Bankasampe Baswele Bubinebine

“LELO kukatōkeja mulumyana dishinda dyandi i kwepi?” mo mwāipangwidile mulembi wa mitōto Muhebelu kintu kya myaka 2400 kunyuma. (Mitōto 119:9) Kino kipangujo kikidi na mvubu ne dyalelo mwanda bankasampe bekondanga na makambakano mavule mu ino ntanda. Bilongwa bya busekese bitalwa kilomo-nyeka bibatwala bankasampe ku kupya SIDA, kintu kya kipindi kituntulu kya badi na luno luba luleta lufu i bankasampe ba myaka 15 ku 24. Kwitonda bitomibwa bileta lujingwe nako kubweja’ko makambakano mavule, kutukija bankasampe abo bakidi babishibabishi. Minjiki yōna ñeni; mafilime alombolwa ku televijo ne ku mavideo a bikandangobo ne a busekese; ne bantu badi mutaka balombolwa ku Entelenete bibaone mpata bankasampe bavule. O mwanda kipangujo kya mulembi wa mitōto kikidi na kamweno kakatampe ku bambutwile ne bankasampe bavule dyalelo.

Mulembi wa mitōto wālondolwele aye mwine kipangujo kyandi amba: “Ponka pa kutámo mutyima mwendele mwanda obe.” I bine, Bible, Kinenwa kya Leza, upānanga buludiki buyampe ku bankasampe, kadi boba bebulonda balumbululanga būmi bwabo. (Mitōto 119:105) Tubandaulei pano bifwa bimobimo bya bankasampe baswele Yehova, balonga buninge bwa kushala bakomo ku mushipiditu mu ino ntanda itobelwe mazua ne byabupeta.

Bafwijanga’ko Pangala pa Bwendeji bwa Bambutwile

Jacob Emmanuel wādi pania, mwingidi wa kitatyi kyonso myaka kampanda kumeso kwa kwenda kukengidila ku bilo bya musambo bya Batumoni ba Yehova mu Mexike. Uvuluka na mutyima wa kufwija’ko pa kumona muswelo wātamijibwe buswe bwandi bwa kuswa mingilo ya Leza, amba: “Bambutwile bami bo bādi bankwasha mpata, nansha banabetu babwino ku mushipiditu bonadi mpwene nabo byobādi nabo na bukwashi bukatampe. Bāumpele mutyima wa kuswa mwingilo wa busapudi. Bādi baludika na kanye matabula ami mu kashinda koloke; nkyādipo neivwana amba abantyinye mbavu.”

David, mwana-mulume ke mulāle myaka mivule mu mwingilo wa kitatyi kyonso, uvuluka mwaātengelwe ku mutyima pa kuyuka amba bambutwile bandi bāshilwile kwingila bu bapania ba pa bula papo aye ne mwanabo bakidi bana batyetye. Shandi pa kufwa, inandi wāendelela na mwingilo wa bu pania wa pa bula. Wādi wibalela koku kadi usapula myanda miyampe. David unena’mba: “Kebādipo baningila kwikala pania, mhm, ino twādi tusangela mpata bupania batwe bonso mu kisaka, kufika ne ponāmwene amba kipwano ne kyanga kya mu kisaka binomba nami kwikala’bo.” David wisambila pa mvubu ya buludiki ne kuta mutyima kuyampe kwa bambutwile, amba: “Kyolwa ne kyolwa mama wādi witutangila nsekununi ya mu dibuku Du paradis perdu au paradis reconquis. * Muswelo waādi witusekunwina’yo wētukweshe tuswe kudya bidibwa bya ku mushipiditu.”

Kukwata Kupwila na Mutyika

Bankasampe bamo i bakomenwe kukwata kupwila kwa bwine Kidishitu na mutyika. Bendelanga’ko’tu bambutwile bebaselanga. Inoko shi bendelela na kutanwa  ku kupwila, mwenda mafuku bakaswa kupwila. Tala kifwa kya Alfredo, wāshilwile mwingilo wa kitatyi kyonso aye na myaka 11. Unena amba paādi na myaka itano, wādi upela kukapwila mwanda wādi ukunuka’ko tulo, ino bambutwile bandi nabo kebādipo basaka alāle mu kupwila. Uvuluka’mba: “Ponādi ñenda ntama, nāanzile bityebitye kusangela kupwila, nakampata ponāyukile kutanga ne kulemba mwanda tamba papo nādi kembwanya kulondolola mu bishima bya ami mwine.”

