Bwejai Bwine Leza ku Kūminina Kwenu
Bwejai Bwine Leza ku Kūminina Kwenu
‘Mu kwitabija kwenu . . . tūlaimo kūminina; ne mu kūminina namo tūlaimo bwine Leza.’—2 PETELO 1:5, 6.
1, 2. (a) I kutama’ka kotusakilanga mwana yense? (b) Kutama kwa ku mushipiditu kudi na mvubu’ka?
KUTAMA kudi na mvubu ku mwana, ino kutama ku ngitu konkakonka kekubwenepo. Tusakanga ne kutama mu ñeni ne mu malango. Mwenda myaka, mwana ulekanga mashinda a bwanuke, wavunguluka ke mwana-mulume nansha mwana-mukaji mutame. Mutumibwa Polo wālombwele kino pa kusoneka’mba: “Po nadi kāna, nadi nēsamba bya bu-kāna, nadi mvuluka bya bu-kāna, nadi mfwatakanya bya bu-kāna, ino byo natama, ke ndi mukulumpe, nafundula byobya bya bu-kāna.”—1 Kodinda 13:11.
2 Binenwa bya Polo i bitenge pa mwanda mwine wisambila pa kutama kwa ku mushipiditu. Bene Kidishitu bafwaninwe kutama, kushiya bya bu kana ku mushipiditu kwenda ku bya bu bantu “batame mu manwa a kwimvwanija.” (1 Kodinda 14:20, NW) Bafwaninwe kufikila pa “kitompekejo kya kīmano kya kuyūjibwa kwa Kidishitu.” Nabya kebakekalapo “bu-bāna-ba-lukeke [ba] kusunkanibwa, ne kupūlulwa ku bivula byonso bya lufundijo.”—Efisesa 4:13, 14.
3, 4. (a) I bika byotufwaninwe kulonga mwa kwikadila batame ku mushipiditu? (b) I ngikadilo’ka ya bwine Leza yotufwaninwe kulombola, ne idi na mvubu’ka?
3 I muswelo’ka otukokeja kwikala batame ku mushipiditu? Kutama ku ngitu kwiilanga ako kwine shi muntu udi mu ngikadilo miyampe, ino kutama kwa ku mushipiditu ako kulomba muntu mwine kwielela’ko. Kushilulanga na kutambula buyuki bwabinebine bwa Kinenwa kya Leza ne kulonga mwendele byobya byotwifunda. (Bahebelu 5:14; 2 Petelo 1:3) Ebiya bino nabyo byetupa muswelo wa kulombola ngikadilo ya bwine Leza. Enka mutaminanga umbidi kya pamo ne bipindi byao pala pala, ne ngikadilo mishileshile ya bwine Leza nayo mo monka, ivudile kutamina kya pamo. Mutumibwa Petelo wāsonekele amba: “Po pene pa mwanda o mukyelelako, ku mutamba wenu, mutyima wa kupyasakana, mu kwitabija kwenu tūlaimo ne bulumbuluke; ne mu bulumbuluke namo tūlaimo [buyuki, NW]; kadi ne mu [buyuki] namo tūlaimo kwibeja; ne mu kwibeja namo kadi tūlaimo [kūminina, NW]; ne mu [kūminina] namo tūlaimo bwine-Leza; kadi ne mu bwine-Leza bwenu tūlaimo lusa lwa bu-mwana na mwanabo; kadi ne mu lusa lwa bu-mwana na mwanabo tūlaimo ne kanye.”—2 Petelo 1:5-7.
4 Ngikadilo yonso itelele Petelo pano idi na kamweno, kepadipo ya kusebula. Ubweja’ko amba: “Shi mwikale nayo mivulevule nabya ikemupa bukomo ne kwimusokweja kuyukidila Mfumwetu Yesu Kidishitu.” (2 Petelo 1:8, MB) Shi ke pano, tutalei bidi kine kyotufwaninwe kubwejeja bwine Leza ku kūminina kwetu.
Kisakilwa Kūminina
5. Mwanda waka tusakilwa kūminina?
5 Ba Petelo ne Polo i bakwatañanye abo bonso bwine Leza na kūminina. (1 Temote 6:11) Kūminina ke’nkapo kutyumwina masusu mu manwi ne kushala musumininwe, ehe. Ino i ne kutūkija mutyima, kwikala na bukankamane ne kwimanija nshinkidingi, pampikwa kujimija lukulupilo mu matompo, mu bikoleja nansha mu kupangwapangwa. Kadi tuyukei amba batwe badi na ‘bwine Leza mu kipwano na Kidishitu Yesu,’ kupangwapangwa ko kwetu. (2 Temote 3:12) Tufwaninwe nanshi kūminina shi tusaka kulombola buswe botuswele Yehova ne kutamija ngikadilo isakibwa pa kukamona lupandilo. (Loma 5:3-5; 2 Temote 4:7, 8; Yakoba 1:3, 4, 12) Shi ketūmininapo, ketukamonepo būmi bwa nyeke.—Loma 2:6, 7; Bahebelu 10:36.
