Bankasampe​—Yehova Kakavulaminwapo Mingilo Yenu!

“Leza kadipo wa bukondame wakuvulaminwa mīngilo yenu ne lusa lwenu lo mwalombwele pa dijina dyandi, lo mwingidila bapandulwemo mīngilo, ne pano pene mukīngila monka.”​—BAHEBELU 6:10.

1. Mukanda wa Bible wa Bahebelu ne wa Malaki ulombola namani amba Yehova ukwete na mutyika mwingilo omwingidila?

 LELO kodi mulongele mukwenu kintu kiyampe, ino aye ne kukufwija’ko kwine mpika? Bine i kintu kisansa mutyima mpata shi ubalonga kilongwa kya buntu ino abekikwatyila ku nzeinzei, ne kupityidila shi abekivulaminwa lonso. Ino na bubine, shi twingidila Yehova na mutyima wetu onso, aye kakavulaminwapo byotulonga! Mwanda Bible unena’mba: “Leza kadipo wa bukondame wakuvulaminwa mīngilo yenu ne lusa lwenu lo mwalombwele pa dijina dyandi, lo mwingidila bapandulwemo mīngilo, ne pano pene mukīngila monka.” (Bahebelu 6:10) Langa bidi nshintulwilo ya kino kintu. Yehova ukemona amba walonga bikondame​—ko kunena amba bubi​—shi wavulaminwa byobya  byolongele kala ne byokilonga mu mwingilo wandi. Bine, uno shandi ye Leza udi na mutyima wa kufwija’ko!​—Malaki 3:10.

2. I bika bilengeja kwingidila Yehova kwikale kwa pa bula?

² Pano wi mupebwe mukenga wa pa bula wa kutōta ne kwingidila Leza uyukile kufwija’ko bantu. Byotuyukile amba kudi enka banabenu betabije kintu kya midiyo isamba kete mu bekadi ba ntanda kintu kya midiyala isamba mituntulu, wi wa dyese ne dyese’po. Ne kadi kuteja koteja musapu wa myanda miyampe ne kulonda mounenena i bukamoni bulombola amba Yehova ukutele mutyima. Mwanda Yesu wānene amba: “Nansha umo wakwīla kwami aye mwine, poso’nka Tata wakuntuma amukokele ko ndi.” (Yoano 6:44) I amo, Yehova ukwashanga muntu ne muntu amwene mu byabuyabuya bya kitapwa kya Kidishitu.

Fwija’ko Pangala pa Madyese Makatampe Opelwe

3. Le bana ba Kola bāfwijije’ko namani pa madyese obādi bapelwe a kwingidila Yehova?

³ Monka motwesambile’kyo kala mu kishinte kibadikile kino, udi na kyepelo kya pa bula kya kusangaja mutyima wa Yehova. (Nkindi 27:11) Kino ke kintupo kyofwaninwe kukwatyila ku nzeinzei. Bana ba Kola bālombwele mu umo wa mu mitōto yabo ya ku bukomo bwa mushipiditu kufwija’ko kwabo pangala pa madyese a kwingidila Yehova obādi bapelwe. Tutanga’mo amba: “Difuku dimo mu bipango byobe dipityile buyampe kanunu; nsanshilwe kwikala bu-wapakibelo mu njibo ya Leza, e nabyako, ino kwikale na kwikala mu mapema a bubi.”​—Mitōto 84:10.

4. (a) I bika bimwenanga bamo amba mutōtelo wa Yehova udi na bya kujidikajidika? (b) Yehova wilombolanga namani amba udi na bukidi bwa kumwena bengidi bandi ne kwibapala mpalo?

