“Napu Kwimushīla Kala Mwakulondela”

“I ponka pano po kimufwaninwe mwikale bafundiji.”—BAHEBELU 5:12.

1. I kika kinenenwa amba binenwa bya Bahebelu 5:12 bifwaninwe’nka kupa mwine Kidishitu malangalanga kampanda a kwibandaula?

 POTANGA binenwa bya ku bukomo bwa mushipiditu bidi mu kisonekwa kimanine’po mutwe wa mwanda, lelo bibakupe malangalanga kampanda a kwibandaula abe mwine? Shi bibakupe’o, yuka amba kudipo kasuku kobe. Byotudi balondi ba Kidishitu, tuyukile amba tufwaninwe kwikala bafundiji. (Mateo 28:19, 20) Kadi tuyukile amba kitatyi kyotudi’mo nakyo kitulomba kufundija biyampe na kampeja-bukidi. Ne kadi tuyukile amba bufundiji bwetu i mwanda upa boba botufundija kyaba kya kutonga būmi nansha lufu! (1 Temote 4:16) O mwanda i biyampe twiipangule amba: ‘Lelo bine ndi mufundiji momfwaninwe kwikadila’bo? Le mbwanya kwilemununa namani?’

2, 3. (a) Mufundiji umo wāshintulwile namani kyalwilo kya bufundiji bulumbuluke? (b) Yesu wētushidile kifwa’ka kya kulonda mu bufundiji?

² Ano malangalanga keafwaninwepo kwituzozeja. Shi tumone bufundiji bu mwingilo ulomba’nka kwikala na bwino kampanda bwa pa bula, nabya tukakolelwa pa kwilemununa. Kyalwilo kya bufundiji bulumbuluke ke bwinopo bwa kufundija, mhm, ino i kintu kikwabo kya mvubu mikatampe mpata. Ivwana byāsonekele mwadimu umo mupotolole’byo biyampe mu dibuku dimo pa uno mwanda, wanene amba: “Bufundiji bulumbuluke ke mwandapo wimanine pa bwino kampanda nansha manwa, mpangiko nansha bilongwa, mhm. . . . Kufundija i mwanda wimanine dibajinji pa buswe.” Eyo, uno mukelenge wadi shandi wisambila pa mufundiji ufundija ku masomo a bwine ntanda. Inoko mwanda waānene udi na mvubu ne mu bufundiji botufundija batwe bene Kidishitu. Namani?

³ Batwe ketudipo na Kifwa kikwabo kiyampe kya mufundiji, poso’nka Yesu Kidishitu wāsapwidile balondi bandi amba: “Napu kwimushīla kala mwakulondela.” (Yoano 13:15) Eyo, Yesu pano wādi wisambila pa kifwa kyandi mu myanda itala kulombola kwityepeja, inoko kifwa kyandi na bubine kitala ne pa mwingilo mwinemwine waāingile paādi pano pa ntanda bu muntu—mwingilo wa kufundija bantu myanda miyampe ya Bulopwe bwa Leza. (Luka 4:43) Pa kino, shi byadi amba i bakunene kutonga kishima kimo kilombola ngikadilo yādi itādile mu mwingilo wa Yesu, padi wadi wa kutonga kishima “buswe,” mwene i amo? (Kolose 1:15; 1 Yoano 4:8, BB) Buswe bwa Yesu bwaādi uswele Yehova, Shandi wa mūlu, kyo kintu kyādi kipityile byonso. (Yoano 14:31) Ino byaādi mufundiji, wālombwele buswe mu bintu bibidi bikwabo. Wādi uswele bubinebine bwaādi ufundija, kadi wādi uswele bantu baādi ufundija. Twimaninei bidi pa bino bintu bibidi byaētushidile’mo kifwa kya kulonda.

