Kupāna Enka ne Byowikōla Tonso

“NANSHA mungite bu wa lulombo; kebinsansapo. Mwanda i Yesu onombela.” Bino binenwa bya mwingidi umo mwine Mishoni bilombola patōka kufwila kufwilanga bantu mukōlo wa bipwilo. Mutōtelo mushimate kyoumwekela bu mwimanije i pa mwanda wa byabuntu bivulevule bitūlwa. Mfutwa koku ikimba kufutwa, kūbaka ne kulongolola matempelo kusakibwa, masapudi koku nao asakilwa lupeto. Le i kwepi kutambanga uno mukōlo onso?

Ku bipwilo bivule, lutambanga ku bya kujikija bu dikumi. * “Bya kujikija bu dikumi o muswelo utūdile’ko Leza wa kusokola lupeto lwa kwendeja nalo bulopwe Bwandi pano pa ntanda,” ye musapudi Norman Robertson unena. “Yo mpangiko Yandi isokola lupeto lwa kusapula nalo Evanjile.” Unena ukoma, ne bumvu bwine mpika bwa kuvulwija balondi bandi kiselwa kyabo kya kutūla, amba: ‘Kya kujikija bu dikumi ke kintupo kyotūdila amba poso udi nakyo, mhm. I kintu kitūdilwa kikōkeji. Kuleka kutūla kya kujikija bu dikumi i kujilula patōkelela mbila ya Leza. I kwiba Leza.’—Kya Kujikija bu Dikumi—Mpangiko ya Leza ya kwa Kulupuka Lupeto (Angele).

Abe mwine uyukile kala amba kupāna byabuntu kubadilwa mu butōtyi bwa bwine Kidishitu. Inoko, le uvutakanibwanga ñeni, pakwabo ne kufitwa mutyima pangala pa kulombwalombwa lupeto? Inácio Strieder mufundi wa teoloji mwine Brezile utopeka bipwilo amba binyemenanga ku bya kujikija bu dikumi mwanda wa “kupwija makambakano abyo a buludiki,” kadi utela ino milongelo amba i bintu “byampikwa kwendela’mo, bibi, binyengakanya lufundijo lwa teoloji.” Ku mfulo, ye aye unena, “bantu bampikwa twaji, bakaji ba bishala, bekadi ba mu masaka ne boba bampikwa ñeni ya kunañuna bintu, kebalanga amba Leza webela, ne amba banenwe’nka kupa ‘musapudi’ bintu bivulevule, abyo bisaka byabo koku bifwa nzala.”

Padi ukokeja kwiipangula’mba: ‘Le bipwilo biningilanga bantu kutūla kya kujikija bu dikumi bilondanga munenena Bisonekwa’ni? Nansha mitōtelo imo itembawilanga kwakamwa Leza mwanda’tu wa kupwila luombe lupeto lwalo? Lelo binebine Leza usaka tupāne’nka ne byotwikōla tonso, na mulangila bamo?

[Kunshi kwa dyani]