6. Kūminina ne pa mfulo pene i kulonga bika ne bika?
6 Nansha shi tubashilula biyampe namani, kikatampe kikimbwa i kūminina. Yesu wānene amba: “Aye ukōminina pototo, ne pamfulo pene, nabya aye ukapandako.” (Mateo 24:13) Bine, tufwaninwe kūminina ne ku mfulo, eyo ku mfulo ya būmi botudi nabo dyalelo nansha ku mfulo ya ino ngikadilo imbi ya bintu. Pa bino byonso, kisakwa i kulama bululame bwetu kudi Leza. I amo, mwanda shi ketubwejejepo bwine Leza ku kūminina kwetu, ketukasangajapo Yehova kadi ketukamonepo būmi bwa nyeke. Ino bwine Leza bwine i bika?
Nshintulwilo ya Bwine Leza
7. Bwine Leza i bika, ne bwitutonwenanga ku bika?
7 Bwine Leza i kalēmo kadi na muntu, butōtyi bwandi, ne mwingilo waingidila Yehova Leza na dikōkeji ku bubikadi Bwandi bwa diulu ne ntanda. Shi tusaka kwikala na buno bwine Leza ku meso a Yehova, tufwaninwe kumuyuka byabinebine ne kuyuka mashinda andi. Tufwaninwe batwe bonso umo ne umo kwikala na mutyima wa kuyuka Leza biyampe shē. Kino kyo kiketutonona tumulamate lulamato lwa na mutyima wetu onso, lumweka mu bilongwa byetu ne mu mwikadilo wetu wa umbūmi. Tufwaninwe kwikala na mutyima wa kusaka kwiifwana bininge na Yehova—kwiula mashinda andi ne kumwekeja ngikadilo ne bumuntu bwandi. (Efisesa 5:1) Bine, bwine Leza bwitutonwenanga ku kusangaja Leza mu byonso byotulonga.—1 Kodinda 10:31.
8. Le bwine Leza ne kutōta Leza kasuku kandi byendelanga pamo namani?
8 Shi tusaka kwikala na bwine Leza bwabine, tufwaninwe kutōta Yehova kasuku kandi, pampikwa kuleka kintu nansha kimo kipingakene pa kyaba kyandi mu mityima yetu. Byadi Umpangi, udi na mbila ya kutōtwa kasuku kandi kete. (Kupituluka 4:24; Isaya 42:8) Inoko Yehova ketuningilangapo amba enka muntōte, mhm. Ino usakanga tumulamate na mutyima umo. Buswe botuswele Leza, bwimanine pa kuyuka kotumuyukile byabinebine, bo bwitutonona twikale kwitōkeja mu būmi bwetu, twipāne kwadi kwishisa mpika ne kwikala na būmi bukwatañene na kwipāna kwetu.
Kuningisha Kipwano na Leza
9, 10. I muswelo’ka otukokeja kutamija ne kulama kipwano kyotupwene na Leza?
9 Shi tubapu kulombola patōka kwipāna kwetu kudi Leza na kubatyijibwa, tufwaninwe kwendelela nyeke na kuningisha kipwano kyotupwene nandi. Mutyima wa kulonga kino ne wa kwingidila Yehova na kikōkeji nao uketutonona twendelele na kwifunda Kinenwa kyandi ne kulanguluka’po. Kadi ponso potupa mushipiditu wa Leza kyaba kya kwingila mu ñeni ne mu mityima yetu, buswe botuswele Yehova nabo bubwejanga’ko mushike. Ne kipwano kyotupwene nandi nakyo kyaendelela kwikala kintu kya mvubu mpata mu būmi bwetu. Ketumone Yehova bu Mulunda netu mulumbuluke, otusaka nyeke kusangaja. (1 Yoano 5:3) Kuloelelwa kwetu mu kipwano kyotupwene nandi nako kwavudila’ko, tumufwija’ko ne kumufwija pa kwitufundija ne kwitulemununa kwaetulumuna na buswe ponso potusakilwa’ko.—Kupituluka 8:5.
