Yehova Wimutele Mutyima
Yehova Wimutele Mutyima
“Ne kwela kuzumbazumba konso kwa mutyima kudi aye, ke-muntu aye wimutele mutyima.”—1 PETELO 5:7.
1. I pa kintu’ka kikatampe peshidile Yehova ne Satana?
YEHOVA ne Satana i beshile kulampe kwine. Muntu yense ufwena kudi Yehova ukashikibwa ponka na ponka na Dyabola. Kuno kwishila i kulombolwe ne mu dibuku dimo disambila pa misoñanya. Dibuku’dyo (Encyclopædia Britannica [1970]) disambila pa mingilo ya Satana mungya moilombwedilwe mu mukanda wa mu Bible wa Yoba amba: ‘Kaji ka Satana i kujokoloka ntanda yonso mwakimba bilongwa ne bantu ba kutwika bibi; bine mwingilo wandi i mwishile kulampe na owa wingila “meso a Mfumwetu,” ajokoloka ntanda yonso mwanda wa kukankamika bintu byonso biyampe (II Bil. xvi, 9). Satana kakulupilepo nansha dimo buyampe bwa bantu bwa kubulwa kwisakila, kadi i mushilwe kyaba kya kwibutompa mu lupusa ne butadi bwa Leza ne mungya mikalo itūdile’ko Leza.’ Bine, padi kwishila kukatampe!—Yoba 1:6-12; 2:1-7.
2, 3. (a) Nshintulwilo ya kishima “Dyabola” i mimweke senene namani mu byobya byātene Yoba? (b) Bible ulombola namani amba Satana ukyendelela na kuvubila bengidi ba Yehova badi pano panshi?
2 Kishima “Dyabola” i kitambe ku kishima kya Kingidiki kishintulula amba “ñongojani,” “vubavuba.” Mukanda wa Yoba witulombola amba Satana wāvubīle Yoba mwingidi wa Yehova wa kikōkeji bubela amba wingidilanga Leza pa mwanda wa kamweno. Amba: “Lelo Yoba wakaminwe Leza bitupubitupu’ni, a?” (Yoba 1:9) Nsekununi ya mu mukanda wa Yoba ilombola amba Yoba nansha byaātompelwe, kābudilwepo kufwena bininge kudi Yehova. (Yoba 10:9, 12; 12:9, 10; 19:25; 27:5; 28:28) Aye upwa’tu kumona dino dyemo, wāsapwila Leza amba: “Nadi nkwivwana na kutwi bitupu; ino pano namino dīso dyami dibakumone.”—Yoba 42:5.
3 Le Satana ke muleke kuvubila bengidi bakikōkeji ba Leza bubela tamba mu myaka ya Yoba? Nansha dimo. Mukanda wa Kusokwelwa ulombola amba mu kino kitatyi kya ku mfulo Satana ukyendelela na kuvubila banababo na Kidishitu bashingwe-māni, ne bapwani nabo bakikōkeji bene kumo. (2 Temote 3:12; Kusokwelwa 12:10, 17) O mwanda batwe bonso bene Kidishitu babine tusakilwa bikatampe kukōkela Yehova, Leza witutele mutyima, kumwingidila na buswe bukatampe, nabya ye kutuluja tutuluje Satana amba matope andi i a bubela. Shi tulonge namino, nabya tubasangaja mutyima wa Yehova.—Nkindi 27:11.
Yehova Ukimbanga Kwitukwasha
4, 5. (a) Muswelo utala Yehova pano panshi i mwishile namani na wa Satana? (b) Shi tusaka Yehova etutōkelwe pa mutyima, i bika byotufwaninwe kulonga?
4 Dyabola unangakananga pano panshi, ukimba wa kutwika bubela ne wa kubokota. (Yoba 1:7, 9; 1 Petelo 5:8) Ino Yehova aye ukimbanga kukwasha boba basaka bukomo bwandi. Mupolofeto Hanani wālombwele Mulopwe Asa amba: “Meso a Yehova akeñenya kusambakanya ntanda yonsololo, konsokonso pi na pi, kwilomboja mukomo wa boba ba mutyima mubwaninine kwadi.” (2 Bilongwa 16:9) Bine, kalondolondo ka mushikwa ka Satana i keshile kulampe na kuta kwitutele Yehova mutyima wa buswe!
