 70 K.K., “difuku . . . ditēma’nka bwa nkelwa” dyāponena pa Isalela wa ku ngitu, monka mokyālailwe mu Malaki 4:1. Yelusalema ne tempelo yandi byāonakanibwa, kadi mungya nsekununi, bantu mudiyo mutuntulu ne musubu bāfwa ku kipupo kya nzala, ku bulwi ne ku kutambwa na bibumbo bya bene Loma. Ino boba bādi bengidila Yehova bāpanda ku kyamalwa’kya.—Mako 13:14-20.
10. Bantu bonso kikonge ne bendeji ba bipwilo beulanga namani Isalela wa mu myaka katwa kabajinji?
10 Bantu, nakampata Bipwilo bya Kine Kidishitu, beulanga ngikadilo ya muzo wa Isalela wa mu myaka katwa kabajinji. Bendeji ne balondi ba mu Bipwilo bya Kine Kidishitu basenswe nkulupilo ya mitōtelo yabo pa kyaba kya bubinebine bwa Leza bwāfundije Yesu. Bendeji ba bipwilo bo bene bafwaninwe kutopekwa. Bapelanga kutela dijina dya Yehova, batalula’dyo ne mu malamuni abo a Bible. Bapunika Yehova na bufundiji kebudipo nansha mu bisonekwa mwine, kifwa mfundijo ya bujentaila ya masusu a nyeke mu kalunganyembo ka mudilo, ya Busatu Busantu, ya kubulwa kufwa kwa muya, ne ya lufundijo lwa kwialamuna. Babudija Yehova mitendelo yafwaninwe kutendelwa, mwādi mumubudijija’yo babitobo ba mu mafuku a Malaki.
11. Le bipwilo bya ntanda byālombwele namani mwine obingidila?
11 Mafuku a mfulo pa kushilula mu 1914, bino bipwilo bya ntanda, nakampata byobya bītela bu bya bwine Kidishitu, byālombwele patōka i ani mwine obingidila. Mu mavita onso abidi a ntanda, byadi bikankamika batōtyi babyo kukalwa divita dya kufwila mizo yabo, ne kwipaya enka ne bantu ba mu kipwilo kyabo kimo kyonka. Kinenwa kya Leza kiyukanya boba bakōkele Yehova ne boba kebamukōkele, amba: “E monka muno mo musokokela bu-bāna ba Leza, ne bu-bāna ba dyabola; yewa wakubulwa kulonga byaboloke kadipo wa Leza, ne wampikwa kusanswa mwanabo nandi mo monka. Ke-muntu uno o mwanda o mwaivwene ne kungalwilo kwine’mba; twisanswe bātwe bene na bene, e mo kyendelemo; kepamopo bwa Kena wadi wa yewa mubi, wāipaīle mwanabo, mhm.”—1 Yoano 3:10-12.
Kufikidija Bupolofeto
12, 13. I bupolofeto’ka bufikidija bengidi ba Leza mu ino yetu myaka?
12 Mu 1918, ku mfulo ya Divita I dya Ntanda, bengidi ba Yehova bemwenine muswelo watyibīle Leza Bipwilo bya Kine Kidishitu nsambu ya konakanibwa kwabyo, pamo ne mutōtelo onso wa bubela. Tamba penepa, lwito lwelwanga’nka kwelwa ku bantu ba mityima myoloke amba: “Bānwe bantu bami, mulupukeimo mwanda wa kunena’mba mwakēabila nandi myanda, kadi amba mwakatambula ku mpupo yandi. Ke-mintu myanda yandi ībafika ne kūlu kwine, ne Leza wavuluka bubi bwandi.” (Kusokwelwa 18:4, 5) Boba baswele kwingidila Yehova bāshilula kutōkejibwa tubiko tonso twa ku mitōtelo ya bubela ne kusapula ntanda yonso myanda miyampe ya Bulopwe bushimikwe, mwingilo ufwaninwe kwingilwa kumeso kwa mfulo ya ino ngikadilo imbi ya bintu kufika.—Mateo 24:14.
13 Kuno kwadi kufikidila kwa bupolofeto bwa Malaki 4:5, munene Yehova amba: “Talangapo bidi, ami nkemutumina Ediya mupolofeto, kumeso kwa difuku dikatampe dya kitentejo [d]ya Yehova po kedyafikile.” Buno bupolofeto bwāfikidile bidi pa mwingilo wa Yoano Umbatyiji, kyelekejo kya Ediya. Yoano wāingile mwingilo udingakene na wa Ediya pa kubatyija Bayuda bādi besāsa ku bubi bobālubīle kipwano kya Bijila. Ino kya mvubu kutabuka i kino, Yoano wādi ntangye wa Meshiasa. Inoko mwingilo wa Yoano kwādi kufikidila kutyetye kwa bupolofeto bwa Malaki. Yesu wāyukenye amba Yoano i Ediya wa bubidi, kadi wāyukija amba kukekala mwingilo ukengilwa na “Ediya” ukāya’ko.—Mateo 17:11, 12.