⁴ Le nobe mo momwena madyese obe a kwingidila Shobe wa mūlu? Eyo, kyaba kimo kutōta Yehova kumwekanga bwa ako kutūdila bwanapabo bobe mikalo. I amo, kwikala na būmi bulonda misoñanya ya mu Bible kulomba kwisuminwa bintu kampanda. Inoko yuka amba byonso bikulomba Yehova bidi na kamweno kodi. (Mitōto 1:1-3) Kadi Yehova umonanga bukomo bolonga, ufwija’ko ne kufwija pangala pa kikōkeji kyobe. O mwanda Polo wāsonekele amba Yehova “upala mpalo boba bamukimba ne mikeketo.” (Bahebelu 11:6) Yehova ukimbanga mwa kukupadila mpalo. Mupolofeto moloke wa mu Isalela wa kala wānene amba: “Meso a Yehova akeñenya kusambakanya ntanda yonsololo, konso konso pi na pi, kwilomboja mukomo wa boba ba mutyima mubwaninine kwadi.”​—2 Bilongwa 16:9.

5. (a) Le i muswelo’ka umo mulumbuluke mpata wa kulombola amba mutyima obe i mubwaninine kudi Yehova? (b) Mwanda waka kusapwila bakwenu lwitabijo lobe kukokeja kumweka bu kukomo?

⁵ Muswelo umo mulumbuluke mpata wa kulombola amba mutyima obe i mubwaninine kudi Yehova i kusapwila bakwenu myanda yandi. Le kodi musapwile bakwenu bamo ba ku masomo myanda ya lwitabijo lobe? Dibajinji kino kibwanya kukutuyula mutyima, pakwabo waivwana’nka ne kamoyo. Ukokeja’nka ne kwiipangula’mba:  ‘Le shi abaunsepa le? Nsa kulonga namani shi abampunika amba kipwilo kyami kidi’tu bingi?’ Yesu wādi uyukile amba ke bonsopo bakateja musapu wa Bulopwe. (Yoano 15:20) Inoko kino kekishintululapo amba kubapu, mu būmi bobe abe kodi’tu enka wa kubengwa konkakonka ne kupelwa. Mwanda kudi bankasampe Batumoni bavule batananga muntu wibateja, pakwabo bapebwa’nka ne bulēme bukatampe na bakwabo pa mwanda wa kulama kobalamine nkulupilo yabo.

“Yehova Ukakukwasha”

6, 7. (a) Nsongwakaji wa myaka 17 wabwenye namani kusapula bukamoni ku bakwabo ba mu kalasa? (b) I ñeni’ka yowaboila ku mwanda watene Jennifer?

⁶ Ino i muswelo’ka okokeja kumona bukankamane bwa kwisambila pa lwitabijo lobe? Ubulwe’po kusumininwa kunena patōkelela, pambulwa kafinda shi muntu wakwipangula myanda ya mutōtelo obe? Ivwana mwanda watene Jennifer, nkasampe wa myaka 17. Unena’mba: “Twadi tudya pa midi mu kalasa. Bansongwakaji botwadi nabo ku meza bashilula kwisamba myanda ya mitōtelo, penepa umo waungipangula mutōtelo ondi’mo.” Lelo Jennifer watuyukile pa kulondolola? “Eyo natuyukile,” ye aye witabija, “mwanda nkyadipo ndyukile byobasa kunena’po.” Penepo Jennifer walonga’po namani? “Nalombwele bansongwakaji’ba amba ndi Kamoni wa Yehova,” ye aye ubweja’ko. “Dibajinji bidi batulumuka. Mobimwekela badi balanga amba Batumoni ba Yehova i bantu badi’tu bingi. O mwanda baungipangwile bipangujo, nami nebatōkejeja myanda yobadi betulangila bingi. Nansha ke kupwa kwa dyadyo difuku, bansongwakaji bamo badi bamfwena kyaba ne kyaba na bipangujo.”

⁷ Le Jennifer wealakenye pa kumona uno mukenga wa kwisambila pa nkulupilo yandi? Nansha dimo! Unena’mba: “Naloelelwe bininge ku mutyima potwapwile kudya bidibwa bya midi. Pano boba bansongwakaji abayuka biyampe Batumoni ba Yehova i bāni.” Jennifer uleta madingi apēla, amba: “Shi umona amba i bikomo kusapula bukamoni ku bana ba masomo ne ku badimu, nabya lombela milombelo mīpi. Yehova ukakukwasha. Ukasangala pa kumona amba ubaingidija senene mukenga wa kusapula bukamoni obakupa.”​—1 Petelo 3:15.