5 Yehova ketubenzangapo mwa kwituboila tuto ne kutupatupa, mhm. Mulembi wa mitōto wāsonekele amba: “Shi abe, Yehova, ubangile mambo nankyo le i ani, a Mfumwami, ukēmananga?” (Mitōto 130:3) Kilondololwa i: nansha umo. (Musapudi 7:20) Ino shi tufwene na mutyima onso kudi Yehova, meso andi akekala potudi, ke mwandapo wa kwitutopeka, i mwanda wa kujingulula bukomo botulonga, kulondolola milombelo yetu, ne kwitufwila lusa. Mutumibwa Petelo wāsonekele amba: “Meso a Yehova adi pa boloke, ne matwi andi adi pa kwisasa kwabo kwa pa kulombela; ino mpala ya Yehova i mikomene boba balonga bibibibi.”—1 Petelo 3:12.
6. I kika kinenenwa amba mwanda wātene Davida i busengi kadi i kidyumu kotudi?
6 Davida wādi muntu wakubulwa kubwaninina, wālongele’nka ne bubi bukatampe. (2 Samwele 12:7-9) Inoko wāshitwidile Yehova mutyima, wāmufwena na kumwabija mu milombelo. (Mitōto 51:1-12, bilembwa bya kungala) Yehova nandi wāivwana lulombelo lwandi, wāmufwila lusa, nansha byaāngwile bipa bilula ku bubi bwandi. (2 Samwele 12:10-14) Bine buno i busengi kotudi, ino kadi i kidyumu. I busengi pa kuyuka amba Yehova udi na mutyima wa kwitulekela bubi bwetu shi tubesāsa binebine, ino i kidyumu kitudyumuna amba bubi kebo kubutula bipa bilula. (Ngalatea 6:7-9) Shi bine tusaka kufwena kudi Yehova, nabya tufwaninwe kulonga buninge bwa kwepuka bintu byo-byonso bimufityija mutyima.—Mitōto 97:10.
Yehova Ukokelanga Bantu Bandi Kwadi
7. Yehova utalanga bantu ba muswelo’ka, ne wibakokelanga kwadi aye mwine namani?
7 Davida wāsonekele mu mutōto wandi umo amba: “Yehova nansha i mukatampe ubangile babumvu; ino bakibengo i mwibayuke kala bakidi kulampe.” (Mitōto 138:6) Mutōto mukwabo nao unena’mba: “Lelo i ani wifwene Yehova Leza wetu; udi ne lupona lwandi mūlu, wēpelula aye mwine pa kubandila bintu bidi mūlu ne bidi panopanshi? Utalulanga mulanda mu luvumbi.” (Mitōto 113:5-7) Bine, Umpangi wa diulu ne ntanda mwinē bukomo bonso wipēlulanga mwa kutadila pano panshi, kadi meso andi atala “babumvu,” ‘balanda’ “babinza ne badila mwanda wa byamunyanji byonso b[i]longwa.” (Ezekyele 9:4) Kadi wibakokelanga kwadi kupityila kudi wandi Mwana. Yesu paādi pano panshi, wānene amba: “Nansha umo wakwīla kwami aye mwine, poso’nka Tata wakuntuma amukokele ko ndi . . . Kekudipo nansha umo wakwīla kuno ko ndi, poso’nka kimupebwe kudi Tata.”—Yoano 6:44, 65.
8, 9. (a) Mwanda waka batwe bonso tufwaninwe kwiya kudi Yesu? (b) I kintu’ka kya kutendelwa kimwekele mu mpangiko ya kinkūlwa?
8 Bantu bonso bafwaninwe kwiya kudi Yesu ne kwikala na lwitabijo mu kitapwa kya kinkūlwa mwanda i babutulwe babipya-mambo, babomboke kudi Leza. (Yoano 3:36) Bafwaninwe kupwana dipya na Leza. (2 Kodinda 5:20) Ino Leza kāilaijepo amba babipya-mambo bamuzenze bidi penepa kaebakwatyila’ko mpangiko ya kwikala nandi mu ndoe. Mutumibwa Polo wāsonekele amba: “Leza wetulombola mwaetusanshilwe’mba po twakidi babipyamambo, Kidishitu wetufwidile. Mwanda shi po twakidi kala balwana na Leza, twapwanyijibwe nandi pa lufu lwa Mwana wandi, nankyo pano po tubapwana na Leza, po pene tukapandijibwa na bumi bwa Mwana wandi.”—Loma 5:8, 10, MB.
