Busengi mu Bitatyi bya Tusua

MYANDA yotwivwana mu ano etu mafuku keidipo na busengi. Mukelenge umo wasonekele amba: “Bimyanda bilongeka ano mafuku bizozeja mutyima mpata, uyuka’tu twakomenwa ne kutyiba mbila shi tulonda nansha shi ketulondapo myanda isapulwa pa nsaa ya 6:00.” Ntanda i miyule’nka mavita, bilongwa bileta nzuba, masusu, bupolapola ne mba—bibi bibwanya kwituponena, pakwabo kebituponene kala.

Bible wālaile na bubine amba bino bintu bikekala’ko. Yesu wāshintulwile mwadi mwa kwikadila kino kitatyi kyetu amba kukekalanga mavita makatampe, bipupo bya mba ne bya nzala, ne bintenshi. (Luka 21:10, 11) Mutumibwa Polo nandi wāsoneka pangala pa “myaka ya malwa” amba bantu bakekala babikandangobo, baswele lupeto, ne bampikwa kuswa biyampe. Wātela bino bitatyi bu ‘mafuku a mfulo.’—2 Temote 3:1-5.

Eyo, pa ino ngikadilo ya ntanda, myanda isapulwa dyalelo i miifwane na yoya yālaile Bible. Ino kwiifwana i kufudile’nka pa bino. Mwanda Bible upanga bantu mumweno kampanda keudipo mu myanda ivwanwaivwanwa. I amo, mu Kinenwa kya Leza mo motwivwana kine kikadile’ko bibi, ne mukekadila mafuku a kumeso.

Leza Mwamwena Bintu Bibi

Bible ushintulula muswelo umona Leza ngikadilo ya bulanda yotudi’mo dyalelo. Eyo, Leza  wābadikile shandi kumona kala tuvutakanya tudi’ko ino myaka, inoko aye ketabijepo amba twikale’ko nansha kusaka amba twendelele kwikala’ko nyeke. Mwanda “Leza i buswe,” mo mwāsonekele mutumibwa Yoano. (1 Yoano 4:8, BB) Yehova utele bantu mutyima mpata kadi ushikilwe bibi byonso. O mwanda i kyendele’mo kunyemena kwadi shi tusaka kusengibwa, ke-muntu i muyampe, wa lusa, udi na bukomo ne mutyima wa kufundula bibi byonso pano panshi. Mulembi wa mitōto wāsonekele amba: “[Mulopwe wa mūlu utongelwe na Leza] ukanyongolola mupando pa kwita; ne balanda ba kubulwa wakwibakwasha. Ukebafwila lusa balanda ne badi makasa, kadi ne myuya ya badi makasa ukeīpandijanga. Ukakūla muya wabo ku bongojani ne bikungulu bya bulobo; kadi mashi abo akēkalanga maleme mu meso andi.”—Mitōto 72:12-14.

Le wivwananga bulanda pa kumona bantu basusuka? Bine, wivwananga’bo. Mwanda kulangila bakwetu i ngikadilo itūdile Yehova motudi, ke-pantu twāpangilwe mu kyelekejo kyandi. (Ngalwilo 1:26, 27) O mwanda tukulupile amba Yehova kadipo mwa kubudilwa kutenekwa na masusu asusuka bantu. Yesu, uyukile Yehova bininge kupita muntu ye-yense, wāfundije amba Yehova witutele mutyima mpata, kadi i muyulwe kanye ka lusa.—Mateo 10:29, 31.

Bupangi’tu bidi bulombola amba Leza utele bantu mutyima. Yesu wānene amba Leza “utēmejanga dyuba dyandi ku babi ne ku bayampe bene kumo, kadi unokeja ne mvula ku bakoloka ne ku bampikwa koloka bene.” (Mateo 5:45) Mutumibwa Polo nandi wālombola bantu ba mu kibundi kya Lesetala amba: “[Leza] kabudilwe kamoni, kunengeja, ne kwimupa mvula ya mūlu, ne myaka ya kupa bipa, ne kuyūja mityima ne bidibwa, ne tusepo.”—Bilongwa 14:17.

Le I Ani Ufwaninwe Kutopekwa?

Tuyukei kadi amba Polo wālombwele bantu ba mu Lesetala amba: “[Leza] walekele mizo yonso ya bantu, ku myaka yadiko’ya, ke balonda mu bisela byabo [abo] bēne.” Nanshi mizo—nansha bantu abo bene—bo bafwaninwe kutopekwa pangala pa ngikadilo yobadi’mo abo bene. Kekudipo kitopekelwa Leza.—Bilongwa 14:16.

Ino mwanda waka Yehova ulekele bibi bilongeka? Le kudi kintu kampanda kyasa kulonga’po? Malondololo ku bino bipangujo atanwa’nka mu Kinenwa kya Leza kete. Mwanda ano malondololo atala pa muntu mukwabo wa ku mushipiditu ne pa mwanda waālengele mu kīkalo kya mishipiditu kekimweka na meso.

[Bifwatulo pa paje 4]

Bantu betūlanga pa kyaba kya bakwabo. Le Leza ye ubulwa namani kutenekwa na masusu a bantu?

[Kutambile Bifwatulo pa paje 3]

Kungala dya ku lunkuso, Croasi: UN PHOTO 159208/S. Whitehouse; mwana ufwa nzala: UN PHOTO 146150 BY O. MONSEN