14. I mwingilo’ka mukatampe ufwaninwe kwingilwa kumeso kwa mfulo ya ino ngikadilo ya bintu?
14 Bupolofeto bwa Malaki bwālombwele amba uno mwingilo mukatampe wa Ediya ukengilwa “kumeso kwa difuku dikatampe dya kitentejo [d]ya Yehova.” Dino difuku dikafula lubilo lonka na divita dya difuku dikatakata dya Leza Mwinē Bukomo Bonso dyafwena’di, ke ku Amakedona kadi. Kino kishintulula amba mfulo ya ino ngikadilo imbi ya bintu ne ngalwilo ya Umbikalo wa Myaka Kanunu wa Bulopwe bwa Leza bwa mūlu bukaludikwa na Yesu Kidishitu binenwe kubadikilwa na mwingilo udingakene na wāingile Ediya. Buno bupolofeto kebubepelepo, kumeso kwa Yehova konakanya ino ngikadilo imbi, kabumbo ka Ediya wa dyalelo, kalungwa kuboko na midiyo ya balunda nabo bene Kidishitu bakulupile kukekala pano panshi, kengilanga na buzanzamuke mwingilo wa kujokeja mutōtelo utōka, katumbija dijina dya Yehova ne kufundija bantu badingakene na mikōko bubinebine bwa mu Bible.
Yehova Weselanga Bengidi Bandi
15. Yehova uvulukanga bengidi bandi namani?
15 Yehova weselanga boba bonso bamwingidila. Malaki 3:16 unena’mba: “Penepa kadi boba baakamwa Yehova besambanga [abo] bene na bene; ino Yehova nandi wateja, ne kwivwana’kyo, ne mukanda wa kivulukilo i mulembwe ku meso andi, wa pa boba bākaminwe Yehova, ne bafwatakanya pa dijina dyandi.” Kushilwila pa Abele ne kuya kumeso, Leza, mu muneneno wa kyelekejo, ulembanga mu mukanda majina a boba bonso bakavulukwa mwa kwibapela kyepelo kya būmi bwa nyeke. Yehova wibanena’mba: “Letai kyakujikija bu-dikumi kyonsololo’tu mu kibīko kya bulēme, amba mukekale bidībwa mu njibo yami; ino pano namino kadi ntompei bidi; . . . amba: Shi nkikemushitwilakopo malolo a mūlu, ne kwimupungulwila dyese, ino kekukekalapo kyaba kibwane kya kutambula’dyo.”—Malaki 3:10.
16, 17. Yehova i mwesele namani bantu bandi ne mwingilo wabo?
16 Yehova i mwesele bengidi bandi byabinebine. Namani? Muswelo umo bidi i na kwibalundila’ko kwivwanija kwa mpango yandi. (Nkindi 4:18; Danyele 12:10) Muswelo mukwabo i na kwibapa bipa bivulevule mu mwingilo wa busapudi. Kibalwa kikatampe kya bantu ba mityima myoloke kyendanga kīlunga nabo mu mutōtelo wabine, bano bantu bonso bo babundile “kibumbo kikatampe . . . [kya bantu] batambile mu mizo yonso, ne mu bisaka byonso ne mu bantu, ne mu ndimi, . . . baningija ne diwi dikatampe’mba: Kupanda i kwa kudi Leza wetu ushikete pa lupona, ne kwa kudi Kāna-ka-mukōko.” (Kusokwelwa 7:9, 10) Kino kibumbo kikatampe i kisokokele patōka bya kutendelwa mpata, mwanda kekidi na bantu midiyo isamba ne kupita bengidila Yehova mu bipwilo 93 000 ne musubu kujokoloka ntanda yonso!