9 Mutumibwa Yoano nandi wāitabije buno bubinebine bwa mvubu mpata amba Leza ye upwenye bantu na aye mwine, amba: “I muno monka mwasokokele lusa [“buswe,” NW] lwa Leza padi bātwe, lwa’mba Leza watumine Mwana wandi wa bunka panopantanda amba tumwene būmi ponka padi aye. I muno monka mo lwikadile lusa, kepakumusanswapo Leza bātwe, ehe, ino ponka pētusanshilwe, ne kutuma Mwanandi ke kipwanino kya pamyanda yetu.” (1 Yoano 4:9, 10) Leza ye wātabwile ditabula dibajinji, ke muntupo. Mwene nobe ubeivwana amba ukokwanga na Leza wālombwele buswe bukatampe ku “bipya-mambo,” ku bantu “balwana” nandi?—Yoano 3:16.
Tufwaninwe Kukimba Yehova
10, 11. (a) I bika byotufwaninwe kulonga pa kukimba Yehova? (b) Tufwaninwe kumona namani ngikadilo ya bintu ya Satana?
10 Na bubine, Yehova ketuningilangapo kwiya kwadi. Ino tufwaninwe kumukimba, ‘kumupupukutyila tumumone, mwanda aye kadipo ne kulampe kwine na batwe bonso.’ (Bilongwa 17:27) Tufwaninwe kuyuka amba Yehova udi na mbila ya kwitulomba amba tumukōkele. Mwanā-bwanga Yakoba wāsonekele amba: “Kōkelai Leza; mumukomene dyabola, nandi ukemunyema. Kadi fwenai kudi Leza, nandi ukemufwena, oījai maboko enu bānwe babipya-mambo; mutōkeje ne mityima yenu bānwe ba mityima ībidi.” (Yakoba 4:7, 8) Bine, ketufwaninwepo kwikaka kwimanija nshinkidingi ku mutamba wa Yehova na kukomena Dyabola.
11 Kino kitulomba kwisonsolola ku ngikadilo imbi ya bintu ya Satana. Yakoba wāsonekele monka’mba: “Lelo kemuyūkilepo’mba, bulunda na bya panopantanda i kiji kikatampe kudi Leza’ni? Penepo nanshi uswile bulunda na [ntanda], nabya wepe aye mwine mushikwa kudi aye Leza.” (Yakoba 4:4) O mwanda tuyukei amba shi tusaka kwikala balunda na Leza, bine ntanda ya Satana isa kwitushikwa.—Yoano 15:19; 1 Yoano 3:13.
12. (a) I binenwa’ka bisenga pa mutyima byāsonekele Davida? (b) I kidyumu’ka kyāletele Yehova kupityila kudi mupolofeto Azadia?
12 Tufwaninwe nakampata kufwena Yehova mu milombelo ne kumulomba bukwashi ponso petulwa ntanda ya Satana mu muswelo kampanda. Davida, muntu wēmwenine misunsa mivule kuboko kwa lupandilo kwa Yehova, wāsoneka mwanda wa kwitusenga’mba: “Yehova udi pa bwipi na boba bonso bamwitanga, na bonso bamwitanga mu [bu]binebine. Ukafikijanga kisaka boba bamwakaminwe; kadi ukēvwananga lwito lwabo, ne kwibapandija. Yehova ulelele boba bonso bamuswele; ino babi bonso abo ukebonakanyanga.” (Mitōto 145:18-20) Uno mutōto ulombola amba Yehova uketupandija ponso potutompibwa muntu ne muntu pa bula, ne amba ukapandija bantu bandi bonso kya pamo mu kitatyi kya “malwa makatakata.” (Kusokwelwa 7:14) Bine, Yehova ukekala nyeke pabwipi netu shi netu tudi nyeke pabwipi nandi. Mupolofeto Azadia wāludikilwe na “mushipiditu wa Leza” wānena bubinebine butala pa myanda mivule, amba: “Yehova udi nenu byo mudi nandi banwe; kabidi shi mumukimba aye ukatanwa ko mudi, ino shi mumulekelele, aye nandi ukemulekelela banwe.”—2 Bilongwa 15:1, 2.
Yehova Ufwaninwe Kwikala Wabine Kotudi
13. Tukokeja kulombola namani amba Yehova i wabine kotudi?
13 Mutumibwa Polo wāsonekele myanda itala Mosesa amba “wakankamene ne kukankamana bwa wamona aye wakubulwa kumweka.” (Bahebelu 11:27) Na bubine, Mosesa kāmwenepo Yehova buntu-ntala nenki. (Divilu 33:20) Ino Yehova wādi wabine kwadi pamo’nka bwa umumwene na meso. Ne Yoba nandi monka na monka, pa kupwa kutompibwa, meso andi a lwitabijo amwene Yehova, wāyuka amba i Leza uleka bengidi bandi bakikōkeji batompibwe, ino kebelwangapo nansha dimo. (Yoba 42:5) Tala ba Enoke ne Noa nabo, bātelelwe amba ‘bādi bananga ne Leza.’ Bānangile nandi pa kukimba kumusangaja ne kumukōkela. (Ngalwilo 5:22-24; 6:9, 22; Bahebelu 11:5, 7) Shi Yehova i muntu wabine kotudi na mwaādi wikadile wabine kudi ba Enoke, Noa, Yoba ne Mosesa, nabya ‘tukamuyuka’ mu mashinda etu onso, aye nandi “ukōlolanga tushinda” twetu.—Nkindi 3:5, 6.