8. (a) Milombelo yākweshe Nehemia namani paātenwe na mwanda wa kibozo? (b) I ngikadilo’ka ya ku masomo ikulomba kulombela kudi Yehova milombelo mīpi ya mundamunda?

⁸ Tala, Jennifer wanena amba i biyampe ‘kulombela milombelo mīpi’ kudi Yehova pomona mukenga wa kusapula bukamoni bwa lwitabijo lobe. Kino kyo kyālongele ne Nehemia, kaseya wa Alatazelekishishi, mulopwe mwine Peleshia, paātenwe na mwanda wa kibozo. Nehemia wādi umweka ku mpala amba udi na bulanda ku mutyima mwanda bāmulombwele ngikadilo ya bulanda yadi’mo Bayuda, ne amba mpembwe ne bibelo bya Yelusalema byonso bidi mu masala. Ponka’po mulopwe wāmona Nehemia mufitwe mutyima, wāmwipangula kine kyaikadile nabya. Kumeso kwa kulondolola, Nehemia wālomba bwendeji mu milombelo. Kupwa, pakubulwa moyo, wālomba mulopwe lupusa lwa kujokela ku Yelusalema kukobakulula kibundi kipomokele. Alatazelekishishi nandi wāitabija byālombele Nehemia. (Nehemia 2:1-8) Le i ñeni’ka iboilwa pano? I ino: Shi mutyima ubakutuyuka kitatyi kyomona mukenga wa kupāna bukamoni bwa lwitabijo lobe, kokakwatyila ku mukose mukenga odi nao wa kulombela milombelo ya mundamunda. ‘Ela kuzumbazumba konso kwa mutyima kudi Yehova, ke-muntu aye ukutele mutyima,’ mo mwāsonekele Petelo.​—1 Petelo 5:7; Mitōto 55:22.

“Kampeja Bukidi ka Kutentulwila”

9. Le Leah wa myaka 13 wabwenye namani kupāna mabuku 23 a Les jeunes s’interrogent?

⁹ Ivwana mwanda mukwabo. Leah, nsongwakaji wa myaka 13, wadi utanga dibuku Les jeunes s’interrogent—Réponses pratiques * pa kukōkolokwa kwa midi ku masomo. Unena’mba: “Bakwetu badi bantala, ne kwija mpika dintu dyaungwila kunyuma kwa mapuji ami. Baanza kungipangula i bika byobesamba mu dibuku.” Ku mfulo kwa difuku’dya, bansongwakaji baná balomba Leah dibuku Les jeunes s’interrogent wa dyandi wa dyandi. Kepaijijepo  bano bansongwakaji nabo balombola bakwabo dino dibuku, nabo balomba kwikala nadyo. Mu mayenga abala-anga alondele’po, Leah wapāna mabuku 23 ku bakwabo ba ku masomo ne ku balunda nandi. Le byadi bipēla kudi Leah pa kwisamba na bakwabo bamwipangwile byobya byaadi utanga mu dibuku? Mhm, kebyadipo bipēla! “Dibajinji natuyukile mu mutyima,” ye aye unena. “Kupwa nalombela, mwanda nadi ndyukile amba Yehova udi nami.”

10, 11. Nsongwakaji mwine Isalela wābwenye namani kukwasha mudyavita mwine Shidea ayuke Yehova, ne nandi wāalamukile namani?

¹⁰ Mwanda wa Leah ukuvuluja byāfikile nsongwakaji mwine Isalela wāselelwe bu musungi mu Shidea. Nemani mudyavita wa bene Shidea wādi wa makopo. Padi mukajandi ye wāshilwile mīsambo yāfikije uno mwanuke mwana-mukaji ku kwisambila pa lwitabijo lwandi. Kānena’mba: “I! shi mfumwami wadi ku meso a mupolofeto udi mu Samadia’wa! longa nankyo wamūndapa makopo andi.”​—2 Balopwe 5:1-3.

