Bipangujo bya Batangi

Lelo kupota njibo ya mutōtelo ungi kwiyalamuna ke Njibo ya Bulopwe i kwikūkila nao mu lwitabijo?

Pavule pene, Batumoni ba Yehova bepukanga kipwano kya uno muswelo na mitōtelo mikwabo. Inoko kwipota bya kwipota namino kekukokejapo pamo kwikala bu kwikūkila mu lwitabijo. Kubwanya kumonwa’tu bu kwipota kwa kintu kwa lupito. Kipwilo kya Batumoni ba Yehova kya mu kibundi’kya kekikengidilangapo pamo na kisumpi kikwabo kya mutōtelo mwa kūbakila kifuko kampanda kya kutōtela’mo abo bonso.

Le i bika bimonwanga ku meso a Yehova bu kwikūkila kwa mu lwitabijo? Ivwana buludiki bwāletele mutumibwa Polo: “Kemukēkula mu kisense kya bampikwa kwitabija; lelo boloke ne bukondame kisense i kya paka? nansha mwinya ne fukutu po bipwanine i paka le? Nansha Kidishitu ne Bediale po bakomanine i paka? kadi nansha wakwitabija ne wampikwa kwitabija kyo befukwila i kika? Kadi njibo īkola ya Leza ne bakishi po bapwanine i paka le? . . . Penepo nanshi pandukaimo mudi abo, mwikale bapandukemo; e mwānenena Yehova; kadi kemukatenga ku kyakujidikwa.” (2 Kodinda 6:14-17) Le Polo wādi usaka kunena bika na bishima “kisense” ne ‘kupwana’?

Kisense kitela Polo pano kilombola patōkelela kutōta ne kwingidila pamo ku mushipiditu na batōtyi ba bilezaleza ne bampikwa kwitabija. Wādi udyumuna bene Kodinda baleke “kudya pa mesa a bademona.” (1 Kodinda 10:20, 21) Nanshi kwikūkila mu lwitabijo i kupwana kwa mu butōtyi ne kwingidila pamo mingilo ya ku mushipiditu na malongolodi a mitōtelo mikwabo. (Divilu 20:5; 23:13; 34:12) Shi njibo yādi ingidijibwa na bulongolodi bwa mutōtelo kampanda ibapotwe, ipotwanga mwanda’tu wa kwikala na kyubakwa kampanda kya kwalamuna bu Njibo ya Bulopwe. Ino kumeso kwa kwingidija’yo bu Njibo ya Bulopwe, ikafundulwa’mo nkoba yonso ya mutōtelo wa bubela. Shi ibapu kulongololwa dipya, penepa ikafikijibwa kudi Yehova mwanda wa kusaka kumutōta kasuku kandi kete. Pano i patupu kisense nansha kipwano pa bukata bwa mutōtelo wabine ne wa bubela.

Inoko mu myanda pala pala itala bya kwipota bintu bya uno muswelo, kwitana kwa na bene bapotwa kintu kufwaninwe kwikala kutyetye, kadi kukemanina’nka pa myanda ya bya kwipota kete. Banabetu ba mu kipwilo kya bwine Kidishitu bafwaninwe kulama mu ñeni kidyumu kya Polo kya kuleka kwikula “mu kisense kya bampikwa kwitabija.” Eyo, ketwimonangapo shetu bu bantu batabukile boba badi na nkulupilo mishile na yetu, ino twepukanga kusamba nabo kipwano nansha kwikuja mu mitōtelo yabo. *

Ino bikekala namani shi kipwilo kikimba kufutyila njibo ya bulongolodi bwa mutōtelo kampanda? Kufutyila njibo kulombanga kwitana nyeke na benē’yo, kino i kintu kifwaninwe kwepuka. Nansha shi mukimba kufutyila’yo pa mwanda umo’tu mukatampe, kitango kya bakulumpe kikabandaula bino bilonda’ko: Le mukekala bankishi ne byelekejo bya mitōtelo munda ne panja pa njibo? Bantu ba mu kibundi baketumona namani shi tubaingidija ino njibo? Le kudi muntu mu kipwilo ubwanya kukukala shi tubaingidija’yo? (Mateo 18:6; 1 Kodinda 8:7-13) Bakulumpe bakabandaula bino byonso, kupwa kebatyibe butyibi mokyendele. Bakalonda munenena mutyima wabo wa mundamunda ne wa ba mu kipwilo bonso shi kebakimbe kupota ne kwalamuna njibo ya uno muswelo bu Njibo ya Bulopwe.

[Kunshi kwa dyani]

[Kifwatulo pa paje 30]

Ino njibo, yadi bidi shikola, kupwa yapotwa yalongololwa ke Njibo ya Bulopwe