14. Lelo ‘kulamata’ Yehova kushintulula namani?
14 Mosesa wāpele bene Isalela madingi kumeso’tu kwa kutwela’bo mu Ntanda ya Mulao amba: “Mukalonda Yehova Leza wenu ne kumwakamwa, ne kulama bijila byandi, ne kumukōkela diwi dyandi, kadi mukamwingidila ne kumulamata kwine.” (Kupituluka 13:4) Bine, bādi banenwe kulonda Yehova, kumwakamwa, kumukōkela ne kumulamata. Mufundi umo wa Bible unenena pa kino kishima kyalamwinwe pano bu ‘kulamata’ amba “ludimi [lwa Kihebelu] lulombola amba padi kwifwenya kwa pa bwipi mpata, ne kipwano kiloe.” O mwanda mulembi wa mitōto wānene amba: “Bupwani bwa Yehova budi ku boba bamwakaminwe.” (Mitōto 25:14) Buno bupwani bulēme, bwa mpwaninine na Yehova tukekala nabo shi tumumwene bu wabine ne shi tumuswele bininge, tutyina’nka ne kumufityija mutyima mu muswelo o-onso.—Mitōto 19:9-14.
Le Uyukile Amba Yehova Ukutele Mutyima?
15, 16. (a) Le Mitōto 34 ulombola namani amba Yehova witutele mutyima? (b) Tukalonga bika shi tudi na makambakano a kuvuluka biyampe bitulongelanga Yehova?
15 Kimo kya mu bilongwa bya budyumuku bya Satana i kwitulabika tuvulaminwe amba Yehova Leza wetu utele bengidi bandi bakikōkeji mutyima kitatyi kyonso. Davida Mulopwe wa Isalela wādi uyukile kuboko kwa bulami kwa Yehova nansha paādi wikala mu kitatyi kya byamalwa byamwiko. Kitatyi kimo wākolelwe’tu kawiengelekeja bulubi ku meso a Akishi Mulopwe wa Ngata, kupwa wābunda lwimbo, mutōto wa buya bwa dyangi, utanwa’mo bino bishima bya lwitabijo amba: “Yō! tumbijai Yehova pamo nami, kadi tutulwile dijina dyandi pamo ponka. Nakimbile Yehova nandi wangitabija, kadi wanyongolwele ku byamoyo byami byonso. Mwikeulu wa Yehova webēla umbukata bwa nsakwa boba bamwakaminwe, webanyongolola. Ē! bānwe tompai mumone’mba Yehova i muyampe; keye wa katōkwe kandi, shandi! yewa muntu umukulupile. Yehova udi pa bwipi na boba ba mutyima mutyumuke, kadi upandijanga bano namino ba mushipiditu wa kwisasapo. Byamalwa bya moloke i bya ntanda ne ntanda; ino Yehova umunyongolola mu byonsololo.”—Mitōto 34:3, 4, 7, 8, 18, 19; 1 Samwele 21:10-15.
16 Le nobe usumininwe amba Yehova udi na bukomo bupandija? Ujingulwile amba bamwikeulu bandi bakukiñanga? Lelo kodi mutompe abe mwine ne kumona amba Yehova i muyampe? I musunsa’ka wa mfulo owamwene byabinebine amba Yehova i muyampe kodi? Tompa’po bidi kuvuluka. Lelo i powapempwile njibo ya mfulo mu mwingilo obe, popa powamwene amba kukibwanyapo kwendelela? Padi po pene powesambile myanda isangaja na mwinē njibo. Le wavulukile kufwija’ko Yehova pa kukupa bukomo bwa mbwejo ne pa kukwesela ano madyese? (2 Kodinda 4:7) Pakwabo padi udi na makambakano a kuvuluka kilongwa kampanda kiyampe kyakulongēle Yehova. Langa’po bidi mwapityila yenga, kweji nansha mwaka wadi’mo’u. Shi ubapu kulanga, ubulwe’po kwikankila’ko kufwena kudi Yehova ne kutompa kumona mwakuludikile ne kukwendeja? Mutumibwa Petelo wāsoñenye bene Kidishitu amba: “Mwikōkejei ke mudi babumvu pa kuboko kwa bukomo kwa Leza, . . . ne kwela kuzumbazumba konso kwa mutyima kudi aye, ke-muntu aye wimutele mutyima.” (1 Petelo 5:6, 7) Bine, ukatulumuka pa kumona muswelo wakutele mutyima!—Mitōto 73:28.