10 Kipwano kilēme kyotupwene na Yehova kikokeja kuzoza shi ketutabwilepo matabula a kuningisha’kyo. Kadi shi kibazoza, ketutopekapo Leza, mwanda “aye kadipo ne kulampe kwine na bātwe bonso, mhm.” (Bilongwa 17:27) Bine, twi ba dyese ne dyesepo mwanda Yehova ketupelejangapo kumufwena! (1 Yoano 5:14, 15) Eyo, tufwaninwe shetu kulonga bukomo bwa kulama kipwano kya mpwaninine kyotupwene umo ne umo na Yehova. Ino aye mwine witukwashanga tufwene kwadi, o mwanda witutūdile’ko mpangiko yonso yotusakilwa mwa kutamijija ne kulama bwine Leza bwetu. (Yakoba 4:8) I muswelo’ka otukalonda ne pa mfulo ino mpangiko yonso ya buswe?
Ikalai Nyeke Bakomo ku Mushipiditu
11. Le i miswelo’ka imoimo yotukokeja kulombola’mo bwine Leza?
11 Buswe bwa mushike botuswele Leza bo bwitutonona tulombole mushike wa bwine Leza bwetu, pamo na mudingidila’kyo Polo amba: “Longa buninge bobe bonso wilombole kudi Leza bu mwitabijibwe, sendwe wampikwa kyafwijibwa bumvu, muyuke kwingidija kinenwa kya bubinebine monka mokyolokele.” (2 Temote 2:15, NW) Pa kino, tufwaninwe kulama kibidiji kiyampe kya kwifunda Bible kitatyi ne kitatyi, kutanwa ku kupwila, ne kutambila mu mwingilo wa budimi. Kadi tukokeja kwikala nyeke pabwipi na Yehova shi ‘tulombela ne kuleka’byo mpika.’ (1 Tesalonika 5:17) Ino yo miswelo milumbuluke ya kulombola bwine Leza bwetu. Shi tulengwe’ko’tu nansha umo, kubapu, tukekolomwena misongo ya ku mushipiditu ne kwizozeja ku makinga a Satana.—1 Petelo 5:8.
12. I muswelo’ka otubwanya kunekenya matompo senene?
12 Kwikala nyeke bakomo, bakankamane ku mushipiditu nako kwitukwashanga tunekenye matompo mavule etufikila. Matompo abwanya kutamba ku nsulo itutūla pa kutompibwa kwabinebine. Kifwa, buñumauma, kukankajibwa, ne kupangwapangwa bikalanga bikomo kūminina shi bisuluka kudi ba mu kisaka kyetu, babutule, nansha balondakani netu. Kuningilwa bya munshimunshi amba tutune misoñanya ya bwine Kidishitu kubwanya kulupuka ku kaji nansha ku masomo. Kupungija mutyima, misongo, ne njia bibwanya kwituzozeja ku ngitu, twakomenwa kulwa na matompo a lwitabijo. Ino tubwanya kunekenya matompo onso senene shi tutakamane na kulonga “bilongwa bikola bya mwiendelejo ne mingilo ya lulamato lwa kudi Leza, koku [t]ukungila ne kulama ndaminine mu ñeni kwikala’po kwa difuku dya Yehova.” (2 Petelo 3:11, 12, NW) Kadi tukalama nsangaji yetu shi tutakamane koku tukulupile amba Leza uketwesela.—Nkindi 10:22.
13. Tufwaninwe kulonga bika shi tusaka kulonda bwine Leza?
13 Eyo, tuyukile amba Satana upwilanga boba badi na bwine Leza mpumpu, ino ketufwaninwepo kukwatwa moyo. Mwanda waka? Mwanda “Yehova uyūkile mwakunyongolwela boba ba bwine-Leza mo batompibwa.” (2 Petelo 2:9) Shi tusaka kūminina matompo ne kwimwena buno bunyongolodi, nabya tufwaninwe “kupela bumpikwa bwine-Leza, ne bya kilokoloko kya panopantanda, ne kwikala bakwilemeka senene, ne bakoloka ne ba bwine-Leza [mu ino ngikadilo ya bintu, NW].” (Tetusa 2:12) Byotudi bene Kidishitu, tufwaninwe kwilama byabinebine kutyina amba buzoze bo-bonso butamba ku mingilo ne ku bilokoloko bya ngitu bwakajilula ne kona bwine Leza bwetu. Pano tubandaulei’ko bidi byaka bimobimo.
