‘Endelelai na Kupa Bipa Bivule Bine’

“Mukapa bipa bivule, kadi mukamweka bu bana bami ba bwanga.”—YOANO 15:8, MB.

1. (a) I kisakibwa’ka kya bu mwanā bwanga kyālombwele Yesu batumibwa bandi? (b) I kipangujo’ka kyotufwaninwe kwiipangula?

 TUDI mu bufuku kumeso kwa lufu lwandi. Yesu waleye’ko kitatyi kya kukankamika batumibwa bandi na kwibalombola myanda itenga ku mutyima. Pano bimweka amba nsaa ke mipite pa bukata bwa bufuku, ino Yesu, byaswele bininge balunda nandi, waendelela na kwisamba. Kupwa enka mu mīsambo’mwa, webavuluja’mo ne kisakibwa kikwabo kifwaninwe kufikila’po bandi bana ba bwanga. Wanena’mba: “E mo mukamwekela ntumbo ya Tata po mukapa bipa bivule, kadi mukamweka bu bana bami ba bwanga.” (Yoano 15:8, MB) Le netu dyalelo tubwenye kino kisakibwa kya bu mwanā bwanga? Le ‘kupa bipa bivule’ kushintulula bika? Pa kuyuka uno mwanda, tujokelei bidi ku mīsambo ya mu kine kyolwa’kya.

2. I kyelekejo’ka kya bipa kyāsekunwine Yesu bukya ke lufu lwandi?

² Musoñanya wa kupa bipa i kipindi kya mu kyelekejo kyāletele Yesu ku batumibwa bandi. Amba: “Ami ne buñanza bwa binebine, ino Tata ye mudimi wabo. Misambo yonso īsapikile kudi ami yampikwa kupako bipa, nabya ufundula’yoko, ino yoya yakupako bipa nayo wiītōkejanga, wenda uketako, amba īpepo ne bikwabo bivule. Ebiya bānwe umbapu kutōka kala pa onka mwanda o nemunenene. Ikalai [nami mu bumo], ami nami ngikale [nenu mu bumo]. Monka mo keuyūkile musambo kupa bipa ao mwine, poso ushimete konka ku muñanza mwine, ne bānwe mo monka, poso mushimatei kudi ami konka. Ami  ne buñanza, bānwe mwi misambo yabo. . . . E monka muno mwatumbijibwe Tata ntumbo, amba [mukapa bipa bivule, kadi mukamweka bu bana bami ba bwanga]. Tata byāusensenwe nami nemusanswa, ikalai monka mu [buswe bwami]. Shi kadi mulame bijila byami nabya mukēkalanga mu [buswe bwami].”​—Yoano 15:1-10.

3. I bika bifwaninwe kulonga balondi ba Yesu pa kupa bipa?

³ Mu kino kyelekejo, Yehova ye Mudimi, Yesu ye buñanza, ne batumibwa besamba na Yesu yo misambo. Ponso palonga batumibwa bukomo bwa ‘kwikala mu bumo na’ Yesu, bine kebakabulwepo kupa bipa. Kupwa Yesu wāshintulula mukabwaninya batumibwa kulama buno bumo bwa mvubu mpata, amba: “Shi kadi mulame bijila byami nabya mukēkalanga mu [buswe bwami].” Mwenda myaka, mutumibwa Yoano pa kutumina banababo bene Kidishitu mukanda, wāsonekele binenwa biifwene na bino amba: ‘Yewa ulamine bijila bya Kidishitu wikele nyeke umbumo nandi.’ * (1 Yoano 2:24; 3:24) Nanshi shi balondi ba Kidishitu balama bijila byandi, bakekala nandi umbumo, buno bumo bo bukebapeja bipa. Le bipa bine byotufwaninwe kupa i bipa bya muswelo’ka?

Mukenga wa Kutama

4. I ñeni’ka yotuboila ku mulangwe wa amba Yehova ‘ufundulanga’ musambo o-onso wampikwa kupa bipa?

⁴ Mu kyelekejo kya buñanza, Yehova ye “ufundula,” nansha kuteta musambo shi keupepo bipa. Le kino kitulombola bika? Kitulombola amba bana ba bwanga bonso kebalombelwepo kupa bipa bitupu, ino abo bonso babwanya kupa’byo nansha shi badi mu ngikadilo’ka ne na mikalo ya muswelo’ka. Shi kebyadipo namino, longa ‘kufundula,’ nansha kupela mwanā bwanga wa Kidishitu amba mwanda’po’tu watunya kulonga kintu kyakabwanyapo kekwadipo kwa kukwatañana na mashinda a buswe a Yehova.​—Mitōto 103:14; Kolose 3:23; 1 Yoano 5:3.