Endelela na Kukimba Yehova
17. I bintu’ka bitusakilwa shi tusaka kwendelela na kukimba Yehova?
17 Kulama kipwano kyotupwene na Yehova kufwaninwe kwikala kwa endaenda. Yesu wānene mu lulombelo lwandi kudi Shandi amba: “Buno namino bo būmi bwa nyeke, bekale na buyuki bwa abe Leza umo kete wabine, ne yewa owātumine, Yesu Kidishitu.” (Yoano 17:3, NW) Kwikala na buyuki bwa Yehova ne wandi Mwana i kintu kitulomba bukomo bwa kitatyi ne kitatyi. Milombelo ne mushipiditu sandu byo biketukwasha twivwanije ‘bintu bya mu nkulwe bya Leza.’ (1 Kodinda 2:10; Luka 11:13) Kadi tusakilwa bwendeji bwa “umpika wabinebine ne wamanwa” udisha mityima yetu bidibwa bya ku mushipiditu “pa kitatyi kifwaninwe.” (Mateo 24:45, NW) Uno o mukola witupela’mo Yehova madingi a kutanga Kinenwa kyandi difuku ne difuku, kutanwa nyeke ku kupwila kwa bwine Kidishitu, ne kutambila na mutyima umo mu busapudi bwa “myanda-miyampe ya buno bulopwe.” (Mateo 24:14) Shi tulonde ano madingi, nabya tukendelela na kukimba Yehova, Leza witutele mutyima.
18, 19. (a) Tufwaninwe kusumininwa kulonga bika? (b) Le tukeselwa namani shi tukomene Dyabola ne kwendelela na kukimba Yehova?
18 Satana uloñanga buninge bwandi bonso bwa kupapamwina bantu ba Yehova kupangwapangwa, kulondwalondwa, ne mitabakano ku mitamba yonso. Ulonga bukomo bwa kuvutakanya ndoe yetu ne kōna mwimanino wetu mulumbuluke ku meso a Leza. Kasakangapo twendelele na mwingilo wetu wa kutana bantu ba mityima miyampe ne kwibakwasha nabo belunge kudi Yehova mu mwanda utala bubikadi bwa ntanda yonso. Ino batwe tufwaninwe kusumininwa kushala nyeke badikōkeji kudi Yehova, kukulupila mwadi amba uketunyongolola kudi yewa umbi. Shi bine tupe Kinenwa kya Leza kyaba kya kwituludika ne shi twikale bantu bengila nyeke na bulongolodi bwandi bumweka na meso, nabya tuyukei amba udi netu nyeke, witukwatakanya.—Isaya 41:8-13.
19 Shi ke pano, batwe bonso tukomenei Dyabola ne bilongwa byandi bya budyumuku, koku tukimba Yehova, Leza wetu otuswele, mwanda kakatunyapo ‘kwitukankamika, ne kwitukomeja.’ (1 Petelo 5:8-11) Namino, ‘tukelama mu buswe bwa Leza, koku tutengele lusa lwa Mfumwetu Yesu Kidishitu na milangwe ya kwikala na būmi bwa nyeke ne nyeke.’—Yude 21.
Usa Kulondolola Namani?
• Kishima “Dyabola” kishintulula namani, ne i kika kinenenwa amba Dyabola uloñanga bikwatañene na kino kishima?
• Yehova i mwishile namani na Dyabola mu muswelo wabandaula bekadi ba pano panshi?
• I kika kinenenwa amba pa kufwena kudi Yehova muntu ufwaninwe bidi kwitabija kinkūlwa?
• ‘Kulamata’ Yehova kushintulula namani, ne i muswelo’ka otukokeja kwendelela na kumukimba?
[Bipangujo bya Kifundwa]
[Kifwatulo pa paje 15]
Yoba wāyukile amba Yehova umutele mutyima nansha byaātenwe na matompo
[Bifwatulo pa paje 16]
Kutanga Bible difuku ne difuku, kutanwa nyeke ku kupwila kwa bwine Kidishitu ne kutambila na bupyasakane mu mwingilo wa busapudi bituvulujanga amba Yehova witutele mutyima