Buswe bwa Tamba Kala bwa Bubinebine bwa Leza

4. I muswelo’ka wātamije Yesu buswe bwa kuswa bufundiji bwa Yehova?

⁴ Mumweno umwene mufundiji myanda yafundija  o ulombola buya bwa bufundiji bwandi. Kubulwa kusangela’bo kwandi ko-konso kekubulwepo kumweka ku befundi bandi ne kwibasambukila. Yesu kādipo usengelwa bubinebine bwa bulēme butala padi Yehova ne pa Bulopwe Bwandi bwaādi ufundija. Buswe bwādi buswele Yesu myanda yaādi ufundija bwādi na mushike mpata. Wātamije buno buswe mwanda nandi wādi mwifundi. Mu bula bwa myaka mivulevule kumeso kwa kubutulwa’ye bu muntu, uno Mwana wa bunka wādi mwifundi kadi nsengwa. Isaya 50:4, 5 unena bino binenwa bifike’po amba: “Mfumwetu Leza wampe ludimi bwa boba balombojibwe [“bafundijibwe,” NW], amba ndyuke mwakukankamijija na binenwa yewa mukōke; umbūkija mo bukila mo bukila, untebeka kutwi kwami kwivwana, amba ngivwane pamo’nka bwa boba [bafundijibwe]. Mfumwetu Leza wajikula kutwi kwami, kabidi ami nkyatombokelepo, nansha kwalamuka kunyuma.”

5, 6. (a) Le i mwanda’ka wēmwenine Yesu pa kubatyijibwa kwandi, ne wādi na lupusa’ka padi? (b) Mu myanda itala kwingidija Kinenwa kya Leza, ba Yesu ne Satana i beshile namani?

⁵ Yesu wāendelele na kuswa tunangu twa kwa Leza kitatyi kyaādi wenda utama bu muntu pano panshi. (Luka 2:52) Paādi ubatyijibwa, wēmwenine mwanda waādi kamwene kashā. Luka 3:21 unena’mba: “Diulu dyajikuka.” Mobimwekela Yesu pano wāikele kuvuluka būmi bwaādi nabo kumeso kwa kubutulwa’ye bu muntu. Kupwa papo, wākalāla mafuku 40 matuntulu mu ntanda mutuputupu kudya kantu mpika. Bine, kābudilwepo kuloelelwa bikatampe mu kulanguluka pa bitatyi bivule bya bufundiji bwaādi ufundijibwa na Yehova mūlu. Ino ne kwija kwine mpika, buswe bwaādi uswele bubinebine bwa Leza bwātūlwa pa ditompo.

⁶ Satana wāiya kutompa Yesu enka pa kitatyi kyaādi mukōke kadi na nzala. Bine, bano bana babidi ba Leza i beshile kulampe mpata! Abo bonso bāpitulukile mu Bisonekwa bya Kihebelu—ino na mimweno mishile kulampe kwine. Satana wādi unyengakanya Kinenwa kya Leza, wingidija’kyo pampikwa bulēme mwanda wa kufikidija bitungo byandi bya kwisakila. Na bubine, kyādi’tu kisaka uno ntomboki i kupēlula bubinebine bwa Leza. Ino Yesu aye wādi upituluka mu Bisonekwa na buswe bumwekelele, wingidija Kinenwa kya Leza bya dyangi pa kilondololwa ne kilondololwa. Eyo, Yesu wādi’ko kala ne bino binenwa bya ku bukomo bwa mushipiditu kebyasonekelwe, ino wādi wibikwete na kalēmo mpata. Bine, bwādi bubinebine bulēme butambile kudi Shandi wa mūlu! O mwanda wāsapwidile Satana amba bino binenwa bya Yehova byādi na mvubu kupita ne bidibwa bine. (Mateo 4:1-11) I bine, Yesu wādi uswele bubinebine bonso bwāmufundije Yehova. Ino le wālombwele namani buno buswe pa kwikala’ye mufundiji?

Buswe pa Bubinebine Bwaādi Ufundija

7. Mwanda waka Yesu kēkwete’kopo na kufundija bufundiji bwa aye mwine?

⁷ Buswe bwa Yesu pa bubinebine bwaādi ufundija bwādi bumweka nyeke patōka. Ke-muntu wādi ubwanya bipēla byonka kutumbija milangwe ya aye mwine. Mwanda wādi na buyuki ne tunangu twa ntanda ne miseke. (Kolose 2:3) Ino wādi uvuluja misunsa ne misunsa bemvwaniki bandi amba byonso byaādi ufundija kebyādipo bitamba kudi aye mwine, ino i kudi Shandi wa mūlu. (Yoano 7:16; 8:28; 12:49; 14:10) Wādi uswele bubinebine bwa Leza mpata mu muswelo wakabwanyapo kupingakanya’bo na milangwe yandi.