5. (a) Le kyelekejo kya Yesu kilombola namani amba tufwaninwe kwendelela na kupa bipa? (b) I bipa bya miswelo’ka ibidi byotukabandaula?

⁵ Kyelekejo kya Yesu kya buñanza kilombola kadi amba mungya potufudile ne ngikadilo yetu, tufwaninwe kukimba mukenga ya kutamija mingilo yetu ya bu mwanā bwanga. Ivwana munenene’kyo Yesu amba: “Misambo yonso īsapikile kudi ami yampikwa kupako bipa, nabya ufundula’yoko, ino yoya yakupako bipa nayo wiītōkejanga, wenda uketako, amba īpepo ne bikwabo bivule.” (Yoano 15:2) Yesu, kubwipi na ku mfulo kwa kyelekejo, wāsoñenye balondi bandi amba mukapa “bipa bivule bīne.” (Vese 8) I bika byakimba kunena pano? Ukimba kunena amba batwe bana ba bwanga ketufwaninwepo kwididika nansha dimo. (Kusokwelwa 3:14, 15, 19) Ino tufwaninwe kukimba mashinda a kwendelela kumeso mu kupa bipa. Le i bipa bya muswelo’ka byotufwaninwe kulonga bukomo bwa kupa bivule?  Kudi (1) “kipa kya mushipiditu” ne (2) bipa bya Bulopwe.​—Ngalatea 5:22, 23, NW; Mateo 24:14.

Kipa kya Ngikadilo ya Bwine Kidishitu

6. Yesu wānene ukoma namani mvubu idi na kipa kya mushipiditu kitelelwe dibajinji?

⁶ Kibajinji mu mulongo wa ‘bipa bya mushipiditu’ i buswe. Mushipiditu wa Leza ulupulanga buswe mu bukata bwa bene Kidishitu, mwanda bakōkelanga ku musoñanya wa Yesu waāsoñenye kumeso’tu kwa kuleta kyelekejo kya buñanza bupa bipa. Wāsapwila batumibwa bandi amba: “Mwanda mupya uno o nemulá amba: Mwikale kwisanswa bānwe bene na bene.” (Yoano 13:34) I bine Yesu, mu mwisambo wandi onso wa bufuku bwa mfulo mu būmi bwandi bwa pano panshi, wāvulwije misunsa ne misunsa batumibwa bandi mvubu ya kulombwela ino ngikadilo ya buswe.​—Yoano 14:15, 21, 23, 24; 15:12, 13, 17, NW.

7. I muswelo’ka wālombwele mutumibwa Petelo amba kupa bipa kwendelanga pamo na kulombola ngikadilo yādi na Kidishitu?

⁷ Petelo wātenwe’po bufuku’bwa, nandi wāivwene amba buswe bwādi na Kidishitu ne ngikadilo mikwabo ikwatañene nabo ifwaninwe kumweka mu bana ba bwanga babine ba Kidishitu. O mwanda myaka pa kupita’po, Petelo wākankamikile bene Kidishitu batamije ino ngikadilo, kifwa kwīfula, kisanso kya bu bana na bana, ne buswe. Wābweja’ko ne kubweja amba kutamija’byo kuketwikadija “mulele mpika, nansha bakubulwa bipa” mpika. (2 Petelo 1:5-8) Bine, tukokeja kulombola kipa kya mushipiditu nansha shi tudi mu ngikadilo ya muswelo’ka. Nanshi tulongei bukomo bwa kulombola’nka ne pa mfulo buswe,  kanye, kutalala, ne ngikadilo mikwabo yādi na Kidishitu, mwanda “ku bino bintu kekudipo kijila,” nansha mukalo. (Ngalatea 5:23, NW) Bine, tupei “bipa bivule.”

Kupa Bipa bya Bulopwe

8. (a) I kukwatañana’ka kudi pa bukata bwa kipa kya mushipiditu na bipa bya Bulopwe? (b) I kipangujo’ka kyotufwaninwe kubandaula?