17 Kadi madyese a Yehova i mamweke mu buvule bwa mabuku esambila pa Bible alupulwanga na Batumoni ba Yehova, abanibwa pi na pi kupita mu mānga yonsololo. Panenwa pano, kweji ne kweji kulupulwanga kintu kya mapepala midiyo 90 a Kiteba kya Mulami mu ndimi 144 ne Réveillez-vous ! mu ndimi 87. Dibuku dya kwifunda nadyo Bible Bubinebine butwala ku bumi bwa nyeke ne nyeke, dyalupwilwe mu 1968, mu mabuku midiyo 107 mituntulu ne musubu, mu ndimi 117. Dibuku Ukokeja kwikala ne būmi bwanyeke mu Paladisa pano pantanda, dyalupwilwe mu 1982, mabuku midiyo 81 ne kupita, mu ndimi 131. Ne dibuku Buyuki Butwala ku Būmi Bwanyeke, dyalupwilwe mu 1995, mabuku midiyo 85 mu ndimi 154. Mukanda I Kika Kisaka Leza Kotudi?, walupwilwe mu 1996, ke mwabanibwe kintu kya mikanda midiyo 150, pano i mulupulwe kala mu ndimi 244.
18. Mwanda waka tudi na ntundubuko ya ku mushipiditu nansha byobetulwa?
18 Tudi na ino ntundubuko ya ku mushipiditu nansha byobetulwa mafuku mavule kudi ntanda ya Satana. Kino kilombola bubinebine bwa byobya binena Isaya 54:17 amba: “Nansha kipungwa, shi kyepi, shi kyepi, kyabundwa kibundilwa abe padi abe kekikafikapo biyampe; kadi ndimi yonso ikatalukila padi abe mu kidye, shi ludimi ka, shi ludimi ka, ukeluponeja; kine kino’ki bo bupyani bwa bengidi ba Yehova, ne boloke bwabo budi ko ndi; i Yehova unena.” Bine, i kintu kisenga bengidi ba Yehova ku mityima mpata pa kuyuka amba Malaki 3:17 ufikidilanga bikatampe pobadi: “Bakekalanga bami i Yehova wa bibumbo unena; mu difuku dyo nkalonga kyabulēme kyami kyami’tu nakampata.”
Kwingidila Yehova na Nsangaji
19. Boba bengidila Yehova i beshile namani na boba kebamwingidilapo?
19 Kwishila kwishidile bengidi bakikōkeji ba Yehova na boba ba mu ntanda ya Satana kwendanga kumweka patōkelela difuku ne difuku. Malaki 3:18 wālaile amba: “Muketola ne kusansanya mubukata mwa boloke ne bapupakane, mubukata mwa yewa wingidila Leza ne yewa wampikwa kumwingidila.” Kimo bidi kibashiyañanya i kino, boba bengidila Yehova bamwingidilanga na nsangaji mikatampe. Mu bintu bivule bibapa nsangaji mudi ne lukulupilo lwa kutendelwa lobadi nalo. Bakulupile na mutyima umo mudi Yehova unena’mba: “Talapo bidi, byo mpanga madiulu mapya ne ntanda mipya, kabidi bintu bya kala kebikavulukwapo, nansha kwikalapo kumutyima kwine mpika. Ino nanshi sangalai ne kusepelela nyeke mu kyokya kyo mpanga ami.”—Isaya 65:17, 18; Mitōto 37:10, 11, 29; Kusokwelwa 21:4, 5.
20. Mwanda waka twi bantu bansangaji?
20 Tukulupile mu milao ya Yehova amba bantu bandi badikōkeji bakapanda ku difuku dyandi dikatakata ne kutwejibwa mu ntanda impya. (Zefenia 2:3; Kusokwelwa 7:13, 14) Nansha bamo umbukata mwabo byobafwa, shi pa mwanda wa bununu, misongo nansha maakishida, kumeso kwa ntanda impya kufika, Yehova upwile kala kwibalaya amba ukebasangula ne kwibapa kyepelo kya būmi bwa nyeke. (Yoano 5:28, 29; Tetusa 1:2) Shi ke pano, nansha byotukamba na bikoleja ne makambakano pano potukikungila dino difuku dya Yehova, tudi na buluji buvulevule bwa kwikadila na nsangaji kupita bantu bonso badi pano pa ntanda.
Usa Kulondolola Namani?
• “Difuku dya Yehova” i difuku’ka?
• Bipwilo bya ntanda biulanga namani Isalela wa kala?
• I bupolofeto’ka bufikidija bengidi ba Yehova?
• Yehova weselanga bantu bandi namani?
[Bipangujo bya Kifundwa]
[Kifwatulo pa paje 29]
Yelusalema wa mu myaka katwa kabajinji ‘wātēmene’nka bwa nkelwa’
[Bifwatulo pa paje 32]
Bengidi ba Yehova badi na nsangaji yabinebine mwanda badi na lukulupilo lwa kutendelwa