8. Ku ngalwilo kwa mwingilo wandi, Yesu wāshile namani mwa kulondela mu myanda itala kunyemena ku Kinenwa kya Leza?

⁸ Yesu wāshile kala mwa kulondela ku ngalwilo’tu kwa mwingilo wandi. Tala muswelo waēlombwele dibajinji ku bantu ba Leza amba aye ye Meshiasa wālailwe. Lelo wāile kwimana ku meso a bibumbo kaikupila pa kyadi amba ami uno ye Kidishitu, ne kulongelela bingelengele bilombola amba bine ye aye? Mhm. Wāendele mu shinakoka, kwādi kwibidile bantu ba Leza kutanga Bisonekwa. Kwine’ko wātanga na diwi ditunduke bupolofeto bwa Isaya 61:1, 2, wāshintulula ne kushintulula amba buno bubinebine bwa bupolofeto butala padi aye. (Luka 4:16-22) Bingelengele bivule byaālongele byālombola patōka amba Yehova udi nandi. Nansha nankyo, aye wādi nyeke unyemena ku Kinenwa kya Leza mu bufundiji bwandi.

9. Yesu wālombwele namani buswe bwa dikōkeji bwaādi uswele Kinenwa kya Leza paādi wisamba na Bafadiseo?

⁹ Balwana na Yesu ba mu mitōtelo pobādi bakimba kumudimbakanya na binenwa, aye kādipo usaka kwituluja nabo, nansha byaādi ubwanya kwibanekenya lubilo lonka. Ino wādi uleka Kinenwa kya Leza kibaponeje. Kifwa, vuluka popa pāile Bafadiseo kutopeka balondi ba Yesu amba abajilula  dya Sabado mwanda abapulula mivungu ibala-inga ya miseke mu madimi kebenda badya. Yesu wēbatentulwile amba: “Lelo kemwatangile kyokya kyālongele Davida pādi ne nzala, aye mwine, ne boba bādi nabo bene”? (Mateo 12:1-5) Bine, boba bantu ba kwimona abo bene bu boloke bādi padi ke batange nsekununi yāsonekelwe ku bukomo bwa mushipiditu idi mu 1 Samwele 21:1-6. Wivwane bādi ke batange’yo, nankyo kebānañwinepo ñeni mikatampe ya kuboila’po. Ino Yesu aye kātangilepo enka nsekununi bitupu. Wālangulukile’po ne kulanguluka, wālama mu mutyima musapu mwine udi’po. Wādi uswele misoñanya yāfundije Yehova mu kino kisonekwa. O mwanda wāingidije ino nsekununi ne kifwa kimo kya mu Bijila bya Mosesa mwanda wa kusokola patōka buluji bwine bujalale bwa Bijila. Ne kadi buswe bwa dikōkeji bwa Yesu bwāmutonwene akinge Kinenwa kya Leza ku kyaka kya bendeji ba mitōtelo bādi balonga bukomo bwa kunyengakanya’kyo mobasakila ne kwikityimpila panshi mu ntoto ya bisela bya bantu.

10. I muswelo’ka wāfikidije Yesu bupolofeto butala pa mufundijijo wandi?

¹⁰ Buswe bwādi buswele Yesu myanda yaādi ufundija kebwādipo bumufikija ku kufundija myanda itamba mu mutwe bitupu, na mulēle nansha bintu byakubulwa kupotoloka. Bupolofeto bwa ku bukomo bwa mushipiditu bulombola amba Meshiasa ukesamba na ‘buntu ku milomo yandi,’ mu “mineneno milumbuluke senene.” (Mitōto 45:2; Ngalwilo 49:21) Yesu wāfikidije buno bupolofeto mwanda musapu wandi wādi nyeke usangaja, utenga ku mityima, kadi wādi wisamba “myanda miya ya buntu” pa kufundija bubinebine bwaādi uswele mpata. (Luka 4:22) Na bubine, buzanzamuke bwandi bwādi bumweka ne mu mpala yandi, meso andi ādi alombola amba usangedile myanda yafundija. Bine, bādi bamuteja kebādipo batunya kuloelelwa, kadi wāshile bine kifwa kilumbuluke kya kulonda ponso potusapwila bakwetu myanda yotufunda!