⁸ Bipa bya musombelo kadi bitobala bineñenyanga mutyi. Ino mvubu ya bino bipa ke enkapo muneñenya onkaonka, kudi bintu bikwabo bivule. Bipa bidi kadi na mvubu mu kuleta nkunwa ya kusangula mutyi wavula. Ne kipa kya mushipiditu nakyo mo monka, kekineñenyangapo enka bumuntu bwetu bwa bwine Kidishitu kete kubapu. Ngikadilo pamo bwa buswe ne lwitabijo bitupanga mutyima wa kukusa nkunwa ya musapu wa Bulopwe utanwa mu Kinenwa kya Leza. Ivwana mutumibwa Polo mwaānenene ukoma kukwatañana kwa mvubu kudi pano. Unena’mba: “Batwe netu monka byotudi’nka na mutyima wa lwitabijo lumo lonka [lubadilwa mu kipa kya mushipiditu], netu tubaitabija, e kyo tunenena.” (2 Kodinda 4:13, MB) Pa kino, Polo ushintulula kadi amba “tulambulei nyeke kudi Leza kitapwa kya lutendelo, kino i kipa kya milomo”​—kipa kya muswelo wa bubidi kyotufwaninwe kulombola. (Bahebelu 13:15, NW) Tubulwe’po kwikala na mikenga mu būmi bwetu ya kulupula bipa mulwi, ne kupa “bipa bivule bīne” bya bu basapudi ba Bulopwe bwa Leza?

9. Lelo kupa bipa i kulonga bana ba bwanga? Shintulula.

⁹ Pa kulondolola senene, tubadikilei bidi kwivwanija bipa bya Bulopwe bine i bipa’ka. Le i kyendele’mo kunena amba i enka kulonga bana ba bwanga kete? (Mateo 28:19) Lelo bipa byotupa bifunkila dibajinji pa bantu botukwashanga baikala ke batōtyi ba Yehova babatyijibwe? Mhm, ke abopo. Shi kyadi namino, longa i kizozeje mpata mutyima wa Batumoni bonso baswe betu bela’nka kwela na kikōkeji lubila lwa musapu wa Bulopwe mu bula bwa myaka kapwila mu myaba kemwitabapo bantu. Kadi shi bipa bya Bulopwe byotupa i enka’tu kulonga bana ba bwanga bapya, longa bano Batumoni bepenenekele na mwingilo namino badi pamo bwa misambo keipe bipa ya mu kyelekejo kya Yesu! Ino na bubine, kekidipo uno muswelo. Penepo kipa kibajinji kya Bulopwe kitamba mu mwingilo wetu i kipa’ka?

Kupa Bipa na Kukusa Nkunwa ya Bulopwe

10. Kyelekejo kya Yesu kya mukushi ne nshi pala pala kilombola amba kipa kya Bulopwe i bika ne ke bikapo?

¹⁰ Kyelekejo kya Yesu kya mukushi ne nshi pala pala kileta’po malondololo​—malondololo akankamika boba basapula bukamoni mu myaba kemulupukapo bipa bivule. Yesu wānene amba nkunwa i musapu wa Bulopwe udi mu Kinenwa kya Leza, nshi nayo i mutyima wa kyelekejo wa muntu. Nkunwa imo “yaponena mu nshi milumbuluke ino pa kumena īya’nka lubilo ne kupa” yāpa bipa. (Luka 8:8) Bipa’ka? Eyo, shi musele wa ñano ubamena, ubatama ne kutama, upanga’ko bipa, bino bipa ke miselepo mikwabo mityemitye ya ñano, ino i nkunwa mipya. Ne mwine Kidishitu nandi monka na monka, shi wape bipa, ke enkapo’tu bana ba bwanga bapya, ino i lukunwa lupya lwa Bulopwe.

11. Le kipa kya Bulopwe kibwanya kushintululwa namani?

¹¹ Nanshi pano kipa ke bana ba bwangapo bapya nansha ngikadilo milumbuluke ya bwine Kidishitu. Nkunwa ikunwanga byoudi i mwanda wa Bulopwe, nanshi kipa kifwaninwe kwikala kwisangula kwa ino nkunwa mu nkunwa mikwabo mivulevule. Mu uno muswelo kupa bipa kufunkila pa kwisamba myanda ya Bulopwe. (Mateo 24:14) Lelo bine kupa kino kipa kya bulopwe​—ko kunena amba kusapula myanda miyampe ya Bulopwe​—kubwanika mu ngikadilo yo-yonso yotudi’mo? Eyo, kubwanika! Yesu, mu kyelekejo kimo kyonka, ushintulula mwanda waka bibwanika.

