Busengi mu Buyuki Bwabinebine bwa Leza

KU BAMO, bintu binena Bible pa buswe ne pa lusa lwa Leza bibalupwilanga bipangujo bikutakane. Beipangulanga’mba: Shi bine Leza usaka kufundula bibi, uyukile ne mwa kwibifundwila, kadi udi ne na bukomo bwa kwibifundula, le mwanda waka kadi bikyendelela? Kobadi, i bikomo kukwatañanya ino myanda isatu: (1) Leza i wa bukomo bonso; (2) Leza i wa buswe kadi i muyampe; ino (3) binkumbulu koku kasha byendelela na kulongeka. Penepa balanga amba binkumbulu byobidi’ko, ne i kutupu upatanya kino, nanshi ko kunena amba mwanda umo pa ibidi imbajinji ke wabinepo. Bafula ku kulanga amba Leza i mukomenwe kwimika bibi, shi kakomenwe nankyo i musūle’ko’tu.

Mafuku alondakena konakanibwa kwa Kité kya Busunga bwa Ntanda Yonso mu New York, mwendeji wa kipwilo mutumbe mu États-Unis wanene amba: “Ke misungu tutwa na tutwa yobangipangula mu būmi bwami kine kilekele’ko Leza binkumbulu ne masusu i kika. Nena na bubine amba nkiyukilepo kilondololwa kifike’po, nansha kyontondwa ami mwine.”

Polofesele umo wa teoloji wesambīle pa uno mwanda na kusoneka amba watengelwe mpata na “teoloji myendele’mo” yasapwilwe na mwendeji wa kipwilo’wa. Kadi wabingija ne mumweno wa mufundi umo wasonekele amba: “Kubulwa kwivwanija kine kyotususukila ko kubulwa kwivwanija Leza.” Ino lelo bine i bikomo kwivwanija kine kilekele’ko Leza bibi?

Nsulo ya bibi

Binenwa bya bendeji ba bipwilo i bishile na binena Bible, mwanda Bible kalombolapo amba kuleka kulekele Leza bibi i kukomo kwivwana. Pa kwivwanija kino, kilomba bidi kuyuka amba Yehova kāpangile’kopo ntanda imbi. Wāpangile ba mulume ne mukaji babajinji babwaninine, bakubulwa bubi. Kupwa, Yehova wātala mwingilo wandi wa bupangi, wēumona amba udi “biyampe’tu byamwiko.” (Ngalwilo 1:26, 31) Mpango yandi yādi ya amba ba Adama ne Eva batandabule Paladisa ya Edena ntanda yonso, bayuje’yo bantu bansangaji balaminwe na bubikadi bwandi bwa buswe.—Isaya 45:18.

Bibi byāshilwile na kipangwa kimo kya ngitu ya mushipiditu kyādi dibajinji kikōkele kudi Leza, ino ku mfulo kyātamija kilokoloko kya kusaka kutōtwa. (Yakoba 1:14, 15) Butomboki bwakyo bwāmweka ne pano panshi kitatyi kyokyāongwele ba mulume ne mukaji babajinji amba bekupe nandi mu bukinkwa bwandi na Leza. Ba Adama ne Eva pa kyaba kya kukōkela ku misoñanya ya Leza yakubulwa kafinda, ya kuleka kudya ne kutenga ku kipa kya mutyi wa kuyuka biya ne bibi, abo bāapa’ko ne kudya bādya. (Ngalwilo 3:1-6) Pa kino, bābulwa kukōkela Leza, ino belombola amba basaka kwikala banapabo kudi Leza.

Mwanda Ulomba Ñeni Wālupwilwe

Butomboki bwa mu Edena bwākolomwene mwanda ulomba ñeni, lwādi lonji lukatampe lutala bipangwa byonso bya mūlu ne pano pa ntanda. Bantu batomboke bākolomwene  kipangujo kya kuyuka shi buludiki bwa Yehova pa bipangwa byandi i buyampe. Lelo Umpangi wādi na mbila ya kulomba bantu bonso bamukōkele ne pa mfulo? Le bantu bakekala biyampe shi balonga bintu na bwanapabo?

Yehova wāpwile luno lonji lwāsombelwe buludiki bwandi mu muswelo ulombola amba udi na bujalale bubwaninine mu buswe, boloke, tunangu ne bukomo bwandi. Wādi ubwanya kwingidija bukomo bwandi ne kupwija butomboki ponka na ponka. Kino kyādi kikokeja kumweka bu kyoloke, mwanda wādi na mbila ya kwikilonga. Ino kulonga namino kekwādipo kwa kulondolola bipangujo bilomba ñeni byālupwilwe. Ne kadi, Leza wādi ukokeja kusūla bubi’bwa kwapwa. Padi kino kyādi kya kumweka ku bamo dyalelo bu kilongwa kya buswe. Ino kino nakyo kyādi kya kutunya kubepulula mulangwe wa Satana wa amba bantu babwanya kwiendeja senene abo bene. Pakwabo kadi, mwene kino kyādi kya kutonona bakwabo nabo basonsoloke ku dishinda dya Yehova? Mfulo ne mfulo masusu ādi a kwendelela nyeke ne nyeke.

