Iula Mufundiji Mukatampe

“Endai nanshi mukafundijei mizo yonso ya bantu nabo ke bāna-babwanga, . . . kwibalombola balaminine byonso byo nemulaīle ami mwine.”—MATEO 28:19, 20.

1, 2. (a) I kika kinenenwa amba batwe bonso twi bafundiji mu muswelo kampanda? (b) Pa mwanda utala kufundija, i kiselwa’ka kya pa bula kidi na bene Kidishitu babine?

 LELO wi mufundiji? Eyo, batwe bonso twi bafundiji mu muswelo kampanda. Ponso poludika ñenda wajimina mu dishinda, polombola mwingidi nobe mwa kwingidila mwingilo kamukaya, nansha poshintulwila mwana mwa kukutyila myonji ya bilato, i kufundija kofundija. Kukwasha bakwetu namino kukupanga kuloelelwa mu ludingo kampanda, mwene i amo?

² Ino pa mwanda utala kufundija, bene Kidishitu babine badi na kiselwa kya pa bula. Twi basoñanibwe kulonga ‘bantu nabo ke bāna-babwanga, . . . ne kwibafundija.’ (Mateo 28:19, 20) Mu kipwilo namo, tufundijanga kyaba kimokimo. Kudi bana-balume babwanye bisakibwa batoñwanga bu “bakumbi ne bu bafundiji” ba kūbaka kipwilo. (Efisesa 4:11-13, MB) Bana-bakaji bapye nabo bafwaninwe kwikala “bafundiji ba bilumbuluke” ku bansongwakaji mu mingilo yabo ya bwine Kidishitu ya difuku ne difuku. (Tetusa 2:3-5) Batwe bonso twi basoñanibwe kukankamika banabetu betabije, ne pa kino, tulondanga uno musoñanya na kwingidija Bible mwanda wa kūbaka bakwetu. (1 Tesalonika 5:11) Bine i dyese ne dyese’po kwikala mufundiji wa Kinenwa kya Leza ne kupāna bintu bilumbuluke bya ku mushipiditu bikokeja kuleta byabuyabuya bya kulādila nyeke!

3. I muswelo’ka otukokeja kwisendulula mwa kwikadila bafundiji bafike’po?

³ Ino i muswelo’ka otukokeja kwisendulula mwa kwikadila bafundiji bafike’po? Dibajinji, i na kwiula Yesu, Mufundiji Mukatampe. Padi bamo bakeipangula’mba: ‘Le tubwanya namani kwiula Yesu? Ke-muntu aye wādi mubwaninine.’ I byabine, batwe ketukokejapo kwikala bafundiji babwaninine. Eyo, nansha shi twikale na lūku luvule nansha lutyetye, tubwanya kulonga buninge bwa kwiula mufundijijo wa Yesu. Twisambilei bidi pa muswelo otukokeja kwiula manwa andi aná aāingidije—binenwa bipēla kwivwana, bipangujo bifike’po, mulangilo muluji, ne byelekejo bifwaninwe.

Fundija Binenwa Bipēla Kwivwana

4, 5. (a) I kika kinenenwa amba binenwa bipēla kwivwana kyo kintu kikatampe kiyukilwa’po bubinebine bwa mu Bible? (b) Mwanda waka i biyampe kuta mutyima ku bishima byotwingidija shi tusaka kufundija na binenwa bipēla kwivwana?

⁴ Bubinebine bwa kyalwilo bwa mu Kinenwa kya Leza kebukutakanepo. Yesu wānene mu lulombelo lwandi amba: “Nakufwijako abe Tata, . . . byo wafīle’byo ku bañeni ne ku badyumuke, ino ubasokwela’byo ku twana-twalukeke.” (Mateo 11:25) I amo, Yehova wāsokwedije mpango yandi ku boba ba mityima myoloke, ya kwityepeja. (1 Kodinda 1:26-28) O mwanda, binenwa bipēla kwivwana kyo kintu  kikatampe kiyukilwa’po bubinebine bwa mu Bible.