Tupānei Kyokya Kipite Kunengela Mwanda wa Ntumbo ya Leza

12. Le kupa kipa kya Bulopwe kubwanika ku bene Kidishitu bonso? Shintulula.

¹² “Yewa wakushilwe pa nshi milumbuluke,” ye Yesu wānene, upanga “byakupa, īmo pa bu-katwa, īngi nayo pa bu-makumi asamba, mikwabo nayo pa bu-makumi asatu.” (Mateo 13:23) Miseke mikune mu budimi bumo ibwanya kwishila mu kupa mungya ngikadilo yoidi’mo. Ne batwe netu monka na monka, byotubwanya  kulonga pa kusapula myanda miyampe bibwanya kwishila mungya ngikadilo yotudi’mo, ne Yesu mwine wālombwele amba uyukile kino. Bamo padi bakokeja kwikala na mikenga mivule, bakwabo nabo beivwana biyampe mu ngitu ne kwikala na bukomo bukatampe kutabuka. Nanshi byotulonga bikokeja kwikala bivule nansha bityetye kudingakanya na bya bakwetu, ino shi ye kyetu kipite kunengela, Yehova ukasangala. (Ngalatea 6:4) Shi bununu nansha misongo itutyumwina panshi ibetuzozeja ketukilongapo bivule mu mwingilo wa busapudi, Yehova, Tata wetu wa lusa kakabulwepo kwitumona bu boba “bapanga bipa bivule.” Mwanda waka? Mwanda tumupanga ‘tonso totudi nato’​—mwingilo otwingila na mutyima wetu onso. *​—Mako 12:43, 44; Luka 10:27.

13. (a) I buluji’ka bwine bwitutonona ‘twendelele’ na kupa bipa bya Bulopwe? (b) I bika biketukwasha twendelele na kupa bipa mu myaba keitabapo bantu ku musapu? (Tala kapango pa paje 29.)

¹³ Monso motubwaninya kupa bipa bya Bulopwe, ‘tukendelela kupa bipa’ shi tulamine mu ñeni kine kyotupela’byo. (Yoano 15:16) Yesu wātelele buluji bwine botupela’byo amba: “E mo mukamwekela ntumbo ya Tata po mukapa bipa bivule.” (Yoano 15:8, MB) I amo, mwingilo wetu wa busapudi utumbijanga dijina dya Yehova ku bantu bonso. (Mitōto 109:30) Honor, Kamoni wakikōkeji pano kadi na kintu kya myaka 75 unena’mba: “Nansha ke mu myaba keitaba’mopo bantu, i madyese makatampe kwimanina Mwine Mukatakata Mwine.” Claudio, Kamoni mupyasakane tamba mu mwaka wa 1974, pobāmwipangwile amba mwanda waka wendelela na kusapula, nansha bavule mu mwaba wandi byokebetabapo ku musapu, wātelele Yoano 4:34, motutanga binenwa bya Yesu binena’mba: “Bidibwa byami i byonka bino’mba: Ngube kiswa-mutyima kya yewa wakuntuma, ne kumupwila mīngilo yandi.” Kupwa Claudio wābweja’ko amba: “Nkisakilepo enka kushilula mwingilo wami wa bu mwedi wa lubila lwa Bulopwe, ino nsakile ne kupwa’o, pamo bwa Yesu.” (Yoano 17:4) Batumoni ba Yehova ntanda yonso nabo betabije kino.​—Tala kapango “Muswelo wa ‘Kupa Bipa na Kūminina,’” pa paje 21.

Kusapula ne Kufundija

14. (a) Le i kitungo’ka kimo pabidi kyādi kimanine’po mwingilo wa Yoano Umbatyiji ne wa Yesu? (b) I muswelo’ka okokeja kushintulula mwingilo wa bene Kidishitu dyalelo?

