Kya ku Meza—Lelo I Kika?

LELO i kika kikwiyanga mu ñeni shi ubaivwana bantu batela kishima “Kya ku Meza”? Bavule belanga milafwe ku kifwatulo kitendelwa mpata kidi mu Milan, mu Itadi, kifwatwilwe na mupentyi Léonard de Vinci (1452-1519). Ino na bubine, Kya ku Meza i nzovu lwano ku basendwe, balembi ne batuimba bavule mu bula bwa tutwa twa myaka.

Shi ke pano, Kya ku Meza i kika, ne kidi na buluji’ka ku batwe badi’ko mu ino myaka katwa ka 21? Mabuku makata a myanda ne a bushintuludi bwa bishima akakuyukija amba Kya ku Meza, kitelwa ne bu Bidibwa bya Mfumwetu, i bidibwa byādile Yesu Kidishitu pamo na batumibwa bandi ku kyolwa kumeso kwa kufwa lufu lwandi lwa bu kitapwa. Byobyādi bidibwa bya mfulo byādile Yesu na balondi bandi bakikōkeji, o mwanda bitelwa na bamo amba Bidibwa bya ku Kyolwa bya Mfulo. Kadi byobyāshilwilwe na Mfumwetu Yesu Kidishitu mwine, o mwanda i kyendele’mo kwibita bu Bidibwa bya Mfumwetu.

Mu bula bwa myaka, bavule i bele būmi bwabo bu kitapwa pa byobya bimonwa na bantu bu bintu bya mvubu. Eyo, mfu imoimo mu ino i mimweje bantu bamobamo kamweno mu bula bwa kitatyi kampanda. Inoko ino mfu yonso ya kwiela bu kitapwa, nansha byoitendelwa, kekudipo nansha lumo ludi na bulēme busenselela ku lufu lwa Yesu Kidishitu. Ne kadi, i kutupu lufu mu mānga ya muntu miyule kavutakanya lukokeja kwikala na lupusa pa bantu ba ntanda yonso pi na pi. Mwanda waka?

Pa kusaka kulondolola kino kipangujo ne kukukwasha wivwanije buluji bwa Bidibwa bya Mfumwetu kodi, tubakwite utange kishinte kilonda’ko.