⁵ Shi wendeja kifundwa kya Bible ku njibo nansha shi ulonga kujokela’mo kupya ku bantu basangela musapu, le ukokeja namani kufundija na binenwa bipēla kwivwana? Vuluka, i ñeni’ka yotwaboila kudi Mufundiji Mukatampe? Yesu wātengele mityima ya bemvwaniki bandi na kunena muneneno unenwanga nyeke, obādi babwanya kwivwana biyampe nansha bavule byobādi “bantu bitupu bampikwa ne kufunda bikatampe kwine.” (Bilongwa 4:13, MB) Nanshi pa kufundija na binenwa bipēla, tufwaninwe dibajinji kuta mutyima ku bishima byotwingidija. Ketufwaninwepo kunena bishima nansha binenwa bikomokomo amba ko kupa bubinebine bwa mu Kinenwa kya Leza bukomo bwa kunekenya bakwetu. ‘Mīsambo mipambaile’ ya uno muswelo ikatuyula nakampata boba kebafundilepo masomo malampe nansha ba lūku lutyetye. (1 Kodinda 2:1, 2) Kifwa kya Yesu kilombola amba binenwa bipēla abyo’ko bitongwe biyampe shē bifundijanga bubinebine na bukomo bukatampe.

6. I muswelo’ka otukokeja kwepuka kupakika mwifundi wa Bible myanda mulwi?

⁶ Pa kufundija na binenwa bipēla, tufwaninwe kadi kuta mutyima ku kwepuka kupakika mwifundi wa Bible myanda mulwi kipukwi. Yesu wādi ulonda mikalo ya bandi bana-babwanga. (Yoano 16:12) Netu tufwaninwe kulonda mikalo ya mwifundi netu. Kifwa, shi twendeja kifundwa mu dibuku Buyuki Butwala ku Būmi Bwanyeke, kekitulombepo kushintulula kamwanda ne kamwanda. * Kadi ketufwaninwepo kwipangila kupwa myanda mivule lwendo lumo, ulanga amba kwifunda bivule kyo kintu kya kamweno. Ino i biyampe kutala bisakibwa bya mwifundi ne lūku lwandi penepa koyuka bukidi bwa kwendeja nabo kifundwa. Kitungo kyetu i kukwasha mwifundi ekale mwanā-bwanga wa Kidishitu ne mutōtyi wa Yehova. Tufwaninwe kwitūdila’ko kitatyi kifwaninwe kya kukwasha mwifundi usangela musapu emvwanije biyampe byobya byaefunda. Namino, bubinebine bubwanya kutenga mutyima wandi ne kumutonona ku kulonga’po kintu kampanda.—Loma 12:2.

7. I madingi’ka aketukwasha tufundije na binenwa bipēla kwivwana ponso potunena mashikulu mu kipwilo?

⁷ Ponso potunena mashikulu mu kipwilo, nakampata shi mudi bapya baile’mo, i muswelo’ka otukokeja kunena muneneno wa “kwivwanwa biyampe”? (1 Kodinda 14:9) Ivwana ano madingi asatu abwanya kwitukwasha. Dibajinji, i biyampe kushintulula bishima byonso kebibidilwe na bantu. Kwivwanija kotwivwanije Kinenwa kya Leza ke kwitupe muneneno mwishile na wa bakwetu. Shi twingidija binenwa pamo bwa “umpika wabinebine ne wamanwa,” “mikōko mikwabo,” ne “Babiloni Mukatakata,” tufwaninwe kushintulula’byo mu muneneno upēla, wivwanija buluji bwabyo patōka. Dya bubidi, twepukei kunena na lusanzadimba. Kunena bishima bivule, bisheteke na muneñenya wa peulu, kujimijanga bemvwaniki. Kunena bintu patōka kutambanga ku kufundula bishima ne binenwa byampikwa mvubu. Dya busatu, ketufwaninwepo kukimba kunena myanda kapwila. Eyo, tubwanya shetu kusokola mu bukimbi bwetu myanda mivule isangaja. Ino i kipite buya kukongela milangwe yetu yonso mu myanda mikatampe ibala-inga kete, ne kunena enka milangwe ilunga kuboko ku ino myanda, nayo i enka yoya ibwanya kunenwa patōka mu bula bwa kitatyi kitungilwe.