¹⁴ Musapudi umbajinji wa Bulopwe obatelele mu Maevanjile i Yoano Umbatyiji. (Mateo 3:1, 2; Luka 3:18) Kitungo kyandi kibajinji kwādi i “kusapula,” bine wāsapwile na lwitabijo ne lukulupilo lukatampe “amba bonso betabije.” (Yoano 1:6, 7, MB) O mwanda bamo bāsapwidilwe na Yoano bāikele ke bana ba bwanga ba Kidishitu. (Yoano 1:35-37) Nanshi bine, Yoano wādi musapudi kadi mulongi wa bana ba bwanga. Yesu nandi wādi musapudi kadi mufundiji. (Mateo 4:23; 11:1) Nanshi ke kya kutulumukapo shi Yesu wāsoñenye balondi bandi basapule musapu wa Bulopwe, bakwashe ne bantu ba kwitabija’o  bekale nabo ke bana bandi ba bwanga. (Mateo 28:19, 20) O mwanda mwingilo wetu dyalelo i kusapula ne kufundija byonso kya pamo.

15. Lelo mwitabilo wāitabile bantu ku mwingilo wa busapudi wa mu myaka katwa kabajinji K.K. wiifwene namani na wa mu ano etu mafuku?

¹⁵ Mu bantu ba mu myaka katwa kabajinji K.K. bāivwene Polo usapula ne kufundija, “bamo [bāikele kwitabija] bintu byasapulwa, bangi ne kwitabija mpika.” (Bilongwa 28:24) Ne dyalelo nadyo mo monka. Ino i kya bulanda mwanda nkunwa mivule ya Bulopwe iponenanga mu nshi keitabapo bidibwa. Nansha namino, nkunwa imo iponenanga mu nshi milumbuluke, yaala miji, ne kushipuka, monka mwālaile’kyo Yesu. O mwanda kujokoloka ntanda yonso, kintu kya bantu 5 000 ne kupita bekalanga ke bana ba bwanga babine ba Kidishitu ku yenga ne yenga wa mu mwaka! Bano bana ba bwanga bapya ‘betabijanga bintu binenwa,’ nansha bavule bakwabo byobapela’byo. Lelo i bika byalamunanga mityima yabo keitabija musapu wa Bulopwe? Divule kuta kwibatanga Batumoni mutyima​—kudi pamo bwa kusangila nkunwa ikuninwe​—ko kwalamunanga myanda yonso. (1 Kodinda 3:6) Mu bifwa bivule, ivwana’mo’tu bino bibidi.

Kuta Bantu Mutyima Kwalamunanga Myanda Yonso

16, 17. Mwanda waka i kya mvubu kuta mutyima bantu botwitana nabo mu mwingilo wetu?

¹⁶ Karolien, nsongwakaji wa mu Belejike, wāpempwile lolo umo mutame wāikele kusepelela musapu wa Bulopwe. Kuboko kwa uno lolo kwadi kupambwe bandaje, ba Karolien ne musapudi nandi bamunena amba tukukwashe’ko, ino aye wapela. Mafuku abidi kupita’po, bano Batumoni bajokela ku njibo ya uno lolo, bamwipangula mwalādila’ko. “Kino kyaalamwine myanda yonso,” ye kunena kwa Karolien. “Wātulumukile pa kuyuka amba bine twādi tumutele mutyima bu muntu. Wetutweja mu njibo yandi, ne kifundwa kya Bible kyāshilwididila.”

¹⁷ Sandi, Kamoni wa mu États-Unis, nandi utanga mutyima boba bonso basapwila. Utalanga mu misapu ya babutula bana mu julunale wa mwabo, kupwa wākapempula bambutwile bapya na Dibuku Dyami dya Mānga ya mu Bible. * Lolo mbutwile byaikalanga nyeke ku njibo ne na nsangaji ya kulombola mwana wandi ku bāya kumutala, divule mīsambo keitunyangapo kwikala’ko. “Nesambanga na bambutwile pa mvubu ya kusamba bulunda na mwana wa lukeke na kumutangila myanda,” ye Sandi ushintulula. “Kupwa mwenda mafuku nesambila nabo pa bikoleja bya kulela bana mu ino ntanda ya dyalelo.” Panopano bupempudi bwa uno muswelo bwalupwile bipa, lolo umo ne bandi bana basamba bashilwile kwingidila Yehova. Bine, kukwata mulangwe ne kuta bantu mutyima kukokeja kulupula bipa bya uno muswelo bileta nsangaji mu mwingilo wetu.

18. (a) I kika kinenenwa amba batwe bonso tubwanya kufikila pa kisakibwa kya ‘kupa bipa bivule’? (b) I bisakibwa’ka bisatu bya bu mwanā bwanga bitelelwe mu Evanjile ya Yoano byotufwaninwe kusumininwa kubwanya?

