Bipangujo bya Batangi

Lelo mpiko ipikwanga kudi Leza ikalanga ya mpikidile?

Mungya Bisonekwa, mpiko i mulao wa ndaidile kudi Leza wa kumulongela kintu kampanda, kumulambula kintu kabidye, kutwela mu mwingilo nansha mu kyepelo kansangwa nansha kujila bintu kamukaya byakubulwa kibi kidi’po. Mu Bible mudi nsekununi ya mpiko yāpikile bantu yādi imanine pa bintu kankenge bya mutyipo obātyipile wa kulonda būmi bunenwe’bwa enka shi Leza abadikile bidi kwibalongela kintu kansangwa. Kifwa Hana, inandya mupolofeto Samwele, wāpikile “mpiko kanena’mba: A Yehova wa bibumbo, shi ukatala . . . ne kwilwa mwingidi obe mpika, ino nanshi ukapana kudi mwingidi [obe mwana-mukaji] mwana mwana-mulume; nankyo nkamupana kudi Yehova mafuku onsololo a bumi bwandi, kabidi ditefu kedikapitepo pa wandi mutwe nansha patyetye, ehe.” (1 Samwele 1:11) Bible ulombola kadi amba mpiko ipikwanga na mutyima tō. Le penepo mpiko ya mu Bisonekwa i ya mpikidile?

“Pa kupika mpiko kudi Leza” ye Solomone Mulopwe wa Isalela wa kala unena, “kokējapo kufuta’yo.” Ubweja’ko amba: “Futa kyokya kyo wapikile’[y]o. Kitabukilepo buyampe kwikala kupika mpiko mpika, na kupika mpiko ne kufuta’yo mpika.” (Musapudi 5:4, 5) Bijila byāpelwe Isalela kupityila kudi Mosesa binena’mba: “Pokapika mpiko, ke mpiko kudi Yehova Leza obe kadi, kokejapo kufuta’yo; mwanda Yehova Leza obe kusakidila ukasakidila’yo kodi, ino kyakekala ke bubi modi.” (Kupituluka 23:21) I kimweke patōka amba kupika mpiko kudi Leza i mwanda musumininwe. Ifwaninwe kupikwa na kapikilo kayampe ne kadi yewa upika’yo kafwaninwepo kwalakana shi ubwanya kufuta kintu kyalaile mu mpiko shi kintu’ka shi kintu’ka. Shi kabwanyapo, i kipite buya kuleka kupika’yo. Ino le mpiko yonso shi ibapu kupikwa ikalanga ya mpikidile?

Le shi mpiko ipikile muntu keimusakila kulonga kintu kyaayuka ke mungya kala amba kekikwatañenepo na kiswa-mutyima kya Leza, bikekala namani? Langa bidi shi i mpiko ifikija mu muswelo kampanda ku kutweja bilongwa bya bukobakane mu butōtyi bwabine? (Kupituluka 23:18) Na bubine, mpiko ya uno muswelo ke ya mpikidilepo. Ne kadi, mu Bijila bya Mosesa, mpiko ipikilwe na mwana-mukaji yādi ipikululwa na shandi nansha na wandi mulume.—Umbadilo 30:3-15.

Bandaula kadi mwanda wa muntu upikile mpiko kudi Leza ya kushala kikungu, ino ku mfulo wamone amba bibamukoleja. Mpiko yandi ibamutūla mu ngikadilo yamona amba kufuta’yo kwenda kumufwenya ku matēlo a kuponena mu kujilula misoñanya ya Leza ya buujila. Le ukalonga enka buninge bwa kufuta mpiko yandi? Lelo ke kipite’po buya kwikinga’ye ku kupya mambo a kulonga busekese na kuleka kufuta mpiko yandi, kupita’ko kalombe kufwilwa lusa na Leza amba amulekele? Eyo, aye mwine ye wa kutyiba’po kya mfulo. Ke muntupo ungi ukamutyibila mbila.

Le shi muntu wapika mpiko yakamona ku mfulo amba wapikile’yo na kiyumbye bikekala namani? Lelo ufwaninwe’nka kukimba kufuta mpiko’ya? Kekyādipo kipēla kudi Yefeta kufuta mpiko yaāpikile kudi Leza, ino na mutyima umo wāfuta’yo. (Batyibi 11:30-40) Kukomenwa kwa muntu kufuta mpiko kubwanya kufikija Leza ku ‘kumujingilwa mutyima,’ kadi kukokeja kupomona byonso byalongele. (Musapudi 5:6) Kupēlula myanda itala kufuta mpiko kubwanya kufikija  muntu ku kubulwa kwitabijibwa na Leza.

Yesu Kidishitu wānene amba: “Kinenwa kyenu kīkale kyakunena’mba: Eyo! Eyo! Ehē! Ehē! ke-mintu yakutentekapo ku yoya nabya ke ya mubi.” (Mateo 5:37) Mwine Kidishitu kafwaninwepo kukalakala enka na kufuta mpiko kudi Leza, ino ufwaninwe ne kwikala muntu ukulupilwa mu binenwa byandi byonso—kudi Leza ne kudi bantu. Lelo shi wakolelwa kulonga kintu kyaadi umvwañene na muntu mukwabo kyadi kimweka dibajinji bu kiyampe ino pa kupwa kwikibandaula kibamweka bu bulembakane, bikekala namani? Kafwaninwepo kukwatyila’kyo ku mukose. Ino shi abesambila pamo na mutyima umo, mukwabo ukokeja padi kutyiba mbila ya kumutentula kino kiselwa.—Mitōto 15:4; Nkindi 6:2, 3.

Lelo mu mwanda utala mpiko ne bintu bikwabo byonso, i kika kine kyotufwaninwe kukimba? Tukimbei nyeke kulama kipwano kiyampe na Yehova Leza.

[Bifwatulo pa paje 30]

Hana kēkakilepo kufuta mpiko yandi

[Bifwatulo pa paje 31]

Yefeta wāfutyile mpiko yandi nansha byoyādi mikomo kufuta