Kwipangula Bipangujo Senene

8, 9. I muswelo’ka otukokeja kutonga kipangujo kibwanya kusangaja mwinē njibo? Leta bifwa.

⁸ Vuluka amba Yesu wādi sendwe wabinebine mu kwipangula bipangujo byādi bitwala bandi bana-babwanga ku kulupula bidi mu mutyima wabo, bilangula ne kutamija mulangilo wabo. Yesu wādi utenga ne kukunka mityima yabo na bipangujo byandi. (Mateo 16:13, 15; Yoano 11:26) Lelo  tubwanya namani kwipangula bipangujo senene pamo bwa Yesu?

⁹ Shi tusapula ku njibo ne njibo, tukokeja kwipangula bipangujo bisamuna milangwe, byala kyalwilo kya kwisambila pa Bulopwe bwa Leza. Ino i muswelo’ka okokeja kutonga kipangujo kibwanya kusangaja mwinē njibo? Ikala mubandaudi. Pofwena ku njibo, ela meso koku na koku pa mwenda. Le ubamone bintu bya kukaya nabyo bilēle pa lubanza, bilombola amba ku njibo kwikalanga bana batyetye? Shi ubamone’byo, ubwanya kwipangula’mba, ‘Lelo kweipangwile kasha mukekadila ntanda pakatama bobe bana?’ (Mitōto 37:10, 11) Le ubamone maloko mavulevule mafunge ku kibelo, nansha bintu bya kukinga lupango? Nabya ubwanya kwipangula’mba: ‘Ulanga kudi’tu kyaba kyotukekala abe ne ami na mutyima-ntenke ku mobo etu ne mu kipito?’ (Mika 4:3, 4) Lelo ubamone’ko kintu kilombola amba kudi ubela nansha wa bulema? Ubwanya kwipangula’mba: ‘Le kudi’po kitatyi kyotukekala batwe bonso bakomo nkē mu ngitu?’ (Isaya 33:24) Ubwanya kutana madingi mavule mu kabuku Muswelo wa Kushilula ne Kwendeleja Misambo Itala pa Bible. *

10. I muswelo’ka otukepangula bipangujo bya ‘kuteka’ nabyo milangwe ne malango mu mutyima wa mwifundi wa Bible, ino i bika byotufwaninwe kuvuluka?

¹⁰ Lelo tukokeja namani kwipangula bipangujo biyampe potwendeja bifundwa bya Bible? Eyo, ketudipo bwa Yesu, mwanda ketuyukangapo bidi mu mityima ya bantu. Inoko shi twipangula bipangujo bya bwino, mungya bintu byotwajingulula, tubwanya ‘kuteka’ milangwe ne malango adi mu mutyima wa mwifundi. (Nkindi 20:5) Tulete kifwa, langa’po shi twifunda mu dibuku Buyuki shapita unena’mba “Mwanda’ka Būmi bwa Bwine-Leza Buletanga Nsangaji.” Uno shapita wisambila pa mumwena Leza budimbidimbi, busekese, ne myanda mikwabo. Mwifundi ukokeja kulondolola biyampe bipangujo bidi kunshi kwa dyani, ino lelo witabije’byo binebine? Pa kino, tukokeja kwipangula’mba: ‘Molangila, lelo mumweno umona Yehova ino myanda i mwendele’mo?’ ‘I muswelo’ka okokeja kulonda ino misoñanya ya mu Bible mu būmi bobe?’ Ino vuluka kwikala na bulēmantu, ne kupa mwifundi bulēme. Ketufwaninwepo kwipangula bipangujo bifityija mwifundi wa Bible mutyima nansha bimufwija bumvu.—Nkindi 12:18.