Cintia, nsongwakaji wa myaka 17 wingila bu pania walonso, witusapwila kisense kiyampe mokyāmukwashishe atamije buswe bwa kuswa mingilo ya Leza. Amba: “Kisense kiyampe na banabetu ne kutanwa nyeke ku kupwila byāunkweshe ndeke kwimona bu muntu ubudilwe balunda bene ntanda ne bintu biswele nakampata banuke, kifwa kwenda ku mabala. Kwivwana malondololo ne myanda mimweke inenwa ku kupwila byāumfikije ku kukimba kupa Yehova byonso byondi nabyo, namona amba kintu kilumbuluke kupita byonso kyondi nakyo i bunkasampe bwami. Penepa nātyiba mbila ya kwingidija’bo mu mingilo yandi.”

Inoko witabija amba: “Kudi kitatyi kimo kumeso kwa kubatyijibwa kyonādi mpēlelwa kushikilwa ku kupwila, mbepela kuteakanya madevwala ne mingilo mikwabo ya ku masomo. Nābudilwe kupwila kuvule, penepa nāshilula kuzoza ku mushipiditu. Nāanza ne kupwana na nsongwalume kādipo nansha wifunda Bible. Ino pa lusa lwa Yehova, nēsendulula mwenda mafuku.”

Butyibi bwa Muntu Mwine

Pablo i nkasampe mukwabo wingidila Yehova kitatyi kyonso; ino pobamwipangwile amba i kintu’ka kikatampe kimukweshe atamije buswe bwa kuswa bubinebine bwa Kinenwa kya Leza, wanene’mba: “Monangila i bintu bibidi: kifundwa kya kasuku kya kitatyi ne kitatyi ne bupyasakane mu mwingilo wa busapudi. Mfwijanga’ko bambutwile bami pa kumfundija kobamfundije bubinebine bwisambila padi Yehova, mona amba kekudipo kintu kiyampe kyobadi bakumpa kipityile kino. Inoko nadi mfwaninwe ami mwine kujingulula mwanda waka nswele Yehova. Pa kino, byadi binomba kuyuka ‘bula ne mushike’ wa bubinebine bwa mu Bible. Mwanda i mu uno muswelo umo kete otufikila pa kwikala na mutyima wabila Kinenwa kya Yehova, kisonshila motudi ‘mudilo utēma’ wa kusaka kwisamba’kyo na bakwetu. Buno bupyasakane mu mwingilo wa busapudi bo bukalama kusangela kotusangela bubinebine.”—Efisesa 3:18; Yelemia 20:9.

Jacob Emmanuel otwapwanga kala kutela nandi uvuluka kamweno kadi mu kwitongela abe mwine kwingidila Yehova. Unena amba bambutwile bandi kebādipo bamuningila kubatyijibwa. “Nkulupile amba kino kyādi kintu kiyampe mwanda pano nemwena bipa biyampe bilupukile’ko. Kifwa, bankasampe bamo botwādi twenda nabo kisense batyibile mbila ya kubatyijibwa kipukwi. Shako kino kyādi kiyampe, inoko nāmwene amba bamo babatyijibwe pa mwanda wa lukutukutu, ne kwija kwine mpika bupyasakane bwabo mu mingilo ya Bulopwe bwātyepa. Ino ami ke bambutwilepo bāuningile amba tyiba mbila ya kwipāna kudi Yehova. Nātyibile’yo ami mwine.”

 Mwingilo Wingila Kipwilo

Bankasampe bamo befundanga bubinebine bwa mu Kinenwa kya Leza abo bene, pampikwa kukwashibwa na bambutwile babo. Na bubine, mu ngikadilo ya uno muswelo, kwifunda ne kūminina mu kulonga biyampe ke mwandapo munekene.