¹¹ Kuno kubulwa moyo kwa uno nsongwakaji kwāfikija Nemani ku kuyuka amba “kekudipo Leza nansha umo panopantanda ponso poso’nka mu Isalela.” Wātyipa’nka ne lukwembo amba “kakelapo kadi monka kyakwela kisōkwe, nansha kutapija kitapwa kudi baleza bangi, poso’nka kudi Yehova.” (2 Balopwe 5:15, 17) Bine, Yehova wāesele bukankamane bwa uno mwana  mwana-mukaji. Mo mwakokejeja, eyo, mo mwakeselela ne banwe bankasampe ba dyalelo bene. Leah wemwenine bino amba i byabine. Mwenda mafuku, bakwabo bamo ba ku masomo bamufwenene kebamulombola amba dibuku Les jeunes s’interrogent dyebakweshe mu mwikadilo wabo. Leah unena’mba: “Nasangele mwanda nayukile amba nakwasha bakwetu bayuke bivule padi Yehova, kadi bashinte ne būmi bwabo.”

12. I muswelo’ka okokeja kumona bukomo bwa kubingija lwitabijo lobe?

¹² Nobe ukokeja kwimwena myanda pamo na ya ba Jennifer ne Leah. Londa madingi a Petelo, wāsonekele amba abe mwine Kidishitu ufwaninwe kwikala nyeke na “kampeja bukidi ka kutentulwila bantu bonso bemwipangula monka mwikadile kukulupila ko mudi nako munda, napo ne kikōkeji ne moyo ponka.” (1 Petelo 3:15) Ubwanya kulonga kino namani? I na kwiula bene Kidishitu ba mu myaka katwa kabajinji bālombele Yehova amba ebakwashe basapule “kwa kubulwa moyo.” (Bilongwa 4:29) Kupwa ikala na bukankamane bwa kusapwila bakwenu nkulupilo yobe. Bine kukabulwepo kutulumuka bipa bikalupuka’ko. Ne kadi ukasangaja mutyima wa Yehova.

Mabande Video ne Madevwala a pa Bula

13. Bankasampe bamo bakwatakanyanga mikenga’ka ya kupāna bukamoni? (Tala tupango pa paje 14 ne 15.)

¹³ Bankasampe bavule bashintulwilanga bakwabo ba ku masomo nansha badimu lwitabijo lwabo na kwingidija mabande a video. Kyaba kimo bālamunanga madevwala obapebwanga ku masomo ke mikenga ya kutendela Yehova. Kifwa, bansongwalume babidi ba myaka 15, bonso Batumoni ba Yehova, bapelwe mu bifundwa byabo bya kalasa bya mānga ya ntanda, mwingilo wa kusoneka myanda itala mutōtelo umo wa mu mitōtelo ya pano pa ntanda. Bano bankasampe babidi belunga pamo, basoneka myanda ya Batumoni ba Yehova mungya munenena’po dibuku Les Témoins de Jéhovah—Prédicateurs du Royaume de Dieu. * Ne kadi badi banenwe kwisamba myanda yabo mu minite  itano. Kupwa, mwadimu ne bana ba masomo baipangula bipangujo bivule, byafikija bano bansongwalume ku kwisamba ku meso a kalasa mu minite mikwabo 20. Mayenga mavule alondele’po, bana ba masomo bakwabo badi bebepangula’nka kwibepangula bipangujo bitala Batumoni ba Yehova!

14, 15. (a) I kika kinenenwa amba kityino kya bantu i dikinga? (b) Mwanda waka ufwaninwe kwikala na kikulupiji posapwila bakwenu nkulupilo yobe?