11. Baneni ba ku kupwila kwa bantu bonso babwanya kwipangula bipangujo senene mu mashinda’ka?

¹¹ Baneni ba ku kupwila kwa bantu bonso nabo bakokeja kwipangula bipangujo. Bipangujo bya bututudyatutu—byotwipangula pampikwa kusaka bemvwaniki balondolole na diwi ditunduke—bikokeja kukwasha bemvwaniki bekale kulanga ne kulanguluka’po. Dimodimo Yesu wādi wipangula bino bipangujo. (Mateo 11:7-9) Ne kadi, shi muneni wapu kunena binenwa bya ntwelelo, ubwanya kwipangula bipangujo bya kulombola mu kīpi myanda mikatampe yakesambila’po. Ubwanya kunena’mba: “Mu mwisambo wetu wa dyalelo, tusa kuyuka malondololo a bino bipangujo bilonda’ko . . .” Kupwa shi ke ku mvuyo, ubwanya kunyemena ku bipangujo’bya pa kupituluka mu myanda mikatampe.

12. Leta kifwa kilombola muswelo ukokeja bakulumpe bene Kidishitu kwingidija bipangujo pa kusenga mwanabo mwitabije na Kinenwa kya Leza.

¹² Bakulumpe bene Kidishitu nabo babwanya kwingidija bipangujo mu mwingilo wabo wa bukumbi mwanda wa kusenga “bampungiji ya ku mutyima” na Kinenwa kya Yehova. (1 Tesalonika 5:14) Kifwa, mukulumpe ubwanya kukwasha muntu udi na njia ku mutyima na kukokela ñeni yandi pa Mitōto 34:18. Patangwa’mba: “Yehova udi pa bwipi na boba ba mutyima mutyumuke, kadi upandijanga bano namino ba mushipiditu [musonsakane].” Pa kuyuka amba wa mpungiji ku mutyima’wa wamone amba bino binenwa bimutala, mukulumpe ubwanya kumwipangula’mba: ‘Yehova udi pabwipi na ani? Le kyaba kimo nobe wimonanga bu muntu udi na “mutyima  mutyumuke” ne “mushipiditu musonsakane”? Shi Yehova udi pabwipi na bantu badi namino, pamo na munenena’kyo Bible, mwene kino kilombola amba udi pabwipi ne na abe?’ Kukulupija na kanye uno muswelo kukapumputumuna mushipiditu wa muntu mupungile pa mutyima’wa.—Isaya 57:15.

Mulangilo Muluji

13, 14. (a) Tukokeja kulanguluka namani na muntu unena amba ketabijepo mudi Leza wakakokejapo kumona? (b) Mwanda waka ketufwaninwepo kulanga amba muntu yense uketabija byotunena?

¹³ Mu mwingilo wetu, tukimbanga kutenga mityima ya bantu na kulanguluka kwendele’mo, kunekenya. (Bilongwa 19:8; 28:23, 24) Le ko kunena amba tufwaninwe kwifunda kwingidija mulangilo mukutakane mwa kunekenenya bakwetu na bubinebine bwa mu Kinenwa kya Leza? Nansha dimo. Kulanguluka kwendele’mo ke kukutakanyapo bintu. Milangwe miluji iletwa mu muswelo upēla yo ivudile kulupula bipa biyampe. Ivwana kifwa kimo.

¹⁴ Tukalondolola namani shi muntu wanena amba kabwanyapo kwitabija Leza wakakokejapo kumona na meso? Tubwanya kulanguluka nandi pa kijila kya kipangila, kya mulongi ne kilongwa. Shi tubamone kilongwa, twitabijanga amba kudi mulongi ulongele’kyo. Tukokeja kunena amba: ‘Shi wenda mu ntanda mudi zolē, amba wele meso njibo ai, myubake biyampe ne bidibwa’mo bā (kilongwa), nalanga kukabulwepo kwitabija amba kudi muntu (mulongi) ūbakile njibo’ya ne kudinga bintu mu tubatyi. Ne potumona bupunga bumweka mu bupangi ne bungibungi bwa bidibwa bidi mu “kibīko” kya ntanda (kilongwa) napo mo monka, mwene i kyendele’mo kwitabija amba kudi Kampanda (mulongi) ulongele’byo?’ Mulangwe upēla uletele’po Bible ulombola’kyo patōka, amba: “Ke-mantu mōbo onso adi ne bashimiki bao, ino wakushimika bintu byonso i Leza.” (Bahebelu 3:4) Inoko tuyukei amba, nansha shi tubalanguluka mu muswelo mwendele’mo namani, ke bonsopo baketabija’byo. Bible wituvuluja amba boba badi mu ‘ngikadilo mifwaninwe’ bo bonka kete bakekala betabije.—Bilongwa 13:48; 2 Tesalonika 3:2.

