“Natana Byonso Byonadi Nsaka”

NJIA pano ilangilwa amba ke mikwate bantu midiyo 120 ne kupita kujokoloka ntanda yonso, mo munenena lapolo wa Kitango Kitala Myanda ya Misongo Ntanda Yonso. Mwaka ne mwaka, kudi bantu mudiyo umo beyoa ne bantu midiyo 10 kutūla ku 20 batompanga kwiipaya. Lelo i bintu’ka bidi’ko bibwanya kukwasha bantu badi na njia? Eyo, bundapi bwa kiñanga bukokeja shabo kutyepeja’ko ano masusu, kadi kusenga mutyima wa muntu nako kudi na mvubu. Ino kudi bantu bamo bajondwanga mutyima uno muswelo batananga bukwashi bukwabo mu mabuku a mvubu umbūmi esamba myanda ya mu Bible alupulwa na Batumoni ba Yehova, pamo na mwikilombwela mukanda utambile mu Franse udi kunshi’u.

“Mafuku matyetye kunyuma, nkyadipo nakimwene mvubu ya kwikadila na būmi bwa endaenda. O mwanda nalombele kudi Leza amba ndeke’tu mfwe. Nadi neivwana bwa ami mufwe kala munda mwami. Pa kukimba buludiki, nalombela na kininga kyonso kudi Yehova. Nasumininwa kutanga dibuku Annuaire des Témoins de Jéhovah 2002, nedipwa dyonso dituntulu mu mafuku asatu. Nena na bubine amba dyaunkankamikile mpata, dyakomeja ne lwitabijo lwami.

“Nakimbile ne myanda kampanda mu mapepala Kiteba kya Mulami ne Réveillez-vous!, bine natulumukile mpata! Ntañanga ano mapepala kitatyi ne kitatyi pano ke myaka 15 ne kupita, ino nadi kasha nkyamwene amba bishinte bidi’mo bikankamikanga ne kukunka mutyima uno muswelo. I biyule buswe​—ngikadilo misakane mpata mu ano mafuku. Natana byonso byonadi nsaka.”

Bible unena’mba: “Yehova udi pa bwipi na boba ba mutyima mutyumuke, kadi upandijanga bano namino ba mushipiditu wa kwisasapo [“mupondakane,” NW].” (Mitōto 34:18) Bine ne bine ponka, boba bonso “ba mutyima mutyumuke” nansha ‘ba mushipiditu mupondakane’ babwanya kutana mu Bible kukankamikwa ne lukulupilo lutala pa mafuku a kumeso. Batumoni ba Yehova babanyanga mabuku esamba myanda ya mu Bible a kukwasha boba basaka kumwena biyampe mu ino nsulo ya kusengibwa ya ku bukomo bwa mushipiditu wa Leza.