¹⁴ Monka mulombwela myanda yotwapwa kunena, kusapwila bakwenu nkulupilo ne bikulupiji byobe amba wi Kamoni wa Yehova kuletanga madyese makatampe. Kokaleka moyo wa kutyina bantu ukubudije ano madyese ne nsangaji idi mu kukwasha bakwenu bayuke Yehova. Bible unena’mba: “Kityino kya bantu kileta dikinga: Ino yewa ukulupila mudi Yehova ukapanda.”​—Nkindi 29:25.

¹⁵ Vuluka amba abe nkasampe mwine Kidishitu udi na kintu kisakilwa nakampata bakwenu​—mwikadilo mulumbuluke wa mu būmi bwa mu ano mafuku ne mulao wa būmi bwa nyeke mu mafuku āya kumeso. (1 Temote 4:8) Kintu kisangaja i kino, mu États-Unis​—mokokeja kulanga amba mo mudi bantu bavule badi na bujundu, bepāne’nka mu bya ntanda​—bwipangudi bumo bulombola amba kisengele kipindi kituntulu pa bibidi kya bankasampe bakwete mutōtelo na kusumininwa, kadi kipindi kimo pa bisatu kinena amba lwitabijo mu myanda ya Leza “ludi na lupusa lukatampe mpata” mu būmi bwabo. Kino kidi muswelo umo onka ne mu matanda makwabo. Nanshi bibwanika ne bakwenu ba ku masomo nabo basangele kuteja myanda ya mu Bible yowisamba.

Fwena Kudi Yehova Pokidi Nkasampe

16. Kutentekela pa kwisambila pa myanda itala Yehova, kusangaja mutyima wa Yehova i ne kulonga bika bikwabo?

¹⁶ Bine, kusangaja mutyima wa Yehova kulomba bivule, ke kwisambilapo pa myanda imutala konkakonka. Ufwaninwe ne kukwatañanya mwiendelejo obe na misoñanya yandi. Mutumibwa Yoano wāsonekele amba: “Buno namino bo buswe bwa Leza, amba tulame mbila yandi; kadi mbila yandi ke ilēmapo.” (1 Yoano 5:3, NW) Ukamona amba ke ilēmapo shi wikale kufwena kudi Yehova. Le ukafwena kwadi namani?

17. I muswelo’ka okokeja kufwena kudi Yehova?

¹⁷ Witūdile’ko kitatyi kya kutanga Bible ne mabuku esambila pa Bible. Mu kwenda wifunda kuyuka Yehova, mo mu kupēlelwa kumukōkela ne kusapwila bakwenu myanda imutala. “Muntu muyampe, kadi ulupulanga kyonka kiyampe ku bibīkwa byabuleme biyampe bya ku wandi mutyima,” ye Yesu unena, “mwanda i ku bingi bya mutyima kyakanwa kyandi kinenenapo.” (Luka 6:45) Nanshi dinga bintu biyampe mu mutyima obe. Ubulwe’po kwitungila kitungo mu uno mwanda? Padi i kulumbulula mwiteakenyo obe wa kupwila kwa mu yenga wiya’ko. Kitungo kilonda’po padi kikekala kuleta malondololo mēpi ao’ko atamba ku mutyima. Bine, i kipite buya ne kwingidija byobya byowifunda.​—Fidipai 4:9.

18. Nansha shi bakulondalonda kyaba kimokimo, abe ukakulupila bika?

¹⁸ Byabuyabuya bitamba mu kwingidila Yehova i bya endaenda​—bine, i bya nyeke ne nyekeke. Eyo, kukabulwepo kyaba kimo kulondwalondwa nansha kufutululwa mwanda’po’tu wi Kamoni wa Yehova. Ino vuluka Mosesa. Bible unena amba “wadi ubambile meso konka ku kupalwa mpalo.” (Bahebelu 11:24-26) Nobe mo monka, kulupila’tu amba Yehova ukakupala mpalo pangala pa bukomo bolonga bwa kwifunda ne kwisamba myanda imutala. Bine, aye ‘kakavulaminwapo mingilo yobe ne buswe bobe bolombola pa dijina dyandi.’​—Bahebelu 6:10.