15. I mulangilo’ka otukokeja kwingidija pa kumwekeja patōka ngikadilo ne mashinda a Yehova, ne i bifwa’ka bibidi bilombola motukokeja kwingidijija’o?

¹⁵ Mu bufundiji bwetu, shi mu mwingilo wa budimi, shi mu kipwilo, tubwanya kwingidija mulangilo muluji pa kumwekeja patōka ngikadilo ne mashinda a Yehova. Nakampata tukengidija mulangilo wa ‘lelo ke pepi’ wāingidije Yesu mu byaba bimobimo. (Luka 11:13; 12:24) Uno mulangilo wimanine pa kushiyañanya bintu na bintu bikwabo, o wikalanga ukoma myanda byabinebine. Kifwa, pa kulombola lufundijo lwa kalunganyembo ka mudilo molwikadile lufwe, tukokeja kunena’mba: ‘I kutupu shabana wa buswe upanga wandi mwana mfuto na kosha kuboko kwandi mu mudilo. Le Tata wetu wa buswe wa mūlu papo ke pepi, mwene ye mwine umona’nka ne mulangwe mwine wa kusoka bantu mu kalunganyembo ka mudilo bu kyamunyanji!’ (Yelemia 7:31) Pa kufundija amba Yehova utele mwingidi wandi umo ne umo mutyima, tubwanya kunena’mba: ‘Shi Yehova uyukile ñenyenye yonso midiyala ne midiyala pa dijina pa dijina, lelo bantu bamuswele, bakūdile na mashi malēme a Mwanandi ke pepi!’ (Isaya 40:26; Bilongwa 20:28) Mulangilo wa bukomo uno muswelo uketukwasha tutenge mityima ya bakwetu.

Byelekejo Bifwaninwe

16. Mwanda waka byelekejo bidi na mvubu mu bufundiji?

¹⁶ Byelekejo i bisombelwa bibweja butobaji bwa bufundiji bwetu ku matwi a bakwetu. Mwanda waka byelekejo bidi na mvubu mu bufundiji? Mwadimu umo wanene amba: “Bwino bwa kulanga bintu mu luvula i kimo kya mu bintu bikomo biloñanga bantu.” Byelekejo bishiyanga bifwatulo bya kamweno kasha bishimata mu ñeni yetu, bitukwasha twivwanije ne pa mfulo milangwe impya. Yesu wādi sendwe wabinebine mu kwingidija byelekejo. (Mako 4:33, 34) Tutalei netu motukokeja kwingidijija ano manwa a kufundija.

17. I bintu’ka biná bilengeja kyelekejo kikale kifike’po?

¹⁷ I bika bilengejanga kyelekejo kikale kifike’po? Dibajinji bidi kifwaninwe kukwatañana na bemvwaniki, kitela myanda yobebidile kala. Tuvulukei amba Yesu wādi ulupula byelekejo byandi bivule mu bintu bya mu būmi bwa difuku ne difuku bwa bemvwaniki bandi. Kya bubidi, kyelekejo kifwaninwe kudingakana na mwanda mwine wisambilwa’po. Shi myanda keidingakenepo biyampe, nabya kyelekejo kikalabika bemvwaniki betu bya bitupu. Kya busatu, kyelekejo kekifwaninwepo kulundikwa’ko tumyanda pala pala twambulwa mvubu. Vuluka amba Yesu wādi utela enka myanda mipotoloke isakibwa, ne  kufundula yoya yampikwa kamweno. Kya buná, shi ketuleta kyelekejo, tufwaninwe kujingulula shi muswelo otusa kulombola mvubu yakyo usa kwivwanikwa biyampe. Shi bitupu, bamo bakabulwa kwivwanija mwanda mwine.