11. Mwanda waka bwino bwa bufundiji bwādi na Yesu kebwāmupelepo mitatulo?

¹¹ Lelo kwivwanija kwādi kwivwanije Yesu biyampe shē bubinebine bwa Leza ne muneneno wandi muyampe byāmupele mitatulo? Divule bafundiji badi namino bekalanga na mitatulo. Ino vuluka amba Yesu wādi muntu wa tunangu, aye’ko wakaminwe Leza. Tuno tunangu ketwāmupelepo kwianya, mwanda ‘tunangu tudi na bantu batūkanye.’ (Nkindi 11:2) Kudi kadi ne kintu kikwabo kyākankeje Yesu kwitatula ne kwianya.

Yesu Wādi Uswele Bantu Baādi Ufundija

12. Yesu wālombwele namani amba kādipo usaka balondi bandi banze kumutyina moyo?

¹² Buswe bwa mushike bwa Yesu bwaādi uswele bantu bwādi bumweka nyeke mu bufundiji bwandi. Bufundiji bwandi kebwādipo buseleja ba mityima kūlu, muselejanga’yo bufundiji bwa bantu ba mitatulo. (Musapudi 8:9) Kifwa, Petelo wāpwile’tu kwimwena kingelengele kya Yesu, wātulumuka mpata, kāpone pa manwi a Yesu. Ino Yesu kādipo usaka balondi bandi banze kumutyina moyo kewendele’mo. O mwanda wāmunene na kanye amba, “Kokikwatwa moyo,” kupwa wāmulombola mwingilo usangaja wa kulonga bana-babwanga wasa kwingila. (Luka 5:8-10) Yesu wādi usaka bana-babwanga bakunkwe na buswe bobaswele abo bene bubinebine bulēme butala padi Leza, ke na moyopo wa kutuyuka mufundiji wabo.

13, 14. I muswelo’ka wālombwele Yesu lusa lwa kwitūla pa kyaba kya bantu?

¹³ Buswe bwa Yesu pa bantu baādi ufundija bwādi bumweka ne mu kwitūla kwaādi witūla pa kyabo kyaba. “Pa kumona bibumbo bya bantu, kadi webakwatyilwa lusa, mwanda basusukile ne kususuka, ne kusansana badingakana pamo na mikōko yampikwa mukumbi.” (Mateo 9:36) Wēbevwanine  lusa mwanda bādi bya bulanda, penepo ne kwibakwasha wēbakwasha.

¹⁴ Ivwana kadi kwitūla kwētūdile Yesu pa kyaba kya muntu mukwabo. Mwana-mukaji wa muyeye wāfwenene kwadi mu kibumbo, wātenga ku milomo ya mutwelo wandi, ponka’po wāpwibwa mu kingelengele. Yesu wēivwana bukomo bumo bwāmutamba’mo, ino kumona muntu wāpwibwa’wa mpika. Ebiya wākimba na mikeketo kumona mwana-mukaji’wa. Mwanda waka? Ke mwandapo wa kumutopeka amba ubajilula Bijila nansha mbila ya basonekeji ne Bafadiseo, na mwādi mukokeja kutyinina’kyo mwana-mukaji’wa. Ino aye wāmunena’mba: “Abe mwana’mi lwitabijo lobe lubakupandija. Endapo ne ku mutyima talala! Ubapwibwa ku kizwa kyobe kyo wadi nakyo.” (Mako 5:25-34) Ubaivwana bino binenwa mobilombwela lusa lwa kwitūla pa kyaba kya bakwabo. Yesu kāmunenepo’tu amba, “Pwibwa.” Ino wānene amba: “Ubapwibwa ku kizwa kyobe kyo wadi nakyo.” Mako wingidije pano kishima kikokeja kushintululwa pa bute pa bute amba “kukupila,” mukupidilo wādi divule ukupilwa muntu mwanda wa kumumwesha malwa. Ko kunena amba Yesu wāyukile amba misongo ya uno lolo yādi imususula, pakwabo imusanshija ku ngitu ne mu milangwe. O mwanda wāikele kwitūla pa kyandi kyaba.

15, 16. I bika byālongele Yesu mu mwingilo wandi bilombola amba wādi utala bintu biyampe byādi munda mwa bantu?