[Kunshi kwa dyani]

Lelo Ukivulukile?

• Mwanda waka ufwaninwe kukulupila amba Yehova ukwete mwingilo obe na mutyika?

• I miswelo’ka ya kusapula bukamoni ku masomo yamwene bamo amba yo yendeka biyampe?

• Ukokeja namani kumona bukomo bwa kusapula bukamoni ku bakwenu ba ku masomo?

• Ukokeja namani kufwena kudi Yehova?

[Bipangujo bya Kifundwa]

[Kapango/Kifwatulo pa paje 14]

Banuke Batyetye Nabo Batendelanga Yehova!

Ne banuke batyetye nabo basapulanga bukamoni ku masomo. Ivwana ino myanda mimweke.

Kalasa ka butano ka ba Amber, mwanuke wa myaka dikumi, kapelwe kutanga dibuku dya kutambwa kwa Bayuda na umbikalo wa Nazi pa Divita II dya Ntanda. Amber watyiba mbila ya kuselela mwadimu wabo bande wa video Les triangles violets. Penepa mwadimu watulumuka pa kuyuka amba Batumoni ba Yehova nabo bapangilwepangilwe mu umbikalo wa Nazi. Mwadimu walombola bande’wa ku kalasa konso katuntulu.

Alexa wa myaka mwanda watumīne kalasa kabo mukanda wa kushintulula mwanda waka wapele kudya nabo masobo a Noele. Mwadimu wandi watulumuka, wanena Alexa kutanga mukanda wandi ku meso a kalasa kabo ne mu tulasa tukwabo tubidi! “Nemufunde kulēmeka bakwetu badi na nkulupilo mishile na yami,” ye aye unena dya ku mvuyo ya mukanda, “ino nemufwija’ko nenu pa kulēmeka butyibi bwami bwa kuleka kudya nenu masobo a Noele.”

Kinondanonda’tu na kutwela mu ka kwanza, Eric waselele Dibuku Dyami dya Mānga ya mu Bible waenda nadyo ku masomo, walomba lupusa lwa kulombola’dyo balunda nandi ba mu kalasa. Mwadimu wandi amba: “Udi na mulangwe muyampe. Le kyokutangila nansha mānga imo ku meso a kalasa i kika?” Eric watanga’mo imo. Kupwa wanena bonso basaka nabo kwikala na dino dibuku bele minwe mūlu. Bantu dikumi ne mwanda​—ne mwadimu mwine kumo​—baela minwe mūlu! Eric pano uyukile amba udi na wandi mwaba wa pa bula wa kusapula’mo.

Whitney wa myaka kitema ufwijanga’ko mpata pangala pa boloshile Les Témoins de Jéhovah et l’instruction. * “Mama upanga nyeke badimu bami uno boloshile ku mwaka ne mwaka,” ye aye unena, “ino uno mwaka i ami mwine wapēne’ye. Pa mwanda wa uno boloshile, mwadimu wetu i mumpe luñanyañanya lwa bu ‘mwanā masomo upityile bakwabo mu yenga’wa.’”

[Kunshi kwa dyani]

[Kapango\Kifwatulo pa paje 15]

Byaba Bingidijanga Bamo Mwa Kwisambila pa Lwitabijo Lwabo

Bamo shi abapebwa lapolo nansha devwala ya kulonga, batoñanga mutwe wa mwanda wibapa muswelo wa kusapula bukamoni

Bankasampe bavule bapanga wabo mwadimu bande wa video nansha dibuku dikwatañene na mwanda wisambilwa’po mu kalasa

Bankasampe bakwabo batañanga Bible nansha dibuku disambila pa Bible pa kukōkolokwa balumbwanga na bakwabo bebepangulanga bipangujo

[Kifwatulo pa paje 12]

Batame badi na bwino babwanya kufundija bankasampe kwingidila Yehova