18. I muswelo’ka otukokeja kuleta byelekejo bifwaninwe?

¹⁸ I muswelo’ka otukokeja kuleta byelekejo bifwaninwe? Kekitulombepo kufwatakanya mānga milamila, ya bwino bwa peulu. Byelekejo bīpi byo bikokeja kulupula bipa biyampe. Tompa’tu kulanga bifwa bitala pa mwanda omwisambila’po. Kifwa, langa bidi shi twisambila pa lulekelo lwa Leza, penepa tusaka kwelekeja mwanda udi mu Bilongwa 3:19, munena amba Yehova ‘ujimankanyanga’ nansha kubula bilubo byetu. Ao mwine bidi i muneneno wa kyelekejo kala, ino le i kifwa’ka kiyukane kyotubwanya kwelekeja nakyo uno mwanda—mwene i na kisasa, nansha kikenda mbaya? Tukokeja kunena’mba: ‘Shi Yehova wetulekela bilubo byetu, kidi pamo bwa aye ubula’byo na kisasa, nansha kukenda’bo na kikenda mbaya.’ Bine, kwivwanija mwanda na kyelekejo kipēla namino ke bikomopo.

19, 20. (a) I kwepi kotubwanya kutana byelekejo biyampe? (b) I bifwa’ka bimobimo bya byelekejo bifike’po bilupwilwe mu mabuku etu? (Tala ne mu kapango.)

¹⁹ I kwepi kobwanya kusokola byelekejo bifwaninwe, ne bifwa bya myanda ilongekele binebine? Kimba’byo mu bobe būmi nansha mu ngikadilo pala pala ne mu myanda mimweke ifikīle banabenu betabije. Byelekejo bibwanya kulupuka ne ku bintu bikwabo bivule, ku bintu byūmi ne byampikwa būmi, ku bipungwa bya mu njibo, nansha ku mwanda kampanda uyukene mu kibundi kyenu kyonso. Lufungulo’tu lwa kutana byelekejo biyampe i kwikala mutale, ‘kubandila na katentekeji’ bintu bilongeka bukile bukya mu kifuko motudi. (Bilongwa 17:22, 23) Dibuku dimo disambila pa muswelo wa kunena pa kitango kya bantu dishintulula’mba: “Muneni ubandila būmi bwa bantu ne mingilo yabo mishileshile, wisamba na bantu ba miswelo yonso, utala bintu sō ne kwipangula bipangujo enka ne byaivwanija’byo, ukongwija myanda mulwi ya kwelekeja ikamukwasha mpata kitatyi kyonso kyakekala nayo mvubu.”

²⁰ Nsulo mikwabo yotukokeja kutana’ko byelekejo bifike’po bivule i Kiteba kya Mulami, Amkeni!, ne mabuku makwabo alupulwa na Batumoni ba Yehova. Ubwanya kwifunda bivule na kubandaula muswelo wingidijibwa byelekejo mu ano mabuku. * Tala’tu bidi kifwa kyelekejo kingidijibwe mu dibuku Buyuki mu shapita wa 17, musāngo wa 11. I badingakanye kwishila kwa bumuntu bwa bantu badi mu kipwilo na kwishila kwa myotoka yenda nobe pamo mu dishinda. I bika bikilengeje kikale kifike’po? I bino: i kiselwe mu bintu bimonwa difuku ne difuku, i kikwatañane na mwanda mwine wisambilwa’po, kadi mvubu yakyo i milombolwe patōka. Mu bufundiji bwetu, tukokeja kwingidija bino byelekejo bilupwilwe mu mabuku, pakwabo na kwibikwatañanya na bisakibwa bya mwifundi wetu nansha na milangwe ya dishikulu dyetu.

21. I byabuyabuya’ka bimwenwa mu kwikala mufundiji wa Kinenwa kya Leza mufike’po?

²¹ Kwikala mufundiji mufike’po kuletanga byabuyabuya bivule. Shi tufundija bakwetu, twisambulwilanga nabo myanda; twibapa byotudi nabyo mwanda wa kwibakwasha. Kuno kupāna kuletanga nsangaji, mwanda Bible unena’mba: “Dyese dyakupana ditabukile dyakupebwa.” (Bilongwa 20:35) Ku bafundiji ba Kinenwa kya Leza, nsangaji yabo i kusepelela kobadi nako ku mutyima pa kuyuka amba bapānanga kintu kidi na mvubu yabinebine, ya kulādila nyeke—ke bubinebine butala padi Yehova kadi. Tudi kadi na kuloelelwa ku mutyima pa kuyuka amba twiulanga Yesu Kidishitu, Mufundiji Mukatampe.

