Bipangujo bya Batangi

Le i biyampe mwine Kidishitu wabine kutanwa ku madilo nansha ku butundaile bulongelwa mu kipwilo nansha shikola kampanda?

Kwilunga mu mutōtelo o-onso wa bubela i kintu kifityija Yehova mutyima, kadi i kintu kyotufwaninwe kwepuka. (2 Kodinda 6:14-17; Kusokwelwa 18:4) Madilo aludikwa na kipwilo kampanda i mwingilo wa mu mutōtelo wakyo ulomba padi kunena’po busapudi bubingija milangwe mitupe na Bisonekwa, kifwa milangwe ya amba muya keufwangapo, ne amba bayampe bonso bapalwanga mpalo ya kwenda mūlu. Pakwabo kuloñwanga ne bisela pamo bwa kayukeno ka musalaba, kulombela pamo na mumpele nansha mwingidi wa kipwilo. Milombelo ne bilongwa bikwabo bya mitōtelo bipatanya bufundiji bwa Bible bibwanya kulongwa ne ku butundaile bulongelwa mu kipwilo nansha mu shikola. Shi mwine Kidishitu watanwa mu kitango kya balonga kilongwa kampanda kya mutōtelo wa bubela, kuleka kwilunga nabo kubwanya kumukomena. Bine, kwitūla mu kino kyaka i kubulwa tunangu!

Ino bikekala namani shi mwine Kidishitu umona amba unenwe’nka kukatanwa ku madilo nansha ku butundaile bulongelwa mu kipwilo kampanda? Kifwa, padi mulume wakubulwa kwitabija wanena mukajandi mwine Kidishitu akamutwale ku kino kizumba. Le ubwanya kwenda nandi ne kukatanwa’ko bu katwala basa? Padi, mwanda wa kulēmeka bisaka mulume, mukaji ukokeja kutyiba mbila ya kwenda nandi koku usumininwe amba kakekujapo mu kisela kyo-kyonso kya mutōtelo. Ku mutamba mukwabo, ubwanya kupela kwenda nandi, shi wamone amba bintu bikalongwa’ko bikamutyinya mbavu ne kumufikija ku kujilula misoñanya ya bwine Leza. I aye mwine ufwaninwe kukwata’po kya mfulo. Mwanda i aye mwine ufwaninwe kusumininwa kushala na mutyima wa mundamunda utōka, wampikwa kumutopeka.—1 Temote 1:19.

Nansha shi watyibe mbila’ka, shi mbila’ka, i biyampe kaka ashintulwile mulumyandi amba kabwanyapo na mutyima wandi wa mundamunda kwikuja mu kisela kyo-kyonso kya mutōtelo nansha kwimba ñimbo ne kukunamija mutwe pobalombela milombelo. Na buno bushintuludi, padi mulume ubwanya kumona amba kwenda na mukajandi kekukamuneñenenapo aye mwine. Kepabulwe ukatonga kwenda bunka mwanda wa kuswa kwaswele mukajandi, kulēmeka kwalēmekele nkulupilo yandi, nansha kutyina’tu kufwijibwa bumvu kwaenda. Ino shi wamuningila amba unenwe’nka kwenda nami, nabya mukaji ubwanya kwenda nandi, ino ukatala na meso bitupu mobipityila.

Kintu kikwabo kyoketufwaninwepo kwilwa i mumweno ukamona banabetu mu lwitabijo kutanwa kotukatanwa ku mingilo mu kipwilo nansha shikola. Kubulwe kuteneka mityima ya mundamunda ya bamo? Kubulwe’po kuzozeja mutyima wabo obasumininwe kwijiba kutōta bankishi? Mutumibwa Polo uleta madingi amba i biyampe ‘kujingulula bintu bya mvubu mikatampe mwa kwikadila bakubulwa mwanda, ne kukukaja bakwabo mpika kufika ne ku difuku dya Kidishitu.’—Fidipai 1:10.

Shi kizumba i kya mubutule wa pa mpala, ba kisaka nabo babwanya kwitwangadika ngitu bikatampe mpata. Nansha nankyo, mwine Kidishitu ufwaninwe kubandaula myanda yonso moikadile ne kuyuka bikalupuka’ko. Kyaba kimo ubwanya kulanga amba i biyampe akatanwe ku madilo nansha ku butundaile bulongelwa mu kipwilo ne kutala na meso bitupu. Inoko, bintu bilongwa’ko batwe tutala bikokeja padi kutapa wetu mutyima wa mundamunda nansha wa bakwetu, papo twakomenwa ne kumwena mu byabuyabuya byotwadi tulangila. O mwanda, nansha shi bintu bibaikala namani, mwine Kidishitu ufwaninwe kutadija biyampe shi butyibi bwandi bukokeja kumupa muswelo wa kulama mutyima wa mundamunda utōka ku meso a Leza ne ku meso a bantu.