O mwanda Yehova, mu tunangu twandi, wālekele bantu belongele byobasaka mu bula bwa kitatyi kampanda. Eyo, kino kyādi kilomba kuleka bidi bibi bikale’ko mu bula bwa kitatyi, inoko kyādi kya kupa bantu mukenga wa kulombola shi babwanya kwiludika biyampe, mu bwanapabo kudi Leza, na kulonda misoñanya ya abo bene ya kuyuka biyampe ne bibi. Lelo i bipa’ka bilupukile’ko? Mānga ya bantu i miyule nyeke’nka mavita, bukondame, kasusu ne makambakano. O mwanda kutunya kwatunya butomboki butombokelwe Yehova kukalondolola musunsa umo kupwididile bipangujo byālupukile mu Edena.

Pano’ko bidi, Leza i mulombole buswe bwandi pa kwitupa Yesu Kidishitu Mwanandi, wāelele būmi bwandi bu kitapwa kya kinkūlwa. Kino i kinyongolole bantu mu mambo a bubi ne lufu obāpile ku kubulwa kikōkeji kwa Adama. Kinkūlwa i kipe boba bonso balombola lwitabijo mudi Yesu dishinda dya kukamona būmi bwa nyeke.—Yoano 3:16.

Yehova witupa kikulupiji kitusenga pa mityima amba masusu asusuka bantu i a lupito. “Kukidi  bidi kitatyi kityetye, ne mubi ukēkala kutupu’ye,” mo mwāsonekele mulembi wa mitōto. “Ukafwatakanya biyampe pantu pandi, ukēkalanga kutupu’ye. Nanshi bakikōkeji bakapyananga ntanda; kadi bakēsangaja mu bungi bwa ndoe.”—Mitōto 37:10, 11.

Būmi bwa Kumeso bwa Mutyima-Ntenke ne Nsangaji

Kufikidila kwa bupolofeto bwa mu Bible kulombola amba kitatyi kya Leza kya kupwija misongo, bulanda, ne lufu lwine kumo kibafwena. Ivwana bintu bya kutendelwa bikekala’ko, byābadikile kala kulombolwa mutumibwa Yoano mu kimonwa. Wāsonekele amba: “Namwene ne diulu dipya ne ntanda nayo mipya; ke-dintu diulu dibajinji dibatukidila, ne ntanda mīne monka; ne kalunga ka mema nako monka kutupu’ko. . . . Ne Leza mwine ukēkala [na bantu], ke Leza wabo kadi. Kadi Leza ukapampula impolo yonso mu meso abo; ne lufu nalo kelukēkalakopo dikwabo kadi, mhm, nansha kuyoyokota miyoa, nansha kudila kwine, nansha misongo mīne mpika. Bintu bibajinji bibatukidila.” Pa kusaka kulombola Yoano amba ino milao i ya kukulupila, bāmunena amba: “Soneka’mba: Ino myanda īno’ī i ya binebine, milumbuluke.”—Kusokwelwa 21:1-5.

Lelo bikekala namani ku tununu ne tununu twa bantu bafwa mwanda ke mwanda tamba butomboki bushilula mu Edena? Yehova wālaile amba bantu bonso balēle mu tulo twa lufu ukebalwija ku būmi. Mutumibwa Polo wānene amba: “Nkulupile kudi Leza na’mba; kusanguka kwa bafu kudiko, kwa boloke, ne bampikwa koloka kumo.” (Bilongwa 24:15) Bano bo abo bakekala na kyepelo kya kushikata mu ntanda ‘mukekala boloke.’—2 Petelo 3:13.

Yehova i muleke bantu basusuke na bibi bya lupito pano panshi, pamo’nka bwa shabana wa buswe uleka wandi mwana apasulwe lupasulo lusansa shi uyukile amba lukamuletela byabuyabuya bya nyeke. Bine, kudi būmi bwa nyekeke buyule madyese onkaonka butengele bonso balonga kiswa-mutyima kya Leza. Polo wāshintulwile amba: “Bipangwa nabyo byanekenībwe ku bukobakane, ke kiswa-mutyima wabyopo, mhm, nanshi i pa mwanda wa enka aye wanekenye’byo, mu kukulupila’mba, bipangwa abyo bīne bikakūlwanga ku bupika bwa kubola, nabyo ke byana bya bene bya ntumbo bwa bāna ba Leza.”—Loma 8:20, 21.

Bine, ino shayo yo myanda—mishile na yoya yotumonanga ku televijo nansha yotutañanga mu majulunale mwanda ino i myanda miyampe. I myanda milumbuluke kupita yonso, myanda itamba kudi “Leza wa kanye ka kusenga konso,” mwine witutele mutyima binebine.—2 Kodinda 1:3.

[Bifwatulo pa paje 6]

Kitatyi i kilombole amba bantu kebakokejapo kwiludika biyampe shi bekale banapabo kudi Leza

[Kutambile Bifwatulo]

Kisaka kya mu Somali: UN PHOTO 159849/M. GRANT; bombe atomike: USAF photo; komponi ka buloko bwa kasusu: U.S. National Archives photo