[Kunshi kwa dyani]

Lelo Ubavuluka?

• I muswelo’ka otukokeja kufundija na binenwa bipēla kwivwana potwendeja kifundwa kya Bible? potunena dishikulu mu kipwilo?

• Tukokeja kwingidija bipangujo biyampe namani potusapula ku njibo ne njibo?

• I muswelo’ka otukokeja kwingidija mulangilo muluji mwa kulombwela patōka ngikadilo ne mashinda a Yehova?

• I kwepi kotukokeja kutana byelekejo bifwaninwe?

[Bipangujo bya Kifundwa]

 [Kapango/Kifwatulo pa paje 31]

Lelo Ukivulukile Bino Byelekejo?

Bino bilonda’ko i byelekejo bifike’po bibala-binga kete. Ubulwe’po kutala mu mabuku atelelwe bu a kunyemena’ko mwa kujingulwila biyampe muswelo wakweshe kyelekejo ne kyelekejo kwivwanija mwanda mwine wadi wisambilwa’po?

• Pamo bwa bakayi bayela ku myonji, nansha bwa ba mwana-mulume ne mwana-mukaji bashetemuka pa maimakasa, boba bakimba kwikala na busongi buyampe banenwe kumona mwine pabo muyampe.—Kiteba kya Mulami, difuku 1 Kweji 6, 2001, paje 12.

• Kulombola milangwe ya ku mutyima obe kudi pamo bwa kwela mukwenu futu. Ubwanya kwela’yo biyampe nansha kunyunga’yo na kikoso yasanshija mukwenu.—Buyuki Butwala ku Būmi Bwanyeke, paje 144.

• Kwifunda kulombola buswe kudi pamo bwa kwifunda ludimi lupya.—Kiteba kya Mulami, difuku 1 Kweji 3, 1999, paje 11, 16.

• Langa’po bidi shi ubela luba lukusakila enka lupasulo, shi bitupu ufwa. Ukeivwana namani shi lupeto lulombwa kufuta pa kupasulwa lupityile pa lodi nalo ku makasa? Shi ne mukongo onso wa ba mu kisaka kyobe ne wa balunda nobe mwine keufikile’popo, ukeivwana namani? Kutanwa na kino kikoleja kitūla būmi mu kyaka i mwanda ujingijanga bantu mpata!—Kiteba kya Mulami, difuku 1 Kweji 3, 1999, paje 6.

• Ku bademona, majende adi pamo’nka bwa kyambo ku biluwe. Akokanga bantu.—Buyuki Butwala ku Būmi Bwanyeke, paje 111.

• Muswelo wāile Yesu kunyongolola lutundu lwa Adama ubwanya kudingakanibwa na mpeta wa mutyima muyampe wafuta bumpulu bwa kompani (yaponejibwe na mwendeji wa budimbidimbi) kupwa wāfungula tshapu, weileka keingila mwanda wa bengidi bavule bamwene’ko.—Kiteba kya Mulami, difuku 1 Kweji 2, 1991, paje 21.

• Monka mulongelanga sendwe upentele kya kupenta bukomo bwa kwaluja kifwatulo kyobamonene, Yehova nandi katalangapo’nka kubulwa kubwaninina kwetu, mhm, ino utalanga ne biya bidi motudi, mwenda myaka uketujokejeja ku bubwaninine bwājimije Adama.—Buyuki Butwala ku Būmi Bwanyeke, paje 181.

[Bifwatulo pa paje 28]

Bene Kidishitu babine i bafundiji ba Kinenwa kya Leza

[Kifwatulo pa paje 29]

Bakulumpe bakokeja kwipangula bipangujo mwanda wa banababo betabije bamone kusengibwa na Kinenwa kya Leza