Noé uvuluka mwaāmwenine byabuyabuya mu bubinebine. Wādi na nketekete ya bulobo, ne bikandangobo tamba ku bwanuke bwandi. Pa kushilula kwifunda Bible na myaka 14, wāanza kushinta bumuntu bwandi, wāfikija ne bambutwile bandi bādi bampikwa kusangela Bible mu kine kitatyi’kya ku kufwija’ko bininge. Noé pa kwendelela ku mushipiditu, wātonga kupāna ne pa mfulo būmi bwandi mu mingilo ya Leza. Pano wingilanga mu mingilo ya kitatyi kyonso.

Ne Alejandro nandi mo monka, wāshilwile kusangela bubinebine bwa bwine Kidishitu aye ukidi’tu nkasampe, nansha bambutwile bandi byokebādipo basangela’bo. Ulombola mutyima wandi wa kufwija’ko pangala pa bubinebine amba: “Nātamine mu njibo ya bwine Katolika bwa tamba bankambo. Ino kulēmenena konādi ndemenene ku lufundijo lwa Kikoministe lwa kubulwa kwitabija amba Leza udi’ko kwātāla, mwanda kipwilo kekyāmpelepo malondololo ku bipangujo byādi bimvutakanya ñeni tamba ku bwanuke. Ino bulongolodi bwa Yehova bwānkwasha, nātambula buyuki bwa Leza. I bupandije būmi bwami binebine, mwanda shi nkyāfundilepo Bible, longa padi nēkujije mu busekese, ne mu kutoma malwa nansha dyamba. Nādi padi wa kutwela mu kisumpi kya bafwila kwalamuna ntanda ne kwangula’mo bipa bilula.”

Le nkasampe ubwanya namani kūminina mu kukimba bubinebine ne kulamata’ko pampikwa kukwashibwa na bambutwile bandi? Na bubine, bakulumpe ne bakwabo pa kipwilo badi na mwingilo mukatampe wa kumukwasha. Noé uvuluka’mba: “Nkyādipo nemona amba ngidi kasuku, mwanda Yehova wādi nyeke pabwipi nami. Kadi nādi nkwatakanibwa na batutu ne bakaka bavule banswele, bāikala ke batata, bamama ne banabetu ku mushipiditu.” Pano Noé udi ku Betele kwaingidija kitatyi kyandi mu mingilo ya Leza. Alejandro nandi usekununa’mba: “Kintu kyomfwijijanga’ko nyeke i dyese dyonādi nadyo dya kubadilwa mu kipwilo kidi na kitango kya bakulumpe bantele mutyima na buswe. Kadi mfwija’ko bininge mwanda ponāshilwile kwifunda Bible na myaka 16, impampwe ikalanga na bankasampe bonso nami nāikele nayo. Ino bisaka bya pa kipwilo kebyāngelelepo. Kekwādipo nyeke kubulwa muntu wa kuntambula na kizaji ne kumpa binsakilwa, ke enkapo pa kulāla ne byakudya kete, mhm, ino i ne mutyima wandi mwine.” Alejandro wingilanga mingilo ya kitatyi kyonso pano ke myaka 13 mituntulu ne kupita.

Bamo balañanga amba kutōta Leza i kwa batame kete. Ino bankasampe bavule befundanga bubinebine bwa mu Bible tamba ku bwanuke, bafikanga pa kuswa Yehova ne kushala nyeke bamukōkele. Binenwa bya Davida bidi mu Mitōto 110:3 bifikidilanga pa bano bankasampe, binena’mba: “Bantu bobe bēpana abo bene ku mityima tō, mu difuku dya bukomo bobe, mu buya bwa bupandulwemo, kushilwilanga lubanga bwē! Udi ne [kitango kyobe kya bankasampe pamo bwa mano a lume, NW].”

Ku bankasampe, kwifunda bubinebine ne kushala balamate’ko i bulwi. Ino tusangalanga mpata pa kumona bavule balamata nyeke ku bulongolodi bwa Yehova, kutanwa kitatyi ne kitatyi ku kupwila, ne kwifunda Bible na kininga. Kino i kibafikije ku kutamija buswe bwabinebine bobaswele Kinenwa kya Leza ne mingilo yandi!—Mitōto 119:15, 16.

[Kunshi kwa dyani]