Kudyumuka ku Byaka Bilwa na Bwine Leza
14. I bika byotufwaninwe kuvuluka shi ketukokwe na dikinga dya kusanswa bya bupeta?
14 Kusanswa bya bupeta i dikinga ku bavule. Tubwanya kwidimba na ‘kufwatakanya amba mu bwine Leza mo mwa kumwena bya bupeta.’ Utulumuka twaikala na mutyima wa kumona kikulupiji kitutūdila banabetu betabije bu petu pa kamweno. (1 Temote 6:5) Pakwabo tukokeja kwiongola amba i kyendele’mo kuningila mwine Kidishitu mufuke ku makasa etwapwije bintu byoketubwanyapo kwaluja. (Mitōto 37:21) Ino bwine Leza bo “budi ne mulao wa būmi bwa pano ponka, ne bwa pa kukāya,” ke kungwijapo byabupeta, ehe. (1 Temote 4:8) Kadi tuyukile amba “ketwaletelepo kantu panopantanda, mhm, kadi pa kwenda napo ketuselapo kantu,” o mwanda tufwaninwe kulondalonda ‘bwine Leza tutūkije ne mutyima monka’ ne ‘kuloelelwa mu bidibwa ne bivwalwa’ kubapu.—1 Temote 6:6-11.
15. I bika byotubwanya kulonga shi kulondalonda nsangaji kukimba kutādila bwine Leza bwetu?
15 Kulondalonda nsangaji kukokeja kutādila bwine Leza. Lelo netu kitulomba kwisendulula bya bukidibukidi mu uno mwanda? Eyo, kwitamuna ngitu ne kwipwija mukose kudi na biyampe byako. Inoko, mpalo imwenwa’mo i mityetye mpata shi twiidingakanye na būmi bwa nyeke. (1 Yoano 2:25) Dyalelo, bavule i “baswe mazua pa kyaba kya kwikala baswe Leza, badi na mumwekelo wa kulamata kudi Leza ino abo batuna bukomo bwako,” tufwaninwe kuvundamina bantu ba uno muswelo. (2 Temote 3:4, 5, NW) Boba bepēne bininge mu bwine Leza bebikilanga “bupeta bwa ku mwaka wakāyako ke kyalwilo [kobadi], amba bakwatyije ku būmi [bwinebwine, NW].”—1 Temote 6:19.
16. I bilokoloko’ka bibi bikankajanga bamo kulonda misoñanya myoloke ya Leza mu būmi bwabo, ne i muswelo’ka wa kunekenya bino bilokoloko?
16 Kukolwa malwa ne bintu bileta lujingwe, busekese, ne bilokoloko bibi byonanga bwine Leza bwetu. Kuponena mu bino bintu kwitukankajanga kulonda misoñanya myoloke ya Leza mu būmi bwetu. (1 Kodinda 6:9, 10; 2 Kodinda 7:1) Ne Polo nandi wādi ūminina bulwi bwaendaenda bwaādi ulwa na ngitu yandi ya bubi. (Loma 7:21-25) Tufwaninwe kulonga buninge bwabinebine bwa kufundula bilokoloko bibi byonso. Dibajinji tufwaninwe kusumininwa kwilama batōka mu mwikadilo. Polo witulombola’mba: “Ipayai byakungitu byo mudi nabyo pano panshi; busekese, ne kujilula kwa bijila, ne kilokoloko kibikibi, ne mutyima wa kusaka byabubi, ne kwabila nako i konka kutōta bakishi konka.” (Kolose 3:5) Kwipaya bya ku ngitu byetu bileke kwitutwala ku bintu bibi bya uno muswelo kulomba kusumininwa kwabinebine pa kusaka kwibifundula, ne kwijiba’byo lonso. Kulomba milombelo ya kininga kudi Leza kwitukwasha tufundule bilokoloko bibi, ino tulondelonde boloke ne bwine Leza mu ino ngikadilo imbi ya bintu.
17. I muswelo’ka otufwaninwe kumona madingi?
17 Kupungija mutyima kukokeja kuzozeja kūminina kwetu ne kona bwine Leza bwetu. Bavule mu bengidi ba Yehova bapungijanga mutyima. (Umbadilo 11:11-15; Ezela 4:4; Yona 4:3) Nakampata kupungija mutyima kubwanya kwitonakanya shi kwendela pamo na kiji kyotudi nakyo ku mutyima mwanda’po’tu abetulubila, abetudingila nansha kwitutopeka. Ino matope ne madingi i bukamoni bulombola amba Leza witutele mutyima na buswe. (Bahebelu 12:5-7, 10, 11) Kudingilwa kufwaninwe kumonwa bu muswelo wa kwitufundija mu dishinda dyoloke, ke bu mfutopo kete, ehe. Shi tudi betyepeje, tukakwata madingi na mutyima ne kwitabija’o, mwanda tuyukile amba “madingi a bulombodi i dishinda dya būmi.” (Nkindi 6:23) Kino kiketukwasha twendelele ku mushipiditu na kulondalonda nyeke bwine Leza.
