Bwine Kidishitu Butūkijanga Balanda Mutyima

MOBIMWEKELA, bulanda bukatampe bwāponene Bayuda mu myaka katwa kabajinji. K.K. Kubikalwa kobābikelwe na mizo mikwabo tamba pobāselelwe bu misungi na bene Babiloni kekwābudilwepo kulekeja bantu kulonda Bijila bya Mosesa byādi bibalamina bupyani. (Dingakanya na Nehemia 9:36, 37.) Bendeji ba bipwilo, kupityidila Bafadiseo, bādi bepēne bininge mu bisela pa kyaba kya kufundija buswe bwabinebine bwa kuswa bantu nabo ne kabango ka kubanga bambutwile banunu kadi bafudilwe. (Mateo 15:5, 6; 23:23; dingakanya na Luka 10:29-32.) Bafadiseo bansanswa-lupeto kebādipo batele mutyima bininge ku balanda.​—Luka 16:14.

Ino Kidishitu Yesu aye wādi ‘ukwatyilwa bibumbo bya bantu lusa, mwanda bāsuswilwe ne kusansanibwa pamo bwa mikōko yampikwa mukumbi.’ (Mateo 9:36) Kusapula kwaādi usapula myanda miyampe ku balanda bamweshibwa malwa kwādi kwishile kulampe kwine na ngikadilo ya bendeji ba bipwilo bya Bayuda, kadi bo bwādi buluji bumo mu bukwabo bulombola amba bine aye ye Meshiasa. (Mateo 11:5; Luka 4:18; 7:22) Ne kadi busapudi bwandi bwāikele kushitwila boba bāitabije’bo madyese a ntumbo a kukapyana Bulopwe bwa mūlu.​—Mateo 5:3; Luka 6:20.

Bayuda bādi na kiselwa kya kukwasha bakwabo bene Isalela bafudilwe, mwanda bādi bapwane kipwano na Leza. (Nkindi 14:21; 28:27; Isaya 58:6, 7; Ezekyele 18:7-9) Zakiasa wājingulwile kino, o mwanda aye pa kwitabija amba Yesu ye Meshiasa, wēelele mūlu amba: “A Mfumwami, tala bidi nkalala lupeto lwami pa bukata, kipindi kimo nkapa’kyo balanda.” (Luka 19:8, MB) Pa buno buluji bumo bonka, Kidishitu Yesu wānene amba: “Pa kuteka bidibwa, wikale kwita balanda, ne bilema, ne basunkuta ne bampofu. Ebiya abe ukēselwa dyese, mwanda abo kebadi ne kyakukulubwila.” (Luka 14:13, 14) Kyaba kikwabo wākankamikile nsongwalume mpeta muludiki amba: “Kapoteje byonso byodi nabyo ku lupeto, ukabile’lo balanda, nabya ukamona byabupeta mu madiulu, penepa wiye kounonda shobe.” (Luka 18:22, MB) Kupela kwāpelele uno muntu kwabanya bituntwa byandi mwa kukwashisha bakwabo kulombola amba kādipo utele mutyima byabinebine ku boba bādi bamweshibwa malwa, bine wādi mubulwe ngikadilo isakibwa mwa kwikadila mwanā bwanga wa Yesu.​—Luka 18:23.

Kukankamika kwādi kukankamika Yesu bantu bakwashe balanda kwādi kukwatañene na byaādi ulonga aye mwine. Aye wādi na bintu byonso, mwanda wādi Mwanā Leza momwa mūlu. Ino ‘nansha byaādi mpeta, wāalamukile ke mulanda.’ Pa kwikala’ye mulanda pano pa ntanda, wāikele na muswelo wa kunyongolola muzo wa muntu, wēusokwela bupeta bupite bonso, ke kyepelo kidi na balondi bandi kya kwikala bana ba Leza kadi. (2 Kodinda 8:9) Kutentekela pa kino, kwādi bupeta bukwabo buvule bwa ku mushipiditu bobādi ba kwikala nabo.​—Dingakanya na 2 Kodinda 6:10; Kusokwelwa 2:9; 3:17, 18.

Kadi, Yesu paādi pano panshi, wādi utele mutyima boba bafudilwe ku ngitu. Aye ne batumibwa bandi bādi na mukōlo wa abo bonso obādi bapa bene Isalela bafudilwe. (Mateo 26:9-11; Mako 14:5-7; Yoano 12:5-8; 13:29) Mushipiditu wa kuta balanda mutyima na buswe wālombwelwe ne mwenda myaka na bene Kidishitu ponso pobādi bapāna bya bukwashi bya ku ngitu ku banababo balanda. (Loma 15:26; Ngalatea 2:10) Ino bamo bālengelwe’ko, o mwanda mwanā bwanga Yakoba wāmwene amba bafwaninwe’nka kutopekwa pa mwanda wa maviyo abo a kulongela bampeta biyampe, balanda’ko bo bobafutulula.​—Yakoba 2:2-9.

Inoko bantu bādi bapebwa bukwashi bwa ku ngitu i enka boba bādi bafwaninwe kupebwa’bo. Kebādipo bakankamika bantu kwikala na bukope. Pamo’nka na mwānenene’kyo mutumibwa Polo mu mukanda waātumīne bene Tesalonika amba: “Wampikwa kwingila mīngilo, kakidya.”​—2 Tesalonika 3:10.