Kitatyi kya Kusokola Myanda Mifyame

Kulama myanda kampanda mifyame i ne kuyuka kwishila kwishidile ndoe ne lupotopoto. Ino le kudi ne kitatyi kya kusokola myanda mifyame? Ivwana binena mupolofeto Amose pa mwanda utala Leza wandi, amba: “Mfumwetu Leza kakalongapo nansha kamo kene, ino usokwela kifibwe kyandi bengidi bandi, ke bapolofeto kadi.” (Amose 3:7) Ku bino binenwa tubwanya kuboya’ko kintu kimo kitala pa myanda mifyame. Yehova ubwanya kulama myanda mifyame mu bula bwa kitatyi kampanda, kupwa wasokwela’yo bantu bamo mwenda mafuku. Lelo netu tukokeja kwiula Yehova namani mu uno mwanda?

Kyaba kimo, bakumbi batongelwe mu kipwilo kya bwine Kidishitu bamonanga amba i biyampe kuleka kusokola myanda imoimo. (Bilongwa 20:28) Kifwa na kutyiba mbila ya kuleka kukonkotola tumyanda tumotumo tutala pa mpangiko nansha pa kushinta kwa madyese pa kipwilo kufika ne mu kitatyi kansangwa, byonso bino pa mwanda wa kamweno ka kipwilo.

Inoko, mu myanda ya uno muswelo, i kipite buya kulombola patōka boba batalwa na mwanda bayuke i kitatyi’ka ne i muswelo’ka ukasokolwa’o patōka. Kuyuka kitatyi kikasokolwa mwanda kukebapa mutyima wa kulama biyampe myanda mifyame.—Nkindi 25:9.