¹⁵ Kadi Yesu wādi ulombola buswe bwaādi uswele bantu na kutala biyampe bidi munda mwabo. Tala byālongele Yesu pobēmwene na Natanaela, wāikele ke mutumibwa mwenda mafuku. “Yesu paamwene Natanaela wiya kwadi, wamunena’mba: ‘Awa shandi mwine Isalela wa bine, wampikwa budimbidimbi munda.’” Yesu wātadile mu kingelengele byobya bidi mu mutyima wa Natanaela, wājingulula myanda mivule imutala. Eyo, Natanaela kādipo muntu mubwaninine. Wādi nandi na tuto, motwikadile nato batwe bonso. Kifwa, paāivwene banena myanda ya Yesu, nandi wātentulwile’po na binenwa bidi bwa bya kafutululo amba: “Lelo mu kibundi kya Nazalete namo mutambe kiyampe?” (Yoano 1:45-51, MB) Eyo, bino bintu byonso byādi shabyo bibabilwa Natanaela, ino Yesu aye wāimanine pa kintu kiyampe kyādi mu mutyima wa uno mwana-mulume, ke kubulwa budimbidimbi kwandi kadi.

¹⁶ Pakwabo kadi mudyavita umo—kepabulwe i Mujentaila, mwine Loma—wāile kufwena Yesu amba ondape umpika wandi ubela, Yesu wādi uyukile amba uno mushidika udi na bilubo. Mudyavita wa mu yoya myaka kādipo ubulwa kwikuja mu myanda ya butapani, kumwanga mashi ne mu mutōtelo wa bubela. Ino Yesu aye wāimanina pa kintu kiyampe—lwitabijo lwa kutendelwa lwādi na uno mukelenge. (Mateo 8:5-13) Myaka pa kupita’po, Yesu wēsamba na nonga-bibi wādi ukobekelwe ku mutyi wa masusu kubwipi nandi. Kāikelepo kumufunina amba kokisamba nami abe kipolapola; ino wāikele kumukankamika ne kumupa lukulupilo. (Luka 23:43) Yesu wādi uyukile amba kumona bakwabo na meso mabi, a kwibatopeka i kukimba’tu kwibazozeja bitupu. Bine, bukomo bwa kukimba biyampe bidi mu bantu bwaādi ulonga bwākankamikile bavule bālongelela bilumbuluke.

Mutyima wa Kusaka Kwingidila Bantu

17, 18. I muswelo’ka wālombwele Yesu mutyima wa kusaka kwingidila bakwabo pa kwitabija kwiya’ye pano panshi?

¹⁷ Bukamoni bukwabo bumwekelele bulombola amba Yesu wādi uswele bantu baādi ufundija i mutyima wandi wa kusaka kwibengidila. Kumeso kwa kubutulwa’ye bu muntu, Mwanā Leza wādi kala uswele bana ba bantu mpata. (Nkindi 8:30, 31) Byaādi “Mwanda,” musedi wa myanda wa Yehova, kābudilwepo divule kwingidila na bantu pamo. (Yoano 1:1) Ino, Yesu pa kusaka kufundija bana ba  bantu mpala na mpala, “wēbudij[e] aye mwine, pa kwalamuka mu ludingo lwa bupika,” wāshiya kyepelo kyandi kya ntumbo kya momwa mūlu. (Fidipai 2:7; 2 Kodinda 8:9) Pano panshi napo, kāsakilepo ekale kwingidilwa, mhm. Ino wānene amba: “Monka mwaīdile Mwanā muntu, aye kaīdile’mba ēngidilwe mīngilo, mhm poso’mba ayeko ēbēngidile, ne kupana muya wandi ke kikūlwa kya bavule bene.” (Mateo 20:28) Yesu wālondele ne pa mfulo bino binenwa mu būmi bwandi.

¹⁸ Yesu wādi wingidila na kwityepeja bantu baādi ufundija, wipāna ne kwishisa kwine mpika pa mwanda wabo. Utyibuluka Ntanda ya Mulao koku ne koku lwa panshi, wenda tutwa na tutwa twa makilometele mu ñendo yandi ya busapudi, mwanda’tu wa kwimona na bantu bavule bininge. Kādipo bwa Bafadiseo ne basonekeji ba kwitatula, aye wādi nyeke mwityepeje, ulumbwa. Bantu ba miswelo ne miswelo—bamfumu, basola, bayuki ba bijila, bana-bakaji, bana, balanda, babela, nansha ke babisumbule bene—bonso bādi bamufwena pampikwa kwikaka, ne moyo mwine mpika. Eyo, Yesu wādi mubwaninine shandi, inoko nandi wādi muntu ukōka, wivwana ne nzala. Ino, nansha ke kitatyi kyaādi ukōka, ukimba kwitūkija ne kulombela kufula kwakubulwa lunwa, kādipo ubulwa kubadikija bisakibwa bya bakwabo kumeso kwa byandi.—Mako 1:35-39.