18. I kiselwa’ka kyotudi nakyo shi tubesanshija na bakwetu?
18 Kubulwa kumvwañana ne kwikoleja na bakwetu kubwanya kuleta makambakano mu bwine Leza bwetu. Bino bintu bibwanya kuzumbijazumbija ba mityima ne kufikija bamo ku kutyiba mbila mibi ya kwitolwela kulampe na batutu ne bakaka wabo ba ku mushipiditu. (Nkindi 18:1) Ino i biyampe tuvuluke amba kulama kiji ne kulamina bakwetu manimani ku mutyima bibwanya kona kipwano kyotupwene na Yehova. (Levi 19:18) Bine, “yewa wakubulwa kuswa mwanabo o bēmwene nandi, kayūkapo kuswa Leza o kebēmwene nandi.” (1 Yoano 4:20) Yesu wānene ukoma mu Busapudi bwandi bwa pa Lūlu amba i biyampe kutabula ponka na ponka matabula a kusaka kupwija myanda yomwipile. Wāsapwila bemvwaniki bandi amba: “Shi ubaleta kyabuntu kyobe ku madabahu, kadi uvuluke ponka ne mwanda ōmwenena ne mwanenu, nankyo shia’kyo bidi konka ku madabahu, wende ukabadikile kupwana ne mwanenu, ebiya kōjoka shobe kwiya kupana kyabuntu kyobe.” (Mateo 5:23, 24) Kulomba lusa kubwanya padi kundapa kilonda kyotutapile mukwetu na bishima ne bilongwa byetu bisansa. Mfika ibwanya kupwa ne kipwano kya ndoe kyaikala’po shi tubalombe kufwilwa lusa ne shi tubaitabija amba twelubile. Yesu wāletele kadi madingi makwabo a mwa kupwijija bikoleja. (Mateo 18:15-17) Bine, tusangalanga mpata pa kumona bipa biyampe bilupuka ku bukomo botulonga bwa kupwija myanda yetu!—Loma 12:18; Efisesa 4:26, 27.
Londai Kifwa kya Yesu
19. Mwanda waka kwiula kifwa kya Yesu kudi na mvubu mpata?
19 Matompo keakabulwepo kwitufikila, ino keafwaninwepo kwitulabika mu lubilo lotunyemena ku būmi bwa nyeke. Vuluka amba Yehova ubwanya kwitunyongolola mu matompo. Bine, pano potuvūla “byonso byakwitulemenena,” ne ‘kunyema na kūminina ponka luno lubilo lotutungilwe,’ twelei “meso konka kudi aye Yesu kilongoji kya kwitabija kwetu.” (Bahebelu 12:1-3) Kubandaula na katentekeji kifwa kya Yesu ne kulonga buninge bwa kumwiula mu binenwa ne bilongwa byetu kuketukwasha tutamije bwine Leza ne kwibumwekeja byabinebine.
20. I mpalo’ka yotumwena mu kulondalonda kūminina ne bwine Leza?
20 Kūminina ne bwine Leza byonso bino bitukwashanga tuyuke kukulupila byabinebine amba tukamona lupandilo. Shi tulombola ino ngikadilo milēme, ketukabulwepo kwingidila Leza mingilo yetu ikola na kikōkeji. Nansha tutanwa na matompo, tukekala nyeke na nsangaji pa kwimwena kisanso kya kanye kya Yehova ne madyese andi mwanda wa kūminina kotūminina ne kulonga kotulonga bilongwa bya bwine Leza. (Yakoba 5:11) O mwanda Yesu mwine witukulupija’mba: “Pa [kūminina kw]enu po pakumwenamo ne myuya yenu.”—Luka 21:19.
Le Usa Kulondolola Namani?
• I kika kinenenwa amba kūminina kudi na mvubu?
• Bwine Leza i bika, ne bulombolwanga namani?
• I muswelo’ka otukokeja kuningija ne kulama kipwano kyotupwene na Leza?
• I byaka’ka bimobimo bikokeja kona bwine Leza bwetu, ne tukokeja kwepuka’byo namani?
[Bipangujo bya Kifundwa]
[Bifwatulo pa paje 8]
Bwine Leza bulombolwanga mu miswelo mivule
[Bifwatulo pa paje 10]
Dyumuka byaka bikokeja kona bwine Leza bobe