Mwanda Waka I Bikomo Kulomba Lusa?

MU KWEJI WA 7, 2000, Kitango kya Bajidiki ba Bijila kya mu Kaliforni, mu États-Unis, kyaletele lubila lwa kutalula bantu mu mambo shi abakwatyilwa lusa muntu utapilwe bilonda mu akishida yobalongele. Mwanda waka baletele luno lubila? Mwanda kyamwekele amba shi akishida ibalongeka, divule bantu bekakanga kulomba lusa ku boba batapilwe, kutyina amba bakebatwala mu kidye amba ke betabije kala mambo. Ku mutamba mukwabo, boba bamona amba badi bafwaninwe kulombwa lusa ponka na ponka nabo bafitwanga, papo akishida mityetye yaalamuka ke lupotopoto lukatampe.

Eyo, kulomba lusa pangala pa akishida yokulengeje ke kwendele’mopo. Kadi kudi kyaba kimo kilomba kutadija biyampe binenwa byonena. Lukindi lumo lwa pa kala lunena’mba: “Mu binenwa bya ntanda ne ntanda kemubulwepo kujilula: Ino yewa umuma milomo yandi ulonga byañeni.” (Nkindi 10:19; 27:12) Nansha nankyo, ukokeja kwikala muntu wa kinsañanya, uleta bukwashi.

Ino mwene i bimweke amba bavule kebakilombangapo lusa, nansha shi kebasapo kutwejibwa mu kīmu? Mukaji musongwe ubwanya kutompola’mba, ‘Mulumyami  kalombangapo lusa nansha dimo.’ Ku kaji nako, mwimaniji padi ukesamba’mba, ‘Bengidi kebetabijangapo bilubo byabo, kadi i bikomo kwibevwana banena amba mfwile’ko lusa.’ Ku masomo nako ubwanya kwivwana mwadimu unena amba, ‘Bana kebafundijibwepo kunena amba “yō, mfwile’ko lusa.”’

Buluji bumo bubwanya padi muntu kwikakila kulomba lusa i moyo wa kutyina kufutululwa. Shi muntu wasela mutyima kūlu amba nakamonwa bibi, ubwanya padi kutunya kulupula bidi ku mutyima wandi. Ino muntu obasanshije nandi ukokeja kwepuka lonso mwine umusanshije, papo ne kujokeja kipwano dikwabo kwine kwakoma.

Kubulwa kubanga kutapwa ku mutyima kwa bakwetu nako i buluji bukwabo bwikakilanga bamo kulomba lusa. Padi balañanga amba, ‘Kulomba lusa kekusapo kupwija kilubo kyompwile kala kuluba.’ Bakwabo nabo bekakanga kunena amba mfwile’ko lusa mwanda wa kutyina bipa bibi bibwanya kulupuka’ko. Benenejanga mu mutyima amba, ‘Mwene mbwanya kulambikwa mwanda ne kufutyijibwa mambo?’ Inoko, kijika kipite byonso kikankajanga muntu kwitabija kilubo kyalongele i mitatulo. Muntu udi na mitatulo ya kupela kunena amba “mfwile’ko lusa” ubwanya nakampata kulanga amba, ‘Nkibwanyapo kwipwa bulēme na kwitabija kilubo kyami. Kuno i kwipelula.’

Bavule, shi pa buluji’ka, shi pa buluji’ka, bakomenwanga kulupula binenwa bya kulomba lusa. Ino le kulomba lusa kudi na mvubu? I byabuyabuya’ka bimwenwanga mu kulomba lusa?

[Kifwatulo pa paje 3]

“Bana kebafundijibwepo kunena’mba mfwile’ko lusa”

[Kifwatulo pa paje 3]

“Mulumyami kalombangapo lusa nansha dimo”

[Kifwatulo pa paje 3]

“Bengidi kebetabijangapo bilubo byabo”