¹⁸ Bine, i kintu kikankamika mpata pa kuyuka amba netu tubwanya kufikila pa kisakibwa kya ‘kwendelela na kupa bipa bivule’! Twikale banuke nansha batame, bakomo nansha babela, twikale kusapula mu mwaba witaba nansha mupela kwitaba bantu, batwe bonso tubwanya kupa bipa bivule. Namani? Na kulombola kipa kya mushipiditu mu ludingo lukatampe mpata ne na kusambakanya musapu wa Bulopwe na bukomo bwetu bonso. Koku tulonga bukomo bwa ‘kūminina mu mwanda wa Yesu’ ne ‘kwikala na buswe umbukata mwetu batwe bene.’ Bine, wivwane tubwanye bino bisakibwa bisatu bya mvubu bya bu mwanā bwanga bitelelwe mu Evanjile ya Yoano, nabya tubelombola amba ‘bine twi bana ba bwanga ba Kidishitu.’​—Yoano 8:31; 13:35.

[Kunshi kwa dyani]

Bipangujo bya Kupituluka’mo

• I bipa bya muswelo’ka byotufwaninwe kupa bivule bine?

• I kika kinenenwa amba netu tubwanya kufikila pa kitungo kya ‘kupa bipa bivule’?

• I bisakibwa’ka bisatu bya bu mwanā bwanga bitelelwe mu Evanjile ya Yoano byotwabandaula?

[Bipangujo bya Kifundwa]

[Kapango\Kifwatulo pa paje 29]

MUSWELO WA ‘KUPA BIPA NA KŪMININA’

I BIKA bikukwashanga wendelele na kusapula na kikōkeji musapu wa Bulopwe mu myaba keitabapo bantu ku musapu? Teja malondololo amoamo akwasha pa kino kipangujo.

“Kuyuka’tu kotuyukile amba tudi na Yesu wa kwitukwatakanya i kintu kitupa mulangilo muyampe ne kūminina, nansha shi bantu mu mwaba betabije nansha shi bapele.”​—Harry, wa myaka 72; wābatyijibwe mu 1946.

“Kisonekwa kya 2 Kodinda 2:17 kinkankamikanga nyeke. Kinena amba twingilanga mwingilo ‘ku meso a Leza, pamo na Kidishitu.’ Shi ndi mu busapudi, ndi na balunda nami balumbuluke kupita bonso.”​—Claudio, wa myaka 43; wābatyijibwe mu 1974.

“Na bubine, mwingilo wa busapudi i bulwi kondi. Ino, nemwenanga bubinebine bwa binenwa bidi mu Mitōto 18:29, binena’mba: ‘Ponka pa Leza wami e po ntumbukila nsakwa.’”​—Gerard, wa myaka 79; wābatyijibwe mu 1955.

“Shi natangila muntu kisonekwa’tu kimo mu busapudi, ndoelelwanga mwanda mutyima wa muntu kampanda ubabandaulwa na Bible.”​—Eleanor, wa myaka 26; wabatyijibwe mu 1989.

“Ntompanga misapwilo mishileshile. I mivule mine yonkibwanyapo kwingidija yonso mu myaka inshadile’ko mu būmi bwami.”​—Paul, wa myaka 79; wābatyijibwe mu 1940.

“Kupela kobapela kekunsansangapo. Ntompanga kwibasapwila na mutyima mutūke, nesamba na bantu, nteja ne milangwe yabo.”​—Daniel, wa myaka 75; wābatyijibwe mu 1946.

“Netene na bantu babatyijibwe panopano baunene amba busapudi bwami i bwibakwashe bekale ke Batumoni. Ino ami kuyuka mpika, muntu mukwabo mwenda mafuku wefunda nabo Bible ne kwibakwasha bendelele kumeso. Kino kimpanga nsangaji pa kuyuka amba mwingilo wetu i mwingilo wa makuvu makwikane.”​—Joan, wa myaka 66; wābatyijibwe mu 1954.

Lelo nobe i bika bikukwashanga ‘upe bipa na kūminina’?​—Luka 8:15.

[Bifwatulo pa paje 28]

Tukapa bipa bivule shi tulombola kipa kya mushipiditu ne kusapula musapu wa Bulopwe

[Kifwatulo pa paje 31]

Yesu wādi usaka kunena bika paānene batumibwa bandi amba: “Mukapa bipa bivule”?