Kupangwapangwa Pangala pa Mutōtelo—Mwanda Waka?
Kupangwapangwa Pangala pa Mutōtelo—Mwanda Waka?
LELO ulanga amba bantu babwanya’tu kupangwapangwa pa mwanda wa mutōtelo wabo? Mobimwekela malondololo i mhm—shi bine bilongwa byabo kebijilulapo byepelo bya bakwabo. Ino shi tutale, kupangwapangwa pangala pa mutōtelo ke kulāle myaka kapwila, kadi kukyendelela ne dyalelo. Kifwa, Batumoni ba Yehova ba mu Bulaya ne mu bipindi bikwabo bya ntanda, bādi divule bapelelwa kupebwa byepelo byabo, bāmweshibwa mwiko mu bula bonso bwa myaka katwa ka 20.
Mu kine kitatyi’kyo, Batumoni ba Yehova bāmweshibwe malwa na kupangwapangwa kubikubi, bebakadile’ko ne mpango, kadi kwa myaka mulwi, mu maludiki makatampe a kasusu ādi abikele mu Bulaya. Lelo myanda yēbatene itufundija bika pa mwanda utala kupangwapangwa pangala pa mutōtelo? Ne i ñeni’ka yotukokeja kuboila ku mwikadilo obāikele nao mu ano masusu?
“Ke ba Ino Ntandapo”
Batumoni ba Yehova beelelanga’ko kwikala bantu balēmeka bijila, baleta ndoe, kadi ba mwikadilo moloke. Kebalwangapo imbikalo nansha kukimba kwisusa nayo, kadi kebepapamwinangapo kupangwapangwa amba nabo batelwe bu bantu bepaibwa pa mwanda wa lwitabijo. Kadi bano bene Kidishitu kebekujangapo mu bimyanda bya kipolitike. Kino i kikwatañane na binenwa bya Yesu bya amba: “[Balondi bami] ke ba ino ntandapo, monka mongikadile ami’wa ke ne wa ino ntandapo.” (Yoano 17:16, NW) Imbikalo mivule iyukile mwimanino wa Batumoni wa kubulwa kwikuja mu bya ntanda. Ino baludiki ba kasusu kebalēmekelepo bikatampe kijila kya mu Bible kinena amba bene Kidishitu kebafwaninwepo kwikala ba ino ntanda.
Buluji bokebalēmekelapo kino kijila bwashintulwilwe mu kitango kyalongelwe ku Inivelesite ya Heidelberg, mu Alemanye, mu Kweji wa 11, 2000. Kitango kyadi na mutwe wa mwanda unena amba “Kupela ne Kunenenena Abo Bene Patōka: Batumoni ba Yehova Munshi mwa Kasumalomo ka Umbikalo wa Kisosialiste ne wa Kikoministe.” Dokitele Clemens Vollnhals wa ku Masomo Makata a Hannah-Arendt a Bukimbi bwa Myanda ya mu Umbikalo wa Kasusu unena’mba: “Imbikalo ya kasusu keikadikijangapo mingilo yayo enka mu myanda ya kipolitike kete. Ayo ilombanga bumuntu bonso butuntulu.”
Bene Kidishitu babine kebabwanyapo kupāna bwabo “bumuntu bonso butuntulu” ku umbikalo wa bantu, mwanda i bapāne dikōkeji dyabo dyonso kudi Yehova Leza kete. Batumoni badi mu imbikalo ya kaninga-mpo ka kasusu bamonanga amba bintu bilomba Leta ne bijila bya mu lwitabijo lwabo bikalanga bipatanya mu byaba bimobimo. Lelo abo baloñanga namani shi bibepatanya namino? Mu bula bwa mānga yonso, Batumoni ba Yehova balondanga mu būmi bwabo musoñanya wāletelwe na bana ba bwanga ba Yesu Kidishitu amba: “Batwe tufwanyinwe kukokela Leza, kutabuka kukokela bantu.”—Bilongwa 5:29, MB.
Kudi Batumoni tununu ne tununu bāikele nyeke badikōkeji ku lwitabijo lwabo, kasha bashala bampikwa kwikuja mu bimyanda bya kipolitike, nansha ke pobādi bapangwapangwa bya mwiko mpata. Lelo bābwenye namani kūminina? Le i kwepi kobāsokwele bukomo bwa kūminina? Twibalekei abo bene balondolole. Twikale Batumoni nansha ketudipo Batumoni, tutalei i ñeni’ka ikokeja kuboila muntu ne muntu ku myanda yēbatene.
[Bushintuludi pa paje 4]
Batumoni ba Yehova mu Alemanye bāmweshibwe malwa mu kupangwapangwa kubikubi, kwa myaka mulwi mu maludiki abidi a kasusu ādi abikele mu myaka katwa ka 20
[Bushintuludi pa paje 4]
“Imbikalo ya kasusu keikadikijangapo mingilo yayo enka mu myanda ya kipolitike kete. Ayo ilombanga ne bumuntu bonso butuntulu.”—Dokitele Clemens Vollnhals
[Bifwatulo pa paje 4]
Ba mu kisaka kya Kusserow kebāpelwepo bwanapabo bwabo mwanda bāpelele kutuna lwitabijo lwabo
[Bifwatulo pa paje 4]
Johannes Harms wāipailwe mu kaso ka Nazi pa mwanda wa nkulupilo yandi