Bipangujo bya Batangi

Shi muntu weyoa, lelo i biyampe mwingidi mwine Kidishitu anene’po dishikulu dya pa lufu?

Mwingidi mwine Kidishitu yense ukatyiba mbila ya aye mwine, na mutyima wandi wa mundamunda muyampe, shi ubwanya nansha shi kabwanyapo kunena dishikulu pa lufu lwa muntu umweka amba i mwiyoe. Kitatyi kyatyiba ino mbila, ufwaninwe kubandaula bipangujo bilonda’ko: Lelo Yehova umwene namani kwiyoa? Lelo bine lwadi lufu lwa kwiyoa? Le kudi kavutakanya kampanda mu malango nansha mu ñeni yandi kamufikije ku kwiyoa? Lelo ba kibundi bamwene namani kwiyoa?

Byotudi bene Kidishitu, tutanga mutyima ku mumweno umwene Yehova kwiyoa. Kudi Yehova būmi bwa muntu i bulēme, bujila. (Ngalwilo 9:5; Mitōto 36:9) Kwiipaya ku kusaka i pamo ponka na kwitapa abe mwine, kadi i kubi ku meso a Leza. (Divilu 20:13; 1 Yoano 3:15) Le kino kikankaja muntu kunena dishikulu dya pa lufu lwa muntu wiyoele?

Ivwana mwanda wātene Solo Mulopwe wa Isalela. Solo wādi ulwa divita dyandi dya mfulo na bene Fidishitia, wāmona amba kakibwanyapo kupanda, pa kyaba kya kuleka balwana nandi bāye bamumweshe malwa, aye ‘wāyata kipete kyandi wāponena pa akyo.’ Bene Fidishitia pa kutana umbidi wandi ulēle kitantala, bāpopela’o ku nsakwa ya kibundi kya Bete-shane. Bene Yabeshe-ngileade pa kwivwana byālongele bene Fidishitia, bāiya kutalula umbidi mufwe ne kwiusōka beusōka. Kupwa bāsela bikupa byandi bakajika’byo. Ebiya bāshikilwa na nzala mafuku asamba-abidi, mungya bibidiji bya pa lufu bya bene Isalela. (1 Samwele 31:4, 8-13; Ngalwilo 50:10) Davida mushingwe-māni wa Yehova wāivwana byālongele bekadi bene Yabeshe-ngileade, wānena’mba: “Mweselwe dyese kudi Yehova, byo mwalongele nenki kufwila lusa kudi mfumwenu, ke kudi Solo kadi, ne kumujīka. Ino pano kadi Yehova emufwile lusa ne bu-binebine ko mudi.” (2 Samwele 2:5, 6) Bilembwa bya Leza kebilombwelepo amba bekadi ba Yabeshe-ngileade bātopekelwe mwanda wa kujika kobājikile Mulopwe Solo mungya kishi kyabo. Dingakanya kino na boba bābudilwe kujikwa pa mwanda wa bunkuma-bibi bwabo. (Yelemia 25:32, 33) Mwingidi mwine Kidishitu ubwanya kwimanina pa ino nsekununi itala padi Solo wayuka mwa kutyibila mbila shi ubwanya kunena dishikulu pa lufu lwa wiyoele.

Kadi mwingidi ubwanya kubandaula kitungo kine kinenenwanga dishikulu pa lufu. Batumoni ba Yehova i beshile na bantu bakulupile mu kubulwa kufwa kwa muya, o mwanda kebajīkangapo lufu koku balamine milangwe ya bubela amba tubakashindikila ufwile wenda mu ntanda ingi. Nanshi kitungo kya byonso bipitanga pa madilo ke kya kumwejapo ufwile kamweno kampanda, mhm, ino i kusaka kusenga boba bafwidilwe ne kupāna ku boba baile pa madilo bukamoni butala pa ngikadilo idi’mo bafwile. (Musapudi 9:5, 10; 2 Kodinda 1:3-5) Buluji bukwabo bwa kamweno bunenenwanga dishikulu pa lufu i kukwasha bonso batenwe’po balanguluke pa kwipipa kwipipile būmi. (Musapudi 7:2) Lelo dishikulu dya pa lufu lwa wiyoele dibwanya kufikila pa bino bitungo?

Eyo, kudi bantu bamo bakokeja shabo kulanga amba muntu’wa i mwiipaye ku kusaka, kuyuka uyukile’tu amba i bubi bwalonga ku meso a Yehova. Ino le kudi bubinga bubingija patōka uno mulangilo? Lelo ke kilongwapo kya mwididi bitupu? Bamo i batompe’nka ne kwiipaya, ino kupwa bealakanya, baleka’byo. Inoko, shi muntu wafu, kubapu, kakibwanyapo kadi kwisāsa bibi byalongele.

Mwanda mukwabo wa mvubu wa kutala i kavutakanya ka mu malango ne mu ñeni kafikijanga bavule ku kwiyoa. Nansha nankyo, kuno nako i kwiipaya konka. Mungya bibalwa bimobimo biletelwe, kubwipi kwa bantu 90 pa katwa beyoanga, bekalanga  bavutakanibwe ñeni, ne malango, nansha bakolwe bitomibwa. Le Yehova ukalekela boba beipaya abo bene pa mwanda wa kuno kujinwa ñeni? Batwe ketubwanyapo kutyiba mbila amba i balonge nansha amba kebalongelepo bubi bokebakafwilwapo lusa ku meso a Yehova. Mwingidi mwine Kidishitu ubwanya kwimanina pa ngikadilo ifikije muntu ku kwiyoa ne pa bipimo bimupimine bamuñanga, penepa katale shi ubwanya kwimanina lufu lwa wiyoele’wa.

Kudi kadi kintu kikwabo kifwaninwe kubandaula: Le bantu ba kibundi bamonanga namani kwiyoa ne lufu lwa muntu wiyoele? Nakampata bakulumpe bafwaninwe kutala kino, mwanda i abo batanga mutyima ku kulama ntumbo miyampe ya kipwilo kya Batumoni ba Yehova mu wabo mwaba. Mungya mumwena bantu bavule kwiipaya, nakampata kwiyoa kweyoa muntu’wa; bakulumpe bakokeja kutonga kuleka kwimanina myanda ya madilo nansha kuselela lufu ku Njibo ya Bulopwe.

Inoko, shi bantu abalombe mwingidi mwine Kidishitu kwimanina kizumba kya lufu, ne shi wamone amba ubwanya kwimanina’kyo, wao i mwanda umutala, ukokeja kwimanina’kyo. Shi watyibe mbila ya kwimanina’kyo, ufwaninwe kudyumuka kutyina amba wakanena binenwa bikulupija amba mwine ufwile’wa ubwanya kukasangulwa. Būmi bwa kumeso bwa yense ufwile budi mu makasa a Yehova, i kutupu ubwanya kunena na bubine amba ufwile kampanda ukasangulwa nansha amba kakasangulwapo. O mwanda mwingidi wisamba pa mfwani ufwaninwe kwimanina pa bubinebine bwa mu Bible butala pa lufu ne kusenga boba bafwidilwe.