19. Yesu wāshidile namani bandi bana-babwanga mwa kulondela pa kwikala nabo na kwityepeja, kitūkijetyima ne na kanye?

¹⁹ Yesu wādi kadi ne na mutyima wa kwingidila bandi bana-babwanga. Wēbengidile pa kwibafundija na kanye ne na kitūkijetyima. Pobādi bakolelwa kwivwana bufundiji kampanda bwa kamweno, kādipo ukōka, uloba nansha kwibakalabela. Ino wādi ukimba muswelo mukwabo wa kwibevwanija’bo. Kifwa, langa’po bidi misunsa mivule yādi īpotomeja bana-babwanga mobādi bafwila kuyuka i ani mukatampe umbukata mwabo. Ino Yesu aye, misunsa ne misunsa, kutūla’nka ne ku bufuku bukya ke lufu lwandi, wādi’nka watompa ou muswelo ke ou wa kwibafundija kwityepeja ku meso a bakwabo. Bine, mu myanda itala kwityepeja, ne mu myanda mikwabo mine, Yesu wādi na bubinga bwa kunena’mba: “Napu kwimushīla kala mwakulondela.”—Yoano 13:5-15; Mateo 20:25; Mako 9:34-37.

20. I mufundijijo’ka wāshiyañenye Yesu na Bafadiseo, ne mwanda waka wādi mufike’po?

²⁰ Tala biyampe, usa kumona amba Yesu kādipo’tu ulombola bandi bana-babwanga mwa kulondela; ino ‘wāshile mwa kulondela.’ Wādi wibafundija na kifwa. Kādipo wisamba nabo na kukimba kwibēkija, pamo bwa aye wimona bu kapita ufunka na minwe ino aye mwine kulonga bintu byaibalombola mpika. Muno mo mwādi mulongela Bafadiseo. “Ke-bantu banena’byo kadi ne kwibilonga mpika,” ye mwēbanenene Yesu. (Mateo 23:3) Yesu wādi ulombola na kwityepeja befundi bandi buluji bwine bwa bufundiji bwandi, mwanda aye mwine wādi wibulonda mu būmi bwandi, wingidija’bo ne kwingidija. O mwanda paāsapwidile balondi bandi kwikala na būmi bupēla, bwampikwa kutyintyidilwa na mushipiditu wa kulondalonda bya bupeta, kebāikelepo kwiipangula amba i bika byasaka kunena. Ino bādi bemwena biyampe bubinebine bwa byobya byaānene amba: “Mizeu īdi ne mikembo, ne byoni bya mūlu nabyo bidi ne manswa, ino Mwana wa muntu kadi ne pakusamina mutwe wandi.” (Mateo 8:20) Yesu wāingidile bandi bana-babwanga na kwityepeja, wēbashila kifwa mwa kulondela.

21. I bika byotukabandaula mu kishinte kilonda’ko?

²¹ Bine ne bine ponka, Yesu wādi Mufundiji mukatampe wa kasha ne kashele! Buswe bwaādi uswele myanda yaādi ufundija ne bantu baādi ufundija bwādi bumweka patōka ku bonso ba mityima myoloke bādi bamumona ne kumwivwana. I bumweke ne dyalelo ku meso a boba bafunda kifwa kya kulonda kyaāshile. Ino tubwanya namani kulonda kifwa kibwaninine kya Kidishitu? Kishinte kilonda’ko kikemanina pa uno mwanda.

Usa Kulondolola Namani?

• Kyalwilo kya bufundiji bulumbuluke i kyalwilo’ka, ne i ani wālombwele’kyo?

• Yesu wālombwele namani amba wādi uswele bubinebine bwaādi ufundija?

• Yesu wālombwele namani buswe bwaādi uswele bantu baādi ufundija?

• I bifwa’ka bilombola mutyima wa kwityepeja wa Yesu wa kusaka kwingidila boba baādi ufundija?

[Bipangujo bya Kifundwa]

[Kifwatulo pa paje 8]

Yesu wālombwele namani amba uswele misoñanya idi mu Kinenwa kya Leza?